THE CHRISTMAS BLANKET (Chapter -4)

 THE CHRISTMAS BLANKET

Chapter - 4

River-a chuan chhuar atangin glass no pahnih a rawn lachhuak a. A hmelah chuan hlim hmel ka hmu a, mahse chu mi ti lang lo tur chuan a insum hle tih pawh ka hria. Chuvang chuan hun kal tawh thil eng emaw sawichhuah pui ka tum a. “Hman a pipu mawi tawh a min uai tir kha ila hria em…?” tiin za angreng deuh hian ka nui a.

“Ka uai tir che pawh a nia mi? I uai chak em a uai tir lo che pawh ni ila i uai tho ang” tiin min rawn hnial a. “Kha inhlui deuh pawn lama va intihhlim i duhna chhan ber pawh kha  nia, chuvang a nih kha kan vai a min hruaichhuah. Khami pipu a uai i chak em avang khan. Ni lawmni?” tih pahin eggnog chu a rawn thli a. “Pipu chah chhan kha chu ka thiam loh pawh a ni pawn ka hre lo” tih pahin a zu chu a in a.

“Ka khelah kar khat chhung vel hliam ka neih phah” tiin ka no chu ka dawm ve a. “Min la nuih nasa em em mai lehnghal a”

“A nuihzathlak em alawm”

“A nat mah nak laia”

“I thi chuang hleinem. Pipu chat tur i mangang lutuk phar kual vel leh tui a posi rem lo deuh a i tla lut bur kha chu nuihzathlak tak a ni” tih pah chuan za mangkheng hian a nui a. Kan inhmuh leh hnu a ala tawng tui ber a ni hial ang.

“I au dan zawng zawng te kha…” tih pahin a aia za zawkin a rawn nui chhuak leh a. “Zawhte hur rak i ang lutuk”

Kei pawh chu za takin ka nui ve a. Khami ni khan ka insawh sil viau nangin a hnu lamah dilah party kan nei a, kan hlim viau thung.

“Khami ni kha a ni tak e. Truth or dare kan khel a, Jenny i’n Tabatha-i kiss tur a dare che kha” ka ti a, ka thil in chu ka lu ah a rawn thawk chiai chiai a.

“A ni dawn tak maw !” tih pahin River-a chu a nui leh hak hak a. “I lawm loh viau tak kha maw..!”

“A teuh lo mai. A ti dawn tih kha ka hre lawk sa vek alawm. A chhan chu Tabatha-i khan high school kal lai atangin a star tawh che a. Kan pahnih inkarte chu a hre ve reng alawm” tiin ka lu ka thing a. “Chance tha an inpe ve a ni mai”

River-a chu a nui suk a, Rum chu a no ah a thli a, a lem leh sek a.

Kei pawh ka no a la bang chu ka in zo a, eng emaw ka hrechhuak thut. “Ti rawh game i khel ang?” ka ti a.

“Eng game maw?”

“Truth or dare”

A nui suk a. A no a tlak a, a dang lak belh turin choka lam a pan a. “Chutiang a nopang chhia emai” a ti a.

“Kum te chu number mai mai alawm. Lo kal teh. A nawm dawn zia mai chu. I chhan duh loh zawng leh i tih duh loh zawng ka zawh che chuan i duh leh vawikhat i ti lo thei ang” ka lo ti cheng chung a.

No a a dang rawn thlit belh leh pah chuan an thaw halh a.

“Mawhhhh…..?” naupang thil ngen ka ang mah mahin ka inhria.

Min rawn en a, a nui sak a, a bu nghat a. “Aw le aw le. Mahse chhan duh loh ka neih chuan tum hnih ka chhang lo thei ang. A chhan chu i phakar ziah” a tih chuan za deuh hian ka nui a.

Kan no ve ve kan thli khat a, meichhemna hma ah lukham chungah kan thu ve ve a. Moose-a pawh phur hmel deuh hian ka bulah a bawk ve a, a mei a then lauh lauh a.

Kan insiamrem ta maw tihah chuan “Truth or Dare?” ka ti a.

River-a chu a nui hak a. “I van han phur em em. Naupang an duh zawng tak tihpui ang mai alawm i nih le” min ti a.

“Chhang mai mai teh”

 

Nui hak chung chuan “Truth” a ti a.

“Alee… a har dawn teh mai ania aw” kan ti kual ve a. Zawhna tur ngaihtuahin inchung lam ka melh vang vang a. “E.., ka hria” tih pahin a awm zawnah ka kawk a. “Nikhat chu kan bedroom ah ka rawn lut a. Ruak vekin i lo awm a, i thaw halh halh bawka. ‘Ka workout zo ka inbual zo chiah a’ i ti a. I inbual tak tak nge i inhrawt?”

A rawn meng zau kawk a, a nui vak bawk a. “I van hre rei em em”

“Zawhna chu chhang rawh le ka pu”

“Ka ti ve ve”

Ka ring ka fan a. “I ti ve ve maw?”

“Ka work out zawh veleh ka inbual a. Mahse chumi pahnih inkarah chuan eng emaw chu ka ti ngei alawm”

“Ka ring reng a ni” tih pahin ka nui hak hak a. “A chhan chu ka raw luh khan i phu nasa em a. Min sawm ve lo chu a fair lo hlemai” kan ti zeuh a.

River-a chu a nui hak a. “Tunah i hun ve. Truth or dare?”

“Truth”

Min rawn en a, a no dawm lai chu an lem leh sak a. “Aw le….mupa engzat nge i mutpui tawh?”

Chu zawhna ka han hria chu ka ka hau a, ka awm danah chuan eng emaw tal a rawn sawi ka ring a, mahse ngawi rengin ka chhanna nghakin min en reng a.

Ka chil ka lem khawlh a. “Pakhat” ka ti a.

River-a hmel chu a danglam eih lo. Ni e, ani tih loh chu tumah ka la mutpui tlat lo. Thil awihawm loh tak tur pawh a ni ngei ang. Mahse zin kual reng rengin ka hun ka hmanga, mipa han lem kual vel nachang pawh ka ngaihtuah hman lo.

Ka hrawk ka thian kharh a. “Truth or dare?”

“Dare” tiin min chhang vat a. “Ka zawhna che ang tho kha i ngaihtuah ve tho ang ti ka ring. Kei pawh pakhat chauh tiin ka chhang nghal mai ang che” a ti a.

Ka thinphu a in rawn dup dup a, a sawi ang chiah chuan ka zawt hman lo nangin ka zawh chak ve ber thil a ni. Mahse khang kum chhung zawng zawngah khan tu hmeichhia mah a kawp lo a maw? Chu chu engtia awm thei nge ni ngai?

Ka no dawm lai chu tlem ka in a, ka ngaihtuahna a chawl dup a, han tih tir tur vak pawh ka hre tawh lo. Mahse game chu a kal ngaiin a la kal zel a.

Zu no khat tlak turin ka ti a, ani’n Moose-a toy pakhat liak turin min ti a. Zun ram a thiar tawhna hmun thing ber ka zawt a, ani’n kum 19 ka nih laia banbun manto tak ka neih phak hauh loh ka neih dan dik tak min vawt leh a.

Game a kal zel a, kan rui tial tial a, nuih lah kan nui tam telh telh a, kan infiam nasa telh telh bawk. Chhun lam boruak rit tak khan min kalsan tawh a, tun a kan awm dan chu kan tleirawl lai ang mai kha a ni.

“I tet lai video pakhat; i pa in a min entir kha i la hria em? Puan lian puiin i intuam a, i vir kual a. Pa, lalnu ka nih hi, lalnu ka nih hi i tih vak vak kha” ka ti a

“Mipa te chu lalnu an ni ve ngai hleinem bawiha. Mipa chu lalpa an ni thin” a pa aw ki ang deuh chiahin River-a chuan a rawn sawi a.

“Mahse…mipa pawh Queen an ni ve thei tho alawm. Queen nih ve ka duh!” River a’n a tet laia a sawi ang chiah chuan ka lo chhang let a, kan nui dun vak vak a.

“Chu chu ka dare na che ni rawh se” tiin tifuh inti zetin ka kawk a. “I tih dan ang chiah chiah khan i tih nawn leh angai”

Ka tho a, christmas blanket chu lain a lamah ka vawm phei a. Lo dawn chat pahin a nui vur vur a.

“Ti vat vat rawh” tih pahin ka thuthmun ka rem tha sauh sauh a, kei a lo thlirtu ka ni a, ani a changtu. Meichhemna bul awl zau lai chu stage. 

River-a chu hreh hmel zet hian an thaw deuh ham ham a, a tih ngei a ngai si. A rawn dingchhuak a, blanket chu a darah a bat a, a tet lai a a tih ang chiah chiah chuan Queen a nih thu chu sawiin an kal kual vel a.

Dul na ur in ka nui a, chhuatah chuan ka let tawp tawp a ni ber mai. River-a chuan a thil tih lai chu a chawl a. Blanket bat chung chuang kan hma zawnah a ding a, min en reng a. A hnung a mei alh a vang chuan a thla chauh a lang thei a. Mei alh chuan incheina chi hrang hrang chu a en tle sep sep a, bati eng chuan a hmel chiang lo zet hian a lan tir a. A hmelah chuan thil tam tak ka hmu a ni. Blanket hnuai atang chuan a ban a rawn phar chhuak a, blanket chhung chu puk ang maiin a kaw huah a. “He tah lo kal teh” min rawn ti a.

A ngaihna ka hriat loh em avangin chet pawh ka che lawk lo. River-a chu a nui sak a, buk nghat pahin “Lo kal teh le Eliza” min ti leh a.

Ka hming a lam zawng chuan ka thin a phu dup dup a, ka thutna atanga thoin a dinna lam chu ka pan a. A bul lawka ka din takah chuan a hma aiin a rawn nui zau zawk a, ka darah rawn vuanin a lamah min pawm bet a.

Christmas blanket chuan kan pahnihin min tuam lum dun leh ta. Engtia awm tur nge ka hre lo. Ka awmdan chu River-a chuan a hrethiam a ni ngei ang. Ka kut chuan a darah min kuah tir a, muangchangin min insawi pui del del a.

Radio atang chuan hla muang chi a in play mek a, chutiang a in play a ni tih reng reng pawh ka lo hre lo. Inkuah chungin ngawi rengin kan insawi a, thawm awmchhun chu ‘I’ll be home for christmas’ tih hla, mawi leh nalh em em a Bing Crosby sak chu a ni.

Mei alh puak ri tek tek hmaah chuan muangchangin kan insawi dun a, a awmah ka lu ka nghat a, chung lam atangin min rawn en reng a ni tih pawh ka hria.

“Truth or dare ?” a rawn ti thawp sat a.

“Truth” ka ti sep a.

“Min hua em?”

A awmah ka bei a, a pangti lum ther ther chuan ka taksa pum a fan a. Ka awmdan mek chu engtiang chiah a nuam nge a nih tih chu kum tam tak chhung ka lo theihnghilh tawh. A khabe hnuai chiah chiahah ka lu a awm a ni tih te chu ka lo hre reng tawh lova, a kawr hak lai rim zawng zawng te. A lungphu ri dep dep te nen chuan…..engkim mai chu ka tana thil thar ni lo mahse hun rei tak chhung a hlut zia ka lo theihnghilh tawhte vek an ni.

“Aih” tih pahin a lamah ka hawi chho a. “Mahse a chang chuan hua che ila ka inti thin”

A khabe kual chu a ti che ralh a, mahse min la kuah reng a, min la insawi pui reng bawk.

A kut lum ther ther chuan ka hnungzangah a chul thla a, a lamah min pawt hnai sauh a. Ka hmui a rawn melh a, chutih lai taka a lungphu awm dan chu kumkhuain ka theihnghilh tawh lovang. 

“Truth or dare?” ka ti veleh a, ka aw chu a ri chhuak tawk tawk a.

“Truth”

“Ka chhuahsan hnu che khan min lo ngai thin em?”

Buk nghauh nghauh pahin min pawm nghet sauh a. “Nitinin Eliza” a ti thawp sat a. “I kal hnu atanga darkar tin, minute tin leh second tinin”

Ka hnuk a ulh tuau a, mahse ka tilang ngam si lo. Blanket chu chhuatah a tla ta. River-a chuan a lamah min pawt hnai leh sauh a, rawn kun hniamin ka hmuiah min rawn fawp a. Ka mittui a rawn luang a, ka rum ham ham a. Ka taksa leh ka thluak zawng zawng chu a buai nghal vek a, engtia awm tur nge ka hre lo.

Nghet takin min pawm a, kan hmui ve ve chu nghet takin a insi chat bawk a. Chu infawhna chu vawi tam tak kan lo tih dun tawh thin a ni a, mahse tun ang tak a infawh hi chu ka la experience ngai lo. Hei hi a ni ka pasal chu tiin ka thinlung a au chhuak a, hei hi a ni ka nuna ka thlakhlelh ber chu.

Min fawp mektu chu ka tana mi hrang hlak a ni tiin ka thluak a insual buai mek bawk a. Ka kal phaltu kha a ni tlat. Chu ngaihtuahna chuan electric ang maiin min rawn man zawk a, a awmah dawmin ka nam sawn a.

River-a chu ka hnuchhawn nghal a, ka kut pahnihin ka hmui ka dawm a. Ka lu ka thing a, ka mittui a rawn luang a, ka lungchhiatna chu ka zu in chuan a rawn belhchhah leh zual a.

“Enga tinge?” ka aw chu a zawi kher mai. A zawi lutuk a hre pha kher lo maithei a ni. Muangchangin a lam hawi chuan ka inher riai riai a, ka mittui avang chuan ka mit a vai vek a. “Engvangin nge khatiang khan min tih? Khatiang khan enga tinge min kuah..? Khatiang khan enga tinge min fawh….?” ka inhnit hlawp hlawp a. “Ka kal kha i phal alawm tiraw…? Tun ang hian i hmaah ka ding a, eng nge i duh, eng nge i chak ka zawt che a. Ka ruala lo kal ve mai tur pawhin ka ti che a, mahse i duh lo” ka lu ka thing a, tun hma a ka rilru natna chuan min rawn tuam chhuak leh a. “Enga tinge River?...Enga tinge?”

“Eliza…”

“A chhan chu sawi mai rawh”

A chil a lem khawlh a. Mei alh lam chu a en reng a, a hrawkbawk chet ralh ralh danah a lung a chhe ve hle tih a hriat theih a. A mittui a rawn far fap a, hruk zauh pahin ka lam a rawn hawi a.

“A chhan chu ka pa a thi mek tih ka hriat vang a ni” zawi deuh, vawt raih hian a ti a. 

Ka hmui a khur der der a “Maw..? Enga tinge chungte chu min hrilh ve loh?”

“Hrilh che kha ka tum reng alawm. Ni e Eliza, nang chu ka thiantha ber i ni tel a. Khami ni khan hrilh tur chein ka rawn hawng a, mahse kan chaw ei dawhkanah i lo thu a, i ruahmanna zawng zawng ziakin i lo chap pharh duah a”

A lu a thing a, chutah chiah chuan thil ka hrechhuak nghal uar uar mai. Chu mi zan chu a ni in atanga chhuah ka duh thu ka sawi zan kha. Ka duh dan tak phei chuan kan pahnih a in chhuah san ka duh.

Khami ni; nileng khan travel megazine atang thil tam tak ka chep thla a, bangah ka tar a. Engtia kal tur nge tihte, kan va kalna hmunah chuan engtin nge pawisa kan va hlawhchhuah theih ang tih zawng zawngte ka zawng kual a. Ruahmanna ka nei a, chu chu tihpuitlin ngei ka tum. Khawvel zau zawk kan hmuh nan leh nun nuam zawk kan neih theihna turin.

“In ah ka rawn haw a, i thil buaipui zawng zawng ka rawn hmu a. I thusawi ka ngaithla a, chhuah vat vat i duh thu te, chu khaw tereuhte a awm nuam lo i tih a hrehawm i tih tawh zia te…” a thusawi chu a tawp vang vang. “Eliza, ka hrilh theilo che a ni”

 

“Kei te chu engtin pawhin lo awm ila sawi tho tur che alawm” tiin ka lo hnial vat a. “A tul a nihte chuan ka la awm ve rih mahna. Ka awm ngei zawk ang”

“Chu tak chu alawm ka buaina !” tiin River-a chu ka lamah a rawn phar chhuak a. “I hmu thiam lo em ni? Ka pa a thi mek a, chutih laia nang ka chelh tlat che chuan nang pawh nin lutukna avangin i thi mai ang. He khua hi i ning ngawih ngawih a, ka chelh tlat che chuan i nun tichhetu ka ni thei asin…,i thlarau, i suangtuahna leh i nun nuam tihna thlengin. I duh berna hmuna i awm ka duh a,...i duh ber bula i awm nen”

Ka lu ka lo thing mawlh mawlh a, ka mittui a far zung zung bawk a. “Min hrilh tur kha i ni asin. Duh thlantur tal min pe ve ta che…,a tul a nih chuan min hnial ve mai tur alawm” tap pur chungin ka ti a. “Ka kal kha i phal alawm”

“Chuvang chuan ka inchhir reng alawm” aw dam diai a ti chungin min rawn din hnaiha. “Ka hloh tak ni atang che khan minute tin hian ka inchhir asin. Mahse ka hmangaihna che erawh ala ngai reng Eliza. Ka hmangaih em che avangin ka kal tir ta che a ni” tiin ka hmaiah min rawn dawm a, ka hmuiah min rawn fawp a.

Min fawhna a hmui lum ther ther chu thlahlel takin ka lo dawh a, engkim mai chu thil thar ang mai niin ka hria a, dim taka ka sam a chul del del laite chuan duhthaw takin ka fawp let ve a.

Chu hun nuam tak mai chuan kan in ka ngaihna a ti bo a, mahni in a thlamuang taka awm ang chiah chiah ka ni. 

Inchhung chu a eng che che a, kan bati chhit pawh chuan ral lam an pan hret hret a. Khum ah min pawm phei a, hmanhmawh lo takin ka kawrlum min phelh sak a, a kut lum ther therin a ka kawrhnuai a hlih laite chuan phur takin ka lo zi tual tual a. Ani pawhin phur takin a thawmhnaw a hlip a, saruak ngal ngatin kan awm ta.

Chu urlawk zan vur sur hnuaiah chuan kum tam tak a nawm zia ka tem tawh loh hmangaihna atanga chhuak, mipahnih inkara hlimna leh nawmna chu ka tem thar leh a. Ka ngaihzia leh ka lo mamawh tawh zia hrechung rengin chu hmangaihna par chu kan chen dun a. Theih nise chu chu zan chu tawp lo se ka duh a, theih nise khua hi var tawh lo mahse pawi tihna ka nei lo hial ang.

Zing nichhuak chuan tukverh atangin cabin chhung chu a rawn chhun eng riai a, pawn lama vur var vo mai chu ni chuan a chhun tle ser ser a. Nizung chuan min rawn kai harh a, thlasik mah nise min kuahtu chu a lum nuam em a, vawt reng ka hre lo. Ruak ve ve in kan la awm a, a ban pakhatin min kuah a, a ke pakhatin min khan bawk a. Tih harh hlau takin ka tho a, bathroom lam ka pan a.

Zan hmasa lama kan in nasat deuh avangin ka lu a na luk a, ka luak a chhuak deuh bur bawk a. Ka inphih harh a, ka ha ka nawt a, ka inkhuih that zawh hnu chuan bathroom atang ka chhuak a, khum a thu chungin River-a chuan min lo en reng a, nuisang chungin “Christmas chibai” min rawn ti a.

Kei lah pentawng lu na bur nen “Min han en teh, Isua pianchamah ka pentawng chu a niah!” ka tih chuan River-a chu a nui hak hak a. A khum bul dawhkana a lo chhawp sa damdawi mum leh serthlum tui chu min pe a, min ei tir a. “Kha kha pentawng damdawi tha ber a nih kha” a ti a.

Zan lama kan sulhnu chu a ngai ngaiin a la awm a. Dawhkanah chuan kan no ruak leh a bang a la awm nual a, meichhemna hmaah kan christmas blanket kha chhuatah a inzam nuaih bawka. Bati te chu an kang ral nge River a’n a chhemhlum tih pawh ka hre tawh lo.

Radio ah chuan Christmas hla a la in play reng a, tukverh lam ka hawi chhuak a, vur sur a reh tawh tih ka va hmu a. Chhum a la zing a, mahse chhum karah chuan nizung hi mawi zetin a rawn inkap chhuaka.

River-a lam ka va hawi a, ani chuan mit tla lek lo hian min lo en reng a.

“Chuan….” tih pahin min nuih sang a.

“Chuan….?” a ngaihna hrelo zetin ka lo ti let a.

“Kan sawi chian a ngaiin ka hria” a ti ringawt a.

“Eng chu maw..?” ka ti hu a.

Tawitein a nui hak a. “Umm…nizan thil kha i hria ang a” tih pahin a dar a chhin ak a. “Engtin nge kan awm zui zel dawn tih hi kan sawi angaiin ka hria”

Chu thu chuan min ti harh zawk a, ka thu ngil zawt a. Rizai chu ka awm thlengin ka pawt chho a, zamna chuan ka thisen zunzam zawng zawng a rawn fan chhuaka.

River-a pawh a rawn thu ngil ve a, ngun taka min en chungin “Eliza…” a rawn ti sapa. 

“Umm…” ka aw chu a tial ruai a. “Nia, a hlimawmin a nuam khawp mai” kan ngawi deuh dat a. “Sawi zui vak tur a awm em ni? Kha zawng kha a ni mai alawm”

River-a chu a ngawi vang vanga, tukverh lam a thlir a. A dik a dik chuan ka sawi loh tawp tur ka sawi tih ka hria. Mahse ka sawi tawh miau avangin laklet leh theih a ni tawh si lo.

Khum atangin a tho a, a thawmhnaw a ha tha mawlh mawlh a “I vannei hleimai. Christmas ni takah vur sur pawh a bang ta e. I kalna tur lam pawh i pan thei thuai ang” tih pahin kal mai a tum a.

“Lawkin” ka lo ti vat a. Ka mit ka chhing a “Ka sawi tum tak chu….englo…,ihhh….” ka sawi tum a piang mai chu ka sawichhuak thei lo. Ka awmdan chu ka hriat pawlh nuaih a, sawi dan ber tur pawh ka hre lo.

“Nia ka kal a hunin ka hria” ka ti ringawt a. “Ka lo zin chhan ber chu christmas a ka chhungte surprise a nia. Mahse tum loh deuhin ka-”

“Kei Wellhaven-ah ka lo la awm si a” tiin min rawn tawng khalh a. “I tana chenna tlak loh hmun nuamlo takah hian” a ti bul hmuk a.

“Min lo tawng khalh zel lo la, ka sawi duh min sawi tir ta che” ka ti a.

“Ka ngaihthlak chak tur eng nge sawi tur i neih Eliza? Keimah avanga rawn kir leh i nih loh a hnu” a awm a insep dawrh dawrh a, a mitah zawhna tam tak a awm a.

Ka chil ka lem khalh a, a lama kal phei ka tum a, mahse a tawlh hnung thuai a. Engmah sawi ve na hun pawh ka nei lo. Kawngkhar lam a pan a, a coat lian zet mai chu a ha a.

“Chuti khawp a i rilru an nat viau le!” ka ti chhuak tuar a. “Kan rui ve ve a, thil a thleng a ni mai love’m ni? Chuan… chuan..ka” sawi tur ka hre tawh lo. A chhan chu nizan thil thleng kha sawichhuah dan ka thiam lo a ni.

Kan rui chiang alawm.

Mahse kan thil tih kha kan ruih vang ringawt ti kan ni em ni?

Koh let leh theih ni se ka harhfim hnu hian ka ko let leh duh angem?

Chu zawhna chhanna chu chiang takin ka hria. Mahse ka  hlauhthawnna leh ka thinrimna chhan tam tak avang chuan tlang takin ka sawichhuak theilo.

“A pawilo e Eliza” River-a aw chu a dam dap a. Lukhum a khum a, kutkawr a bun a, eng emaw sawi tum hian a ang leh zuau a, mahse engmah sawi lovin suahdur a pu a, pawn lamah a chhuaka. Pawn a vur tam lutuk chu a thian dawn tih ka hria. A chhuak chiah erawh a hma aiin khua chu a vawt ta zawk ni mai hian ka hria a.

Khum sir a bawk Moose-a chik ngher nghe chu a lu ah zuk chulin “Engkim a tha leh vek dawn alawm” ka ti a. Ka tho a, coffee ka lum a, coffee no dawm pahin pawn a River a’n vur a thian lai chu ka thlir reng a.

Kum tam tak hnuah kan intawng leh a ni a, enga tinge amah zawk pawh chuan kal bo tawh lo tura min ngen mai loh, engah nge chungte chu a sawi hmasak ve mai loh? Engvang nge tih chu ka hria. Min hmangaih vanga ka kal min phalsak kha ka lawm a, ama hlimna aia ka hlimna tur a duh zawk avanga ka laka thudik a thup pawh kha ka lawm.

Mahse eng nge a chan ve tih ka ngaihtuahin ka lawm lo a ni. Nun thar min neih tir a, chu chuan ka nun tam tak a nghawng danglam tawh. Tunah lem eng nge a beisei leh si?

Wellhaven ah hian reilote cham tur chauhin ka kal a, ka chhungte hmu tur chauhin. Ka pasal hlui nena cabin khata tan dun hi ka tum sa a ni lo a, mutdun pawh kha ka tum lawk a ni lo. Amah zawkin engkim a tibuai vek a nih hi.

River-a a rawn lut a. “I car pawh ka nawr chhuak tawh a, vur thiantu motor in kawr a thian mek a, tun atanga reiloteah i inkhalh chhuak thei tawh ang” tih pahin min rawn en zauh a, choka lamah kalin whiskey a inthlit a.

Kal ka duh lo

Mahse ka cham thei tawh lo

Nizan thil thleng kha thil thleng palh mai mai a ni

Nizan thil thleng khan awmze thuk tak a nei a ni

Engtia awm tur nge ka hrelo

Khawngaihin engtia awm tur nge min hrilh teh u

“River…..” ka ti sap a, mahse engmah sawi zawm tur ka hre chuang lo. Ka ngawi reng a.

“Insiam rawh” min ti a. “I kawrchung va ha la, keiin i bag ka lo khai ang”

Ngawi rengin kan in pack fel mawlh mawlh a, nizana kan thawmhnaw phelh darh ka khung mawlh mawlh laite chuan ka in haw tun a. Moose-a ka hmuh phei chuan ka thinrim a zual. Min hnim thet thet a, ka kalsan dawn tih a hria. Ka kalsa chuan ka let leh tawh dawn lo tih pawh a hriat ka ring.

“Ka ngai dawn hlemai che Moose” tiin a bulah ka thuhniam a, a chal leh ka chal ka insik tira. A chal a ka fawh lai chuan ka hmaiah min rawn liak hlup hlup a, ka mittui tla tur chu ka dang hram hram a. “Fel takin lo awm ang che” ka ti a.

Ngawi rengin ka rental car awmna lam kan pan a, River a’n ka suitcase a khai bawk a. Car awmna kan thleng a, ka bungrua chu a chhungah min dah luh sak a.

“Ka lawm lutuk e” ka ti a. “Harsatna ka tawh lai takin min mikhual a, ka-” ka nui a,  boruak tih zan deuh hlek ka duh. “Hautak min tih lutuk loh ka beisei”

River-a chuan a lu a thing a, lei lam a en a. Zawitein “Ka rawn zui ang che. Tluang takin i thleng ngei a ni tih ka hriat nan”

“A ngai hleinem. Phone te chu han nei la ka thlen ve leh ka thlen tluan thu ka text mai tur che hi a nia” tiin fiamthu han thawh leh hram ka tum a.

Nuih luih an tum ve ngei nangin a nuih a za lo tih hairual a ni lo. “A nih le.., a tha e. Fimkhur deuhin i khalh dawn nia Eliza” a ti a, engmah ka sawi veleh hmain a inher a, a in awmna lam a pana.

A kal chhat chhat lai chu ka thlir reng a, a vawihnihna atan kan in kalsa leh dawn chu a ni si a. Ka thinlung chu vih ang maiin a na a, ka mittui a rawn tla a. Hetiang hi a thleng nawn leh ang tih ka ngaihtuah ngai lo. Ka inngaihtuah lungpuam tam hmain ka car chhungah chuan ka lut vat a, a engine ka ti nung a, ka kalna tur lam panin ka inkhalh chhuak nghal a.