The Bride (Season -1)

 

THE BRIDE (Season -1)

Letlingtu: Noah Hringngen

“Ka hmangaih lo che a, chu chu engtikah mah a thleng ngai bawk hek loving. A chhan chu hmangaih dang ka nei a tinni” Ian-a awki chu a sang vah a, a ngaithlatu tan lek phei chuan a aw fiah lutuk chu a hrilhhai thlak zawk viau ta ve ang.

.

“Tu nge chu nu chu?” tawng nat hlau tak leh mahni inthunun ru tak chungin Alison-i chuan a han ti sap a. A hma a ding mek, khawvela a mipa hmangaih ber kum hlun tur lakah chuan na takin a tawng ve thei lo pawh a ni ngei ang le.

.

“Ashley, a pawi ka ti khawp mai. Tu dang ni lovin i laizawnnu hi ka hmangaih chu a ni” Ian-a chuan a ti zawi raih a, chu thu a sawi lai kher kher chuan a mitah pawh a en ngam lo.

.

“A pawi hleinem. I neih theih nan theih tawp ka chhuahpui dawn che nia” a ngawih vang vang hnu chuan Alison-I chuan a rawn ti a. A ngawih chhung kha rei lote mah nise darkar tam tak ang a ni.

.

“A hmeichhe hmangaih ber chu a tanga a kuah theih hun thlengin ka pui ang. Ka hmangaih berin a duh ber a neih theihna tur a nih phawt chuan atan ka inhlan pumhlum thak mai a ni ang chu” tiin a ngaihtuah a.

Chapter -1

“Ka naute hi a lo hmeltha ber mai” mittui tling pam chungin ka nu chu ka beng zawnah a rawn phun a.

Tawite in ka nui seih a, ka hma zawna darthlalang hlai takah chuan ka in en a. Ka mo kawr var hak chu ka inhmeh hle a, khawi lai mai pawh chuan ka taksa mawina lai zawng zawng a pho chhuak vek emaw tih mai tur a ni. Ka ke lamah tui luang thla ang maiin a fual thla a, puk lovin ka ke chu a rawn phuar mah mah zawk a. Ka lu khim var leh ka sam a ka tawn pangpar chu a inchawih hle a. Mascara leh eng eng emawni ka mit a an hnawih vang chu a niang, ka mitte chu a lian ta riauin ka hria. Ka biang tlemin kan hnawih tai a, lipstick sen duk raih mai ka inhnawih bawk a. Engkim mai chuan min ti lang mawi em em vek a.

Kawngka pui pahnih chu a rawn inhawng a, hlim hmel pu sang chunga ka pa rawn lut mek chu ka lo en a. A suit dum hak chu a inhmehin avan lang hmeltha tehreng em.

“A hun a lo thleng ta e lalfanu” nui var var chungin a rawn ti a. Ka chhungte hlim taka an awm hiam nuam ka ti. Hei hi ka nih dan a ni reng a ni, midangte hlim taka siam tir hi. Mahse tunah chuan anni chauh an hlim lova, kei deuh hi a ni hlim chu.

Ka dinhmun angah hi chuan tu fa hi nge maw hlim lo bik reng ang ni. An mipa hmangaih ber, high school kal lai atanga an hmangaih tawhte nen innei ve dawn ngat ni se tu pawh an hlim ang chu.

Ka pa chuan lungchhiat hmel angreng tak hian min rawn kuah a. “Ka lal fanu hi tunah chuan lalnu tak tak a ni ve dawn ta. Engtik lai khanin nge i lo puitlin tak thut a?” aw zawi angreng tak hian a rawn ti a.

“Ka pa, i ti tap dawn alawm. A tap a nih vaih chuan a mit hnawih kha a pherh nghal vek a ni mai” ka laizawnnu, han ti ila ka na fabik Ashley chuan a rawn ti a.

“Chu chiah mai pa. Chutiang a pawimawh rih lo. I lalfanu hi a mit hnawih a pherhna zawngin a pawi viau ang” tih pahin a mittui chu ka tuai hul saka. Nui hak hak chungin a bu nghauh nghauh a.

Ashley chuan ka khim tur mawi zet mai chu ka lu ah min rawn khum tir a, ka kawr hak lai pawh chu a siam that ngai lai lai min rawn siam that sak nghal a. Ka pheikhawk bun tur sang tha tak mai chu huphurh hmel zetin ka thlir a. “Khati vak khan en mah ta che mawle. A seh dawn hleinem che. Bun mai mai teh” ka tet lai atang a ka best friend Emily chuan min rawn ti a.

“Ui ka bun chak lo ve...” tiin ka phun nang nang a. Naupang kum 3 mi, a lawm loh zawng tak thil lei sak ang vel ka ni.

“Bun mai mai teh a” Ashley-i chuan a lo ti hlur tawh a. Ka tan chuan chutiang ang bun chu inhremna lian tak a ni ringawt.

“Awi a nalh lutuk” tiin ka nu lah chuan a kut a lo beng vel vak vak a.

Tunah chuan a hun a thleng ta. Ka pa chuan a kut a rawn la chhuak a. Ka ti thei tur a ni.

Keimah leh keimah ka inti huaisen lui a, ka pa banah chuan vuanin pawn lamah kan inzui chhuaka. Inneihna hmun turah chuan ka pa chuan min kai lut a, music a lo ri riai riai bawka. Ka zam lutuk chu boruak ka hip lut kawk kawk a. Favang a ni a, tlai ni tla tur chuan rangkachak rawngin a rawn kap tle siau a, chu lai vela thingkungah te chuan ribbon leh jasmine par an thiat vul chuk bawk a. Chair var inhungah chuan sawm bikte chu an lo thu far a, chutia kan lut chiah chu min lo lawm nan an lo tho chhuak nghal sang sang a. Ka kalna tur kawngah chuan pangpar an lo theh darh chiai bawka.

Tunah chuan ka pasal tur pawh chu ka va hmu ta. 6’1ft a sang a ni a, a mitmeng inringtawk vah mai chuan a ti lang hmeltha zuala. Suit dum a ha a, a hnuaiah kamis var, necktie dum leh pheikhawk dum a bun bawka. A sam nalh tak mai chu awmze nei takin a ti phir a, ka pa chuan a bulah min va din tira.

Min han hmu chu a lo meng zau kawk a, mahse pangai takin a awm lehnghal vata. Ka pa chuan ka kut chu a hnenah a hlan chhawnga, “Ka fanu hi tha takin lo enkawl ang che” tih pahin a bu nghat a.

Pastor a rawn ding chhuaka. “Vawiin tlaiah hian nupa tuak thar duhawm tak ni mai turte inneihna thianghlim hmanpui turin kan lo kalkhawm a” a han ti a. Pastor lam chu ka hawi a, ka bula ding ka pasal ni mai tur lam chu ka hawi leh a.

Eng ang hmel hlim nge a put tih hriat tumin ka en a, mahse a hmelah chuan engmah chutiang ka hmu lo. Hlimna emaw, hmangaihna pawh. Engmah hmuh tur a awm lo. Chu chuan min ti lawm lo hle mai. Ka lam a rawn hawi a, ka lung nih lohna chu thupin ka lo nui nghal vata.

Thutiam kan chham zawh hnuah zungbun kan inbun tir a. “Tunah i nupui chu fawp tawh rawh le” Pastor chuan a han ti a.

Ka pasal chuan ka lukhuhna chu hlip kiangin ka hmuiah min rawn fawp a. Ka hrehawm tihna thup mai hi chu harsa ka ti hran lo.

Mitin mai chuan lawmpuina min hlan a, cake te zaiin kan inbarh a. Chumi tlai chu boruak a nuamin a mawi khawp mai. Lam dun a lo huna, ka kawngah vuanin min insawi pui a. Mahse kan insi lo. Kan pahnih karah chuan puitling pakhat an inzeh len theih hial ka ring.

Chumi tlaia ka pasal awm dan chu kawikhat mah ka hai lo. A nui lo va, ka lakah thu kam khatmah a chhak chhuak lo va, mi pawh a en hek lo.

Kan chuanna tur car Mercedes dum a rawn thleng a, a chhungah kan lut a. Ani a kilah a thu a, kei a kil leh lamah.

Alison Every Cullen-i ka ni hi ka hlim a, Ian Blake Cullen-a nupui ka nih avangin. Mahse ani erawh a pasal ka ni hi a hlimpui ve angem?

*** *** *** *** ***

Malna.

Ruakna

Khawharna

Chung thil pathumte chu pasal ka neih atanga thla 3 hnua ka awm dan a ni. Inneihna chu a thianghlim a, mi inhmangaihte pahnihin damchhung atana hlim taka awm dun tura an intiamna leh an inzawmna a ni. Mahse in khata cheng dun reng chungin i pasal hmel hmu ngai lo ta la?

Chutiang inneihna chu eng nge ni ta ang?

In khata cheng dun reng chungin Ian-a hmel chu thla khat chuang ka hmu tawh lo. Kan chenna in chu chhawng thum a ni a. A zauin bedroom ringawt pawh paruk a awm bakah kan nupa room pakhat a awm bawka, pawnah swimming pool a awm a, inchhungah pawh pakhat a awm. Personal theatre, game khelhna room, music room leh gym a awm vek bawk.

Chu in lian takah chuan mi pali chauh kan cheng a. Keimah, Ian-a, Marie; intifaitu, pitar sam tuak tawh a ni a, Cullens chhungkaw tan hian kum 30 chuang a lo thawk tawh a ni. A tette atanga Ian-a awm seiliantu a ni bawk. Chubakah Marie tunu Lily a awm leh bawka. A nu leh pa car accident a an thih avangin a pi hian a enkawl ta a ni.

Ani chu ka thian neih chhun, ka khawhar changa ka belh ber a ni. In lian zet a awma tih tur engmah neih loh chu tam tak chu nise an thih phah thei hial ang.

A tirah chuan nuam i ti viau anga, mahse a rei hnuah erawh khawharna leh ruaknain a rawn luah khat thuai ang che. Ka pasal ang hi i nei ve lo a nih chuan thu hran. Ian-a chu ka muthilh hnuah a rawn haw a, ka thawh hmain a chhuak bo leh thin.

Thla 3 kal ta a thil thleng, ka nun ti buai vek tu chu ka hrilh ang che.

*FLASHBACK*

Zing dar li ah Paris kan thleng a. Kan thlenna hotel tura kan luh fel hnuah rei zet mai ka inbual a, chumi zawhah inthlakin pyjama leh tawnzau var ka ha a.

A tawp a tawpah chuan ka hmangaih ber tanga ka beih theih hun tur a lo thleng ta. Ian-a hi high school kan kal lai atang daih tawhin ka ngaizawng tawha, a duhawmna leh a hmelthatna zawng zawng chuan ka engkim hi a hip bet vek a ni mai. Mahse hmun dangah a insawn ta daih a. Nitin leh zan tin mai hian a mitmeng mawi tak mai chu ka mitthlaah a awm reng thin a, a nui hmel mawi takte.

Mahse kum 6 chhung zet a rawn inlan tak lovah chuan ka bei a dawng ta hlemai. Mahse ka pa puan siamna company lian tak ‘The Browns’ chuan company lar tak ‘Cullen Inc.’ Nen inremna an siam dun ta hlauh maia. Ka pa hi Millionaire a ni a, The Cullens ho erawh billionaires an ni thung. Khawvel hmun hrang hrangah an inzam pharh a, chumai bakah company dang, lawng lian te, puan lamte leh lehkhabu lam thlengin thawhpui an nei bawk a. Cullens ho chuan khawvel hmun hrang hrangah Hotel lian tak tak an nei teuh bawk.

Pu Paul Cullen-a chuan a fapa chu an company CEO ni turin a duh a, chuvang a inhmelhriat leh pawh chu kan ni.

Ian-a nen chuan kan inhmu leh a, min la hriat leh hria loh chu ka hre lo, mahse ka laizawnnu Ashley-i nen erawh an lo inhre tha khawp mai. Kei pawh chu min la hriat tho ka ringa, mahse chutianga han inbiakna mumal tak erawh kan nei hran lo.

Chung ngaihtuahna zawng zawng chu tih reh tumin ka lu ka thing a, ka ngaihtuahna ah thil pakhat chiah awm tir ka duh. Helai hmunah hian Honeymoon hmang tura kal ka ni a, chu chu eng thil mahin a a chawh buai ka duh lo.

Hlim hmel put luih tuma nui sang chungin bedroom ah chuan ka lut a, mahse a lo ruak huai a. Thil a thim zawnga thlir loh hram ka duh. Chu khum lian zetah chuan keimahin ka thu a, khum khuhna dum leh vutbuak rawng chu mawi tak a ni.

Muangchangin Ian-a chu pindanah chuan a rawn lut a, kekawr vutbuak rawng leh kawr var plain a ha a, a sam dum hlap mai a la hnawn chap danah a inbual zo chiah a ni tih a hriat nghal mai. Khum a ka lo thu chu min rawn en vang vanga, rang takin a hawi sawn lehnghal daih a. Lukham leh puan pakhat chu lain thuthlengah chuan a daha.

“Eng nge tih i tum a?” ka lo ti vata.

“Ka mutna tur ka siam” tiin min chhang bul hmuk a. A tawng kam nelawm loh tak chuan min ti vawt nghal sung sunga.

“Hetah i rawn mu dawn lovem ni?” ka aw chu a khur ru der der a, ka hrilhhai zia a hre thei ngei ang. A tawp deuh chawt danah a hre ngei a ni tih ka hria. Thutthleng dum man to zetah chuan a thu a.

“Alison, thil sawi dun kan ngai a ni” a ngawih vang vang hnuah chuan a rawn ti ve hlawl a.

Chu thumal tawite chuan tu emaw hringnun leh a suangtuahna zawng zawng a ti chhe vek a ni tih chu a hre ve kher angem le?

Eng thu mah sawi lovin ka lu ka lo bu nghauh ringawt a.

“He inneihna hi ka duh lo. Ka hmangaih lo che a, chu chu engtikah mah a thlen pawh ka ring lo. A chhan chu hmangaih dang ka nei a ni. Ka pa in min ngen avang chauh a nei che ka ni a, chu pawh kan company tan a nih avagin. Ka tan chuan he inneihna hian awmzia a nei ve lo a ni Alison. High school kan kal lai atang tawhin ka hria che a, mi tha tak i ni tih pawh ka hria. Chuvang chuan hetiang hi i phu lo. Ka tan hi chuan i felin i tha lutuk mah mah. Ka lak atang hian pasalin an tih ang chi engmah beisei nei lo la ka duh a ni. I duh phawt chuan Cullen hming i pu anga, i duh zawng eng pawh i ti dawn nia. Mahse kan pahnih chuan mi hrang kan ni. Kum khat hnuah kan inthen anga, sum pawh tam tawk tak ka pe dawn che nia. Tichuan nuam i tih dan ang angin i nun i hmang dawn nia. Pawi ka ti lutuk Alison” tiin a thusawi tur chu a sawi zo a, ka chhanna pawh nghak chuang lovin light a ti thim a, thutthlengah chuan muin a mit a chhing zui nghala.

Chu thu chuan eng ang takin nge ka rilru a tih nat tih a hre ve lo a ni.

A thusawi zawng zawng mai chu ka bengah a ri nawn awn awn renga. Engvanga a sum vanga neiah inngai nge maw a nih le? Cullen hming ka put chu inchhuan phah thamna viauah a ngai em ni ang?

Ka natna chu thinrimnain a rawn luahlan a. Boruak thianghlim dawn ka mamawh a ni. Ka mutna atanga thoin balcony-ah ka chhuak phei a, ka dinna atang chuan chiang takin Eiffle Tower alang ruih a. Hei hi ka honeymoon hman chu a ni si a maw? Hetiang kher hi chuan ka lo ngaihtuah ngai lo asin.

Ka mittui ka biangah a rawn luang thla riai riai a, reilote hnuah a buakin a rawn baw zawih zawih a.

END OF FLASHBACK

***

Chu chu kan honeymoon hman dan a ni. Thla khat dawn Paris-ah kan cham a, keiin khumah ka hun ka hmang a, Ian a’n thutthlengah a laptop a khawih reng bawka. Kan inbiakna pawh a tawi tek tawk thin khawp mai. Thla 1 hnuah New York-ah kan thlawk haw leh a. Tlai takah lo hawin hma takah a chhuak a, inah a awm ve a ni tih hriatna chu a thawmhnaw suk tur a lo dah ve thin hi a ni.

TV en nan leh guitar perh a zai nan nileng hun chu ka hmang thin a. Zai hi nuam ka ti em em a, chu chu ka talent dawn a ni tih ka pa chauhin a hria. Ka nu pawh khan a hria, a thih hma kha chuan.

Ashley-i hi chu ka unaunu dik tak a ni chiah lova, ka nuhrawn Amelia-i fa rawn chawm a ni. Mahse ani chu ka nu tih hlirin ka ko thin. Ka nu dik tak chu Linda-i a ni a, kum 5 ka nih laiin car accident ah min thih san a ni. Ashley-i nen hian kan inrual vel chiah a, ka thisen zawmpui ni lo mahse thil dang zawng zawng aiin ka hmangaih zawk a, chu chu tu pawhin an hria.

Ka nui suk a, hetianga renga Ian-a lemchang lai hi ka hmu thei tawh lo. Hei hi a in a ni a, mikhual ang maia a awm angai hleinem. Kei hi mikhual zawk chu ka ni. . Thla 9 zet hun hman dun kan la ngai a, thian ang tal pawhin kan awm thei dawn lawmni?

Nuam lo tihnain ka khat a, a chhan chu keimah avangin a hmangaih ber bulah pawh a awm thei si lo. An inkarah ka lo tla zep ve a, chuvang aniang min ngainat hlawl loh ni.

Chutiang thil chu ka thlen tir thei loving. Amah ka hmangaih ang bawkin ani pawhin hmangaih a nei ve a, chuvang chuan engah nge hetia ka awm reng ang ni. Ka biak a ngai a ni.

Eng nge ka tih tur tih pawh ka hria.

Ka thlah zalen angai a ni. A hlim ve theih nan.

END OF CHAPTER -1

 

MY HUSBAND’S GIRL

Chapter -2

Tukverh atanga ni zung rawn inkap lut iar chuan min rawn kai tho a. Ka nui seih a, ka mutna khum vawt thlur atang chuan mahnite chauin ka tho chhuaka. Midang ang thoin morning kiss te pawh dawn ve ka chak thin. Zan thim tak kalsan a beiseina thar nena nithar ka hman theihna turin. Inbual turin bualin lam ka pana, eng nge ka tih tur tih pawh ka hre chiang. Midangte tih hlim aia nuam tih ka nei hleinem.

‘A nih i hlimna ve tur chu engtin nge niang?’ tih chu ka rilruah a rawn lut nghal vat a, chu erawh mahni hmasialna rilru a thil ka thlir chauhin a ni.

Ka thawmhnaw dahna bawm lam panin ka insiam mawlh mawlh a, makeup tlem ka inhnawih ve bawka. Hmaihnawih hi ka uar ve lutuk hran lo va, a chhan chu min ti lang mak vekin ka inhre thin. Ka phone, ka purse leh ka car chahbi ka la a, ka chhuah lawk tur thu Marie-i ka hrilh hnuah pawn lamah ka chhuak nghala.

Hmun rem laiah ka car chu ka park a, car atanga chhuakin ka hma zawn a ding luah mai inchhawng sang zet chu ka thlir chho a.

A luhna chung zawnah chuan lian tha takin ‘Cullen Inc’ tih a in ziak kuau a, thawk ka lak vang vang hnuah kei pawh chu building chhungah chuan ka pen lut a. An glass tile phah uk kharh maiah chuan ka high heel bun chu ka pen ri khauh khauh a. Rangkachak rawng an hmang uar ber a, rawng var leh uk a inzep tel zauh zauh bawka. An reception ah chuan thing hmang a siam dawhkan, thla de lai ang maia kual mawi hi a lo inhung a, chutah chuan nula sambuang hian computer ah eng emaw a lo chhu mual mual a, a bubble gum thial lai chu a lo ham puak pawp pawp a. A awm dan atang chuan thil pawimawh tehchiam a khawih lo tih a hriat nghal mai.

A hmai a bial purh a, kamis senno a ha a, a awm bawr lang tam thei ber tur angin kawrkilh pawh kilh hmaih a nei nual mai. Zahmawh film vela chang turte pawh a ang mah zawk.

Ka va ding hnai a, ka lam a rawn hawi chhuak a, ka chhip atang chuan min han en chhuak vek te te a.

“Eng nge i duh a?” peihloh hmel zeta rawn tih pahin a kuttin chu a thlek kual vel a.

“Mr Ian Cullen hmuh ka duh”.A ngaite bawk chuan ka chhip atang min en chhuak leh veka.

“Meeting an nei mek. Appointment i nei em? I neih loh chuan siam angai ang a, chumi a zirin i hmuh theih hun tur pawh..., kan en chhin ange” tih pahin a computer ah chuan eng eng emaw a han hmet a. “Tun atanga thla 6 hnuah i rawn hmu thei chauh ang” tih pahin a rawn nui kiai suk a.

Hetiang mai mai a min chhan chhan hi ka hre ta. Ka thluak ka hmang ve mai dawn lovem ni? Chhan dan turte chu ka hre khawp alawm.

Lung nihloh hmel zetin kan awm der vel a. “Uiii, a ni maw? A nih chuan thla 6 hnu atan appointment chu min siam sak thei mai angem?” tih pahin kan nuih tlawn vela. A hmel awmdan atang chutiang anga ka chhan chu a beisei lo hle a nih ka ring. Computer ah bawk chuan eng emaw chu ahan chhu leh mual mual a.

“I hming?” tiin min rawn zawt a.

Ka nui suka. “Alison Cullen” ka han ti a. Mak tiin a rawn meng kawk a, a hmel chu hlauhthawnnain a khat nghal a.

“P-Pi. C-cul-len” a tawng pawh a bah vek tawh.

“Aw ni e Dear” no hnapin ka han ti a.

“Ka tihpalh lutuk.Ka lo chhawn dan che avang khan.Khawngaihin min ngaidam dawn nia” aw khur deuh dar dar chungin a ti a.

Nuih suk pahin ka lu ka bu a. “Khawiah nge Ian-a chu?”

“Sir chu inchung lamah a awm” rang takin min rawn chhang nghal vata. “Chhawng 63 naah. Chutah chuan a assistant a lo awm anga, ani chuan a hruai ang che”

Lawmthu ka hrilh zawh chuan elevator lam ka pan a. Duh chuan private elevator hmangin ka chho thei reng a, chu chu a pangai aiin a letin a chak zawk a, Mahse neitu rilru ka put ve loh vang nge a pangaiin ka chho ta zawk a. Cullen tih hming ka hman kher nachhan pawh kha nu laka ka tan reng loh nan chauh a ni. Elevator ah lutin chhawng 63 na chu ka hmet a.

Ka nghaka.

Ka nghaka.

Ka nghak zela.

Chhawng 24 na kan thlen chuan ka ning tan der tawh. He lift han muan dan em em hi. Hnapkhawn kal ang mai a ni. Ka nin lutuk chu chhuatah chuan ka per tet tet renga.

Chhawng 35 naah lift chu a dinga, chutah chuan tlangval chhelo zet hi a rawn luta, ka sir chiahah chuan a rawn dinga. Suit dum leh kamis dum a ha a, necktie pawl dal a awrh bawka. A sam a buanga, a ding reng reng chu a ngil zaiha. A mitmu paw ram mai chuan a iPhone ken chu a en a.

“Nupa inhmeh tak innih hi le” kan zinga rawn tel ve pitar kum upa lam tawh chuan a rawn ti a. Chu pitar aw ah chuan chu pa chu a rawn hawi chhuaka, ka lam a rawn hawia.

“Enga ti maw ka pi?” awi leh ! A British accent han mawi dan em em chu !

“Han en reng reng che u pawhin in inthlang fuh vel vek a nih hi” tih pahin a nui sen sen a. Mak tiin ka nui hawk a, chu pa lam chu ka en a, ani pawh chu min en chungin a lo nui ve mek a.

“I sawi dik chiah mai ka pi” tiin ka lo chhang leta.

“Mahse keini chu nupa kan ni-“ nupa kan nih loh thu sawi ka tum lai tak chuan ka kawngah min rawn kuah a, a lamah nghet takin min kuah bet a. A pangtilum chuan min ti lum nghal vek thei. A chet dan chu lung ni lo viau tur ka ni a, mahse chu mi letling thawk chu ka awmdan a ni.

“Nupa inhmeh tih vel hi chu ka hrethiam ve chiah lo a, mahse ka tan chu ani hi hmeichhe famkim a ni ka pi” tih pahin nuisang chungin min rawn en a, ka lo lai ve em em ringawt nia. Ka sen nghal tawn tawn mai.

Ka sam chhawlleng rawn uaithla chu ka bengkawmah ka zep a, ka hmai sen chu thup nan hnuai lam ka melh daih a. Chu pitar pawh chu hlim takin a nui har hara.

“In duhawm lutuk” tih pahin chhawng 40 naah min chhuk san a. Chu pa pawh chuan ka kawnga min kuahna chu la thlain zawitein a nui suka.

“Ka tihpalh lutuk aw” a rawn ti a.

“A ho lutuk” tih pahin ka lo nuih leta.

“Ka hming chu Aiden-a a ni e nula” then sak chungin a kut a rawn phar chhuaka. Nuisang chungin ka lo chibai a. “Kan inhmu chu ka lawm hlemai. Alison-i ka ni e”

Chhawng 60-na kan thleng a. “Ka chhuk a hun ta tlat mai. Nakininah kan la inhmu leh ang chu” tih pahin ka kutah a rawn vuana, ka kutchanga a fawh zeuh lai chuan ka lo nui a. Ka phur teh dan hawrh chu ka zak leh deuh zawk.

‘Ding’

A tawpa tawpah chuan kei pawh ka thleng ve ta e. Chhuatah chuan carpet dum, man to hmel tak hi a lo inphah chhuak vek a, bangahte chuan eng eng emaw nalh tak tak a lo intar nual bawka. Khualchhawntu thutna dawhkan lian zet mai awmna ka thlen hma chu ka kal zet a, inhnuai a mi ai kha chuan a len pawh a lian zawk daih. Chutah chuan hmeichhia kum 30 bawr vel, thawmhnaw hrigng nalh tak inbel hi a lo thu a. A computer khawih lai chu chawin hmel hlimawm tak puin min rawn nuih sanga.

“Puih theihna che ka nei em?”

“Ian.., awh ka tih. Mr Cullen-a rawn hmuh ka duh a” tiin ka lei ka chheh sual zeuh chu ka siam tha nghal vata.

“min lo nghak lawk rawh aw ka pi” tih pahin a bula a dah phone chu a la a, number a dial nghala.

“Good morning Sir. Hmeichhe pakhat nangmah hmu tur chein a lo kal a” a tih zawh chuan rei lote a ngawia. Phone speaker chu hupin ka lam a rawn hawia. “I hming min hrilh thei angem ka pi?” a dam tak hian min rawn ti a.

“Alison” ti a chhan pahin ka nui sanga.

“Sir, a hming chu Alison a ni e”

Chu nu chuan loudspeaker ah a dah palh hlauh mai. Ian a’n a “Tu Alison-i maw?” a rawn tih chu a chiang khawp mai. A min den dan pawh na tak a ni. A nupui hming em pawh a hre lo a maw? He inneihna hi atan chuan engmah a ni lo. Mahse a nupui ka la ni ve tlat si.

Rang takin loudspeaker chu a off nghal vata, inthiam lo tak chungin min rawn nuih a.

“Alison Brown” tiin min zawh hma hmain ka lo chhang nghala.

“Alison Brown-i a nia Sir.....Aw le Sir”

“Ka pi” tih pahin a bu nghat a, rawn tho chhuakin a hnungah ka zui nghala. Kawngka dum lianpui hmaah chuan min ding pui a, chiang zeton ‘CEO Ian Cullen’ tih a inziak kalha.

Lawmthu ka hrilh hnu chuan min kalsan a, ka luh hmain thawk ka la te te a. Tunah chuan kan inneihna chu keimah ngeiin ka tihchhiat a ngai dawn ta. Hlim takin a awm phah ngei anga, chu zawng chu a ni ka duh chu. Inti huaisen luiin kawngka chu kik ka tuma.

‘Ngaihtuah chiang rawh Alison. I lut a nih chuan i chan kumkhua tawh ang. I kik a i lut a nihna zawngin midang tan tul lovah i inpumpek ringawt dawn asin’ mahni hmasialna thlarau chuan a rawn ti a.

‘Inpumpekna tel lo chuan hmangaihna a awm thei lo tih hi hre reng ang che. Kumkhua atan ka chan a ni thei e, mahse ani chuan kumkhua atan a hmangaih ber kiangah hnun a hman theih phah dawn si a. Ka hmangaih a, mahse ka ta tur a ni si lo. Chuvang ringawt chuan a kawng ka lo dal kher tur a ni tihna a ni hleinem’ tiin ka ngaihtuah zui nghala.

A tawp a tawpah chuan kawngka chu ka kik ta.

“Lo lut rawh” a ti ri ka hriat veleh ka lut nghala.

Kawngka chu hawngin muangchangin ka pen luta. “Alison, ka office meuh a lo kal tur khawpa thu hmanhmawh thlak chu a pawimawh viau ka ring” a lo ti bul deuh hmuka. A hmel chu a that ngaiin ala tha reng a, a mut tam tawk loh vang a ni ang a mit ko hnuai lamah chuan dark circle a awm phei raih a. Ka hrethiam mai. Inah thil a ei ngai lo a, a nih chuan dawr thil hlir a ei thin tihna. Zanahte hian darkar hnih vel bak a muthilh ngai ka ring lo.

“Pawisa i mamawh em ni? Chutiangte chu rawn kal kher lovin min rawn text la, ka rawn transfer mai dawn che alawm” a rawn ti dam diai a. A sum vanga nei ka ni emaw a inti tlat hi ka hrethiam thei lo.

Thinrimnain min rawn man a, ka puak keh loh chauh a ni ber.

“Ngawi rawh”

A hmel awm dan chu ka sawi thiam lo. Ka tawng dan chuan a thawng hle niin alang.

“Engvanga i sum hi mamawh a min ngai tlat nge i nih a? Mr. Cullen, nang a pawisa dere mah hi ka it chhete eih lo tih hi min hriat sak ang che. Hmuh che ka duh a ka rawn kal a ni mai. Mi nupuite anga hlim tak nih ka duh a, ka pasal thla khat leh a chanve zet ka hmuh tawh loh hnuah amah hmu turin ka kal a ni mai”

“He inneihna hi i duh lo tih ka hria a, chuvang chuan hlim lo taka awm reng tura nawr luih che hi ka tum reng reng hleinem.Midang hmangaih i nei a, a tha alawm.I nun a nia, kei hi i nupui ang a min ngai lui tlat tura nawr luih theihna che ka nei hleinem. Mahse mahni in ngeiah pawh tlangnel lo zeta i awm hi chu ka duh lo va, pangai takin awm la, nilenga hna i thawh hah hnu hi chuan thlamuang takin chawl hahdam ve thin la ka duh a ni. Chaw i ei mumal lo va, mumalin i mu bawk si lo. Hetiang rengte chuan i taksain a tuar thuai anga, damdawiin a hun hman i ngai ang tih ka hlauhthawnpui che a ni.” Tiin thawk pa la miah lovin ka sawi zawm par para.

Ani hi nei lo pawh ni ila sumah ka buai lo va, ka pa bulah pawh thlamuang takin ka awm thei. Mahse engvanga ka hun khawhral mai mai tur a ani hi nei nge ka nih? Hmeichhia chuan sum an duh rual rualin hmangaihna an mamawh a ni.

“ALISON” a awki ring zet mai chuan min ti phu nasa lutuk a ka thlawk chhuak lo chauh. A lam ka hawi vata, thinrimnain a khat dawn emaw ka tih laiin hmuhnawm thlirin min thlir vel mai mai ni berin ka hria.

“Eng e?” ka thawte chu a chham lo chauh. A mit a chhinga, a ngaihtuahna a awm chu thai bo tum ni awm takin a lu a thing a.

“Han thu ve phawt la maw le” aw dam tak hian a rawn ti a. Kei pawh chu a thutna ep chiah thutthlengah chuan ka thu a.

“A tir berah chuan ka hriatthiam tawk lohnaah che pawi ka ti a” thupui fun deuh hian a han ti dap dap a.

“A pahnihnaah chuan in a ka rawn haw khat vang leh a chhan leh vanga i lo inngaihna avangin pawi ka ti hle bawk” ahan ti chiah chu ka lo melh nghal deuh hraw a.

“Ni e ni e...nangmah vang chu a ni tho mai” tih pahin a nui suk a. Kan thusawi tur pawimawh ber lama kan luh chhoh thuai tawh ka beisei.

“Chu nu chanchin chu i han sawi teh ang” nuisang chungin ka ti a.

“Tu chu maw?” a rawn ti deuh hu a.

“I hmeichhe hmangaih chu mawle” aw phawi zang vahin ka ti a. Tlemin a meng buai deuh a, a beng erawh a sen tan tana.

“Hmeichhe hmeltha tak a ni. High school kan kal lai atangin ka hre tan a, a hmelthat em avangin lar pawh a lar khawp mai. Amah chuan min hre kher lo anga mahse kei erawh chuan engtik lai mai pawh hian ka ngaihtuah thin a. Bing taka thil a ngaihtuah lai hmelte, a zam changa a hmui a seh dante, a thin tim changa a hnar a tih sawih dante thlengin ka hre vek a ni. A engkim mai chu a mawi em em vek a” a sawi zawnga a hmel awm dan atang a hmeichhe sawi chu a mitthlaah a suangtuah mek a ni tih ka hria. A thusawi mal khat lek pawh chuan ka rilru an tina em em veka, mahse nui hmel ka pu reng tho.

“A nih chuan chhuahpuiah paw hi la sawm chin lo tihna a ni maw?” ka han ti a.

“Aih” a ti chuai raih a.

“Ian, a nihte chuan lantir t ache. Tu hmeichhe mahin an hnar hauh loving che” ka han tih chuan a nui suka. “Anih chu hmeichhia chu i la duh reng em?”

“Duh tehreng mai” nuisang chungin min chhanga.

“Wow..,a nih i duh tih a hre tawh em?”

“Aih”

“Hrilh tura ruahmanna deuhte i nei em?”

“Aih”

“Ian, khua i tlai hmain hma i lak vat angai a nih chu” ka lo ti vata. “Chu nu chu chhuah reng reng suh ang che. Keiman ka pui dawn che nia” nuisang chungin ka ti a.

“Eng a? Eng a ti maw?”

“A bulah chuan awm la i hlim angem?”

“Mi zawng zawng aia nasain”...chu nu chanchin kan sawi laia a hmel awmdan chu hmuhnawm tak a ni.

“A nih chuan min han hrilh teh” tih pahin ka nui lui hram hram a. Min rawn en vang vanga.

“Nupui nei ta la, nangin i hrilh angem?” tiin min rawn zawt a.

“Hrilh chiang viau ang” tih pahin ka nui haka. “Tu nge chu nu chu a hming?”

“A hming chu........”

A hming sawi a tum lai tak chuan phone a rawn ri hlauh maia. “Min lo nghak lawk rawh aw” tiin min rawn mitmai a, ka lo bu nghata.

“Aw Lucy” a tih zawh chuan a ngawi vang vanga. “Aw le, minutes 10 hnuah ka rawn thleng ang” tih pahin phone a daha, inthiamloh hmel takin min rawn en a.

“Ka kal mai angai. Meeting kan nei dawn a”

Nui chungin ka bu zeuha, ka bag chu lain ka ding chhuaka.

“Ka lo haw veleh kan sawi chhunzawm leh mai dawn nia” tih pahin mawi zetin min nuih a. Thla 3 hnua a nui hmel mawi tak ka han hmu leh chu ka thinlung a tuiral nawn leha.

“Ka lo nghak ang che” tih pahin a room atang chuan ka chhuak nghala. Pawn ka chhuak chiah chu kawngkhar ngheng chuan ka dinga, ka mittui a rawn hnam tiam tiam a. Ka thinlung chu na tawpkhawkin a na a, mittui dan beh reng pawh thil awlai lo tak a ni.

Ka mittui chu hru hulin ka nui lui a, ti hian keimah leh keimah ka inhrilh a. A nui hmel mawi tak ringawt pawh kha ka natna chhawk turin a tawk a, a hmel a hlimna ka hmuh kha ka natna zawng zawng tidam turin a tawk a ni.

Ka phone phawrhin ‘SOS’ ti a ka save number chu ka dial a, rei vak lo a ring hnuah min rawn chhanga.

“Cafe meeting” tih zawng ka sawi zawh hnuah phone chu ka dah lehnghala.

 

Chapter -3

“Eng nge a chhan ni a Ali” Marie chuan mi han ti a. A eirawngbawl chu ka pui pah mawlh mawlh a.

“Engmah a chhan a awm lo Marie” tiin nuisangin ka chhang a.

“Chuti maw? He in a i rawn lawi luh atang khan i hlim hmel hmuh tur a awm pawh hi ka la hre lo. Ian-a ei duh zawng hi i siam sak deuh reng mai tih loh chu” tih pahin a mit chu a tun deuh hru a.

“Chutiang engmah a awm hleinem Marie. Eirawngbawlte hi chu nuam ka ti ve hrim hrim alawm” tiin ka lo chhang thuai a.

“A tha. Chutiang rilru chu pu reng ang che” tih pahin a nui haka, a blueberry pie siam chu oven ah a khung lut a. Eng nge maw ka han sawi dawn ni?

Tuna ka hlim tak chhan hi ka pasal nena inbiakna kan neih ve tak vang em ni ang? Chu kan inbiakna chuan khuareiah natna mai min thlen leh si lawng maw?

‘I tan hun hnuhnung ber pawh a ni tawh thei. Chuvangin ngaihlu hle ang che’ ti a inhrilh chungin ka nui saka. “Kan va insiam ange, a lo haw tep taw hang” tih pahin sana ka en a. “Nalh deuhin va inchei rawh” Marie chuan ka hnung lam atang a rawn ti a.

“Ka theih anga nalhin” tih pahin inching lamah ka chho a.

Rei tawk fang muang mar zeta ka inbual hnuah kan thawmhnaw dahna chhuar lian zet mai chu ka hawnga. A vei lam zawngah chuan Ian-a thawmhnaw a khat vek a, a ding lamah keima thawmhnaw. Wine rawng kawrfual ka ha a, pheikhawk sang dum ka bun bawka. Ka mit tlemin ka hnawih a, lipstick sen lar tak ka inhnawih bawka. A sam chu fel fai takin ka tukhumah ka tawna, darthlalang hmaah dingin keimah leh keimah chu ka insiai saka.

Doorbell ri chuan min ti pen chak zual sauh a. “Keiman kan lo chhawn ange” tiin Marie chu ka lehpel a. Ani pawh chuan hrethiam takin a lu a bu a, a let leh nghal mai a.

Nuisang chungin kawngkhar chu ka hawng a, ka nui hmel chu a lem a ni lo. A mitmu pawl ram mai ka hmuh ringawt pawh hian ka thla a muang veng veng thei thin. Ka chip atanga ka keler thleng chuan min en chhuak veka.

“Hi” tiin ka lo chhawn a.

“Hey..., i nalh kher mai a”

“Ka lawm e. Lo lut rawh” tiin kawngka chu ka hawn zau saka.

“Ka han inti fai anga ka rawn let leh vat ang” a ti a, ka lo bu nghat a. Chaw ei dawhkan lamah pheiin chaw ei ka siam a, dawhkan chhehvelah chuan bati ka chhi kual bawka.

“Engkim mai hi a nih dan tur ang thlap a ni” tiin ka inhrilh a.

“A dik chiah mai” chu aw chu ka hnung lam atang; Ian-a aw a ni. Ka hawi let vata. “Rawn tih phut che ka tum lo a nia”

“Engmah a ni hleinem” tih pahin ka lo nui a.

“Eng nge a chhan?” ti a min zawh pahin ka thutna tur chair min pawh chhuah sak a, nui hak chungin ka tu a. Chu zawhna tho chu Marie pawhin min zawt tawh.

“Tunah chuan i inah ngei i rawn kir leh tawh a, chubakah kan inhriatthiam lohna zawng zawngte kan hlip kiang tawh a, thian anga awm tawh turin. Lawm tur tam tak kan nei a ni” ka ti a. Chhungkaw lu ber thutnaah chuan thuin no pahnihah wine a thli a.

“Inthianna a!?” a rawn ti deuh hu a.

“Tinge a rem chiah lo em ni?” inthlahrung ru angreg tak hian ka han ti leh a.

“Kan inthianthatna atan” tih pahin a no chu a rawn dawm kang a, kei pawh chuan ka no chu ka dawmkang ve nghala.

“Kan inthianthatna atan” tiin a sawi ang chiah chuan ka lo sawi veleh a. Kan no inkhak tir ri chu inchhungah chuan a khawk ral ral a.

“Hun rei tak hnuah zanriah tui tak ka ei leh ta a nih hi” tih pahin a fian a cookie cream kai chu a fawp faia.

“Marie hi chu chawchhum thiam tak a ni”ka lo ti a.

“A awihawm loh emai a Ali” hnunglam atang chuan Marie i’n a rawn ti a. Ka hmui ka seh a, hnuai lamah ka kun a. Thil thleng tur chu Ian-a chuan a hrethiam nghal mai. A khabe a dawm a, kan pahnih chuan min en duna.

“Ian, i thil ei zawng zawng Ice cream tih loh kha chu ama siam vek a nih kha. Keite chuan ka lo pui chauh zawk a ni” tih a pahin min rawn en a.

“Eng nge ka sawi dik lo em ni? Min pui reng alawm” ka lo ti vata.

“Ka pui che tih i sawi loh kha. Ka eitur siam angin i sawi alawm. I sawi dan nente kha chuan a inang lo lutuk” tih pahin a mitko a rawn san arh a.

“I van ngeiawm reuh tak” tih pahin ka tlawm tih entir nan ka ban pahnih ka phar chhuaka.

“Mahni thil tihte hi chu dah zahawm thiam tur Adison” a rawn ti leh hram a. Buk zeuh pahin ka lo nuih a. Amah pawh chuan nui sun sun chungin kan plate hman tawh loh ho chu a la a, choka lamah a keng phei a.

“In hmuhnawm khawp mai a” tih pahin Ian-a chu a thutna atang a tho chhuaka.

“A ni vel ang” tih ringawtin ka chhang a. Kan ei zo ta bawk a, inthlak turin bedroom lam kan pan dun a. Ian-a chu bedroom kan luh veleh ngawi rengin bathroom ah a lut thlang a, kawngka a khar nghal hmak a.

Engtin nge ka tih a? Engtin nge ka zawh chhuah ang? Chuthil ringawt chuan ka rilru a luah a, ka hriat hma chuan min kap reng taw hang. Ian-a hmeichhe hmangaih chu tunge a nih tih ka hriat ngei a ngai a ni.

Bathroom kawngkhar inkhar ri dawt thawm atang chuan Ian-a a rawn chhuak tawh a ni tih ka hre nghala. Rang takin ka leh hawi a. Ka hma zawna ding mipa chu en in ka meng zau kawk a, Pathian thil siam zinga sexy ber chu mipa an lo tih thin zawng zawng ti diktu a ni hial ang.

A sam la hnawng chap mai a tuai chhoh zawng a a ban puam lian tha zet mai rawng langte, a dar atanga tui mal rawn luangthlain a awm pauh lah mai a zawh thla a, chuta tang a 8pack ah, a dul hnuai lamah a kal thla ralh ralh maite chu a van hmuhnawm em. Ka pian a hnu lamah tui mal luang mai mai ala hmuhnawm ber tum a ni ang.

Ka mit chu chung lamah ka len chho leh a, a hmui senno chek mai chu a rawn kiai seih a, chu thil zet chuan hmeichhe tam tak chu a ti tui thawt thei ang. Kei tiamin.

“Min en dik zo taw hem?” tih pahin ngeiawm zet hian min rawn nuih a.

“Ohh...Um...a..., kan va inbual ve ange” tih pahin rang takin bathroom ah chuan ka tlan lut nghal vata.

Tui s aver vawrin ka inbual sawk sawk a, ka inhru hul lehnghal vata. Ka thawmhnaw hak mai tuma ka indap lai chuan thawmhnaw reng reng ka ken glut lo tih ka inhre chhuak thuta. A van hahthlak take m. Ka hmai a dang nghal sawt sawt mai. He khawvela hmeichhe tlaw ber ka nih hi.

Thawk ka la hawk a, ka awm a chin chu towel chuan ka tuam tawp a, kawngkhar chu hawngin ka dak dek dek a. Tumah hmuh tur an awm love. Kawngka chu ka khar a, rang takin thawmhnaw dahna lamah ka tlan phei nghala. Thawmhnaw dahna pindan ka thlen chuan kawngkharah ka lu ka nghata, ka nui ver ver a.

“”A van awl leh si ve” ti a ngaihtuah chungin ka nui a, mahse ka hnung lam atanga rum nghut thawm chuan min ti khang nghal vek.

“Awi leh awi leh...” hreh tak chungin muangchangin ka inher a, ka hnungah chuan Ian-a a lo ding run a. Mupuiin uluk taka thil a thlir ang mai hian min lo en hraw a. Vanneihthlak takin kekawr a lo ha fel tawh a, t-shirt nghawng V a ha bawk a. A mitmu pawl nalh tak mai chuan ka khawilai pawh chu a thlir a, a mitah chuan tisa chakna ka hmu a ni.

Chu chu chiang takin ka hria. Enga tinge min it? Ka chungahte chuan eng thil mah tih a duh lo a ni lawmni?

“K-ka inthlak d-dawn a”

Harhchhuak thut ni awm tak hian a bu nghat a, vawikhat min rawn en leh a, a kal sawn nghal a. Hnar a hlit phawi ang huai a ni. Hetiang thil hi vawikhatmah a thleng nawn leh tawh tur a ni lo. Kan inneih zan khan engtin mah min khawih lo va, a pawisa vanga neiah a inngai tlat bawk a. Tunah pawh amah va lem a, va inlak itawm tumah min ngai leh der dawn a nih hi.

Pyjama ka ha a, tawnzau var ka ha bawk a. Pindan chu a vawtin a ruak ruih mai.

“Hetah rawn chhuak rawh” Ian-a chuan bathlar atang min rawn au a. A hmel nui sang mai chu thla eng chuan a chho nu nghalh a.

A kiangah chuan ka va ding ve a, thla eng chu kan thlir dun a. Mahse thil pakhat hmabak ka la nei tlat.

“Ummm....,i bialnu chungchang chu sawi tawh ila” fiam titih deuh hian ka han ti a. Min rawn en a, a hmel chu a nui sang reng a.

“Ka hmuh hmasak ber chuan 3rd semester kan la nia. Ice cream a lo ei tuam tuam a, a cream kha a hnarah a ti kai a. A hria nge hre lo chu ka hre lo a, mahse a lang duhawm takzet. Chu chu ka duh tanna a ni. Hun a kal zel a, amah pawh chu a danglam hret hret a, duhawmna atang chhiatlohnaah a kai chho a, mahse chu chu pawnlam land an chauh a la ni. Chu nu chu hriatchian a kawm nel ka chak em em thin a, mahse ka thei lo. Kan school ah chuan hmeichhe lar ber a ni a, kei lah ka zakzum em em mai bawk si. Nikhat chu ka huaisenna zawng zawng nen a hmachhawn a, engkim hrilh ka tum ta a. Mahse chu mi ni chuan ka pain hmun danga kan insawn angaih thu a sawi thut mai a. Tichuan thuthlukna siamin ani chu bansan a ka lak a ta kalbo tir mai ka tum ta a. Nitin mai hian ka ngai em em a, nitin hun ka neih laia ka lo che lo kha ka inchhir hnuhnawh leh ziah thin. Mi dawihzep tak ka ni. Tichuan kum 6 hnuah ani chu ka tawng leh a, mahse thil dang vangin ka chan leh ta a ni”

A aw ri atang chuan a rilru a hniam takzet a ni tih ka hria. Ka khawngaih a, ka lainat takzet. Kha inneihna kha lo hnar ni ila chuan hlim takin a awm ve tawh mai tur.

“I awm dan tur chu ka hrethiam alawm Ian....” ti a ka sawi lai mek chuan kum 6 a awm loh chhunga ka ngaih theih zia kha ka ngaihtuah chhuak nghala. “...mahse lungngai suh. I nei let leh dawn alawm. Hlim taka awm hi i phu a, chu chu ka thlen tir ngei bawk ang. A rilru zawng zawngin min rawn en a, ka sen nghal tawn tawn a.

“A nih leh tunge a hming?” ti a zawh pahin ka sam chu ke bengah ka zep a. A mit a khap fak fak a, hmun tin mai chu a melh kual a, a tawpah chuan keimah bawk min rawn en a.

“Alison....Ka-“ a tawp hmuk a.

“Eng nge ni?” ka lo ti vata.

“Enteh, tih nat che emaw, tih thinrim che emaw ka tum miah lo a nia” inthlahrung takin a ti a.

“Chutiang thilin engtin mahin min tin a thei hleinem” tiin ka nui lui a. “eng thil mahin”

“A hming chu...” an ngawi leh vang vanga.

“A hming chu?” tiin ka lo chunzawm saka.

Thawk ka la kawk a, ka thinlung kehsawm vek tawh chu chhut dip vekin a awm dawn ta a nih hi.

“....i laizawnnu Ashley-i a ni e”

 

Chapter -4

Midang ho nen chuan kan innek lawih lawiha, an lamna lamah a then phei chu an thlan hnawng chup tawh a. Ke chheh ka zei vak lo nen hnung lamah ka pei leh khut khut thin. Chu hall chhung chu perfume rim chi hrang hrang, than rim leh zu rim nen a inpawlh nuai a, pum a ni nghulh thei alawm mawle.

“Tawn beh tlat angina wm mahta che” ring lenglawngin Jake-a chuan min rawn ti a. Music a ring viau nangin midang zawng pawh chuan an hre thei deuh vek a. Min en a an nui hak hlawm a. Jake-a chu ka kiuin a awmah ka va nghawk deuh fawka.

“Kan party a ni lawmni, i lam ang” tih pahin Emily chuan ka banah min pawt a, lamtual lamah min pawt chhuaka. Mi ho chuan min nuih deuh tlatin ka hria.

“Washroom ah kan lut teh ang” ka han tih chuan Emily-i chu a bu nghata, dik tak chuan eng nge ka sawi tih engmah a hre lo. Zanin hman dun pui tur tlangval tlahlang a zawng mek a tinni.

Mipui phu mup mup kar atang chuan ka pit chhuak a, washroom lam ka pana. Ka va thlen cuan light eng chuan ka mit a tih nat avangin ka mit ka chhing veka. Kan awmna pindan kha a thim a, light chi hrang hrang, rawng hrang hrangin a phe zawk zawk bawk nen, light eng tha pangai hnuaiah chuan khawhmuh a nuam lo zo vek.

Darthlalang hmaah chuan dingin ka in en vang vanga, ka chhe lo ka inti. Mahse keimah ka ni lo.

Emily i’n kawr sen duk, hnute khuh chang chang min hak tir a, a hnuai lam chu a lang vek. Leather kekawr tight tak, mal leh chawn shape zawng zawng lang thei vek tur ang hi hi min hak tir bawka. Ka sam min tih kir saka, makeup pawh nidanga ka hman thin letin min tih saka, lipstick sen tai hlur nen. Ka kawr dahlau lutuk chu ka zahpui deuh avangin jacket ka ha vata, ka sam thur lutuk tur chu tuai mamin washroom atang chuan ka chhuaka.

Ka rui ve tur a ni.

‘I rilru natna zawng zawng i theihnghilh theihna tur chuan rui hnapa i awm a ngai a ni’ tiin keimah leh keimah ka inhrilh a.

Ka rilru ka kawm nasat lutukna lamah ka hma zawn a ding pawh chu ka hmu lo reng reng. A awmah ka va insu dawt a. Ka rilru te chu a te zo vek tawh. Enga tinge maw an tih thim em em mai le? Midang pawh kan inhmu tha thei lo a nia tiin ka ngaihtuah a.

“Ka tihpalh lutuk” tiin thupha ka chawi a, ka sut chu mipa a la ni zui.

“A pawi lo” tih pahin a kut chu a thing hula.

“Ui haa..! Ka sut buak sak che elaw?” ka ti Chula.

“Aw” tih zawngin min chhanga.

“Ahhh..,k-ka tihp-“

“A pawi lo ka tih kha” tiin aw dam takin min lo pawtchata.

“Chutia tih rikngawt. I thil in lai ka sut buak sak vek che a nih kha. I la huh phah lehnghal. A van mimawl hna thin tak” tih pahin a kut chu ka va hruk saka. Dik tak chuan a intih buak ngei em tih pawh ka va hmu chuang lo nangin k=a kut a thin dan atang khan a intih buak a nih ka ring ve ringawta.

“A nih le hi inthiam loh ai chuan in tur min lei sak la” tih pahin min rawn nuih saka. Ka tawp deuh chuta. Hetiang anng zawng kher kher hi chuan ka la flirt ngai lo. Chuvang a niang mak ka tih huih ni.

“Hahaha...ka fiam mai mai che a nih kha” a rawn ti lehnghal vata.

“Ni lo e. Ka tihbuak sak che a chungte chu ka ba ve reng alawm” ka lo ti vata.

“Tuin nge maw Angel i’n a thil a tihsak turte hnar phal ang ni” a tih lai chuan ka lo en kar renga. “Tihpalh, i kal ang hmiang” tih pahin bar lamah min phei pui a, kan phei chhung chuan ka hnungzangah a kut pakhatin min dawm char char a.

“Eng chi nge i duh ang?” tih pahin stool-ah chuan a thu a.

“A strong ber chu eng pawh a ni mai”

“Tha deuh ka hria alawm” tih pahin min rawn nuih sen sen a, bartender beng bulah chuan eng emaw hi a hrilh ru a.

“Lo nghak lawk rawh” tih pahin bartender chu a kal sawn daiha.

“Ka in tura damdawi pawh ruk chu i tum loving chu maw?” fiamthuin ka han ti a, a nihna takah chuan ka fiamthu hauh lo.

“Chutiang ti duh tur hmel ka pu em ni?” thutak hmel takin lem a han changa.

“Min bum loving tih pawh ka sawi thei hleinem” ka lo ti vata.

“Ni e, a hriat miah loh” tih pahin min nuih saka. “Party girl ni si lovah chuan i sexy khawp mai a”

“Tuin nge party girl ka ni lo ti a?” tiin ka lo chhanga.

“A hriat mai alawm. Party girl chuan jacket an ha ngai hleinem. Chubakah dance floor a second 3 vel lek an awm hnuah bathroom an pan ngai lo”

“Chu...,tu emaw chuan min lo va chik awm ve”

“Hetiang anga mipui zi mup mup karah pawh nangni angte hi chu a hmuh hmaih theih hleinem”

Chutih lai chu glass no tereuh te te a zu thlit sa diam chawi chungin bartender chu a rawn lut leh a, a tray chawi chu phawk hruin ka lo melh a.

“A strong ka duh ka tih khan hetiang anga tui pawlh loh hi ka ti hleinem” tih pahin kan hma zawna a rawn dah tray chu ka en a.

“I inthei phian zawk ang. Ka sawi dik hrim hrim” min rawn ti a.

“Engtin nge chu chu i hriat?”

“Nangni ang hmeichhia hi chuan chhan pahnih bak innei ngai hleinem. Pakhatnaah chuan i best friend in ti turin a nawr lui che a ni thei a, a nih loh vek pawhin ruih chum hmawk a chak tihna”

“Engvanga helaia lo kal hi nge ka nih tih ka zawt hleinem che” tih pahin ka kut ka phar chhuaka. A nui haka.

“Tirawh le, i ti tan ang hmiang”

*IAN’S POV*

“KHAWIAH NGE A AWM..??” ti a au thawt chungin ka phone ken lai chu ka vawm pawm a. Bangah chuan a ri chhuai a, chhuatah a darh phunga. Tunah kher kher hi chuan ka phone lamin ka rilru a luah lo, Alison-i chauh a ni ka ngaihtuah ni.

Khawiah nge a awm ang? Engtin nge a awm? A chungah thil eng emaw a thleng angem?

Chung zawhna ho chuan ka rilru an luah luai luai a. Kut lum ther therin hnung lam atanga min rawn khawih chuan ka inher nghal vata. Chu pangti lum kher kher chu ka hresual thei lo.

“Lungdam takin awm rawh ka fapa, khawiah pawh awm se la tha takin a awm ngei ang tih ka hria a ni” tiin a aw ka thlamuanthlak tak chuan min hnem a. Kum 5 mi lek ka nih laia ka nuin min thih san hnu khan Marie-i hi ka nu ai awha min chawi liantu a ni a, ka tan chuan ka nu nen danglamna engmah a awm lo.

Tawite a nuih pahin ka bu nghata. Ani pawh hian Allison-i chu a ngaihtuah takzet a ni tih ka hria. A fanu ang chiahin a en a, an awm dan atang hian chungril taka inawmna an nei a ni tih ka hria.

“In pahnih inkarah hian eng emaw thil thleng a awm em ni?” aw ki hniamtein min rawn zawta.

“Eng nge i sawi awmzia?” th pahin ka mit ka tun hru a.

“In pahnih inkarah inhauhna emaw amah ti lungawi lo thei thil thleng a awm em ni?” a rawn ti leh a.

“Awm lo. Eng,-“ ka tawng lai chu ka tawp chawta. Zan hnih liam ta kha ka ngaihtuah chhuak nghala, Allison-i hnena k a hmangaih tak zawk chanchin ka sawi chhuah kha.

“Maw?” hrialt belh chak hmel tak hian Marie chuan a lo ti vata.

“Engmah ni lo ve” ka lo ti thuai a. Khami vang kha a ni thei angem? Keimah ber pawh chu ka chiang chuang lo.

“Min han hrilh teh bawiha” . Ka sawi hma chu min zat char char dawn a ni tih ka hria. “A bulah ka sawi chhuaka” tih pahin ka thaw haka, ka hawisawn nghala.

Marie chuan hlauhthawn hmel zet hian min melh a.

“Eng maw i hrilh a?”

“Ashley chungchang”. A thaw hawk a, a hmel awmdan chu a buai nghal vek. Thinrim tep tep hmelte, a nngaihna hrelo tak hmelte a pu kual nuaih mai.

Engtin nge hmeichhe ho hian a rual a rual a thil tam tak an ngaihtuah theih le tiin ka lo ngaihtuah a.

“Thil tha lo tak a nih chu” tiin Marie chu a aw a lawi rut a.

“Nu, eng nge chhan ber pawh ka hre bik chuang lo”

“Engtin nge chutiangte i sawi theih reng reng zawk a?”

“Awww...,aman engah maha a ngaih loh tur thu a sawi alawm. Zan hnih liam ta khan a nia” ti a ka han sawi chuan awih harsa tih hmel takin Marie chu a ang phuau a.

“Nangman chingfel ang che” tih pahin a kal bo nghala.

“Engtin nge ka tih ang?” tiin ka inzawt mawlh mawlh a. Phone ri chuan min ti harhchhuak zawk a. Rang takin ka va la vata.

“Mr Cullen, i cellphone a rawn biak che ka tuma, mahse a tlang thei miah lova. Chuvangin hetah hian ka rawn ti ta mai” tiin ka secretary chuan min rawn bia a.

“Nia. Phone thar ka lei phawt loh chuan a tlang thei loving. Eng pawh chu ni se min hrilh duh chu eng thil nge?”

“Sir, Pi Allison-i Retro Club-ah kan hmu a” a rawn ti a.

“Retro club a!?”

“Aw ni e Sir”

“Chu nu chu Allison-i a ni ngei tih i chiang a maw?” ka han ti leh a. Allison-i leh club chu thil inhmeh lo tak a ni.

“Ni e Sir. Amah a ni ngei a ni tih kn chiang e” ti a a rawn nemngheh hnu chuan phone chu a daha.

Ka car-ah ka tlan lut a, ka driver chu Retro Club lam pan nghal turin ka hrilh a.

Club ah chuan ka lut a, a thawktu ho chuan min lo be siam siam hlawm a. A neitupa Drake-a hi ka thianpa a nh avangin a thaw ho pawh chuan min hre deuh veka.

A tlangpui thuin chu club chu mipa hurl eh hmeichhe awmtha duhlo ho kalkhawmna a ni deuh ber a, chung ho zinga Allison-i ka han zawng tur chu thil mak leh duhawmloh tak a ni.

“Frank” tiin chulaia lo duty pakhat chu ka ko a. “Hmeichhe pakhat min zawn sak la ka duh a” tih pahin ka phone chu phawrha Allison-i thlalak entir ka tum a.Mahse ka vawmchhe vek tawh tih kha ka hrechuak leh a.

“Engah nge maw ka lo vawm kher kher ni” tiin ka rum nghut a. “5’6ft a sang, vun uk lam, mitmu uk. Hmeltha deuh a ni mai” ka han ti ringawta.

“I zawn chu saw laia mi saw a ni em?” tiin ka hnung lam chu a kawk a, rang takin a kawhna lam chu ka hawi nghal vata. Ka thil hmuh chu awih harsa ka ti hlemai.

Mi chi hrang hrang an lam hut hut a, dawhkan pakhat chungah chuan Allison-i chu a lo ding kang a, a lo bu nghawng nghawng a. A kawr sen hak tawngchham tak mai chu a lo kau huau a, a kekawr hakte lah chu a engkim thla a lang thei vek ang tih tur a ni. A kawng chu a shake kual a, a samte pawh a thur vek tawh.

Ka mit ngei pawh chu ka ringhlel zo tawh. Saw saw chu ka Allison-i hriat thin kha a nit a hauh lo. Mipa ha lah chuan chilthli tla lo chauhin an thlek dauh dauh a, khum siampui atan tuman an iai hauh loving le. Chumi ka ngaihtuah zawng chuan eng emaw ti tak hian ka thin a rim a, chung mipa ho chu ka khuai nuai tak ka nap a.

Chung mihring phu nuai nuai chu ka tawn phei bawrh bawrh a, a dinna dawhkan zawn chu ka va thleng a. “Alison, rawn chhuk thla rawh”. Music a rin em avangin tawng rin a ngai hle a. Ka lam a rawn hawi a, min han hmu hlawl mai chu mak a ti hlemai.

“Lo hawi vek teh u. Hei hi ka pasal a nih hi” tiin a au vak a, dawhkan atang chuan a rawn tlathla hlawm tawp a. Chu chu ka lo pawm chata.

“Dawng fuh vee...” tih pahin a nui vur vur a.

“Zu te i en ve elaw !” tiin ka phu sap a. “I haw ang” tih pahin ka pawm tho a, ka car awmna lam ka panpui nghala.

“Ekhai aa! Pumbilh vek i tum bike law?” tiin mipakhat hian min lo chelh dinga. Suit dum a ha a, a hmel pawh a zahawm phian. Ka hmelhriat a ni tepin ka hria.

“Tum e. Buaina i nei em ni?” ka lo ti hmuk a. A nui vak a, eng nge nuihzat tum awm reng reng le?

“Nei lo ve thiana. Mahse ka hrilh ang che. I lo enkawl tha dawn nia” tiin a nui suk a, a kalbo lehnghal daih a. Eng nge a sawi awmzia ni ang? Tinge a nuih?

Ka nupui hmel pawisawi lo tak mai chu ka en a, ka thian a ni zawk mah ang chu. “No engzat chiah nge i in a?”

“No khat, hnih, thum, hnih” tih pahin a kutzungtang chu a chhiar a. “Aw no hnih” tih pahin a kutzungtang pali min rawn hmuh a. “Hey..., ka chak lehnghal mawle” ti a inchhuang tak chungin a awm a chum a.

“Engah maw i chak a?” ka lo ti a.

“Kan intihsiaknaah maw le”

Ka nui huk a, seat hnungah thut tirin seatbelt ka hren saka.

“I mit kha” tiin a rawn phun sapa. Kan hmai a inhnaih hle a, mahse zu rim a nam huam huam a.

“Tinge ka mit chu?” zawitein ka ti sapa.

“Khawvelah a nalh ber ang” tih pahin ka hmai rawn khawih a tum a, a rawn khawih fuh tep tihah a chatthla ta nge nge a. Ka lungawi lo kher mai.

Enga timaw ka lungawi loh? Ka hmai a khawih hman loh vang chuanin maw? Hrep tak hian !

Ka lu thing nawk nawk chungin car kawngkhar chu ka khar a.

 

 

Chapter-5

Rum nghut chungin zangthal zawngin ka inlet a, engvanga ka lu chu brick bunga vawm chawrh ang maia na vawng vawng nge maw a nih le?

Muangchangin ka mit ka han meng a, parda a lo la inzar tha thlap chu ka lawm ngei mai. Ka lu dawm chung chuan muangchangin ka tho chhuak a.

“Hei hi ei rawh” chu aw ka han hre thut chu ka thlarau a thlawk chhuak dawn hialin ka hria. Marie-i nen chuan ka hauin kan inen a. “Min ti hlau alawm” tiin ka thaw hrawka.

“Tihpalh” a ti deuh hmuk a. Ka lu na chuan ziaawm lam reng a pan lo.

‘Engtin nge ka haw?’ tih ringawt chu ka rilrua zawhna awm a ni. Ka hriat hnuhnun ber chu Emily leh Jake-a te nen club ah kan kal tih zawng ka hria.

“Nizan chu i rui khawp mai” Marie chuan a rawn ti a.

“Ka rui chhe viau a mi?”

“Chair-ah thuin KS lamin i lam kual vel a, rawngin Edward-a i theh hring vek lehnghal. Chutah Hulk tiin i la ko zui a. Rui chhe tak i ni” nuihza lek lek hian a ti a.

“Edward-a? Ian-a bodyguard kha maw?” tiin ka zawt a, Marrie chu a lo bu nghauh a. Lukham chuan ka hmai ka khuh a, ka au vaka. “KS lamin chair-ah ka lam a maw?”

“Hlimawm i tih thu ka bulah i sawi bawk kha” ti chungin Ian-a [awh a rawn lut a. Nasa leh rapthlak taka rak chhuah nghek a nia ka chak ni. “Sawi tawh lo teh uuu...” tiin ka au chiam a. Anni pahnih lah chuan mak ti thlir tak hian min lo thlir a. “A nih tuin nge min hruai haw reng reng a?”

Marie chu tawng tumin a ang hman zuau a, mahse Ian a’n a lo tawng khalh thuai a. “Emily leh Jacob-a ten”

Pindan chu ka enkual a, ka pindan thar ngeiah ngei chuan ka awm si. Khami thu kan zawi zan atang khan riah hran tawh nise kan ti a, niminah ka wordrobe zawng pawh hetah hian ka thiar lut vek kha a ni sia. Chung zawng zawngte chuan Emily te chuan an hre ve awm si lo. Marie i’n a lo kawhhmuh a nih ngei dawn hi.

“Eng pawh chu ni se zaninah min lo nghak suh ang che u. Japan-ah ka zin dawna, naktuk tuk leh hma chu ka rawn haw lovang” . A awki atang chuan a hmanhmawh hmel angreng khawp mai. Enga tinge mawni?

“Aw le” Marie nen chuan kan ti rual a. Ian-a pawh chuan “A tha e” a ti sapa. A tawng danah chuan a nervous deuhin ka hria. Enga tinge mawni?

“I lu na a dam nan eng emaw i lo ti dawn nia” tih pahin min chhuah sana. Marie lam ka hawi a “Eng a tinge?” ka ti deuh hu a.

“Lo kal rawh bawihi, tho rawh. I mut reng avang khan i lu na a dam phah dawn lo a nia”

Buk nghat pahin ka tho chhuak a. Ka ha ka nawn a, tuilumin rei tawk tak ka inbual bawk a, ka lu na pawh a zia deuh hawkin ka hria. Sweater nghawng zau chi ka ha a, pyjama var ka ha bawk a. Inhnuaiah thil ei turin ka chhuk thla a.

“Kha, hei hi in rawh”. Marrie chuan coffee min rawn pe a, cream leh chini tlang lian chi a rawn telh sa bawka.

“Ka lawm e” tih pahin ka lo la a.

Ka hmuiin coffee a si tep tihah chuan Emily a rawn lut a, ring lenglawngin ka hmingin min rawn au chiam a. Inchhungah chuan a khawk rum rum mai. He nu tak hi chu aw...! Ka thian tha ber a ni a, ngainat pawh ka ngaina. Mahse a chang hi chuan a che thing tlat zel.

“Khati khan rawn au lut vak vak suh” tiin ka lo khak a. Chutiang thawm bengchheng chu tunah rih chuan ka ngaithei thak lo. Pentawng luna pawh tih tawh naklaiin.

“Oppss...tihpalh” tiin a hmui chu an han uhup ve ngei a. Ka lo nui suk a, ka coffee lam pawk chu ka ngaituah a. Tihpalh a

Ti zo chauh nangin ring leng lawng hian “Nang nen hi chuan kan rui dun uleh tawh lovang” a rawn ti lawng lawng a.,

“A lawmawm khawp ang chu” hmai zangthal ar a en chungin ka lo chhang a. Mahse a hmuh laia luna ang deuh a awm chu ka duh chuang lo.

“Ngawi mai teh a” min rawn ti a. “Zu kan in dun leh tawh lovang ka tih nachhan chu i ruihin i nihna i hloh vek a, mi mawl ber ang maiin i che alawm. Nizana i awmdante kha i la hria em?”. Chhan tumin ka ang zuau a. mahse min lo tawng khalh nghal vata. “I hre lo tawp a nih kha. Hria nilang chuan tunahte hian ka bulah i thu ngam tawp lovang”

“Engtin vak nge ka awma?” tiin ka lo zawt a.

“Min..,min kiss te i tum mawle”

"Eng a?" ka ti hluai a, ka hmel zawng zawng chu hlauhthawnnain a khat nghal veka. Amah lah chu a thutak hmel ropui si. Reilote chhung chu a takt tak emaw tiin ka awih hman tep a ni. Ka hlauthawng hmel lutuk a hmuh chuan a insum zo leh ta lova, za mangkhengin a rawn nui chhuak vak a, a nui tawp hleithei lo. Mittui tla phungin a nui a.

Rei lote chhung chu ka hamhaih hle mai. Mahse ka pentawng thluak pawh nise rei loteah thil a lo hrethiam veleh thei tho a, min tihder mai mai a ni tih ka hre leh ta.

"I hmel kha" tiin min kawk a, a nui uar uar a. Chhan ngaihna ka hre tawh bawk si lo, ka nghen lai lukham chu ka la a, a vawm ringawta.

"Ka tihpalh. Mahse i hmel awmdan kha a nuihzathlak lutuk " Emily chuan a rawn ti a. Melh pawh ka melh tha peih lo. Ka coffe ken lai chu tlem ka in a. "Nizanah chuan engtin chiah nge ka awm tih chu min hrilh dawn em?" tiin ka han zawt leh a.

"Ka lo tel ve" tih pahin Jake-a pawh alo lang hlawl mai. Emily bulah chuan rawn thu a. Jake-a hi tlem a tuai deuh a ni a, mahse mipaah chuan ka thian tha ber a ni. "Nizan kha chu Alison-i chi dang hlak kan hmu a ni. Mahse zep miah lovah chuan a SEXY tawp" a han ti vel hluak hluak a, a thusawi lai chu ka hauin ka lo en a.

Tunah khan keima chungchang em ni a sawi?

"Nangma chanchin a nih chu aw ka sawi bawihte. A tuk leh a awm tawh dawn lo emaw ti ang maiin in lam siksawi kual vela. Mahse nizanah khan chuan club chhungah khan nang aia hmeltha dang an awm hauh lo a nia. Bar ah khan i lawn kang a, i jacket in phelh meuh phei kha chuan mipa awm ho zawng zawng kha chu an au dur dur mai mawle. Mahse Ian-a a rawn kal a, a rawn hruai daih che a"

"Engtin maw Ian-a chu?" rang mangkhengin ka lo zawt nawn vata.

"Club atang khan a hruai chhuak daih che alawm. Nangmah it hmel hmel deuh deuhtu mipa dang ho pawh kha a melhrum nasa mai" tiin Emily chuan a lo chhunzawm vata.

Eng ber nge awih a awih loh tur tih pawh ka hrethiam zo tawh lo. "A nih chuan nizan a min hruai haw tu kha amah tihna a ni maw? Amah lah chuan chutiang chuan a sawi der si lova" ka hriat tham lekin ka ti sap a. Ka thusawi chu an hriat leh hriat loh pawh ka hre lo. Mahse a rawn haw veleh ka zawt chiang khawp ang.

"Al..." inthahrung aw tak hian Jake-a chuan min rawn ko a.

"Eihah?"

"I unaunu leh i pasal chu i inkawp that tih leh dawn tak tak em ni?" tiin min zawt a. Khatia Ian a'n thudik tak min hrilh tlaiah khan cafe-ah Emily leh Jake-a hi ka va hmu a, engkim ka hrilh vek a ni.

"Aw" tiin ka chhanga.

"Enga ti kherr= maw?" Emily chu a rawn tawng vata.

"Emily, ani hi ka hmangaih a ni. Ka hmangaih lutuk. Mahse ani chuan kan inzawmna hi sumdawnna thil vangah bak a ngai ve lo a, chutiang reng chuan ka awm tir thei lo a ni. Kei chuan hlim taka a awm ka duh a, a hlim hmel hmuh chu ka thil chak ber a ni. Ashley-i bula a awm chauhin chutiang chu a thleng thei ang. A nui hmel ka hmuh theihna tur a nih phawt chuan eng thil pawh tih ngai se tih hreh ka nei lo" tiin ka chhanga. Ka thinlunga hlimna min thlentu chu hmangaihna a ni a, chuvangin aman thiam lohna engmah a nei lo. Ani chuan ka hmangaih a ni tih pawh hi a hre lo. A hriatpui si lohin ka thinlung zawng zawng erawh a luah thung si.

"I that lutuk vang nge i mawl lutuk vang tih pawh ka hrethiam nek lo ve a"J Emily chuan a ti hmuk a.

"I lamah ka tang tlat a nia Al" tiin Jake-a chuan ka kutah min rawn vuana. "I thuthlukna ka pawmpu-i kher lo maithei che. Mahse kei pawh i lamah ka tang tlat ania" Emily pawh chuan a lo ti ve a.

"A nih chuan engtin nge ruahmanna i neih?" tiin Jake-a chuan min zawt a.

"A hmasa berah chuan Ashley-i hian Ian hi a duh ve reng em tih ka hriat phawt angai a ni" ka ti a.

"A dik chiah. A lo duh em em lo a nih ngat phei chuan hnathawh tur a hautak viau ang le" Emily chuan a lo ti vata. "Engtin nge chu chu i hriat theih ang?" a rawn tih chhunzawm leh a. Chhan tumin ka ang zuau a.

"Tih dan ka hria" Jake-a chuan a rawn ti hluta. Eng nge a sawi tum tih chu kan lo ngaichang nghal a.

"Game i khel ang u" a ti a, Emily nen chuan kan hrethiam lawk lo. Kan en reng ringawt a. Jake-a chuan Emily chu a en vang vang a, Emily pawh chu hrethiam thut ang mai hian a rawn nui haka.

"Chu chu a tha dawn lutuk"

"En-" ka tawng hma hmain Emily chuan min rawn khap nghal a. An van han ngeiawm dun tak. Ka hrethiam ve der mai si lo.

"Han ko nghal vat teh" tih pahin Emily chuan ka phone min rawn pe a, a number chu ka han hmet chhuak nghal vata, rang takin ka dial nghala. "Loud speaker ah dah rawh" Jake-a chuan min ti a, ka dah nghala.

"Hello ka u" tiin Ashley-i chuan min rawn chhang vata.

"Hey Ash. I dam maw?" ka han ti a.

"Dam lutuk. Nang?"

"Ka tha e. A nih ka nu leh pa te?"

"Anni pawh an tha e"

"Enteh Ash. Tunlai chu ka ngai thei lutuk che a, rawn leng la inkawm ila" tiin ka sawm a. A reng vang vang a, engtin mah min chhang lo. "Ash?" tiin ka han ko leh a.

"A nih Ian-a a awm ve em?" tiin min rawn zawta.

"Awm lo. A zin a" ka han tih chuan a thaw hawka. "Aw le. Ka lo leng dawn nia"

"Aw le. Bye"

"Bye" phone chu a dah nghala. Emily chuan mitko tun hra chungin min en a. "Eng nge kha kha a awmzia?" tiin a ngaihna hre lo takin ka lo en ve ringawta.

"Aw le. Hna i thawk ang hmiang" tiin Jake-a chuan Emilychu a pawt tho a. Kei erawh a ngaihna hre lo zetin ka thu tlawn reng ringawta. " Eng hna maw?"

"I la hre mai ang" tih pahin pindan atang chuan min chhuah sana.

*** *** ***

Ashley a rawn thlen chuan kan inkuah nghal chuk chuk a. Kan inhmuh lohna a rei ta bawka kan inngai der kher mai.

"A thing rim i nam" min han ti a. Zawitein ka bu nghata. "Zu i in a ni maw?" mak tih hmel deuhin min zawta.

"Hey Ash" hnung lam atang Emily a rawn luta.

"Ekhai aw...Emily. Ka hai dawn che alawm. I nau pawh a awm ve elaw?" tiin a bula ding Jake-a chu a en a. "Eng nge kan tih dawn a?" a han ti a.

"Game kan khel dawn mawle" tih pahin Emily chuan a kut a benga.

"Eng game maw?" tiin Ashley-i chuan a lo zawt vata.

"Kei pawhin ka la hre bik lo" tih pahin tray pahnih no a zu inthli sa vek hi an rawn chawi luta, dawhkanah chuan an rawn chhawpa.

"Marie i'n ka zu in lai min hmuh na zawngin min hau hrep mai ang. Chubakah ka pentawng mek bawk si" ka lo ti a.

"No hnih khat lekah eng i nih phah teuh lo. Chubakah Marie te chu dawrah a bazar daih alawm" Jake-a chuan a lo ti vata. "A nih chuan khawh u i ti ang" tiin Ashley-i zawk chuan thutthlengah min pawt thu a.

Ashley-i chuan no khat chu an tlak nghal piap mai a, ka la hmuh ngai loh vang nge ngawi rengin mak ti deuhin ka lo thlir reng ringawt a. Ka ta tur chu ka in ve a, a awm dan a danglam deuh bikin ka hria. Emily ka va en a, min lo siai zauha.

Chutak chu a ni ngei ang an thil sawi kha. Vawi 15 vel kan shot hnu chuan ashley-i pawh a rui chhe tawh hle a, ho teteah a nui vak vak reng a.

"Alison, lo kal lawk teh" Jake a'n a rawn tih chuan ka tho a, choka lamah kan inzui phei a. Chuta tang chuan chiang takin Ashley-i leh Emily chu a hmuh thei a, an thusawi pawh a hriat vek theih.

"Kei chu vawikhatmah ka laizawnte pasal ka ngaizawng ve ngai lo" Emily i'n a tih chuan Ashley-i unuig lai chu a tawp chawta. Emily chu a melh vang vang a, no khat chu a tlak leh pawp a. Ani pawhin a hmangaih ve tho a ni tih han hriat chu a deh dan a nuam lo khawp mai.

"Ka zawi" rei fe a ngawih vang vang hnu chuan Ashley-i chuan a rawn ti a. "Ka muhil dawnin ka hria" a ti zui nghala.

"Ka lo pui ang che" tiin Emily chuan a tlu tur a lo veng nghal vata. Mikhual room lamah an inkuah phei a. Kan awmna ngaiah let lehin thinphu dep depin kan lo nghak a.

He thil kan zawh hunah hian ka hlim ang nge ka lungngai ang? Thil a kal tluang a nih chuan Ian-a ka neih theihna chance chu 1% pawhin a awm tawh dawn si lo.

"Tunah chuan eng nge i tih leh tak ang?" tiin Emily chu kan bulah a rawn thu a. "Kan ruamhmanna neih sa angin" tiin ka lo chhanga.

"I chiang chiah-"

"A tawp nan tak tak. Ka tih turah hian ka chiang" tiin ua sawi zawh hmain ka lo sawi khalh a.

"Eng nge le ka chhar hi?" tih pahin guitar pawm chungin living room ah chuan

Jake-a a rawn lang leh hlawka. u"Rimawi hian a hnem ber ang che. Chu chu i mamawh a ni" a rawn ti zui nghala.

Thawk ka la hak a, guitar hrui chu no hnapin kan perh ri a. Chumi rual chuan hla a rawn chhuak nghala.

'Min chelh a, zunzam chak tak i nei a nih tih inhre lovin.

I lak atanga hla takah ka dinga, mahse

Ka hnaiha i awm chuan ka hlat thei si lo che.

I kalna tur min kawhhmuhin min liam sana

Chutah chuan ka leng ve si lo.

Kei a riang hi engtin nge ka awm a?

Duhtak, chu chu hria la ka van ti em'

Ka mit ka chhinga, ka mitthlaah Ian-a ka hmuh hmasak ber ni leh ka rilru zawng zawng a neih ni chu a rawn lang uar uara.

'Ka dil a che, ka chungah zahngai la

Ka chan tur min dawnpui lul teh

Ka nat i duh lo ka hria e, mahse ka hlat che a tul ta si

Ka chungah zahngai la, ka thinlung min dawnpui lul rawh

Ka chungah zahngai la, ka thinlung min dawnpui lul rawh'

Ka mit atang mittui a rawn luang chhuak a, mitthlaah kan honeymoon zana kan thlenna hotel balcony atang, thinlung beidawng taka Eiffel Tower ka thlir laite kha a rawn langa. Ka thinlung ua na nawn leh a, a thusawi zawng zawng ka benga a rawn ri nawn leh meuh chu ka mittui a baw nghal zawih zawiha.

'Zan a lo ni a, ka kiangah nang i lo langa

Thinlung mu hnu a rawn kai tho a

Hmangaihna chuan min bual a zo ta em ni ang?

'Ka laka that chhuah reng turin

Ka ngen ngam lo che duh tak

He ka thinlung luhlulna chauh hi

Ka neih chhun chu a ni

'Ka dil a che, ka chungah zahngai la

Ka chan tur min dawnpui lul teh

Ka nat i duh lo ka hria e, mahse ka hlat che a tul ta si

Ka chungah zahngai la, ka thinlung min dawnpui lul rawh'

Mittui bawkin a rawn chhunzawm a, ka laizawnnu a hmangaih zawk thu min hrilh laite mitthlaah a rawn lang leha. Kha zan khan ka tap a. Ni, ri lovin ka hmangaih, min hmangaih ve lotu vangin ka tap a ni. Tunah lah ka natna zawng zawng ai pawha a hmangaih zawk ka nau nen chuan kan intawng leha.

Mahse atana ti ka ni tih ka inhrechhuak nawn leh a, ani a hlim chuan a tawk e. Eng dangmah ka phut lo

'Ka kawchhunga boruak awm zawng zawng te chu ka hip chhuaka

Ka vun zai thlerin ka ruhte chu ka phawrh chhuak meka

A tana inhlan turin ka insiam a

Vawi tam tih ngai mahse ka lawm tho a

Ani a hlim a nih phawt chuan

'Mahse ka ngen a che.

Ka thinlung tan zahngai la,

Ka ngen a che. Chu chauh chu ka ngen a che

Ka thinlung tan zahngai ang che'

Tlar tawp ber ka sak zawh chuan boruak ka hip lut vang vanga , ka chhin vang vang hnuah ka mit chu ka menga. Emily leh Jake-a chuan lainat hmel zetin min lo en reng a, nuih seih pahin ka mittui chu ka hruhul a.

"Ali....!" chu aw hnung lam atanga ka hriat rual rual chuan rang mangkherin ka leh hawi a. Chu aw kher kher chu khawi atang pawhin rawn ri mahse, tunge a nih tih ka hai ngai lovang. A hmel atang chuan ka hla sak zawng zawng chu a lo ngaithla vek a ni tih ka hrethiam vek. A hmelah a inziak tlat alawm.

"Ian..!?" ka ti thawp sata.

Chapter - 6

 

 

Thlifim vawt tak rawn thaw heuh heuh chuan ka hmai a rawn chhem a, ka mit a chem thip vat dawn avangin ka mit erawh ka chhing thuaia. Tuifawn inchhawk ri hlup hlup mai chu rimawi nalh tak a tlinga, a chawih mawi lehzual turin hnung lamah Perhpawng a lo chiri a, tuipui al rim chuan hnar a fan riai riai a. Ka mit chu mengin chu zan thim mup mai chu ka thlir kual a. Chunglamah chuan van a inzar phei duai a, ka chung zawngah tak chuan zanlalnu a bial kulh a.

 

 

Khuarel mawina.

 

 

Chu chauh chu engmah i tih ngai lova i ngaihzawn theih awmchhun a ni hial ang. Mi tam tak chu rimawiin lungawina a pe a, thenkhat chuan lamah lungawina an hmu a, mahse khuarel mawina erawh hi chuan i hriatthiam pha lovin hahchawlhna nuam a pe ang che. Chu chuan i harsatna zawng zawng a theihnghilh tir che anga, hlimna leh hahchawlhna a pe ang chu. Chu chiah chu tunah hian ka dawng mek a ni.

 

 

Naktuka engkim danglam tawh tur ka ngaihtuah zawng chuan tawitein ka nui seiha. Ian-a secretary thar ni turin. Khatia tihpalh thil thu a ka zai lai Ian-a a lo ngaihthlak nachhan kha chu a secretary in nau neih chawlh a lo lak vang a ni a, a passport la turin a rawn let leh a ni.

 

 

In a awm tawp reng zawng a ninawm emai tiin a ai min thawh tir phal leh phal loh ka zawt a. Ka pa hna chungchang avangin hetiang lam hna hi chu ka lo khawih ve nual tawh a, zei lo leh khawr lutuk tur chu ka ni lo.

 

 

Zaninah Japan atang a rawn haw anga, naktuk atangin a office-ah ka thawk ve tan ang. Zep lovah chuan ka zam khawp mai. Engtia han awm tur nge pawh ka hre lo. Ka hnaiha a awm hi chuan ka buai zo thin an tih ang deuh tak tak hi ka ni. Harsatna leh buaina ka neih chuan ka pa ka pan mai zela, mahse hemi chungchangah hi chuan pan chi a ni si lo. Thudik a hriat chuan a rilru a na anga, chu chuan Ashley-i leh Ian-a te hma hun tur thlengin a nghawng thei a ni.

 

 

Emily pawh ka hrilh rih lovang. Ani chuan ka thil tih hi atthlak a ti leh dawn lutuk. Hmangaihna dik tak chuan pekchhuah hi a thupui ber a ni tih hi engtin nge maw kan hrilhfiah dawn ni. Ka tan chuan a hlimna chiah a pawimawh. Thil dang zawng aiin.

 

 

Ka mit chu chhing lehin khuarel mawina zunzam chu ka tem leh a, chhanna awm lo zawhna ka van ngah tehlul em.

 

 

 

*** *** *** *** ***

 

 

“A ninawm. Ka hria ka hria. Ri tawh lo teh” tih pahin ka alarm chu kan chum ri pawp a. A tel lo va awm thei si lo, a rik a ning leh bawk si ang chi hi ka ni. Thoin bathroom ah ka lut a, ka tih thin dan angin tuilum sa ver vawrin ka inbual a, chu chuan tlem chuan min ti harh ve deuh. Dryer in ka sam ka chhem ro a, chu mi zawah ka khuih keh veka. Ka insiam zui nghal a. Mascara tlem leh lipgloss ka inhnawih a. Kei hi chu make up tello pawhin ka hmeltha sa tih hi ka thupui a ni ve reng renga.

 

 

Ka purse leh car chahbi ka la a, Ian-a room lamah ka va lut phei a, a lo ruak hiai a. A thawmhnaw dahna lamah ka phei leh a, tah chuan a lo insiam meka. Suit vutbuak rawng a ha a, a chhunah kamis var a ha a. A awm hlai tak mai chu a pauh larh a, kekawr vutbuak rawng tho leh pheikhawk dum a buna. Mahse a tie erawh hnawk nuaiin a lo la awm a.

 

 

Ka lam a rawn hawia, tawitein min rawn nuih saka. “Good morning” a rawn ti a.

 

 

“Good morning” ti a chhanlet pahin ka va pan phei a. Ka high heel bun chu chhuatah chuan a ri kurh kurh a.

 

 

“Diklo a awm em ni?” ka va ti a.

 

 

“Ka tie hi” tih pahin a then saka. “Marie i’n ka tie zawng zawng a lo su vek a, suih leh lovin a lo khai ringawt a”

 

 

“I tie a suih sak thin che amaw?” kan ti a.

 

 

“Aw” tih pahin a ring chu an thle kual vel a, a beng erawh a sen tan tan a.

 

 

“I suih thiam lo em ni?” nui lek lekin ka ti a. “Ka thiam hleithei lo” tiin min chhanga. A awm dante chu naupang inthlahrung deuh hi a anga, a biang a piai rep tak a ni ka nap ni.

 

 

“Khawi keiman ka lo suih ang” tiin ka bag khai lai chu chhuatah ka nghat a, a necktie chu ka suih saka. Necktie hi rawng hrang hrang a nei a, mahse an vai chuan a plain vek an ni.

 

 

“Ka suih nalh em?” tiin ka tie suih chu ka hmuh a. Nui chungin a lu a bu nghata. Nui chungin ka pan hnai a, a rimtui inkah chuan min zem chem chem a, ka ruh chuaktuahte chu an chaklo nghal vekin ka hria. A lu rawn kun hniamin keimah ngeiin ka awrh tir a, pawt tight in ka siam that sak nghal veka. Kan taksa a intawh zawng ringawt pawh chuan sawithiam theih si loh hian ka za chuai chuai a. Ka thinphu dawt dawt ri te chu a hriat phak hial a nia ka rinni.

 

 

“Kan zo e” tih pahin ka tawlhhnung leh vata. “Tukthuan i ei tawh ang” ka ti a, ka inher a, a pindan atang chuan ka chhuak vata. Inhnuai lamah chuan Marrie i’n chawei a lo siam mawlh mawlha. Dawhkan chu a mawi hlemai. Chutah chuan eitur chi hrang hrang, tui leh hrisel hmel tak tak a lo inchhawp dula.

 

 

Hna ka tanna ni hmasa ber tur a nih avangin Marie chuan eitur chi hrang hrang min siam sak hi a lo nia. A vai mai chuan ka ngainat em em chi vek an ni.

 

 

“I kal tawh ang le” tiin kan ei zawh chuan Ian-a chuan min sawm a.

 

 

“Lo va kal rawh. I hnungah ka rawn kal ang” ka ti a, pancake pakhat chu ka lak belh leha.

 

 

“Rawn tlai suh ang che” min ti a. “Tlai teuh lo mai” ka lo ti vata.

 

 

Thil eng emaw sawi tur ni awm tak hian a ding reng a, sawi tumin a ang zuau tihah a phone a rawn ri a. Inthlahrung hmel tak hian min rawn en a, Marie biangah a fawp a, a kal nghala. Kei pawh chuan ka ei zawh veleh Marie biangah ka fawp a, ka chhuah san veleha.

 

 

 

 

Inchhawng sang lian pui mai, ‘Cullen Inc’ tih inziahna bulah chuan ka ding a, chulai ka thlen rual rual chuan ka luh hmasak ber ni kha ka mitthlaah a rawn lang nghal uar uar a. Kha ni kha thian kan nih tanna ni leh hna har leh khirh tak ka thawh tanna ni a ni. Ka va luh chuan receptionist nu chu a lo ding vata, chibai min lo buka. Kei chuan elevator lam ka pan dinga. Kan inhmuh hmasak ber ni a min lo tihdan kha ka ngaituah chhuak a, ka nui ver ver a.

 

 

Elevator chak chi-ah zawk ka chuan avangin ka awmna tur chhawng pawh chu ka thleng hma khawp mai. Hmana Ian-a awmna chhawng ka thlen a min lo chhawn tunu awmna dawhkan kha a lo ruak huai a. Chutah chuan ka thu a, ka bag khai chu chhuatah ka dah a. Hlim ruk riauna ka nei. Hna han thawh leh chu a nuam em a ni.

 

 

Ka intihfel zawh hnuah vawiina Ian-a program ho chu ka en thuak thuak a, vawiin chu a awl dawn khawp mai. Mahse hetah leh hetah hian meeting tur a nei a nih hi.

 

 

Elevator rawng ti tengah chuan ka hawichhuak vata. Ian-a chu pawimawh hmel taka phone a midang be chungin a rawn luta. Ka thlen khalh hi a ring hau lovang. Ka surprise ve chak reng reng.

 

 

“Good morning Sir” tiin chibai ka lo buka. Rin loh hmel deuh hian min en hu a. “Engtin nge i thlen hman...?” tih pahin elevetor lamte chu an melh leh riha. Ka lo nuih seiha.

 

 

“Vawiin chhun dar 10 ah meeting i nei ang” inla professional deuhin smart takin ka lo ti a.

 

 

“A chipchiarin min rawn pe ang che” tih pahin a kal lehngal mai a.

 

 

*** *** ***

 

 

“Sir an rawn thleng a” a cabin a va dak de de chungin ka ti a. A laptop khawih laklawh lai chu a rawn hawi chhuak a. “Conference room-ah lo awm rawh se” a rawn ti a. Ka lu ka bu a, a light leh a AC ka on saka.

 

 

Peon pakhat chu an mamawh tur tui in tur vel la tura ka tirh hnuah chung mikhual ho chu conference room lamah chuan ka hruai lut a, an thutna tur theuh ka kawhhmuh a. An vaiin pali chauh an ni.

 

 

An zinga an hotu ber angah lang chu ka rin ai daihin ala naupang hmel viau mai. A sam chu a uk thim lam a ni a, a mitmu a hring nghalh mai a, a khabe kual a lang raih a, a hmui a sen chak mai bawk. 6’2ft ai chuan a tawi hauh lovang. A suit hak chuan a phuang tang mai a, a ban lian tak leh a taksa inkhaithli zaih mai chu chu chuan a ti lang chaing leh zual a. Tie a awrh lova a suit hnuaia a hak kamis chu chung lam a kilh kil lo va, chuta tang chuan a awm mam thlarh mai chu tlem a hmuh theih a, chu laite pawh chu hmeih=chhe thenkhat chilthli tlakna tham a ni. Kei ngei pawh chu ka meng pawng zawr mai.

 

 

Zep thu a cheng lo, chu pa chu a chhelo chiang alawm. “Mahse Ian-a nen a khaikhin tur chuan engmah hi tling zo a awm lo” tiin ka inhrilh a.

 

 

A lam ka hawi chho a, min lo nuih sen sen a. “Min en dik zo tawh em?” a lo ti sap a, a tawng dan chu Italian aw phawi a ni. Hei aia a lan sexy leh chuang dan tur hi engmah a awmin ka ring lo.

 

 

“Demetri Sarmentio” tih pahin a kut a rawn phar chhuaka, keimah emaw min chibai a tum ka lo ti hial.

 

 

“Ian Cullen. Ka hmu che u chu ka lawm hlemai” tiin Ian-a chuan a kut chu a lo chelh saka.

 

 

“Mr. Cullen, i tan nghal mai ang u hmiang” Demetri-a chuan a ti a. Ian-a chu a bu nghata, kan hmazawna dawhkan lam chu kan pan a. A lu ber thutna turah chuan Ian-a a thu a, a ding lamah kei ka thu a, ka hma zawnah Demetri-a chu a thu bawka.

 

 

Ian-a chuan a presentation pek tur chu a han tan a, Demetri-a chuan min lo en leh vawng vawng thin a, kan mit a intawn chang pawh chuan min rawn nuih mai zela. Chutih lai tak chuan Ian-a chuan dawhkan chu a rawn chum ri dawt a, ka phu chiang lutuk. “Ka duh aia a rin chu le. Tihpalh lutuk” tiin a han pha mawi ve bawka, tihpalh rilru tak tak erawh a pu lem lo. Enge maw a hriatni?

 

 

“Kan in man dawn riauin ka hria” tih pahin Demetri-a chuan Ian-a chu a chibai a, Ian-a pawh chuan lawm takin a lo chhang let ve maia.

 

 

“I hming kha ka lo hre chiang miah lo va Miss....” tih pahin Demetri-a chuan ka lam a rawn hawi a, tawng tuma Ian-a lo ang zuau chu ka lo tawng khalh vata.

 

 

“Alison. Alison Brown” nui ver ver chungin ka ti a. Ian-a chuan min rawn en a, a hmaite chu sen hlur khawpin a nelawmloh nia. Min ti hlau lek lek zawk.

 

 

“Miss Brown, kan la inhmu leh dawn nia” Demetri-a chuan a ti a, elevator lam an pan nghala.

 

 

Ian-a chu a room-ah a lut nghal hmak a, kawngka lah chu a khar na em em mai lehnghal. A awm dan chu a awihawm loh zawk. Ka thaw hak a, file ka dawhkana awm ho chu ka rem fel zung zung a. Ian-a sign ngai ho chu dahkhawmin minute reilote hnuah a pindan kawngkhar ka va kik a.

 

 

“Eng nge i duh a Miss Brown?” min lo ti deuh kher a.

 

 

“Dik lohna i nei em ni?” ka ti a.

 

 

“Khatiang ang reng khan mipa dang rilru lak pen pawh i lo thiam a ni maw Alison? Chu pawh ka awm lai kher lehnghalin” min vin deuh thawt a. “I lo khawloh viau dawn hi”

 

 

Ka ding tlawn reng ringwt a. Mi khawlo min tia maw? Tunah khan chu chu em ni a sawi? A ni thei lovang. Kei hi ka mawl em ni? Amah zawk hi alawm khawlo chu. Ka chil ka lem ri khawlh a, ka mittui chu tla mai lo turin ka dang a. A dawhkan bulah chuan pheiin a file ho chu ka dah a, ka let lehnghala. Mahse ka hawi let lehngata. “Nula anga insawia Miss Brown ka intih nachhan chu nangmah ngeiin hemi room chhungah hian ‘Cullen; hming ka awh vang chauha neiah min puh a, nangmah vekin i tan chuan he inneihna hian engmah awmzia a neih ve loh thu i sawi a nih kha. Nakuma kan inthen leh nghal tur thu sawitu pawh nangmah hi i ni. A nupui anga min pawm lo tu hmaah chuan duh leh nula ang pawhin ka insawi ang chu. Chutiang anga inneih thinte chu miin mi khawlo an ti thin a nih chuan kei pawh hmeichhe khawlo ti a koh tur ka ni ve aniang chu”

 

 

Min en renga, a mitmengah chuan a rilru a nuam zan bik lo a ni tih ka hre thei. Mahse helaiah hian ka ding reng thei lo. Ka inher a, ka chhuahsan nghal a.

 

 

 

 

CHAPTER -7

Lehkha han chhut nilen thak mai chuh kut a aikhirh lo chauh alawm le. Ian-a secretary ni lai Lucy i’n nau neih chawlh a lak avangin a chawlh chhung chu a ai ka thawk rih dawn a ni. A changin email thawn chhuah tur chhut angai a, a chang leh ngaihdam dilna chhut leh a ngai a. Chutiang reng reng chuan ka tul nileng a, ka mawngte chu a kham ut ut mai.

 

 

Thawk kan la vang vanga, ka thil chhut lai chu ka chhunzawm lehnghala. Ni a tla tawh tih reng pawh ka lo hre lo. Ka hnathawhah chuan ka lo insawrbing lutuk a ni ang, ka awmna lam pana ke pen thawm takngial pawh chu ka hre lo. Hrawk thian ri ka hriat chhuan ka hawi chho vata.

 

 

Ka tarmit kar atang chuan a mitmu pawl ram maia inthiam lohna awm chu ka han hmu thei a. A rang a rangin ka tarmit bun lai chu ka phelh vata, ka biang a sen nghal tawn tawna.

 

 

“Dar 6 a ri tawh a nia Alison. I hawng ang” a aw thawp sat chuan a rawn ti a. Ka dawhkan chu ka en a, email la thawn chhuah loh ho chu vawiin ngei a chinfel vek ka duh bawk si. A nih lo chuan naktuk a tih tur a tam lutuk ang. Ka nui seih a, inthlahrung angreng tak hian ka melh chho a.

 

 

“Ka la haw thei lo. Hnathawh lai ka la nei a. Lo va haw rawh. Ka rawn um ang che” ka ti a. Ka dawhkana ka lehkha dah ho chu a rawn thlek a. “Khangte chu naktukah i chhunzawm mai dawn alawm” min rawn ti a.

 

 

“Chutianga hnathawn lai kal san rikngawtte chu ka duh hleinem. Ka zawh hma chu ka thutna hi ka thawh san thei lo a ni” ka ti a, ka aw ki ah chuan sawm luih chi ka nih loh zia a hriatthiam ngei ka ring.

 

 

Min en vung vunga, a rum nghut a. Elevator lampan chuan min phei san ta a. Kawngka a inkhar thleng chuan min enreng a, a lungawi vakin a lang lo. A kal hnu chuan ka hnaah bawk chuan ka insawrbing leh a.

 

 

 

*** ***

 

 

“Ka zo ta hlawl mai” tih pahin ka email hnuhnung ber tur chu ka thawn chhuaka. Lehkha engkim chu a awmna hmun turah thlap ka dah fel a, drawer kalhin computer ka off a. Ka bungrua ho ka lak fel zawhah elevator lam chu ka pana.

 

 

Sana ka en chu ka phu thelh a ni. Zan dar 8 a lo pel der tawh. Ka ril a tamin ka chau a, ka mut pawh a chhuak. Ka iPhone ka pawrh a, natuka Ian-a programme tur ka en a. Elevator in a ground floor a thlen thleng chuan ka buai tluan thak. Beng a phone chuktuah chungin ka chuaka.

 

 

“A lo chhuak ve ta hram e”. Ka hawi kual vata, bathlar thutthleng atang chuan Ian-a a rawn tho chhuak a, a jacket hak lai chu a siam tha a.

 

 

“Eng nge khatahte i lo tih reng a?” ka ti a.

 

 

“Ka lo nghak che. I hre mai lo em ni” nuih insum deuh hian min chhanga. A biang sen tawn tawn chu thup a tum hle mai. He pa hi chu a a deuh tak tak a nih hi.

 

 

“Thuttthlengah khan ka lo muthlu der ang tih ka hlau khawp mai” tih pahin chhuahna kawngkhar lam chu a pana.

 

 

“Min lo nghak rawh ka ti reng reng hleinem” tih pahin ka nui a. A rawn inher a min rawn en a.

 

 

A car dahna kan thleng a, kawngka a hawnga. “Lawkin, engtin nge ka car saw ni dawn?” ka ti a. “Philip a’n a rawn khalh haw mai ang” a ti a. A sawi zo chiah tihah Philip-a, Ian-a driver chu a rawn chhuak a, chahbi dilin ka lamah a kut a rawn phar chhuaka. Nui seih chungin ka chahbi chu ka pe a. “Fimkhur takin i rawn khalh haw dawn nia” ka ti a.

 

 

Ka luh fel hnu chuan Ian-a chuan kawngka min rawn khar saka. Car chu helin a thutna turah ani pawh chu a rawn thu luta. Car ri dam diai leh kan tlan zawnga thlifim rawn thaw heuh heuh chu tlangchhip atanga khua chuan ang maia nuam lehhahdam thlak a ni.

 

 

Thil eng emaw ka hrechhuak thuta. “Naktukah Gala a i kal a ngai dawn ania” tiin ka hrilh a.

 

 

“Ka kal lovang” tiin min changa.

 

 

“Charity tur a nia, i kal ngei ngei a ngai a ni. A pawimawh lutuk” ka ti a. A ngawi vang vanga “A nih a tha alawm” a ti a.

 

 

“Umm.., chhuah dunte in duh ve em?” ti a zawh pahin ka hawisawn vata, pawn lama thingkung kal zut zut chu ka thlir daiha. “Chutiang ka ti ngai lo” tiin min rawn chhanga. “Engtik lai mahin” a rawn ti leha.

 

 

Tukverh darthlalang chu ka ngheng a, pawn lam chu thlirin ka maimitchhin san a. “Kan thleng ta e” tih pahin car engine chu a ti thi a.

 

 

“In kan thleng ta hlawl mai le” tih pahin ka thaw hawlha. Ka purse ka la anga, ka khumah ka mu hahchawl veng veng thei tawh ang. Ian-a chuan a kawngkhar chu a hawng a, mahse a hawn full hmain a tawp chawta. Ka lam a rawn hawia, a mitah chuan a kal ka dil ta emaw tih tur hmel hi a pu a.

 

 

“Eng nge?” ka lo ti hu a.

 

 

“Eng nge i sawi kha?” tiin min rawn zawta.

 

 

“”In kan thleng-“ kan ti chu ka tawp chawta. Chutia min zawh chhan chu ka hrethiam ta. ‘In’ ti a ka sawi vang a ni.

 

 

Ka hrawk ka thian kharh a, Car kawngkhar chu hawngin ka chhuak a, a zawhna pawh chu chhang lovin hmahnawh takin inchhung lam ka pana. “Ka inthlak anga, chuan zanriah kan ei dawn nia” a tih zawhin Ian-a chu a room ah a lut a, kei pawh chu ka room lamah ka lut ve nghala.

 

 

Ka lut chiah chu chhuatah ka bag ka thlak thla a, ka high heel bun hrehawm zet mai chu phelhin khumah chuan ka thal tawpa. Rei lote ka chhing sek anga, chumi zawhah ka inthlak ang. Ka mit ka chhinga, mahse reiloteah eng ang maiin ka inperhtho nghala.

 

 

Tu emaw ka pindanah chuan rawn lutin ka puan sin a rawn hlim a, “Engkimah khan ka tihpalh lutuk Alison. Muttui le” a rawn ti angin ka hre tlat. Amah kha a ni emaw ka ti a, mahse a ni lo nasa mai. Ani chuan engtikah mah a tihpalh thu a sawi ngai lovang. Ka lo muhil sek a nih dawn hi.

 

 

*** ***

 

 

“Ka ti thei lovang” tiin ka hriat tham lekin ka phun sap a, ka tawlh hnunga. “Ni lo, ka ti thei tur a ni” ti a inti huaisen luiin ka pen hma leha. Keima zawhna ngei chuan min tibuai a ni. Emily chu ka khumah a thu a, a ha khawng ri bauh bauh chungin ka awmdan vel chu min lo thlir reng ringawt a.

 

 

“Ti mai mai teh a. I in tat lut tawh ta sa sa” ti chungin ka phone chu ka lamah a rawn vawr pheia. Chhuata a tlak keh vek hmain ka lo dawng hman hlauh mai. Ka va melh let hraw a, ani erawh hrelo ang hmakin a lo awm a.

 

 

Hei hi ka ti ngei tur a ni. Duhthlan tur dang ka nei chuang lo. A number chu ka dial a, ka nghak vang vang a. Rei fe hnuah min rawn chhang hrama.

 

 

“Hello sissy” Ashley-i chuan min rawn ti fiama.

 

 

“Enteh, zaninah tih tur i nei em?”

 

 

“Yup” tih ringawtin min rawn chhanga.

 

 

“Lo ngaithla teh. Thil eng emaw min tihsak thei angem?”

 

 

“A tehreng mai”

 

 

“Ian-a hi charity pualin gala a a kal angai dawn a, kalpui tur a mamawh si a. Kei lah ka lo nuam sam lo nen, khawngaihin ka ai min lo awh sak thei mai angem le?” beisei nei takin ka zawta. Thehreh ang maiin a reh vawng vawng a, a dah tawh emaw ka tih hial hnuah a thaw ri atang chuan phone ala keng reng a ni tih ka hre thei ta hram e.

 

 

“Ashley?” min chhan lawk loh takah chuan kan ko nawn leha.

 

 

“Kal ve ta ringawt ila i lungawi dawn em ni?” tiin min rawn zawta.

 

 

“Tun ang hian sawi lawk lo ila chuan ka lungawi kher lo maithei a ni”

 

 

“Nia, i tih tlatte chuan”. Ka thaw huai mai.

 

 

“A tha lutuk. Dar 6 ah lo inpeih ang che” ka tih zawh chuan ka aw khur a hriat hman ka hlauh avangin rang takin phone chu ka dah nghala. Ka kun vang vang a, hawi chhuakin Emily lam hawi chuan ka nuisang a. A mit atang chuan ‘i thil tih hi i chiang chiah maw’ tih zawhna hi min la zawt reng a ni.

 

 

“Ui leh, sana chu” tiin rang takin ka inthlak a, pencil skirt leh blouse ka ha a, ka sam ka khuih thuak thuak a, lip gloss inhnawihin mascara tlem ka inhnawih bawk a.

 

 

“Ka va thlah ang che” Emily chuan a ti a. “A ngai lo. Ka rawn let leh ang” tih pahin in atang chuan kan chhuak a, motor kan dahna garage lam chu kan pan a.

 

 

Dawhkan ka thlen chuan chhuatah ka bag ka dah a, dawhkan a file awm ho, financial department a thehluh hma a Ian-a enfel tur ho chu ka la khawma. A kawngkhar chu vawihnih ka kik karh a, lut tura min rawn chhawn hnu chuan ka luta.

 

 

A thutthlengah thuin a laptop ah thil a lo chhiar mawlh mawlh a, suit dum a ha a, tie erawh a awrh leh ta pek lo.

 

 

“Tie i awrh lo leh elaw?” ka ti a. A rawn hawi chhuak a, a bu nghata. Ka lu ka thing a, thil dahna chhuar lam chu ka pana.

 

 

Chu laia a dah tie sen chu ka la a, a rawngte pawh thlak ve zeuh zeuh angai alawm mawle. Nuisang chungin a tie ka lak chhuah sak chu ka entir a. A nui hak a, rawn tho chhuakin ka hmaah a rawn dinga. Tie chu awrh tirin ka suih sak nghala.

 

 

“Ngati nge? Ti hian min tihsak ziah tawh dawn em ni?” tiin min zawta.

 

 

“A nih hmel khawp mai” tih pahin a tie chu ka pawh chip saka, rem leh nalh takin ka siam rem saka.

 

 

“A nalh lutuk. Marie lah hi thawh tur a ngah sia, a buai thei lutuk a” tih pahin a thutna ngaiah bawk chuan a let leha.

 

 

“Heng hi i lo en fel dawn a nia” tiin ka file ken ho chu a dawhkanah chuan ka chhawp saka. Chiang takin ka mitah min rawn en a, a bu nghat a.

 

 

Chhuak lehnghal turin kawngkhar lam ka pana. Ka chhuah hmain “I zinpui tur pawh ka thlang fel vek tawh e” ka ti a, ka lam a rawn hawi hmain rang mangkhengin ka chhuak nghala. Ka thutna dawhkan ka thlen thleng chuan ka thin chu a phu ri dup dup a.

 

 

Engvanga ka thinphu chiam nge a nih hre lo mah ila chhan chu a awm a ni ang. Kumkhua a ka chan tawh tur chu ka hlauthawng a ni maithei. Chutih rualin ani chu kumkhuain ka ta a ni ve dawn tlat lo a tinni.

 

 

“Eng maw i lo tih a?” a aw ri chuan ka ngaihtuahna khawvel atang chuan min pawt tho zawka. Ka dawhkan bul chetah chuan a lo ding reng a, a meng phawk deuh hru a. Aw..., a mitmengte chu a van han mawi tehlul em. Ka aw kan thian kharh a.

 

 

“I zinpui tur mi ka rual fel ka ti” ka ti a, hnathawk laklawh awm deuhin computer chu ka bih san leh daiha.

 

 

“Tunge chu chu?” lawm vak lo hian min rawn zawta.

 

 

“Tunge a nih i rin?” tiin ka zwt leta. Ka mitah tak chuan min en vang vang a, a lu a la sawna. “Ni lo, chutiang chu i ti thei lovang” a aw atang chuan a hlauthawng ni berin ka hria.

 

 

“Mahse ka ti sia lawm” tiin ka nui a.

 

 

“Engvangin nge i tih kher?”

 

 

“A chhan chu ka sawi lawk tawh avangin. I la hre reng em?”

 

 

A lu a dawm a, chhuatah chuan a vei tawn seka. A changin a chal a dawm a.

 

 

Ka thutna atanga tho chhuakin a hma zawnah ka va ding a. “I nervous em ni?” pangai takin ka ti a. A vanvadaka, chhuatah chuan a vei tawn leh chhena. A hma zawnah tak lo din khalhin ka lo danga.

 

 

“Eng nge?” a lo ti hmuk a. A kut chu lain thlamuan tumin ka vawn saka. Dik tak chuan kei hlei hlei hian a kut vawn chu ka thlamuanpui zawk a ni.

 

 

“I ti ngei tur a ni Ian. A ni chu i vawikhat hmuhna atangin i hmangaih tawha, chuvangin tlawm san suh. Ti ngei ang che. I ti thei tih pawh ka hria” a mit a en kar chungin ka sawi a, amah ai chuan a thlarau zawk ka hrilhin ka hria. A bu nghata, ka lo nuih let vata.

 

 

“Ka lawm e” a ti sapa.

 

 

“Gala atanga in rawn haw hunah lawmthu chu min la hrilh zawk dawn nia” tih pahin ka siai zeuha.

 

 

“Ti vat vat ila, dar 6 ah i va lam hman a ngai dawn nia” ka ti a, ka hna lamah ka let leh thuai a.

 

 

Dar 4 leh a chanve velah ka inti fel a, kik pah kik chuang lovin Ian-a cabin-ah chuan ka lut phei a. “I kal tawh ang” ka va ti lut nghal deuh tlawnga.

 

In kan thlen veleh inbual turin bathroom-ah ka nawr lut nghal vata, a thawmhnaw bawm haiin a ken tur ho ka thlan saka, ka pack fel sak veka.

 

 

Towel veng chungin bathroom atang a rawn chhuaka. Ka lo melh deuh hu a. “I inmet fai vek elaw?”

 

 

“Aw, tinge nalh lo i ti em ni?”

 

 

“Aih..,ka tih awmzia chu Aw. Ni lo, i khabe hmul kha i inhmeh ka tia, mahse Ashley chuan i fai veng khan mawi a ti zawk ang che” ti a nuih chungin a suit hak tur ka thlan sak chu ka pe a. Lawm taka la in a ha nghala.

 

 

Bow tie ka awrh tir thlapa, chumi zawhah a sam awmdan tur ka siam sak leha. A chhip atanga a ke ler thleng chuan ka en chhuak veka, a chheloin a van nalh ber tehreng em. Hmeichhe rualin a an bawr luai luai tur ka hmu lo ringawt pawh hi ka tan chuan vanneihna zawk a ni.

 

 

“I nalh lutuk” ka ti a.

 

 

“Tak takin ka lang tha tak tak maw?” tih pahin darthlalangah chuan a in thlek kual vela.

 

 

“Chhelo tih piah lam i ni” ka lo ti a. A in enna darthlalang atang chuan kan mit leh mit chu a intawng chata, rei vak lo chu kan inmelh vang vanga, mahse ka hawisawn ta vata.

 

 

“Hei aw, a tawp berna a tan” tiin a rimtui inkah tur chu a taksaah chuan ka kah saka.

 

 

“Le, i hman ta. Tunah chuan hmahmawh takin kal tawh rawh le. Hmeichhia an innghah tir ngai lo a nia” ka ti a, pindan atang chuan ka nam chhuak rawk rawka.

 

 

“Lo kal ve mai la” a rawn ti uk a.

 

 

“Naupang ang maiin awm suh. Kal vat rawh” ka lo ti vata. Kal zawng ka kal ve chak tehlul mai. Mahse zanin atana rilru na turin ka inbuatsaih lawk vek tawh.

 

 

“A nih duhsakna min hlan rawh” tih pahin min rawn nuih a.

 

 

“Good luck “ tiin nuisangin ka lo chhawn a. A kal liam thleng chuan ban kan in vaia.

 

 

Ka thaw chhuak haka, mahni inbengdai turin ka mit ka chhing vang vanga. Ka pindanah lutin intih hahdam nan tuilum in rei tawk tak ka inbual a, chumi zawhah pyjama ka ha a, tawnzau nen. Mu turin ka khum lam ka pana. Chutih lai tak chuan ka phone message tone a rawn ri a, rang takin ka hawng vata.

 

 

‘I thil min tih sak zawng zawngah hian ka lawm lutuk e Alison. Vawiin hi ka ni hman tawh a zawnga ni nuam ber ala ni’

 

-Ian

 

 

 

 

 

Chapter- 8

 

 

* Ian's POV *

 

 

"Good luck " tih paha a nui hmel mawi tak mai chuan min ti nervous lek lek a ni. Ka nuihsak a, inhnuai lampanin ka chhuk sana. Ka han hawi let leh pawh chuan nui sang chungin min lo la vai lauh lauh a. A nui hmel chuan sawithiam si loh hian lungawina riau min pe a. Ashley-i ka hmuh hmasak ber tum kha ka mitthlaah a rawn lang nghala.

 

 

 

Hmeichhe lian lutuk lo. sam dum. felfai taka tukhuma tawn kawh teuh a ni a, a biang chu tlem a tai bawk a, a thawmhnaw par hak nen chuan a inchawih angreng khawp mai. A mah a duhawm ang bawkin a thawmhnaw hak pawh chu a duhawm a ni. A strawberry ice-cream ken lai chu tui ti takin a lo liak hliam hliam a. a tui bawk a niang a hnar hmawra a tih kai pawh chu hria awm pawhin a awm lo. A hnar hmawrah a kai tih a hriat meuh chuan a lo tuiral tan tawh a. A chal a chuar a, a hnar chu tuai faiin a strawberry ice-cream ken lai chu a liah chhunzaw, lehnghal mai a. Ka lo nui chhuak haka.

 

 

Chumi ni atang chuan chu hmeichhe duhawm tak Ashley-i chuan ka thinlung a luah ta em em a. Chu ka duhna chhete chu hmangaihna lipuiah a kangkai dawn a ni tih reng ka lo ngaihtuah pha lo. Vawi tam tak biak ngei tumin ka hel ve thin a, mahse ka tum ve leh hian eng emaw reh lohna emaw, kan inkarah midang rawn intla zep emaw an awm ziah zel.

 

 

A tawp a tawpah Alison-i vang liau liauin biak theihna hun tha ka nei ve dawn ta a nih hi. Thil ka lo ngaihtuah nasa lutuk a niang, tuin emaw ka dara a rawn vawn chuan ka phu dawrha. Marie chuan hmuhnawm tih hmel zet hian min lo en reng a, chutia kan phu dawrh chu a nuih a zat hmel khawp mai.

 

 

"Thlawh chhuah i tum mai elaw? I van han chhelo em em ve mawle" ti a nui var var chungin ka coat haka vaivut kai lo pui chu min rawn ben fai saka. Ka lo nuih let ve a.

 

 

"Khawiah nge chhuah i tum a?" tiin hlim sang hmelpu chungin min han ti a, a mitmengah chuan nu hmangaihna mitmeng ka hmu tel thin. "Gala-ah. Alison i'n a hrilh lo che em ni?"

 

 

"E ni dawn tak. Min hrilh thlap kha maw' a han ti a. "A nih khawnge amah? A lo zui ve dawn lo che em ni?" tih pahin min rawn thlek deuh hu a. Chhan ngaihna mai ka hre lo. Alison-i chu a hmangaih a, a fanu ang chiahin a en a, chumai bakah ka nunhlui a thil thleng zawng zawng kha chu Alison-i hian min la theihnghilh tir theih mai a ring tlat a ni. Mahse engtin nge maw hmangaih hmasa ber chu an thi thei lo tih thu hi kan hrilhfiah dawn ni?

 

 

Ka rin ang ngei ngeiin chik zetin min en a, Alison-i pindan inkhar phui thiap mai chu a va thlek deuh kher bawka. Mahse thawklehkhatah a hmel a inthlak thut a, ka rilru a rawn hmu thei emaw tih mai tur a ni. "Ani nen khan in kal dun dawn a ni tiraw?"

 

 

"Engtin nge chu chu i hriat a?" ka ti ta ringawta.

 

 

"I mitah khan a inziak vek alawm. Alison-i a pindanah a awm bawka. Awlsam takin nang leh amah inni dawn tihte chu a hriat theih mai alawm" tiin min chhanga.

 

 

"Thil eng emaw hrilh che ka duh a ni Ian" a ngawi vang vang hnuah a rawn ti a. Thil eng emaw sawi tumin a rawn ang zuau a, mahse a ka chu a chip leh ta zawka. A thaw chhuaka "Eng tikah emaw i la hrechhuak dawn tho" tih pahin ka darah a rawn beng thak a, choka lam min pan san a.

 

 

Eng chu nge niang ka la hriat chhuah tho tur chu? Chu thute chuan ka rilru a sawi ri dawt a. Mahse chutianga ka din reng zawngin hunin min nghak ve si lo. Rang takin ka Car awmna lam ka pan a, Phillipe-a chu tlan chhuak nghal turin ka ti a, Ashley te in pawh reiloteah kan thleng thuaia.

 

 

Ashley-i leh Alison-i ten university an kal dawn khan an pahnihin apartment an luah dun a, chuvangin a nu leh pa te bulah an awm lo a ni.

 

 

An in zawnah tak car chu a ding a, maimitchhingin thawk kan la vang vanga, Alison-i thusawi kha ka rilruin ka ngaihtuah chhuak leh a. "Ka ti thei ngei tur a ni" tiin ka phun sapa, chu thu chu a dik zia ka lantir ngei bawk ang. Kawngka chu hawngin pawnah ka pen chhuaka, kawngka bula thawmhnaw sen mawi tak nena a lo ding kan han hmu chu ka thaw chhuak haka.

 

 

A pawnfen hak chu mermaid thawmhnaw ang maiin a chung lam a puar deuh a, hnuai lamah zuihin a tlangah a arh thla a. A kawr hak chuan dar bahna a nei lo va, a hnute chung zawnah chuan a intuam phei tawp hi a ni mai. Makeup a hmang nual a, chu chuan Alison-i min ti hrechuak nghala. Ani kha chuan makeup a ngaina ve vak lova, a chhan chu natural a a that em vang a ni. Chutiang chuan vawikhatmah anni pahnih chu ka la tehkhin ngai lo. Vawikhat mah Ashley-i chu tu hmeichhe dang mah nen ka la khaikhin ngai lo va, tunah tih loh hi chuan.

 

 

Chhung ril atang eng emaw tak sawi turin min rawn nawr a, zanin hi kei leh Ashley-i tan liau liau a hun ruat a ni tih ka hrechhuak nghal thuai a.

 

 

Ka hma zawnah a ding a, ka hmai bula a kut a rawn vai takah chuan ka harhchhuak thuat a. "Tihpalh" tiin thupha ka chawi nghala.

 

 

"Va pending rei ve" a rawn tih takah chuan thupha ka chawi nawn leh a. A thutna lam tur kawngka chu ka hawn sak a, a luh pah chuan "I nalh hlemai" kan ti ve hram a. Sen tawn tawn chungin a sam chu a bengah a zepa, "Ka lawm e" a ti sapa.

 

 

Rei lutuk lovah kan hmun ruat pawh chu kan thleng thuaia. Ka thutna atanga ka chhuak chu eng de zawr zawr chuan ka mit a rawn ti vai a, ka mit ka chin hnuah ka meng nawn leh a. Chulai bul velah chuan thlalatu eng emaw zat an lo awm a, an camera chu an rawn hmet de zawr zawr renga. A then chuan duhtawk an ngah thei lo emaw tih mai turin an hmet nawn mawlh mawlh a, thenkhatin hrui sen an thlun chu rawn pal tlangin microphone nen min rawn pan chilha.

 

 

"Enga tinge a?" tiin Ashley-i chu ka hnungah a rawn biru vata. Chung ho rawn pun khawm chhan chu Ashley ka chhuahpui veng a ni tih ka hrechhuak nghala. Hrep tak hian. Engvangin nge hetiang hi ka paltlang a ngai dawn a ni tihte ka lo ngaihtuah lawk loh reng reng le?

 

 

"Eng nge i nghah?" Ashley-i chuan min rawn ti a. "Engmah" tih pahin a kutah ka vuan lawka, luhna kawngkhar awmna lam chu ka panpui nghala. Kawngkhar kan thlen dawn chuan ka vawnna chu a thlah a, thlalatu ho hmaah chuan second 3 vel a lo in pose hmanhmawh a, rang takin inchhung lamah ka pawt lut nghala.

 

 

Security guard chuan kan kalna tur hall lam chu min pan pui a, chutiang anga in mawia kan han lut chu Ashley-i pawh a meng zau ngang mai. Engkim mai chu rawng pawl leh vara chei a ni a, poster lian takah naupang rethei ho thlalak a chuang nuala, stage chungah chuan lian takin a kum 25th na kan lawm tur thu chu a lo inziak kuau bawka. Chulai hmuna lo kalte chu nalh tak tak vekin an inchei a, mipain suit an ha vek bawka. No an dawm a, der tih hriat tak hian an innuih hlawma. Helaia rawn kal tam zawk hi chu a der mai an ni.

 

 

Ka bul chiaha ding hmeichhe pakhat chuan stage a hralh chhuah tura an dah lunghlu a siam thi chu mittla lo chauh hian a lo thlir dauh dauh a.

 

 

"Mawi i ti hlawm em?" tiin ka va zawta.

 

 

"An vai mai khian ka lung a dum vek" tiin min chhanga.

 

 

"Vawiin nuam takin hmang ang che" ka tih chuan a bu nghata, a thiante awmna lam min pan sana. Stage lamah chuan pheiin chung lunghlu ho chu ka en kual a, a khawi nge tha a nalh ber tih pawh ka hrethiam ve lo. Ka tan chuan lunghlu pian hrang hrang nei a ni deuh tawp mai.

 

 

"Puih theihna che ka nei em Sir?" tiin chulaia duty pa chuan min rawn ti a. Lem zet hian min rawn nuih a. Suit a ha a, a kawngah biakhlatna a hreng bawka.

 

 

Bawm chu ka ennawn leh a, chu pa lam hawi leh pah chuan "A man to ber chi kha min han pe teh" ka ti ringawt a. Chu pa chuan min thlek zeuh a, lehkhaah eng number emaw hi a ziak a, thil ngai dang min zawh pawh chu ka lo chhang nghal vata. Ka kal leh dawn lai chuan thi pakhatte chuan ka mit a la riau mai. Chain pangaiin a kual a, a hmawrah tuimal far anga siam lungthlu a awm a. Ka mitthlaah Alison-i a rawn langa. Chu thi chu a inhmeh ngawt ang le.

 

 

Ka lu ka thing vata, engvangin nge maw ka lei sak rikngawt ang ni? Ka tan engmah a ni hleinem.

 

 

Mahse i thian a ni alawm tiin tu emaw hian hnunglam atang min rawn hrilha. Thian maw? Hetia ka ngaihtuahna ka biak fo dawn chuan mi a ah ka chhuak har tawp lovang.

 

 

Rang takin ka inher a, bar awmna lam ka pan vata. Whiskey no 1 ka tlak pap a, ka hrawk a sa thla ham ham a.

 

 

Mitin mai chuan aw rawn chhuahna lam chu kan hawi thup a, mipakhat, nalh taka inchei a rawn ding chhuaka.

 

 

"Tlailam chibai vek u. Adam Swift, Light Foundation dintu ka ni e. Kan kum 25 na min lawmpui tura lo kal zawng zawngte chungah lawmthu ka sawi nghal bawk a ni. He pawl hi ka rilru luahtu ber a ni a, ka tan chuan ka chhungkaw pahnihna a ni. Helai hmuna mi harsate leh chanhaite tana ui lo va pawisa rawn thawh thinte hlim leh nui hmel ka hmuh ringawt hian a ropui ka ti. Eitur nei lo tam tak an awm a, damdawi a inenkawlna tur nei lo damlo tam tak an awm bawk. Anni chuan i tanpuina kha an mamawh a, helai hmuna i sum i lo thawh ve hian tute ta emaw chuan vantirhkoh i ni ngei ang. Zaninah hian helai hmunah thi kan zuar chhuak a, heng leina atanga kan pawisa hmuhte hi a bo a bang awm lovin mi retheite chhawmdawl nana hman chhuah tur a ni a. Tunah mai khah kan tlereuh zinga hlu tak 'The Sparkling Shine' chu Mr. Ian-a hnenah hralh chhuah a ni a, i pawisa kha naupang cancer veite tana hman chhuah tur a ni. Mr Ian-a leh a thil leisak dawngtu tur a nupui duhawm takte malsawmna dawng zel rawh se. In vaiin zanin hi hlim takin hmang ang che u"

 

 

 

A sawi zawh chuan stage atang a chhuk a, mipui ho chuan kut an lo beng dur dur a, thenkharin ka lam an rawn hawi bawka. Ani lah khan ka nupui tana ka lei angah a rawn la sawi zui.

 

 

Ka darah Ashley i'n min rawn vuana. "Lam ve ang" tiin ka kut a rawn vuana. Hall chhungah chuan music a ri fan raih a, light pawh chu an rawn ti dim nghal vek bawka. Ka phur hran lo khawp mai.

 

 

"Khawngaihin" ti a min ngen takah chuan lam tual lamah kan inkai phei ve a. Ka darah min rawn vuan a, keiin a kawngah ka lo vuan let ve a, rimawi rem chuan zawimuangin kan insawi duna. Kan nui a, kan titi dun paha. Ka thil hriat duh ka zawta, aniin a hriat duh min zawt ve bawka. Chu lam tualah chuan hun tha tak kan hmang dun a ni.

 

 

Kan lam zawh veleh Ashley chu ka hruai hranga, a tana ka lei thi chu ka phawrh chhuak a.

 

 

Ka kuta ka thil ken a hmu chu a ka a hup nghala. "The Sparkling Shine maw?" tiin phur takin min zawta. Chu chu a hming pawh a ni mahna, ka hre ve lo le. Adam a'n a puan lai khan zuin in ka buai lutuk a, chiangin ka lo ngaithla ve tlat lo.

 

 

"Ka ta tur maw?" a tih chuan nuisangin ka lu ka bu a. Min rawn kuah a, kei pawhin rang takin ka lo pawm let ve a. Chu hun chu a ni hman atanga ka lo suangtuah thin chu. Tunah tak hian ka thinlung a hlim a, nuam ka ti veng veng mai.

 

 

"Ka lawm lutuk" tih pahin thi chu a la a, a awrh nghala.

 

 

"Eng nge ka an?" tiin min rawn zawta.

 

 

"I mawi lutuk" tiin ka nui sanga. A thiante bul lamah let lehin a thi dawn thar chu a va hmuh tir ve hlawma. Kei erawh bar lamah let lehin ka ngainat ber bourbon ka thlit tira.

 

 

Ka in lai tak chuan hnung lam atang min rawn beng a, ka thil in lai chu ka hak thelh a. Tunge a nih tih hre turin ka inher kher angai lo, mipakhat bakin chutiang chuan min rawn ti lovang. Ka bestfriend Drake-a.

 

 

"Ekhai aw...!" tih pahin ka hmui ka tuai faia.

 

 

"Kei pawn ka ngai khawp mai che" tiin a nui vur vura. A dik, kei pawhin ka ngai takzet. Ka hmuh hnuhnun ber kha kan inneihni kha a ni a, chu pawh thla 5 dawn a liam leh tawh.

 

 

"Khawiah nge i awm daih a?" tiin ka lo zawt thuaia.

 

 

"Sumdawnna lamah" ti a min chhan pahin ka thil in bang chu a rawn tlak zo veka. Kei chuan ka lo en haw ringawta. "I n upui nen in rawn kal an ti che a" a han ti a. Nupui a!!

 

 

"Ka rawn kalpui te chu-" ti a ka sawi lai chuan min lo pawtchat thuai a.

 

 

"Ka hria. Ashley i rawn kalpui a ni tih chu"

 

 

"Engtin nge i hriat?" ka o ti nghal vata.

 

 

"Ka date in min hrilh mawle" tih pahin ding lamah a lu a thle zeuh a, a thlekna lam chu rang taka hawi nghalin ka tum loh deuh ka va hmu a. "Emily maw?"

 

 

"In ni tih ka lo hre ve lo reng reng". Drake-a mit chu hmeichhe sambuang, pitar thil sawi nuih pui bawk bawk lamah chuan a fu rana. Hei hi Drake-a awm dan thin a ni lo.

 

 

"A nih nang ve hi?" min rawn tih chuan hrethiam lo zetin ka no dawm lai chu ka lo lek kang a. "In inneihna chungchang kha a nia ka tih. I hun kal tawhah thil serious tak mai i thlen tira. Alison-i te ang hmeichhe tha nupuiah i nei leh a, tichuan tunah ani vang sawn i kalsan leh a" ti a ner sung chungin Ashley awmna lam chu a melh pheia. Ani lah chu mipa rual hmaah a lo titi suam suam a. High school a mipa dang a biaka ka thik thin nen, chutiang chu ka nei ta hau lo mai.

 

 

Eng vang nge ni ta ang?

 

 

"Ka hmangaih a ni. Chuanin ka hmangaih hmasa ber a ni bawk" tiin ka chhanga.Ani chu a hria tlemte te zinga pakhat a ni. A ring chu an thle zak zak a, ka mitah tak chiang fek fawkin min rawn en a. A jacket hak lai chu pawt rual thain kal sawn a tum a.

 

 

"Hmangaih hmasa ber leh hmangaihna dil tak chu thil in ang lo tak a ni" a ti sap a, min kalsan nghala.

 

 

Ka ngaihtuahna a thil awm zawng zawng chu nuai bo tumin ka lu ka thing vaka. Alison-i chu ka thian a ni a, a ni reng bawk ang. Eng thil mahin chu thu chu a thlak danglam ngai lovang.

 

 

 

Chapter -9

Zing ni chhuak chuan ka hmaiah tak min rawn chhun a, a lum duh khawp mai. Ning takin ka rum chhuak haka. Tho ta mai lo chuan ka inkhuh tah sauh sauh a, ni rawn chhuahna hnung chhawn zawng chuan ka inlet thaka.

Ka muhil leh tur chiah chu thil ri hneawm zet chuan min rawn ti harh zawk a. Alarm hmu chhuaktu hi la dam se lang chuan ka va beng duh hial ang. Ka harh laklawh tawh avangin muthil leh tum pawhin awmzia a nei tawh lo. Ka sam chu sava bu ang maiin a pheng vek a, ka mit nuai nauh nauh chungin khum atang chuan ka chhuka. Kan zi mar kual vela, chutia ka insan phek zawng chuan ka mal chu a rawn lang chho thui hle a. Nizan chu kekawr ha tur ringawt pawhin ka taimaknain a tlin thlawt lo. Kawr lian tha hleu hluau tak ka ha a, ka mut tawp mai kha a nia.

Bathroom ah lutin ka dan pangai angin ka inti faia, kekawrbul hain tawnzau ka ha a, tukthuan ei turin inhnuai lamah ka chhuk thla a. Dawnkanah chuan Ian-a a lo thu a, apple a lo vel meka. A bulah chuan thuin "Good morning" ka ti a, apple a lo hmuam tun bawk nen a lu a lo bu nghat ringawta.

"Nizan chu a nuam bawk em?" fiam ti tih deuh pahin ka zawt a, mahse hetiang zawnga ka tawng apiang hian keimah zawk hi ka na reng dawn a nih hi. A nui suk a, a apple vel lai chu a hmawm leh thawiha.

"Zanriah ei kham hnu khan eng nge i tih a?" ka tukthuan tur min rawn chhawp sak pahin Marie chuan min rawn zawta. Vawksa kan thar leh artui kan tui hmel tak ka hmuh zawng ringawt pawh chuan ka chil a put lo chauh.

"Keimah maw? Paul Wesley nen kan mu dun" engah mah a ngai lo ang deuh hian ka chhang liam puat a, vawksa kan chu ka hmawm nghala. Ka sir a thu Ian-a chuan a apple ei lai chu a hak nghal a, a khuh nghal thawt thawta. Rang takin tui ka la a, Marie chuan a hnungah a lo chum sak bawka.

"I zia tawh em?" a khuh a zia deuh hnu chuan ka lo ti vata.

"Eng nge i hriat a?" a aw chu a nelawm lohin a ram hmarh a, a mitmute chu a dum vek dawn emaw tih mai turin a meng thim run bawka.

"Eng chu maw?"

"Nizanah chuan eng maw i tih a?" sehchilh deuh nawk nawk chungin min zawt nawn leh a. Kei lah chu engah mah ngai lo ang maiin ka awm lui ve tlata. "Ka sawi tawh kha. Paul-a nen-" ka thil sawi lai chu ka tawp chawt a, nuihzatnain ka khat nghal a. Ka nui nasa lutuk chu ka mittui a tla hial mai. Ka thutna atanga ka tlak mai loh nan dawhkan tlangah ka invuan a. Ka nuih zawh meuh chuan ka pum a na urh mai.

Ian-a lah chuan thinrim hmel deuh hian min lo la melh reng mai bawka.

"A nih leh le. Ka sawi danin a zir lo a niang e. Zanriah ei kham hnu khan Vampire Diaries ka en a, Paul Wesley-a a chang ve a. Chuan ka en laiin ka lo muhil daiha" tiin ka sawifiaha. A mitmeng rum ul pawh chu zawi zawiin a ziaawm ta hret hret a. Mahse a apple ken lai chuan min vawm chawrh duh ang tih mitmeng a ni a la put ni.

"Khatiang kha sawi leh ngai tawh suh" thu tak deuhin a rawn ti a, la nui sung chungin ka lo bu nghata. Chutih lai chuan Marie chu hmanhmawh takin choka atang a rawn phei a, a chanchinbu ken lai chu Ian-a hma zawnah tak a rawn theh thla a.

"Eng thil nge ni a?" Ian-a chuan a lo ti vata.

"Chhiar rawh"a ti hmuk a, lungni lo tak chungin a kal sawn leh vata. Ian-a chuan a kut a beng fai a, chanchinbu chu lain a phek hmasa ber chu an bih nghala. A hmel chu ka lo en reng a, mak tihna, thinrimna leh inthiam lohna hmel a pu a. A thutna chair atang chuan a tho vuta.

"Ka pindan lamah kan lut tawh ange" tih leh kal a rual nghala. A ngaihna ka hre lo kher mai. Ka fork ken lai chu dahin chanchinbu chu ka la a, a phek hma ka han hmu chiah chu ka thawk a danglam nghal vek. Ka awmdan erawh thunun ka tum nghal vata.

'ASHLEY BROWN ATANG ASHLEY CULLEN'

Cullen Inc a an CEO ni lai mek Ian Cullen chuan nizan khan The Light 25th Anniversery gala-ah a nupui a rawn hruai. He tlangval hausa leh hmeichhiate ngawihzawn rawn hian 28th October khan Brown Chain of Hotel neitupa Nick Brown-a fanute pahnih zinga pakhat zawk nupuiah a nei a.

Nick Brown-a hi a tleirawl chhuah tirh atanga a ngaihzawng Claire Brown nen inneiin fanu duhawm tak Alison Brown an nei a, mahse vanduaithlak takin Claire-i hi accident ah a thi hlauh mai a, a pasal leh a fanu la naupang tak a kalsan a ni.

Nick Brown-a hian nupui dang fa pakhat nei tawh Linda Brown a nei leh a, a fa rawn chhawm Ashley-i chu Alison-i nen kum thuhmun niin unau piang hmun ang maiin an inhmangaih a, tumahin piang hmun an ni lo tih reng an hre lo.

Hun a lo kal a, Nick Brown leh William Cullen te chuan an inthian thatna ti nghet lehzual tu tur atan an fapa leh fanute chu inneih tira chhungkua a insiam chu an thuthlukna a lo ni ta a. Thla tam kan nghah hnu khan Ian-a chuan a nupui chu a vawikhat nan vantlang hmuhah rawn hruai chuakin a nupui thar Ashley-i nen chuan zankhuain an lam dun a, hei mai bakah Ian Cullen-a hian 'The Sparkling Shine' thi manto tak chu a nupui thar tan a leisak a ni.

An dam dun chhunga nupu hlim tak ni reng turin kan duhsakna sang ber kan hlan e'.

Kut khur der der chungin ka chanchinbu ken lai chu dawhkanah ka dah a. Chu thil chu thleng tura ka duhthusam a ni a, mahse hetianga chanchinbu lam thlenga hmu let leh tur chuan ka lo suangtuah phalo a ni ngei ang. Vah chhuah ka mamawh. Ka tukthuan pawh chu ei mumal lovin ka tho a, ka pindanah chhoin ka sport thawmhnaw ka han inbela.

In hnung lamah ka chhuak phei a, ka in warmup zawh hnuah muangchangin ka tlan a, ka tlan chak telh telh a, a hnuah phei chuan ka nunna tan ka tlan emaw tih mai tura chakin ka tlana. Ka rilru tawt zawng zawng chu ka ke atang tih chhuah vek chu ka duh a ni.

Thinrimnain ka khata, hetiang zawng zawng ka chunga a tih avangin Ian-a lakah ka thin a rim takzet. Chutih rualin kei mimawl tak, khawvela a mipa hmangaih ber midang laka hlantu chungah hian ka thin a rim bawk. Hmeichhe hmeltha tak, mipa zawng zawng hip thei Ashley chungah ka thin a rim bawka, ka pasal leh zel pawh min luahlan sak ta a nih hi.

Ka ka a nat tawh em avangin ding lo thei ka ni ta lo. Ka thinphu chu a rangin a ring hle a, ka beng atang pawn a hriat theih. Leiah ka thingthi hnawk a, ka kut pahnihin leiah chuan ka innem khalh a. Ka chal atang tlan a rawn far zawih zawih a, ka kawr hak chu a huh vek bawk. Ka bianga tui rawn luangthla chu ka kutin ka tuai hul a, chu erawh thlan a ni ve lo. Natna, natna atanga rawn chhuak mittui a ni.

Ian-a chungah ka thinrim thei lo. Ani chuan engmah thiam lohna a nei ve lo va, keiman ka hmangaih mai zawk chauh a ni. Ashley chungah pawh thinrimna chhan tur engmah ka nei lo. Mahni duh pawh ti hlawhtling ngam lo keima chungah hian ka thin a rim ber mai.

Ka chawlh hahdam deuh hnu chuan ka pindanah lutin ka inbual fai a, towel a intuam chungin ka thawmhnaw dahna lam ka pana. Thawmhnaw lian lam ka ha a, ka infihfel zawh hnuah ka sam la hnawng chuap mai chu ka bek sir lamah huiin ka khum lam ka pan a.

Ka khum lam pan tura ka kal chu ka hma zawn a mi nen chuan kan insu chawrh a, ka per dawrh a mahse Ian-a chuan nghet takin ka banrekah min lo chelh vata, keiin a darah ka lo vuan vat bawka. A mitmu pawl ram inthiamloh hmel taka de ral ral chu ka en a, a mit ka hmuh apiangin ka tuiral ziah dawn a nih hi.

Mahse engvangin nge a inthiamloh?

Ka hrawk ka thian khar a, ani pawh chuan pangai takin min din that tir leh vata. "I pa in inhnuaiah a nghak che" a ti sapa.

Ka meng phawk hru a. Ka pa maw? Kan inneihni bak kha ka la hmu leh ta miah lo. Ka mit ka chhing vang vanga. A lo kal chhan chu ka hriat theih mai ka ring. Chanchinbu kha a lo chhiar ve a ni ngei ang.

Ka nui haka, ka mit chu mengin khawvela mitmeng mawi ka tih kumhlun tur chu kan melh leh zuaia. A lamah ka kut ka phar chhuak a, ani lah chuan hrethiam lo zetin ka kut chu a lo melh ringawt a.

"I zuk kal ang hmiang" ka tih takah chuan ani pawh chuan a hrethiam thuai a. Ka kut tereuhte chu a kut hrawl zet chuan a rawn vuana, inkai rial chungin inhnuai lamah kan chhuk duna.

Inhnuai kan thlen thlak chuan hlim anga lan mawi tumin ka nui sanga, ka pa mitmu dum ralh mai ka hmuh chuan Ian-a kut chu ka thlah a, a lamah tlan pheiin ka va kuah chawta. Ka thla a muang siai siai a.

Ani pawh chuan nghet takin min lo kuah ve a, mangchhia atanga harhchuak hlawl ang maiin ka dam sawng sawngin ka hria. Ka chhip atanga ka ke ler thleng chuan min en chhuak veka "Ka ngai thei lutuk che princess" a ti sapa.

Ian-a lam ka hawi a, kan piahah chuan hnuai lam melhin a ding reng ringawt a. Ko pheiin ka pa bulah chuan ka thut tira, a lehlamah kei ka thu bawka. Lemchan tlem a zawng kan tih angai dawn a ni.

"I tha a maw?" tiin ka pa chuan min zawta.

"Tha tih piah lam a ni" nuisang chungin ka lo chhang vata.

"Chanchinbu kha ka lo chhiar a"

Ka pa hi mi tawngtlem tak a ni a, a sawi duh ngei ngei pawh sawi lova ngawih pui leh mai chi ang kha a ni. Thu tak sawi hunah erawh sumdawn thiam tak a ni thung.

"Kei pawhin ka hmu alawm" tih pahin ka han nui tha leha.

"An rawn tih dan kha an ti awm ang lo khawp mai. Nimin khan ka nuam sam lo lutuk a, gala-ah khan tlereuh an zuar chhuak dawn bawk nen, Ashley kha ka ai lo va awh mai turin ka va ngen ta ringawta" tiin tawi fel takin ka chhanga. Ka pa hmaah hi chuan dawt ka sawi thei ngai lo. Tun hi chu tum sateh a ka tum vang chauh a ni.

Ka pa chuan ka mitah tak hnai set sawtah min rawn en a. Lalpa, ka dawt sawi hi hriatchhuah tir lul lo teh.

"A nih leh thi kha?" tiin min zawt leh a. Ian-a chuan nghet takin ka kutah a lo chelh a, ka insawi fel thei ang nge thei kher lovang tih pawh ka chiang tawh lo.

"Ian-a hian charity hi a ngai hlu em em a, chuvangin an thil zawrh pawh a man to ber pawl a lei sak ta reng a nih kha. Mahse khatiang thi lian ber bur kha ka ngaina ve lo va, chuvangin Ashley bulah nei mai turin ka ti ta a nih kha" tiin dawt ka han phuah rem zung zunga.

Min en leh vang vanga, chumi zawhah Ian-a lam chu a hawi leha.

"A nih chu mawle. A nih chuan ka rawn kal hian chhan dang a nei a ni zawk mahna" a ti a, a ngaihna hrelo takin ka lo en reng ringawta.

"Thawhlehni a Miami a meeting kan neih tur kha chu kan hria a nia" tiin ka lo tawng khalh vata.

"Will-a te chhungkua leh kan chhungkuain chhungkaw intihhlimna neih kan rawt a, naktuk zing hian kan chhuak ang"

"A ni maw?" ka lo ti hlut a. Chutiang chu ka ngainat zawng tak a ni. "A nih Emily leh Jakob-a te an lo tel ve dawn em?"

"An tel lote chuan chhungkua kan kim thei hleinem" nuisang chungin ka pa chuan min lo chhanga.

"Drake-a pawh ka lo sawm ve ang" a vawikhat nan Ian-a pawh a rawn tawng chhuak ve ta hlawl a. Ka pa chu a bu nghata, thoin a suit hak chu a siam tha a. Tha taka kan inmangtha hnuah kan pahnih chuan min en dun leh a, ka chalah fawpin min chhuah san a.

Ian-a bulah "Ka kal dawn a nia" ka ti a. Hlauhthawn hmel tak hian "Khawiah maw?" a lo ti vata.

"Ka room ah. Ka insiam lawk loh chuan" tiin ka chhang a. Eng dik lohna nge maw a neih ni? Chutia ka han sawi takah chuan thaw huai hmel hi a pu a. "Aw le" a ti ve maia.

Ka pindanah chuan lutin Miami a kal turin ka insiam tan nghala.

Chapter -10

Ka nipui thawmhnaw, a hma a pangpar lianpui awmna chu ka ha a, pheikhawk falt ka bun a, lip-gloss tlem ka hmuiah ka hnawih mawm bawka. Darthlalangah chuan ka inen vang vanga, han belh chuan vak ngaiin ka inhre lo. Ka innuih saka.

Chawlh hmang tura zin kan ni dawn bawka ka za zek zek. Chawlh a nih hrim hrim hi chuan ka phur em em zela. Nikhumah pawh California-ah chawlh hmangin kan zin tawh a, nuam tak a ni.

"Alison" ka pindanah Marie a rawn luta. "Eng nge ni?" tiin a lam hawi chuan ka inher vata.

"Mr Cullen a'n inhnuaiah a nghak reng tawh che a nia" a ti a, a inher a a chhuak lehnghal maia. Kei pawh chuan ka zui ve nghala.

"Will" tiin nuisangin ka ko a. Ka lam a rawn hawi vata, min rawn nuih a, a kut pahnih a rawn phar chuaka. Rang takin a lamah ka va tlan a, kan inpawm chawta. Will-a (Ian-a pa) hi ka pa tak tak ang chiaha ka en a ni a, ka pa a awm loh hnuah pawh a ai a awh zo khawp mai. Hun a neih apiangin min hmu turin a rawn kal fo thin.

"I lo tha maw Ali?" tiin min rawn chhuak en a.

"Tha lutuk. Nang zawk?" ka tih chuan a ha var sar langin min rawn nuiha. Ian-a hian a pa a chhun khawp mai. Ani hi chu a la naupang deuh zawk e tih mai a ni. A mitmeng te reng reng chu naute ang maiin a la pawl ram a, a vun uk kharh mai chuan tar hmel a pu ve thei lo. A sam dum karah chuan a khat mawi tawkin a tuak ve pheuh pheuh a, a mitko duk deuh ruih pawh chu ti lang tartu ni lovin a hnathawh nasat zia lantirtu chauh a ni. Engtik lai mai pawh hian a nalhin a bu ang thlap a ni a, a chhungkaw zinga mi ni lo tan chuan suit nen a mu thin emaw tih mai tur a ni.

"Ka la tlangval dawn chauh alawm" a tih chuan ka nui hak haka. Chu chu William-a dik tak a nihna a ni.

"Kan kal thei tawh em?" tiin Ian-a pawh a rawn inpeih ta a, chhiat lai reng a nei ve thei lo a nih dawn hi. Kamis var simple angreng deuh a ha a, a kawrkilh chung lam pahnih erawh a kilh tel ve lo va, chu chuan a awm chhah tha zet chu a sexy tawk velin a ti langa. Kekawr uk tight tha teng tawng leh converse uk a bun bawk a.

"Aw kal thei e" ka tih rual rualin ka lo en uluk lutuk a ni tih a hriat hmain ka inher vata. William-a nen pawn a TUV car dum ding lam chu kan pana, kan bag leh kan thil ken tur velte erawh chu dah fel sa diam an ni tawha.

A hnung lam kawngkhar ka hawng tur chu Ian-a'n min lo nuih ver ver a ni tih ka va hmu leh kher a, ka buai leh hman thelh a ni. Hahthlak hian ! Ani pawh chu ka bulah chiah a rawn thu ve a.

A chang changin ka va mit sir leh zauh thin a, tukverhah a dak dauh dauh renga. Mahse pawn lam a thlir pawhin alang lo, thil ngaihtuah eng emaw a nei zawkin ka hria.

"Eng nge i ngaihtuah a?" zawitein ka va ti dek dek a. Min rawn en a, hawi let lehin a ngai ang bawk chuan tukverhah a dak leh a. Nakinah a falin ka la be zawk mai ang.

Kawng tluan mai chuan ua reh tlawk tlawk a, a tute pawh chu mahni ngaihtuahna kawmin kan buai theuh a nih ka ring. Emily-i nen pawh kan inhmu thuai a. Ka hmu veleh ka nuih ver ver a, mahse ani chuan min rawn kuah a tum nghala. A kutah ka lo ben sak hlawk a.

"A naa.! I kutthlak a na emai Ali?" tih pahin a kut chu a dawm nghal vawng vawng a. Ka beng na a niang. ka kutthla a sen kalh thei nia.

"Drake-a nen in ni a maw? Enga tinge chungte chu min hrilh ve loh? I best friend ka ni a ni lawmni? Khawiah nge Jake-a?" tiin in la drama deuhin kan meng kual vela.

"Lemchang kual vel lo mai teh a. Ani chu chhunah a rawn kal ang"

"Kan intih fel hmain thil zawng zawng a kilh-kelh a hriat vek ka duh" tih pahin ka kawng ka dawm a, Ashley-i leh ka pa din dunna lam chu ka pan nghawng nghawnga.

"Hey ka u" tiin Ashley-i chuan min rawn kuah vata, kei pawh chuan ka lo kuah let ve nghala.

"Khawiah nge ka nu?" tiin chulai vel chu ka melh kuala.

"A damlo alawm mawle Princess. Lo chawlh hahdam hrilh zawk rawh se" tiin ka pain min lo chhanga. Ka pa lam chu ka hawi thuai a. "Helaia ka lo awm ve kher a ngai emawni le? Kei man ka lo awmpui zawk mai ang chu" ka ti a.

"Ni lo ve ka u. Amah avangin i kal ve theih lohte chu a du-h teuh lo mai" Ashley-i chuan rang deuhin ka pa a lo tawng khalh vata.

"Ni chiah mai Princess. Ashley-i khan a sawi dik a ni" ka pa pawh chuan lo ti ve nghalin ka darah a rawn beng thek thek a, Will-a nen an inbe chhunzawm lehnghala.

Chulai hmunah chuan mitmu dumpawl ve dang zawngin ka mit ka len ruai a, rei loteah ka va hmu thuai e. Drake-a leh pilot nen an inbia a, an titi tui khawp mai.

Rei loteah kan thlawhna tur an ti fel a, thlawhna chhungah lutin van sang lam panin kan thlawk vang vanga.

"Min hrilh tawh rawh" tih pahin ka kiuin Emily chu ka va nghawk sawka. Ani lah chu nin hmel zet hian a thaw halh a, a megazine chhiar lai chu a dah thla a.

"Aw le. In inneihni a thlen hma kha chuan kan hrawk kan intawm thin a, mahse khami ni atang khan thilte pawh a lo danglam ve hret hret a ngai ta a. A tirah tak chuan a company a internship ti thin ka ni a, chutih lai vel phei chuan min vin phar reng hi a ni mai. Mahse zawi zawiin ka zunah a uai chho ta a ni" ti a sawi pahin a han nui deuh seih a.

"Mahse...?" engmah sawi leh lovin ka ngawi ta daih a. Thawnthu tam tak a awm dawn chiang sa. A han nui leh hak a, min rawn en a.

"Hmeichhe kawplawr-a a ni tihte chu nang pawhin i hre ve thovang chu. Ka rilru a kehsawm ka duh reng reng hleinem" a tih chuan ka nui haka, ka va kuah a.

"Rilru kehsawm chu thil namai a ni lo asin Em. Mahse rilru kehsawm chung pawha kan hmangaih berte kan kianga an la awm ve tal hi chuan a zia deuh". Min rawn nuih suka, kei pawh chu za lo angreng tak chungin ka nui liam ve maia.

Tukverh lam ka hawi a, hnuai lamah chhum a var mup tih loh chu eng dang mah hmuhnawm thir tur a awm hran lo. Mahse van dumpawl mawi em em mai chuan ka lung a dum a ni. Chung chhum var mawi takte pawh chu theih ni se ka kut ngei a han khawih vel ka chak thin. Khawih thei ni ta ila engtin nge ka awm ang le? A lo nem thlerh ang nge khawih loh ang maiin a awm zawk ang?

Miami pawh chu kan thleng ta a. Thlawhna atanga kan han chhuak chiah chu Miami boruak lum tuk mai chuan min rawn chhun nghala, helai hmun thleng tur hian van sangah darkar 3 zet kan thlawk a ni. Ka nui saka, Miami ka kal hnuhnung ber tum pawh kha ka la hre reng mai.

Kum 7 lai a liam ta. Kha tih lai khan Ashley-i nen hian kum 18 kan tling vel chiah chiah a. Miami a kal a, bikini ha chung a kan tleirawl ti no tak tuipuikam a han pholan vel kha kan chak a ni. Chu chu thil nuam leh hlimawm tak turah kan ngai nghet tlat bawk.

Tuipuikam kiang lawka in nuam tak mai ka pain a lei a ni tih kan hriat phei kha chuan kan hlim zia kha aw. Mahse university kan kal tak avangin duh angin kan tlawh leh thei ta chuang lo va. Tunah erawh kan let leh ta. Ka chhungte leh ka chhungkaw tharte nen.

"I kal ang u le ka naute uu" tiin ka pa chu Car bul atang a rawn au a. BWM ca pahnihin min lo nghak rana.

"Puitling ho hi pakhatah chuang ila, naupang ho chu a pakhat zawkah hian rawn chuang rawh se" Will-a chuan a lo ti ve bawka.

"Puitling kan ni ve tawh tho" kan ti rual thap a, keimahni bawk chu kan nui nghal tlawrh tlawrh a, Ian-a pawh a nui nasa khawp mai. A nui hmel hmuh hi a nuam ka ti.

Will-a awmna lam chu kan hawi leh a, mahse a lo tlan hla tawh khawp mai. Kan vai mai chuan kan ka hau a. Chu putar la valai tak mai chu kan nuih hlanin hlate khua a lo thleng hman tep alawm mawle.

Emily, Drake, kei leh Ashley te chu kan in en tham a, kan vai chuan passenger kawngkhar lam chu kan en rual leh thapa. A dinna a hla deuh nangin intlansiakna tham chu a ni. Drake-a chu a tlan nghal thuta.

"Ui ha ni lo. I tlan ve thei lovang" ti a thaw halh pahin a hnungah chuan ka tlan ve nghala. I thei a ni Alison ti a infuih sauh sauh chungin ka tlan chak telh telh a, Drake-a chu ka tlan pel ta maia. Chutia ka tlan pel lai chuan mak tiin min lo en hau mai.

"Ka lehpel ee. Silai muuu...!" tiin ka au ruah ruah a, ka zuang pah bawka. Car awmna chu thlengin ka hawng a, a chungah ka lut a. Drake-a leh Emily hah hmel taka rawn tlan ve hlawp hlawpte chu nuihin lei ka lo chhuah khum vela.

Reiloteah Ian-a pawh a rawn tlan lut ve a, Emily leh Drake-a, Ashley-i ten an rawn dawr a, a hnung seat-ah an thu lut nghala. Min en hau hlawm a, Ian-a pawhin nui chung leh mak tih hmel takin min rawn en a.

Chutia min en vung vung chu nuam ka ti chiah lo. "Eng nge? Tu ma umphak nih ka duh hleinem" tih pahin ka inher a, tukverhah ka dak daiha.

A darthlalang atang chuan min la en reng a ni tih ka la hmu thei tho. Ian-a chuan car chu ti nungin a khal a, kan vai mai chuan kan ngawi thap a. Tape chu on in Shape of you - Ed Sheeran chu kan play nghal vata.

"He hla hi ka duh lutuk" tih pahin ka sak pui nghal nghawng nghawng a. Emily pawh chuan min rawn zawm vata, kan awrawl tawp tawpin kan au vak vaka. Kan sak tawp meuh chuan kan thlenna tur in pawh chu kan thleng der a.

 

 

A lian lo nangin a te fel ren rawn khawp mai. A pawn lam chu thing var, a dum chi leh darthlalang hmanga chei a ni a. Khawthlir nan chuan duhthusama nuam a ni. Tuipui chiang taka a hmuh theih baka tuipui atanga thlifim rawn thaw chuan a chem heuh heuh reng a, tuipui al rim pawh a hnarin a hre veng veng thei.

Inchungah chuan kan lut a, ka pa leh Will-a chuan bathlarah thuin min lo nghak reng tawha.

"In lo thleng ta maw?" tiin Will-a chuan a chhung lamah min luhpui a. A pawn lam a a lan dan aiin a chhug chu a lian daih mai. A lai taka thisen ang maia senduk thutna tur dup nawm hmel zet a inhung a, nalh takin a chungah cushion var a inrem leh thlap a. A chungah chandelier nalh zet mai a inkhai ruah bawk. Bangah chuan 72inch seta chhah TV a inbela, chaw ei dawhkan erawh pawn bathlar-ah (balcony) a inhung thunga, chuta tang chuan chiang zetin tuipui a lang ruiha. Inchung lamah pindan paruk a awm a, inhnuaiah pa li.

"Kal ula in pindan duh ber va thlang rawh u" ka pa in a tih chuan ka kan darh nghal haka.

Midang zawng chuan inchung lam pindan an thlang vek a, kei erawh inhnuai a mi, a kawngkhar nawrtawlh theih, tuipui ep chiaha awm chu ka thlanga. Zanlaia tuipui kama tei vel nuam ka tih avangin inhnuai pindan ka thlang zawk zel thin. Will-a leh ka pa chuan engvanga Ian-a nen pindan khata awm dun lo nghe kan nih tih chu min la zawt ngei dawn a ni tih pawh ka hria. Mahse engtik niah emaw kan la awm hrang dawn tho a ni tih hrilhhriat lawk kha a pawi lo zawkin ka hria.

Niminah khan ka pa bulah dawtin ka insawi chuak tawh tih ka hria. Tunah pawh hian eng emaw chuanlam tur a awm leh em em ang.

Dik taka sawi chuan keimah ber hian eng nge ka tih dawn tih ka inhre lo a ni. Keimah ngeiin Ian-a bulah Ashley ka hruai let sak tur thu ka tiam a, mahse engtin nge ka chungte bulah hian ka sawi ve tak ang? Eng thu nge Will-a bulah ka sawi ang? Tun atanga ka ngaihtuah lawk angai a ni. Chu ni chu engtikah emaw thlasik ang maiin a rawn la thleng ngei dawn si a.

Ka nui saka, ka luggage ken chu ka khum tur var sar mai chungah chuan ka hlang a. Ka pindan thlan chu a simple angreng khawp mai. Furniture awm ho chu a uk an ni a, a dang parda, bedsheet, lukham leh a dang ho erawh a van an ni hlawm. Wardrope a awm a, khum leh bathroom a awm bawka, lemziak intar tlem nen.

Kawngka chu hawngin thlifim chuan ka sam a rawn chhem leng siau siau a, Miami hi ka ngaina a ni.

"Ka naute u" ka pa chuan pawn lam atang min rawn ko a. Ka pindan atanga chhuakin Emily bulah ka va ding ve a, a Lays ken chu eiin a lo buai khawp mai. Khawiah nge maw a lo hmuh leh hman tawh ni. Chhuh sakin ka ei sak ve nghala. Min melh rum ngang mai.

"Shopping turin kan chhuak theuh anga, mahse chawhnu lamah erawh keini putar pahnih hi chu kan chhuak bo daih dawna, zanlaiah bak kan lo haw lovang. Hun nuam deuh lo hmang ang che u" tiin Will-a chuan a ban a rawn vaia.

"Nangni khawi lamah nge in chhuah dawn?" Ashley-i chuan a han ti a.

"Chu chu keimahni chauh hriat chi. Nangni chu in duhna lam lamah in kal thei ang" tiin Will-a chuan a lo chhang nui vur vura. An inbe lai chu ka lo thlir reng a, tuna a biak mek nula chu engtikah emaw a monu ala ni dawn a ni tih ka hrechiang ropui mai si. Tunah hian hre ta chu ni se heart attack a a tluk tawp theih ka ring.

"Eng nge kan la nghah? Shopping tur chuan i chhuak teh ang u" phur hmel tak hian Ashley chuan a rawn ti a. A tan chuan shopping tih chu thli nuam tak a ni anga, ka tan erawh inhremna a ni leh dawn a nih hi.

Kal ve loh mai ka rilruk laiin thil tha deuh mai ka ngaihtuah chhuak thuta. Ka lamah Emily chu ka pawt phei a, ka hrilhru nghala. Min melh hraw a, chutiang tih chu a chak lem lo tih ka hre nghal mai.

"Khawngaihin Em. Hun ka neih tlem tawh em hi" tiin ka ngen vata. A tawp a tawpah rilru si zan lo chungin min pawm sak ta hrama.

"Yippe...tirawh i kal ang. Mi in date tir tur kan neih kha" tiin ka kai a, in kawta min lo nghaktu car lam chu kan pana.

Ian-a leh Ashley te in date na hmasa ber tur chu.

Chapter -11

(Beach Day)

“Ka hrilh tawp ang che u, a flop dawn sa” tiin Emly chu a phun nang nanga.

“Chutiang sawi angai lo” Jake-a nen chuan kan ti rual thawta. Emily lah chuan ti mak min tih hmel takin min melh run mai a.

“Ashley-i leh Ian-a te chu lo in date pawh nise eng nge Drake-a bula ka kal ve kherna chhan tur awm?” a aw atang chuan a hlauthawng a ni tih ka hre thei.

“A ti leh ta. Nang pawn i duh ve tho a ni tihte chu i inhre reng. A nih a hnu kal ve mai la” dawhkan min siam pui mawlh mawlh pah chuan Jake-a pawh chuan a lo ti ve a. Ni a tla tan mek a, tuipui cham dul mai in a serthlum rawng ang maia eng ni a dawlh tur chu thlir nuam tak a ni.

“Chhuak dun ila ka tih laia min melh dante kha in lo hmu ve lovem ni?” ban phar meuhin a rawn ti hluta. Jake-a nen chuan hahthlak tih hmel deuh hian kan in en ringawta.

“Zankhuain eng nge a bulah ka sawi ang a?” Emily hmel chu hlauhnain a khat tawh.

“Aw..., mi inhmangaihte tih thin ang tho kha inti ve ang chu” Jake-a chuan a lo ti a, ka insum zo lo chu ka nui chhuak hak haka. Emily-i lah chuan a melhrum nasa mai. “Ngawi hmak la a nih chu” a ti buk hmuk a, inchhung lamah a lut ta daiha.

“Em...” tiin kan ko zi ngial nangin Jake-a nen chuan kan nui dun ta tlawr tlawr zawka.

“Jake, nangmah nen chiah kan chuang tawh a nia” ka ti a, bati chu a nalh thei ang ber turin ka hunga.

“Tirawh, movie i va en ve daih ang” Jake-a chuan a ti a.

“Ni chiah mai” ka lo ti a, kan awm dan chu a naupang chhia angreng khawp mai. Thil engkim a kal tluan vek ka beisei.

*Darkar 5 hnuah chuan*

“Kha movie boring zia kha” inchhunga kan luh pah chuan Jake-a chu a phun nghala, ka car chahbi chu a dahnaah dahin thutthlengah chuan ka thu thlawrh a, ka high heel bun chu phelhin ka ke ka malis nghala.

“Nangma thlan alawm. A hmuhnawm vak i ring reng reng emawni?” tiin ka lo chhanga.

“Ka ril a tam” Jake-a chuan a ti leh hluta, a tho a, choka lamah a phei a. Chutia a sawi takah chuan kei pawh chu ka pum a ruak tawh khawp mai. Khawi khawiah emaw kan tei kual a, kan pum lam erawh kan lo ngaihtuah tehchiam lo a ni. Kei pawh chu ka tho a, choka lamah ka phei ve a. Ka lut tur chu ka va intauh chawrha.

“A nahh ! Enga tinge Jake kawng lai takah ban ang maia i din tlawn zuah a?” ka ti a, ka chal chu ka tuai nghal nauh nauh a. Min chhan lawk tak lohvah chuan a lam ka hawi chho a, a hma zawnah chuan eng emaw hmuh a nei a ni. A melhna lam chu ka hawi ve vata, a hmuh ang kan hmu ve chiah chu a bul atang bawkin ka thinlung chu a kehsawm nawn leh ta.

Ian-a leh Ashley-i te chu inhnaih mangkhengin an lo ding dun a, An mit chuan an hmui ve ve chu a en rana. An infawp dawn chiah tihah Jake-a chu ka hming lamin a rawn au nghek a, ka hnung lamah a rawn ding nghala. A au ring lutuk a ka lungphu a chawl dawn alawm mawle.

“Eng nge?” tih pahin ka lung zawn ka dawma.

“I ril a tam emni?” min rawn ti a. A ngaihna hre lo zetin “Engtin aa..?” ka lo ti a.

“Tirawh eitur i va siam ang” a tih takah chuan ka man thiam ta deuh. “Aw le” ka lo ti ve maia.

“Eng nge maw choka ah hian am reng reng le” tih paha lutin Ian-a leh Ashley-i a han hmu chu phu deuh zawk ang hian a han awm dera.

“Ehe..! Hetah in lo awm a ni maw?” Jake-a chuan a han ti a.

“Aw” Ashley-i chu a rawn tawng ban chapa.

“Tumah an lo awm lo va, kan ril a tam sia Ian-a nen kan lo ei tawp mai a” ti a chhunzawm pahin a piah chiah chair a thu Ian-a chu a en a. Ian-a chu hawi pawh a rawn hawi chhuak duh lo.

“Eng nge awm th kan en reng reng ange” tih pahin choka chhungah chuan ka luta, chhuar awmna lam chu panin inthunun tumin thawk ka la hram hrama. Ian-a leh Ashley-i lo in en ngawih ngawih lai leh in kiss an lo tum mek lai kha ka mitthla atang ka nawt reh thei lo.

“I tha em?” tiin Jake-a chuan ka darah a rawn vuan a, a lam chu hawiin ka nui saka, ka lu ka bu a. Pawhdawh ka pawt hawnga, a chhunga pasta lo awm chu phawrhin Jake-a ka pe a.

“Pasta kan ei dawn a nih hi” ka ti a.

*** *** ***

Ka flat bun chu ka phelh a, bathlarah chuan chhuakin kailawn tlem awm chu ka zawh thla a, ka ke in vaivut nem thak mai a zuk rah chiah chuan nuam ka ti veng veng a, chulai tak chu a hahdamthlak ka ti.

Tuipui thim mup lam chu ka pan phei a, tuifawnin ka ke a rawn chim chinah chuan ka dinga. Van lamah ka daka, arsi lo pe un mai ka hmuh chuan ka nui ver vera. Tuifawn lamah chuan ka kal phei zel a, tuifawn inchhawk ri but but mai chuan ka beng a ti tlai takzet a, chu ri chu thli thaw ri vuk vuk leh perhpawng hram riin a rawn chawih maw lehzuala.

Ka mit ka chhing a, tuipui atanga thlifim rawn thaw chuan ka sam a rawn chhem leng siau siau a. “A mawi ngawt mai ti raw?” ka hnung lam atanga mipa aw ri kan hre thut mai chu ka zuang lo chauh a ni. Ka lung zawn ka dawm vata, zanin tlai zet chu lungphu tha lo ka neih phah hial dawnin ka hria. Ka phu nasa thei emai.

Ka inher a, ka hnung a ding pa chuan min lo en renga. A mitmu pawl ram mai chu ka hmuh than tawh tak a ni.

“Ian, min ti hlau dawn alawm” ka ti a.

“Ka tih tum tak ka ti a nih chu” tih pahin a nui ver ver a, a mit a la sawn lo. Tui chu ka dai phei lehzela, tunah erawh mahni chauhin ka ni ta lo. Ka bulah chuan rawn kalin tui chu a rawn dai ve a, tuifawn chuan kan chawn chu a rawn nam leh sawk thin a. A sam dum mawi tak mai chu tuipui atanga thlifim rawn thaw chuan hawi bik lam pawh awm lovin a rawn chhem leng suau suau a, a hmui theite hmin ang maia sen chu a lang vam hiam bawka. Ka en a ni tih a inhriat hmain ka hawi sawn lehnghal vata.

In be lova rei tak kan ngawih dun hnuah “Ka lawm e” a rawn ti chhuak sapa.

“Eng thilah chuan maw?” a ngaihna ka hre hauh lo.

“Vawiin a i thil min ruahhman sak zawng zawngah kha” tiin hnuai lam a hawi daiha.

“Lawmthu sawi a ngai hleinem. Ka thutiam angin thil ka ti mai chauh alawm” ka ti a, tuipui lam chu ka thlir a.

“Alison” kan ngawih vang vang hnu chuan min rawn ko leh a. Ka vei lam ka hawi a, ka hmu tawh miah lo. Hnung lamah ka lehhawi thuai a, ka hnung lam pen tlemteah chuan a lo dinga. A ipte a zena, a chhungah chuan eng emaw a ak a ni tih ka hre nghal mai.

“Thil eng emaw ka pe thei che angem?” tim deuh dui chung hian a rawn ti a.

“Eng tin maw?”

“Min sawi nawn tir kher tawh suh” tih pahin a nui haka. “He thil hi pek che ka duh a” a ti a, a ipte atang chuan eng emaw a rawn phawrh chhuaka. Ka lamah a kut a rawn dah phei a, a kutzungtang karah chuan thi mawi zet mai hi ka zuk hmu a.

En mai chuan simple hmel deuhin alang a, tuimal far ang pian nei, a tlanga lunghlu a chei kual, a ni a, chumi chhungah chuan vur mal pian ang sapphire a inphum bawka. A chain chu silver nge platinum a nih ka hre lo, mawi tak a ni. A ngaihna hre lo takin a mitah ka en ringawta.

“A van mawi em em” ka ti a, inthlahrun hmel tak hian a thi rawn lek chhuah chu ka va khawih de de a. “I duh zawng a ni em?” a tawng danah chuan a nervous a ni tih ka hria.

“A nalh ka ti lutuk ka ti a” ka lawm bawk a niang, ka nui lo thei lo. Ani pawh chu a lo nui ver ver a.

“Ka lo awrh tir ang che chu?” a ti a, ka lo bu nghata. Ka sam chu ka lo siam tha a, aniin ka thi thar tur chu min rawn awrh tirin a awm dan tur ang takah a rawn siam rem a. Min melh dan chuan ka hmai a ti sen nghal tawn tawn mai.

“Eng nge a an?” tiin ka zawta.

“A mawi lutuk” tih pahin a thaw halha. A lam ka va hawi zawk a, thi ni lovin ka hmel ngawr ngawr a en a ni tih ka va hmu thei.

“Awrh char char rawh aw”

“Aw le. Ka lo awrh char char ang”

*** *** ***

“Ali, rawn kal tawh rawh” Emily chuan min rawn ko lawng lawng a. “Ka lo kall..” tih pahin ka bag te ka la a, sunscreen leh ka chhiar tur lehkhabu ka la tel bawka.

Tuipui kam lamah chuan ka chhuk thla a, lu chung zawnah ni a sa vawl vawl mai. Ka sunglass ka vuah a, an awmna lam chu ka pan ve a. Anni ho pawh a thenin an mutna tur puan an phah a, a thenin nihliap an lo zar bawka. An buai hlawm khawp mai.

“I lo kal ve dawn lo emaw ka lo ti hman hial alawm” Drake-a chuan min lo ti a, a t-shirt hak lai chu a hlip nghala. A dul phiar fat mai leh a tihrawl lian zet mai an han hmuh chuan chulaia vela hmeichhe lo awm ve dang ho chu an lo ‘Ohhh!’ duala.

“Kal dawn lo pawh ka tih loh kha” ka ti a, ka thutna tur chair ah chuan thuin ka lehkhabu chhiar tur ka lachhuak nghala.

“A lo kal ee” tiin Ashley-i chu ka hnung lam hawiin a au a. Kei pawh chu ka lehhawi ve vata. Kan hnung lamah chuan Ian-a a rawn kal mek a, kawr pan te, kekawrbul a ha bawk. Bikini nen chauh a lo ding Ashley-i chu a rawn nuih a. Ni, ani chauh chu a ni a rawn nuih ni.

“Surfing ti tawh ang u” tiin Jake-a chu a au teng tung a, tuipui lamah Drake-a a pawt thla pah bawka. Ian-a pawh chuan a kawr a hlip ve nghala. Ka lo meng pawng zawr a, ka khabe ka thlauh ta daih emaw ka ti hial. A dul chuan ka lu a ti hai nghal vek.

A kal thlak hma chuan min rawn nuih sak a, awi lehh...ka lo awm dan kha a rawn hmu a ni hrim hrim. Ka zak lutuk chu ka hmai kan hup ringawt a.

Ka hmai hupna ka lakthlak meuh chuan Ian-a pawh a lo huh hlap tawh. A sam huh hnup mai chu chung lamah a tuai chho a, a taksa nalh tak mai tuiin an bual hnawng chap phei chu. Ka chil a lo put .

“Lo kal rawh Al” Emily in min rawn pawh sawk takah chuan ka ngaihtuahna kal kual vel atang ka harh chhuak ve chiah. A kekawr hak lai chu a hlip sawk sawk a, bikini nen mipa hau awmna lam chu a pan ve a. Drake-a lam ka hawi vata, ani lah chuan Emily chu ei zawh vek a tum ta emaw tih mai tur hian a lo thlir a, mipa dang ho pawh chu an ni vek tho mai.

“Ti hian ka lo awm mai ang” tih pahin ka lehkhabu ken lai chu ka chawi kang zauha.

“I mawl a mi ! Helaiah hian lehkhabu chhiar turin kan kal hleinem. Mipa suangtuahna kan chawk khawlo zawk dawn alawm” tih pahin a rawn indawm itawm kual vela.

“Tui kan cheng mai mai dawn emaw ka tia. Khate chu surf a nih kha” ka lo ti a.

“Unaunu lo phei ve rawh” a taksa a suncreen inchulh mawlh mawlh chungin Ashley-i pawh chuan min rawn ko a. Tha taka lo hnarin ka earphone ka vuah daiha.

Chutia tui tak maia ka lehkhabu ka chhiar lai chuan ka hnung lam atang mipa thla a rawn lang hlawl a. Amah hmuh chian tumin ka vanvadaka. Mipa pian tha zet mai, nisa a do avanga vun senno chek mai hi ka hnungah chuan a lo ding renga. A sam chu thli chuan a chhem che hlawk hlawka, a mitmu chocolate rawng chuan min rawn chhuk en run a. Mipa sexy midang hriattir dawn ta ila chu pa chu example-ah ka hmang ang.

“Hey, nangmah chiahin i awm tih ka rawn hmu che a” tih pahin a rawn nui saka.

“Mahni a awm ka duh vang pawh a ni mahna” tiin ka lo chhanga. Zawitein a nui ri sek a, ka lam a rawn hawi leh a. “Pakhat lek lo tel ve chu a pawi lovang chu maw!”

“Ka hre lo le. Kan enchhin a niang chu” tiin ka nuih let a. A nui haka, ka lamah a kut a rawn phar a.

“Caleb-a ka ni e” a rawn ti a, kan inchibaia. “Kan la inhmuh leh ngei ka beisei” tih pahin a tawlh hnung a. “Ka beisei” tiin ka lo chhanga.

“Saw lai a mi saw mipa vannei tak a ni” tiin a zungbun bunna lam chuan a rawn kawk a, nupui nei tawh a nih ka lo rng nghal maia. Kei pawh chuan a kawhna lam chu ka hawi vata. Ni chiah mai. A nih chu a vannei a, kei ka vanduai ta thunga.

*** *** ***

NEW CHAPTER

(The Accident)

Ka high heel bun leh mipa ho pen ri chu inchhung chhuatah chuan a ri kauh kauh a, Cullen Inc te leh Brown ten a meeting an neih chu kan zo fel chiah a, hotel sak dun tur chungchangah hming an sign zo chiah a. Pakhatah ka pain a hming a sign a, pakhatah ka pasalin – reilote chhung a tan.

“Ka thil kan han pack fel ange” tih pahin Ian-a chu inchung lamah a chho a. “Kei pawh tih fel a ngai” ka ti a, ka pindan lam ka pan ve nghala. Ka inbual fai hnuah ka thawmhnaw chu casual deuhin ka thlak a, nileng thak a formal dress hak hi chu a mi phuar a na ve riau zel. Ni a sat deuh hlek avangin kekawrbul leh tawnzau tlawng ka ha a, tunah pawh hetiang a nih chuan May thla lum tur zia chu a ngaihtuah pawh ka ngaihtuah peih lo.

Ngeni a bikini nen tlawng khan kan awm leh reng zawk dawn ni.

Darkar chanve a ral chuan ka thil engkim ka tifel diam ta. Ka chau bawk nen thawk kan la halh halh a. Kawngka an rawn kik karh karh a, rawn lut turin ka ti a. Kawngka chu inhawngin ka pa a rawn lut a. Kawr pawl simple tak leh kekawrbul a ha a. Ka lo nuih ver ver a. A hawi kual a, ka pindan chhung awmdan vel chu a en kual a. “Ka in pack fel vek tawh e” ka ti a.

“Hmanni a heta ka rawn kal atang khan hetianga biakna hun che hi neih theih ka duh daih tawh a” a ti a, min rawn din hnaih sauha.

“A nih chu mawle” ka lo ti liam mai nangin ka thin erawh hriat thamin a phu nghal dawp dawp a, ka hmel chu hlauhthawnnain a khata. Ka dawt sawi kha a hrechhuak ngei a nih ka ring. A laka dawtsawi hi chu engmah lo mai a ni.

“Ali, i tan hian eng nge ka nih?” min rawn ti a.

“Engtin maw?” a ngaihna hrelo takin ka lo ti hu a.

“I tan eng nge ka nih?” dam diaiin a rawn ti nawn leh a. A tawngkam chhuak engpawhah hian sumdawngmi a nih zia hi a hai theih loh.

“Ka pa i ni” tiin ka lo chhanga.

“A nih chuan engtin nge ka lakah hian dawt i sawi theih i rin a?”

Chhan tumin ka ka ka ang a, mahse eng thu mah a chhuak thei lo. Inthiamlo takin hnuai lam ka hawi a. Ka pa chuan ka khabeah dawmin a lamah min kuai chho a, kan mitah tak kan in en rana. A hmaah hi chuan arte pawh ka tluk lo.

Ka pa chuan lainat hmel takin min en a, a lamah min pawt phein a hmangaihna zawng zawng nen min kuah a. A bulah hi chuan ka him a, ka tan phaw nih a tling em em a ni. Min han kuah chiah chu ka la puitlin loh zia ka hrechhuak nghal uar uar mai. Hmeichhe naupang, huana phengphehlep man tum a tlan kual zawr zawr thin, ramhuai leh nawngsawhnawh la hlau em em ang mai kha ka ni.

Mahse ka mittui a parawl eih lo chu a mak ka inti. Ka pa chuan ka darah vuanin ka mitah tak min en a.

“Engtin nge hetiang tak hian ka lo tihsual theih le Princess?” ka pa chuan a ti a.

“Engmah i tisual hleinem ka pa. Ka mamawh apiang engkim min pe a, fanu tana pa tha ber alawm i nih” tih pahin a biang tawn tawnah ka vawn saka.

“Ka kuta ka pawm lai che khan nangmah ti na thei tu tur engmah i chungah ka thlen tir lovang tiin ka intiam a. I mitmeng mawi tak mai hi hrehawm tihna leh khawharnain a a luah khat ka remti ngailo. Mahse tunah chuan ka hlawhchham ta a nih hi”a ti a. Chutah tak chuan hun harsa ka tawh apianga ka tana ban rinawm tak ka pa chak tak mai kha ka hmu thar leh a ni.

A khabe hmul var chhap mai chu ka khawih a. A hma ni lawk khan a met fai vek kha a ni si a, eng ngati nge tunah tak a khabe hmul a rawn vara, a mit ko a thim ruih nachhan chu ka hre lo a ni.

Eng ang fanu nge maw ka nih a chungte chu enga tinge a hma daih a hre lo kha nge ka nih? Ka natna tawkte hi chu eng eng emaw ka tawng ve fo a, mahse tun tih loh hi chuan ka pa mitmeng a a na hmel hi ka la hmu ngai lo.

“Ka pa engmah i thiam loh a awm lo. Khawngaihin nangmah inthiam lo tawh suh” zawitein ka ti sap a, a mittui chu ka hruk saka. Tun hi a tap ka vawikhat hmuhna a ni. A mit a chhing a, thawk a la vang vanga. Ka khum lamah ka kai phei a, ka thut tir a, kei erawh a hma zawnah ka thutung a.

“Ka pa, khawngaihin hetiang ang hi chuan awm suh” ka ti a. A mit a rawn meng a.

“A nih eng nge thil awm dan min han hrilh teh” min ti a.

“Min ring em?” ka ti a. A bu nghat a.

“Min ring turin ka duh che a ni pa. Ka thil tih hi ka hria a ni”. Ka hlauh ber chu ka thil tih lai hi min dang ang a, inah min hruai haw hmak ang tih hi a ni. A nih si chuan eng tikah mah Ian a’n Ashley-i a chang tawh ngai lovang. Mi pakhat hringnun tih chhiat chu mi pathum hringnung tihchhiat ai chuan a tha zawk tho tho.

“Mahse thil awm dan hi, hetiang a nih si chuan i nat phah dawn a. Chu chu ka remti hleinem”

“Min ring rawh ka pa. He thil hian ka hlimna a la thlen dawn zawk a ni”. Ka hmangaih ber Ian a’n a hmangaih ber a pawm huna a hlim hmel chu an thla atang ka lo thlir ve anga, chu chuan min ti hlim em em ang. Ka pa chuan eng emaw sawi leh a tum a, mahse ka lo dang vata.

“Min ring rawh ka tih che kha” ka ti nawn leh a. A mitmenga hlauhthawnna awm chu a kiang a, ka mitmengah erawh tumruhna a zual sauha. A tawp a tawpah ka pa lu bu nghauh chuan min ti nui ve ta. “Hre reng rawh aw ka pa, ka hmangaih che tih hi”. Ka chalah min rawn fawpa.

“Nick” Will-a aw chuan kan hun hman dun chu min rawn thiah saka.

“He pa tak hi chu aw.., a hun lo thei a nia” tih pahin ka pa chu a tho a, ka samah a rawn tuai a. Pindan atang chuan min chhuah sana.

Chhuatah ka thu a, tun thla 5 chhung a thil thleng, kan inneihni atanga Ashley-i leh Ian-a te in kiss tep chhung a thl thleng zawng zawng chu ka ngaihtuah leta. Natna lam ni lovin a eng lam zelin ka thlir lui hram hrama, tunah chuan an pahnih pawh an inpawh tawh khawp mai. Ka hun neih lai ngeiin ka tih tur hi ka hlen tur a ni. Rei loteah kan inneihna chu a tawp anga, chuveleh an pahnihin an innei ang.

“Alison” tu emaw hian ka darah min rawn vuan a, ka han hawi chho chu Ian a’n min lo en renga. A mitmengah chuan min ngaihtuah a ni tih ka hria.

“Aw?” ka ti a.

“Ka koh nasat tehreng che nen eng nge chhuatah thuin i lo tih a?”. Ka hawi kual a, ka pa a chhuah atang khan chhuatah ka lo la thu char char a nih hi. Ka insiamrem a, Ian-a chuan min lo vuan tho a.”Kan vaiin nangmah chiah kan nhak tawh che a nia. I kal vat ang” a ti a, ka bag a ak a, a chuak a. Kei pawh chuan ka purse leh ka phone ka la a, ka zui chhuak ve nghala.

Kan vai chuan pawn lam kan pan a. Ka chhuah ve hma chuan thil eng emaw ri rek ka hria a, ka han hawi kual a, engmah hmuh tur phei chu a awm lo. Ka ngaihtuahna mai mai a nih dawn hi ka ti a. Ka kal leh chiah tur chu ka phone a rawn ri a. Ka phone ka phawrh a, min rawn phone tu chu ka number hriat ngai loh a ni.

“Hello?” engmah chhanna ka dawng lo. “Hello?”

Chhanna ka dawn si lohah chuan dah leh mai ka tum a, chutih lai tak chuan phone atang chuan thaw ri ka hria a. Chuveleh “Hello?” ka ti leh vata. Thaw ri tih loh chu hriat tur dang a awm lo.

“Mangtha le” chu hmeichhe awm chu ka hriat than tak ni tlatin ka hria. Mahse ka hriat chhuah hmain lehlam kawngkar atang Ian a’n min rawn ko a. A awmna lam ka hawi a, ani erawh chak mangkhengin ka lam panin a rawn tlan phei a. Engmah ka sawi hman hmain min rawn pawt leng lawp a, ka dinnaah taka darthlatlang hlawm tla kek ri chuai chu ka bengah chuan a khawk rum rum a.

Ka mit ka chhing tlata, Ian-a chuan nghet takin min vuana. Muangchangin ka mit ka meng a, Ian-a chuan min pawt tho a. Hliam ka nei em tiin ka taksa pum chu a en chhuak veka.

“I tha tiraw?”

“Aw” ka aw chu a khur der der a. Ian-a chuan a hnung lama chandelier tla keh nuai mai chu a thlir a, min tlak na se zawng ka thi chiang teh ang chu.

Midang ho pawh chu mangang takin an rawn tlan lut ve nghala. Emily chuan min rawn bawihsawm vta, ka that thu ka lo hrilh a. Ian-a min vawnna ka kut chu ka en a, thisen a lo kai nung. Ian-a chu ka va en vata, a kutah darthlalangin a lo at a lo ni a.

“Khawi maw” ka va ti a, ani erawh chu engah mah a ngai lo ang maiin a lo nui ver ver a. A kak zau angreng a a thi duh phian lehnghala. A kawr var hakahte chuan a kai luaia. A hnung lamah pawh darthlalang chuan a lo at tho chu niin.

“Lo va kal rawh u. Kan lo kal vat ang” tih leh Ian-a chu pawh ka ruala. Ka pindanah ka luh pui a, ka khumah ka thut tira. Ka tha erawh a la khur der der reng a. Medical kit ka neih ang ang chu ka lachhuaka.

“I kawr kha hlip rawh” ka ti a, a nui suk ringawt a. Mahse a kawr hlip tur pawhin a ban a ti na a, a ban tih kan chu a harsa viau ngei ang. A kawrkilh a phelh mual mual lai chu keiman ka va tih sak a, a kawr pawh chu ka phelh sak nghala.

Khumah ka bawh tir a, darthlalang them la tang chu tweezer in ka pawh chhuah sak a. Chumi zawhah alcohol in ka hruk sak a, a na ti chu a then deuh sawka.

“Min rawn chhan avangin ka lawm e” ka ti sapa.

“Chutiang sawi angai lo. Ka tih tur reng alawm”

Ka lo bu nghata.

A hliam chu tha takin ka tuam saka, ka indah fel leh vek hnuah ka kut ka sil fai a, ka pindan atang chuan kan chhuak a.

END OF CHAPTER -11

Zawhna: Chandelier kha a rawn tla palh reng nge ni ang a tu emawin Alison-i thah a tum zawk?

Chapter -12

(Aiden)

Pawnah kan va chhuah chuan ka pa chuan kan bungraw kengtu tur Pu Gupta-a chu a lo an khum mawlh mawlha. Kum 50 ral kai tawh, sam tuak var vo leh khabehmul nei a ni a. Ka pa chu a kutah ka va vuan a, ka va khap daia.

“Eng ngati nge a ka pa?” tiin ka zawta. Ka lam a rawn hawi a, ka chhip atanga ka ke ler thleng chuan hliam ka nei nge nei lo tiin min en chuak vek a. Hiam pial a min hmu cu a thaw huaiin ka hria.

“Nimin lawk pawh khan Gupta-a hi ka hrilh mawlh mawlh alawm. Chandelier khaina hrui saw a nghet lova, mi a tlak hmain siam tha vat rawh ka ti a. Tunah ti hi kan ni ta a nih hi” a ti a. Pu Gupta-a chu inthiamlo hmel takin a kul ngala.

“Ka pa, ka tha alawm. Engtinmah ka awm hleinem. Ian-a pawh a tha e” tih pahin pu Gupta-a chu kal sawn vat turin ka mitmei a. “I kal vat teh ang’ tiin ka pa chu motor awmna lam ka panpui a. Chutih lai chuan hnung lam atang Charlotte i’n min rawn au a. Charlotte-i hi kan awmpui a ni a, inchhung tih fai chu a hna ber a ni.

“Awihah?” ka ti a, ka va pan hnaia. A kut leh kut a vuan a, hmun tin mai chu amelh kual zek zek a. Nipui kawr ho lam tak a ha a, a kawnngah apron a hreng a, a sam chu hnung lamah fel takin a tawn bawka. Kum 25 bawr vel a nih ka ring.

“Charlotte?” ka han tih chuan rawn harhchhuak zawk hmel hi a pu a. “Ma’am” a thusawi lai chu ka kutin ka lo chelh dinga.

“Alison tiin min ko thei ang” tih pahin kan nuih saka.

“Alison, ka sawi tur hian awmzia a neih leh neih loh phei chu ka hre lo a, i hriat sa vek chu a nih zawk ka ring maha” a tawng chu a kat deuh nak naka.

“Han sawi ta che” ka ti a. A mit a ching a, thawk a la vang vanga. Zawitein ti hian a rawn sawia. “Nizanah khan Emily leh mipakhat an inbe dun lai ka hre ru a, Chandelier tih tlak chungchang vel kha an sawi a ni”

A thusawi chuan min deng na kher mai. Emily maw? Chu chu thil thleng thei a ni dawn em ni?

Ni lo, ani chuan chutiang thil chu a ti hauh lovang. Ka lu ka thing a, Charlotte-i chu ka en a. “Charlotte, min hrilh avangin ka lawm khawp mai. Mahse chutiang thil chu Emily i’n a ti lovang. Thil dang zawk an sawi tumna pawh a ni maithei a ni. Ka pa pawhin a khaina a ngheh tawk loh thu a sawia. Amahin a rawn tla a ni mai” ka ti a. A darah ka beng thak a, motor awmna lamah chuan ka let veleh nghala.

Emily chuan a ti hauh lovang. Ani te chu ka best friend alawm.

*** *** ***

Chawlh hmanga Miami a kan zin leh accident ka tawh atang khan thla khat zet a liam leh ta. Khalam thil reng reng kha tuman kan ngaihtuah leh tawh lo. Drake-a leh Emily pawh angai te tein an la ni reng a, an awmdan chu thla hat kal ta ami ang tho khan ni ve tho si, mahse nghet tak tak chuang si lo angreng kha an la ni. Ian-a leh Ashley-i te inkar erawh a ngai reng lo.

A falin ni tam tak an hmang dun a, a bik taka an chhuah dun pawh tum nga lai a ni ta. Kei erawh zantin Netflix movie en pahin ice-cream ka ei a, chu zawng chu a ni mai.

Ka pa leh Will-a pawh an hotel sak dun hmasak ber turin England ah an thang mek a, Jake-a pawhin social media-ah mipa pakhat a tawng thar a, chu pa nen chuan la inhmu chiah lo mahse a phur thei khawp mai.

“Alison, i tukthuan hi a dai zo dawn” Marie aw chuan min ti harh zawka. Darthlanglang hmaah ka inen zuai zuai a, ka pum riltam tawh zet mai hnawhkhat turin inhnuai lamah ka chhukthla a.

Vawiin chu tlem a dangdai deuh hlek hak ka duh tlat. Jeans dum te lam ka ha a, kamis var hain ka bilhlut a, kawngkher var sin chi ka hreng bawka. Ka kawrban chu ka kiu thleng ka thlep chho a, ka sam chu ngil takin ka thlah bawk.

“I va chhelo ve” Marie chuan min lo ti a.

“Ka lawm e” tih pahin ka in pose a, a nui nghal awr awr a.

“Khawiah nge Ian-a hi?” tih pahin a thutna chair ruak hiai lam chu ke en a. Vawiin chu meeting leh hma taka chinfel ngai tur ang chi files engmah a nei lo bawk a, a hmahmawh tehchiam lo a ni ang.

“Ashley-i a va thlah a nih kha”

“Thlah a? Nizanah hetah a riak em ni?” ka lo ti a, ka zawhna zawh chu a chhanna ka hre chak hran lo. Marie chuan min rawn en a, engtin mah a min chhang lovin a hawi sawn leha. Ka riltamna zawng zawng a reh nghal vek. Ka thleng engtin maha ka la khawih loh chu ka nawr sawn a, ka thutna atang chuan thoin ka purse ka la a, ka hna lama kal turin ka chhuak nghala.

Thla tlemte chiah nghah a ngai ta. Chutih hunah chuan inthenna lehkha ka pe thei tawh ang.

Chutiang thil ngaihtuah chung chuan ka hnathawhna hmun tur Cullen Inc lam chu ka pana.

“Good morning” tiin thawktu dangte chuan min lo chibai liam liam a. A tu a te pawh chuan min hre vek tawh. Ian-a nupui ang ni lovin, a secretary angin. Nuisang chungin elevator-ah ka lut a, Ian-a min pek thi chu ka khawiha. Kha zan kha kan pahnih inkara zan hriat reng tlak ka neih chhun a ni a. Chu mi ka ngaihtuah zawng chuan ka nui saka.

Ian-a awmna chhawng chu ka thleng chho thuai a. Ka dawhkan awmna lamah pheiin ka bag chu chhuatah ka dah a, ka computer ka on nghala.

“Vawiinah eng nge kan tih dawn i han en ang hmiang” ka ti a. Vawiin chu chutiang anga hna hahthlak thawh tur kan nei hran lo. A lawmawm duh khawp mai.

Mail ka check lai chuan elevator rawn thleng ri chu a rawn ri tleng a. Ka hawi phei vat a, elevator chu inhawngin Ian-a a rawn chhuaka. Kawr sen leh kekawr dum a ha a, blazer dum nen.

“Good morning Sir” ka lo ti a. Ka lam a rawn hawi a, a mitmeng eng phet mai chu hmuh a nuam khawp mai.

“Good morning Alison. Khawngaihin rawn lut ta che” a ti a, a kal lehnghala. Kei pawh chuan a office ah chuan ka zui lut ve vata. A dawhkan hma takah ka ding a, ani erawh a closet bulah pheiin a tie dum awrh tur a la chhuaka. Ka nui saka, a tie chu laksakin a nghawngah ka awrh tira.

“Enga tinge hengte chu zingah khan i sawi mai loh a?” ka ti a.

“Ka kal angai tawh si a, i lo la mutui lutuk a” tiin min chhanga.

“Chutiangte chu min kaihthawh mai tur che alawm”

“Ka inthlahrung a” tih pahin a nui seih a.

“I vannei hlauh a nih chu. Ka duhnaah hi chuan Jackie Chan ang chiah ka nia, ka lo kick hrep mai ang che” ka ti a, a nui haka. Ka awrh zawh tir hnu chuan a thutna tur lamah a let phei leha.

“Ka hmu chak khawp mai che” a rawn ti zui leh a. “Fiamthu a nih chu. Vawiin eng nge kan program?”

“Lunch meeting i nei anga, chu zawng chu a ni mai” ka lo ti a.

“Mahse tunge i meeting pui tur hi?” ka ti a, a la sawi loh avangin tunge a nih ka la hre bik lo.

“Umm...kha kha, englo-...” ti a phun nuap nuap chungin ka lam a rawn hawia. Eng emaw sawi a tum lai takin tu emaw hi a office chhungah chuan a rawn lut a

“Hello cousin” mipakhat, hmeltha zet mai hian British awphawi nalh zet mai hian a rawn ti a. Suit dum a ha a, a chhungah kamis var a ha a. A sam a buang a, a mitmu erawh a hring thung. Han en reng reng pawhin mi langsar tak a ni ang tih a hriat theih mai. Ka hmuh tawh hnu ni tlatin ka hre deuh.

“Aiden? Vawi engzat nge i rawn luh hmain kawngka kik thin rawh tih ka hrilh dawn che?” Ian-a chuan a lo ti vata. Chu pa chuan a thusawi chu a hre lo nge engah mah a ngai lo tih pawh ka hre lo. Chair pakhatah chuan a thu kar sauh a, a kut pahnihin a thukhum a dawma.

Ian-a chuan min rawn en a, hrilhhai zet a ka awm chu a rawn hrethiam a ni chek ang chu. “Alison, hei hi Aiden-a a nih hi. Ka cousen, England a mi a nia. Aiden, kei hi ka-“ Ian-a chu a ngawi vang vang a, sawi mai dan tur a hre lo.

“A secretary. Alison ka ni e” tiin ka lo sawi pum a, ka kut ka phar chhuaka. Aiden-a chu a thutna atang a rawn tho a, ka kut chu rawn vuanin a fawp a. Ka biang a lo sen nghal tawn tawn a. “I chhelo hlemai”

“A awihawm loh emai. Ka lawm e Sir” ka ti a. A nui hak a, nui mawi tak a ni. Min rawn en leh a, thil eng emaw zawn nei ni awm tak hian min en a. Hrechhuak ta ni awm takin a mit a chhinga.

“Ka hria che” a rawn ti a.

“A awihawm loh emai a” Ian-a chuan a lo ti a, kei pawh chu ka lo bu nghata.

“Ni lo. Ka hria alawm. A hmain elevator-ah kan chuang dun tawh” a rawn tih takah chuan mak ti takin ka lo en let vata.

“I la hria em pitar pakhatin nupa inhmeh tak in ni min tih tum kha. Chu pawh kawr in ang kan lo hak avangin “ a ti a, a kut chang chu an hmet ri khap a.

“E, ni dawn tak” kei pawhin ka hrechhuak ve chiah e.

“Vawiinah pawh kan inhmeh leh chiah a nih hi” tih pahin an thawmhnaw hak chu a rawn en tawn a, a lo in ang leh chiah chu niin. Kan nui dun hak hak a.

“Helaiah ka hmu leh ang che tih pawh ka ring tawh hleinem” tih pahin min rawn nuih saka.

“Intawng leh tur reng kan ni a niang” tih pahin ka lo nuih let ve a.

“Eng nge i rawn tih dawn?” kan tawng lai chu Ian-a chuan a rawn pawtchat a, thutak deuhin Aiden-a chu a en a.

“Inhlanna hmang turin” tiin Aiden-a chuan a chhang a. A sawi awmzia chu man lo tak ka ni.

“Eng inhlanna maw?” ka lo ti hu a. Aiden-a chuan mak tih hmel angreng deuh hian min rawn en a.

“I hre lo amaw? A secretary i ni sia, kumkhata a kan party nghahhleh ber pawh engmah i lo hre lo a ni maw?” min ti a, kei lah chu ka bo tulh tulh mai.

“Inhlanna alawm. Party a ni lo” Ian-a chuan a lo ti vata.

“A thlawn a intur leh nula awmna hi chu party ka ti zel mai asin” tiin Aiden-a chuan a lo chhanga.

“A mual boin ka bo” ka lo ti a. Aiden-a chuan min rawn en a, Ian-a a tawng hmain a lo tawng khalh vata.

“Inhlanna kan ti a, chu chu kum khatah vawikhat kan hlawhtlinna lawm nan kan lawm thin. Chutah chuan 50% theuh mi harsate tan kan hlan pah thin bawk. Chung ho tana tih chu a ni ber pakhat. Ka tan erawh mipa leh hmeichhia kan han inkawm a, lungkham nei reng lova kan han in ho thin kha a nawmna lai ber chu a ni mai” tih pahin min nuih saka.

“Ka lo la hre ve lo reng reng” a ti a.

“Ka tihpalh a ni e. Hrilh nachang che ka lo hre lo va” Ian-a chuan a lo ti vata.

“Engtin nge maw ka unaupa hian a hrilh theihnghilh theih zawk che ni. Mahse engpawh nise Lalhmeltha, engkim a pui tur che leh hrilhfiah tur chein kei hetah ka awm alawm” tih pahin ka kut a rawn la a, a awm min khawih tira. Kei lah chu ka lo nui ngheka.

“Engtin nge maw lawmthu kan sawi dawn ni Sir” tiin fiamthu pahin British awphawi kan hmang ve ngei a.

“Kei hi min date pui la, chu zawng chu a ni mai” tihpahin min rawn siai zeuh a. Thil ngaihtuah ang deuh hian kan thle vang vanga. “Ka lo ngaihtuah ange” ka ti a.

Ian-a chuan a dawhkan chu a hnek ri bur a, a thutna atang chuan a rawn ding chhuak nghala. A ngaihna hrelo zetin a lam ka va hawi a, Aiden-a nena kan invawnna kut chu a en tih ka hria. Rang takin ka kut chu ka la thla vata.

“In inchhai zawh tawh chuan i hnaah let leh tawh rawh. Lunch meeting ka neih tur kha lunch date ka nei zawk dawn tiin lo thlak ang che” a ti ram hmurh a, pawn lamah a kal chhuak nghala.

“Eng nge kha tia a awm vaka?” ka ti a.

“Ka hre bik lo. Kang rim erawh ka hria” tiin Aiden-a chuan fiamthu a lo thawh leh hmanhmawh a.

Lunch date a neih zawk dawn chuan Ashley nen a ni leh ngei ang. Thawk ka la vang vanga, ka thil tih chu a dik ber angem tih ka ngaihtuah rualin chutiang ngaihtuah nan chuan a tlai tawh lutuk tih ka ngaihtuah chhuak lehnghal a.

*** *** ***

Inhlanna huna eitur rawn siam tu turte ka book fela, mail rawn thleng ka en fel lehnghala. Aiden a’n mn rawn pui a, aniin kawnghmang a lo hre em em bawk nen ka lawm tak zet a ni. Naktukah chuan engkim ka zo vek tawh ang. Thinrim a a chhuah atang khan Ian-a hmel reng ka la hmu leh ta lo va, mahse mu tur em a a rawn haw chu ka beisei.

“Zanriah i siam tui hlemai a Marie. Hman a a tui ka dih dan thin ngai reng kha a la ni” Aiden-a chuan a lo ti a. Marie chuan lawmthu a sawi a, kan thil eina chu a rawn seng fela.

“Enga tinge hetah i chen ve daih a?” tiin Aiden-a chuan min zawta, inhnung lam panin kan phei duna.

“A chhan chu chhenna tur in ka la nei lo va. Tunah hian ka zawng mek a, chumi chhung chu an bulah hian ka cheng ve riha” muang ban chapin ka ti a.

Kan inneihni khan a rawn kal ve lo va, chuvang chuan Ian-a nupui ka ni tih pawh a hre ve lo a ni. A nupui hlui ka ni thuai bawk ang. Kan inneihni khan sawm bik pawh an tam lo va, media lam pawh an inlan kan remti lova. Chuvangin miin an hre vak lo pawh chu mak ka ti hran lo.

“Kan inruahmanna pawh kan peihfel vat dawn hi” tih pahin ka ban chu an zi kual vela.

“Ka la ring chiah lo” Aiden-a chuan a rawn ti a.

“Enga ti maw?” ka lo ti vata. “A chhan chu nang nen a hun hman dun ka la duh a ni” tih pahin a nui saka, inchhung lamah min nuih sana. Kei erawh chet ngaihna mai pawh ka hre lo. ka ang huau ringawta.

Chapter -13

"Ka uang lo a nia Casey. Thil pakhat chiah ti turin ka ngen che a, chumi pakhat chiah pawh chu i ti hman lo a maw?" tiin ka ang hlawih hlawih a. Ka thinrim bawk si, ka rilru a hah bawk si. Ka aw ki pawh a ring thelh a ni.

"Ka tihpalh lutuk Ma'am" inthiam lo takin a tawng zawi raiha.

"Naktuk hi inhlanna ni a ni tawh a, eng nge an ei tak ang a? I inthiamlohna chuan awmzia a nei angem?" ti a ang chungin phone chu ka daha. Ka thinrim lutuk chu ka puakkeh mai dawnign ka hria. Thinrim leh rilru hah hi chu thil kal kawp chi lo tak a nih dawn hi.

Ka awmna choka atang chuan ka hnunglam atangin nui thawm ka hria a, thinrim a tum bur chungin thawm rawh chhuahna lam chu ka hawia. Sandwich ei tuam tuam chungin Aiden-a chu ka hnung lamah a lo ding renga.Ka hmel nelawm loh zet mai a hmuh chuan a inthiam leh chiah lo a niang, ka tlawm tih nan a ban pahnih a rawn phar chhuak a, a awmdan avang chuan ka nuih a za leh hnuhnawh a.

Chutia ka inbengdaih leh tak hnu chuan thil ho te avanga ka ang chiam mai chu ka inthaimlo leh hnuhnawh kher mai. Thupha va chawi leh tha a ka hriat avangin phone chu la kangin va call leh ka tuma. Chuveleh Aiden-a chuan ka phone ken lai chu min rawn chhuh vata, a lu thin pahin "A ngai lo" a ti a.

"I rilru a nuam lovang tih chu ka hriatpui lutuk che a, mahse khami avang khan a lehpekah a insiam that tawh hram ka beisei" a ti a, ka phone chu a ipte-ah a ak daiha.

"Chu pawh ni se inhlanni kha naktuk hi a nih tawh a, engtin nge ka tih ang? Catering rawn ti tu tur pawh kan la ti fel lova, a cheitu lahin an la zo fel bawk si lo. Chubakah bartender tur pawh duhkhawp kan la hmu zo lo ania" ka ti a, ka hmel zawng zawng chu hlauhthawnnain a khat vek tawh. Ka sawi rin pauh leh kan hna a hlawhchham zia a ring ting mai si. Darkar 24 chhunga chung zawng zawng tih fel vek chu thil theih a ni tawh lo.

"Hey Lalhmeltha rawn thu phawt teh" tiin Aiden-a chuan min rawn vuana, steel chair vawt thlawrah chuan min pawt thu a. "Lungngai reng reng suh. Engkim a nih dan tur ang thlapin a ni em em ang. Ka tiam a che" a ti sapa.

Kar hnih liam ta atang khan kan inkawm dan pawh a dang zo vek tawh. Nihnih chhung kha chu CK pui tumin min hel reng a, mahse atan chu chu hun khawhralna mai mai a ni tih hriattir vat ka duh avangin ka nundan chu ka hrilh ta ringawta. Ian-a nen a kan inzawm dante, engvanga helaia la cheng ve reng rih nge ka nih tih zawng zawngte nen. A tirah chuan ka thu hrilh chuan a thawng em em a, mak a tih ber chu Ashley vanga kei min thlauhthla chu a ni. Mahse tunge a hmangaih tur tiha thu ka nei lo ang bawkin tumah hian kan hmangaih turah hian duh kan thlang ringawt thei si lova.

A awmdan chu bansanin tunah chuan engkimah a farnu ang tak takin ka tan a ding tlat a, unaupa tha tak, ka lo awh em em thin ang mai kha a ni. Kei pawhin chutiang ang tak chuan ka en a, chutiang bawkin ani pawhin.

"Tun angah thil theih loh tur atan intiam angai lo" tih pahin ka han melh kawra. "Heng zawng zawng hi nangma thiam loh vek a ni"

"Ngati? Eng nge keimah vang a nihna?" hmeichhia ang mai hian a rawn ti a.

"Nangman hla tawkah min hruai a, party rei tawk nen. Kha khan engkim a pawt khawlo vek ta a nih hi"

"Ohh..! Chutiang chuan ti lo mai teh. Kei ai ai nuam i tih zawk diah kha" a rawn ti nui suk a, chutia a han tih takah chuan uka biang a lo sen nghal tawn tawna. Chumi tum chuan phone kan lo ken theihnghilh avangin Ian a'n min hau hrep bawka, tladah min tih avangin tun thlengin ka lakah a la lungawilo a ni. A lung tihawi leh nan eng emaw tak la tih a ngai dawn a ni.

"Va kal la, va mu siai siai rawh. Keiman ka lo ti vek mai ang" tih pahin kawngka lamah min nawr pheia. Kei lah invawn tan tumin ka phar kual nasa mai. Tum loh deuhin Aiden-a kawrah tak ka han pawt sawk a, ani lah a lo inring lawk bik si lo. Ka tlu tur min vek a tum lutuk naah amah zawk chuan min rawn bawh thlawp a, mahse ka tukhumah a kut a rawn dah hman avangin ka insawhna lo hlauh.

"Oww!" ka ti tuah tuaha.

"Alison? Enga tinge a?" Ian-a aw chu choka chhungah chuan a ring tha kher mai. A rawn au zawng chuan note chu an che dur durin ka hria.

"Karei leh!" kan posi zawng zawng nen chuan hit lo tak a ni. "Tho vat rawh" tiin ka nam tho a, kei pawh chu na ti a rum tuah tuah chungin ka tho chhuaka. A tu ve ve mah chuan min rawn puih pawh an tum lo.

"Min lo puih nachangte inhria a ka lawm khawp mai" kan ti hram a. Zi marin ka bante chu ka phar kual vela.

"A tu emaw zawk zawk chuan insawi fel ngei chu a ngai ang". Ian-a aw chu a vawt ruih a, nelawm loh tak a ni. A meng dur khup bawka. A thin a rim takzet a ni. Engvang nge ni ang?

Aiden-a nen chuan ngawi rengin kan in en ringawt a, a tu ve ve mah chuan han insawithiam ngaihna vak kan hre lo a nih hmel. Ka hnung ka dawmna lut chu Ian-a chuan a rawn hmu thuaia. "I tha em?" min rawn ti a.

"Ka tha e" tiin ka lo chhang vata.

"A tha a nih chu" a ti hmuk a. Mahse eng emaw sawi duh dang nei hmel hi a pu a. Eng emaw sawi tumin a ka arawn ang zuau a, mahse a chip lehnghal vata. Inherin choka atang chuan a chhuak ta daiha.

"A kal ta e" ka bengbulah Aiden-a chu a rawn phun sup a, ka zuang dawrh mai. "Min ti hlau-" tih pahin inchhung lamah kan inzui lut a, a thutiam kha a la hriat reng ka beisei.

*** *** ***

Ni eng chuan ka hmaiah tak rawn chhunin 'Thawh chhuah a hun tawh e' a rawn ti a. Ka inlet thawk a, ka puan sin chuan ka hmai ka khuh a, ka la mu rem ta ang sauh sauh a. Vawiin hi Inrini a ni a, inhlanna ni a ni tih ka hrechuak leh thut a. Chuveleh tun thawh lawp ang maiin ka mu lai chu ka tho chhuak hluaia, en kher lo mah ila ka sam chu thlipuiin a nuai hrep emaw tih mai turin a phir si vek dawn a ni tih ka hria.

Ka inthlakna dawhkan hmaah dingin ka sam chu ka tawn fela, chumi zawhah bathroom-ah lutin tuktina ka tih dan angin ka intifai leha.

"I lo tho tawh maw. I thawmhnaw hak tur pawh darkar 1 chhungin a lo thleng ang. Ti khan lo chawl hahdam la, dar 6 ah erawh a hmunah awm tawh angai dawn a nia" Aiden a'n a rawn ti a, ka pindan atang chuan a chhuak lehnghala. "Engkim a peih vek tawh emawni?" tiin ka phun sup a, ka ha ka nawt nghala. Ka thusawi chu keimah ngei pawhin a ngaihna vak ka hre lo. Engtianga tih tur nge tih pawh min zawt hauh lovin aman a lo ti vek chu a ni awm si a.

Ka tih tur tul ang angte ka tih zawh hnuah khumah thuin cartoon ka en mai mai a, ka taksa hi chu puitling ve vek tawh mahse chhungrila naupanna erawh a reh ve thei lo.

"Alison, i thil tur a rawn thleng e" tih pahin ka pindanah Marie a rawn lut a, lehkha uk a tuam parcel pathum a rawn pawm luta. Pakhat chu a lian deuh ber a, a lai chu a te leh deuh hret a, a tawp berna chu a te bera, chu erawh Lily i'n a rawn ken luh puia. Ani hi Marie-i tunu, Ian a'n lehkha zir tura Chicago a a thawn a ni a, tunah hian chawlh hmangin a rawn aw mek a ni.

Lily-i nen chuan inhmelhriatnate kan nei a, mitmu hring mawi deuh mai a nei lehnghal. Min insiampui turin ka ngen a, ani pawh chu a lo phur khawp mai.

*** *** ***

"Ka in en thei tawh em?" chu zawhna chu vawi za chuang ka zawt tawh ang. Ka zawh apiangin "Aih" ti hlirin min la chhang zel mai. Ka in en theih lohna turin darthlalang puanin a khuh tlat mai a, eng angin nge min chei? Tuarpuii ang deuhte hian min chhuah lo maw tih takngial pawh ka hre thei lo. A tlai tawh avangin a hmahmawh a, a ti puat puat mai bawk si.

Engtik hunah pawh min lam turin Aiden-a a lo thleng thut thei reng tawh tlat. Eng emaw min surprise a duh tih ka hria. A thil min surprise tur chu damdawiin kala lung doctor han hmuh phah a ngaih loh hram ka beisei.

"Kan zo ta" tihpahin Lily chu a tawlhhnung a. Ka thutna atang chuan ka ding chhuak a, a lam hawiin ka inher a. Ani lah chuan a hmui a lo hup nghala.

"Ka lang tha em?" ka ti dek dek a.

"Nangmah ngeiin en teh" a ti a, darthlalang a khuhna puan chu a pawtthla a, chu lam chu ka hawi vata. Ka mitmu uk kharh chungah chuan eyeliner nalh zetin a hawih a, a mascara hnawih chuan ka mithmul chu a ti sei lehzuala. Engkim, ka hmei a chei dan leh a thil hnawih zawng zawngte chu chu bak a awm leh tawh kher lovang. Darthlalang hmaah chuan ka ding vang vanga, chuta ka hmeichhe hmuh chu keimah ka ni tih ka inhre lo tep zawk a ni. Ka nghawnga ka lunghlu thi ka awrh zawng zawngte nen chuan.

Lily lam chu ka hawi a, ka va kuah ringawta. "Ka lawm lutuk" ka ti sapa.

"Kei pawh le"

Chutih lai tak chuan pawn lam atang car horn a rawn ri a. Inhnuai lamah min chhuk pui a. Inhnuaiah chuan ka pasal mitmu pawl nalh em em mai, tu emaw nghaka a ding chu ka zuk hmu a, ka taksa zawng zawng a vawt chhuak nghal vek. A incheina zawng zawng chu nidang ang thoin a inhmeh em em vek a, thawk tibuai vek thei khawp a ni. Mahse eng emaw kim lo a awm. Ka hmuh zawng chuan ka nui haka. A bow tie awrh chu ka suih zawh loh a ni.

"Tie leh bawk ami?" tih pahin ka nui a. Ka lam a rawn hawi a, ka chhip atang ka keler thleng a a en chhuah vek lai chuan a mitmeng zawng zawng a danglam a ni tih ka lo hmu thei. A inthup hman lo a ni ngei ang.

"A nih hmel" a rawn ti tham tuak a. Thawk a la haka.

Ka chukthla a, a tie chu ka siam that saka. Hetia ka tih apiang hian ka lung a awi a, nuam tihnain ka khat thin. "Ka zo ta e" tih pahin a suit haka vut kai lo pui chu ka ben fai saka.

"I va mawi ve" min rawn tih chuan ka lai chhe lehnghal der mai. Lawmthu hrilh ka tum lai takin Aiden-a a rawn luta.

"I va chhelo ve" a rawn ti lut a. A suit hak hnuaiah kamis pawl, a chung kilh pum loh a ha a, chuta tang chuan a awm vun mam thlar mai chu a hmuh theih a. A sam pawh nalh takin a khuih pial a, hmuh ringawt pawh hahdamthlak tak a ni.

"Tie i awrh dawn nange?" ka ti a.

"Tie ka awrh ngai lo" tiin min changa. "I kal vat teh ang. A host tur ber tlai chu a chi loh" tih pahin a chhuaka.

"A hmun tur i hria em?" Ian-a chuan ,min rawn ti a. "I hre bik nange?" tiin ka lo zawt let a.

"Ka surprise dawn che u a ti ve tlat sia" Ian-a chuan a ti a.

"Hmun nuam tak a nih ngei ka beisei" ka ti sapa. Damdawiin hi ka hua. Chuvang chuan luh ngaia awm ka duh lo. Ian a'n ka chuanna tur car kawngkhar min hawn san thleng chuan ka rilruin ka tawngtai mawlh mawlha.

END OF CHAPTER -13

MY HUSBANS’S GIRL

Chapter -14

Car a ding a, party dang ang thoin kan hmachhawn hmasak ber chu paparazzi rual a ni, Min rawn bawr tuau a, an camera light chu an rawn hmet de zawr zawr a. Ian-a hnungah ka inphen ta ringawt a. Aiden-a pawh car atang chuan a rawn chhuak a, hmanhmawh takin inchhung lam panin kan kal vata. Kei chu hetiang ang boruak hi ka zo ve lo aniang, camera light ringawt pawh chuan ka lu an ti puak mai dawnin ka hria. Aiden-a chuan nghet takin ka banah min vuan a, ani erawh camera lam hawiin a nui sang renga. Chutih lai tak chuan kan invawnna chu Ian-a chuan a rawn su phawng hlawk a, rin loh tak maiin ka banah min rawn hmer a, a lamah min pawt nghala. Aiden-a lam atang chuan min pawt hrangin kawngkapu lamah min phei puia.

Kawngka bulah chuan palian tak suit ha pahnih an lo ding a, an bengah bluetooth hmang a inbiak pawhna an vuah ve ve a. Ian-a chuan chung mite chu a han nuih sak a, anni chuan eng sawi lovin min lih tlang tir nghala.

Aiden-a chuan eng angin nge min surprise a tum ka hre lo va, lungphu tha lo ka neih phah mai ka hlauh thu ka sawi tawh kha. Tunah pawh min surprise nghal der mai. Mahse a tha lam a la ni rih e.

 

 

Hall chhung chu a nalh kher mai. Inchung lamah chuan puan pawl leh var an zam a, a lai takah a intawk a. Chung lam atangin ball lian tha tak, darthlalang them a bel khawm ni awm tak hi arawn uaithla a, chu chuan hall chhung chu a ti de neuh neuh a. Dawhkan puan var a khuh leh rangkachak rawng chair a inhung far a, a lai tak erawh chu lamna tur niawm tak hian an zuah awl thung a. Chung chair-ah te chuan mahni no dawmin an thu far a, inchibai tawnin an titi mawlh mawlh hlawma. Stage pawh nalh taka chei niin stage bangah chuan projector hmangin Cullen Inc hnatawh ho, hmuh nuam tak tak an ti lang reng bawka.

Hnung lamah a duh apiang tan a lo thlit sak turin bartender eng emaw zat an lo awm bawk a, ka tih theih loh zawng zawng kha Aiden-a chuan a lo ti vek a nih hi. A lam hawiin ka va nuih seih a, ani pawh chuan intihtheih hmel deuh hian min lo nuih let ve a.

Ka bulah a rawn phei a, “I lawm hmel chuan min ti lawm khawp mai” ka beng zawnah a rawn ti sapa. “Ka lawm tih ka sawi awm pawh ka hre lo e a” ka lo ti a, a sir kil lamah chuan ka kalsawn daih a. Hmeichhe chhelo tak tak an awm fur a, a then a rual deuhin an ding khawm a, mipa chhelo deuh ni a an hriat chu an en vung vung a, eng emaw hi an inhrilhru leh sep sep thin a. Han en reng reng pawhin chung ho chu pasal kawp lai nei vek an ni tih a hriat theih a, chu chuan mak min tih tir lek lek a ni.

Ian-a chu ka melh kual deuh a, ka hmu mai tawh lo. Mipa mitmu dumpawl chu ka hmu nual a, amah tak erawh kha chu hmuh tur reng a awm lo. “Khawiah nge maw a nih daih le?” ka ti a, chuveleh kawngkapui lam atang thawm a rawn awma, mitin mai chuan chu lam chu an hawi nghal veka. “Eng nga tinge a?” ka ti a.

Aiden-a pawh chuan hnung lam a leh hawi a, a champaign no dawm chung chuan a inher ve nghala. “Star nupa an rawn thleng a nih saw” a ti sapa, chulai hmun atang chuan a kal sawn nghala. A ngaihna hre lo takin ka en vung vung a, ka hawi let leh chiah chuan ka zawhna chu chhanin a awm ta.

Ian-a a rawn pen lut a, mahse amah chauhin a ni lo. A banah ka unaunuin a rawn vuan lut tlat. An pahnih chuan fiamthu an inhrilhru bik emaw tih mai turin hlim hmel takin an nui dun ver ver a, chiang takin ka lo en a, ka zawhna chu zawh nawn leh reng a ngai tawh lo. Enga tinge Ashley-i hruai a duhte chuan Aiden-a nen a kan ruala a lo kal ve kher? He pa nen hian thla 5 chuang kan cheng dun tawha, ka la hrethiam thei chuang lo chu a nih hi.

Rei lote hnuah tanna hun kan hmanga, Will a’n rei mawi tawk tak thu a sawi hnuah Ian a’n a rawn zawm veleh a. Thusawi hi ka ning ber zel mai. Kal sawn daih ka tum lai takin Ian-a a rawn ding chhuak veleh a, a mitmu pawl de ral a mai leh a hmui no chek mai chuan ka thinphu a sawi danglam leh vek ta. Chutah meuh chuan thu a sawi a ni tih pawh ka hre chang leh tawh lo.

“I chilthi a tla ania” chu aw tham chhak mai chuan min tiphu nasa lutuk. Rang takin ka khabe ka tuai a, eng chilthi mah a awm lo. Aiden-a lah insum zo lo, a rawn nui ta vak mai. Ian-a thusawi lai a ni a, hall chhung hcu a reh thiap a, mahse Aiden-a nui ri chuan engkim a khawih chingpen vek. Mi zawng zawng mit chu kan awmna lamah a rawn fu vek a, ka zaha ka zah dan zia mai chu.

“I thing lutuk” tih pahin a banah ka va veng taih a, ka kun nghal char char a. Ani lah inthiamlo angreng deuh hian a la nui khur chur chur tho a. Ka han hawichhuak dek dek a, Ian-a chuan chiang zet hian min lo melh ngur a. A thusawi lai pawh sawi zo ta lo chuan stage atang a chhukthla a, Ashley bulah a thu leh ta daiha.

Thil eng emaw tal in ve reng reng ang tiin bar lam ka pan a, mahse rui lo hai lova awm chu ka tan a tha zawk tih ka ngaihtuah chhuah leh avangin serthlum tui ringawt ka lam ta zawka. Bussinessparty hi ka tan chuan party ninawm tak a ni.

Zawimuangin light chu an rawn herh dim riai riai a, Mary Lambert hla ‘She keeps me warm’ tih chu a rawn ri ta ruai ruai a. Chuveleh kawppui nei apiang ten lamtual lamah an kawppuite an kai chhuak a, an lam tan nghala.

“A lam mawi ber i lo thlir em ni?” lang lo lam atang hian a rawn tawng thut thut zela, tun tum erawh ka lo inring hman aniang ka phu lo ve khiah mai. Ashley-i kawngah a kuah a, an kut lehlam an invuan ve ve bawka. Ka awm dan chu ka hrethiam tawh bik lo. Ka pum a rawn sa but but a, Aiden a’n a kut a rawn phar chhuah chu ka vuan ve ta ringawta.

“Engtin nge boruak kar atang hian i rawn lan leh thut thin a?” ka ti a, lamtual lamah min kai chhuaka. Mipa ho chuan min rawn en deuh thup a, a thenin min lo thlir vawng vawng bawka. Aiden-a chu ka din hnaih deuh a, tunah chuan a nuam pawh ka ti ve tan ta deuh. It hmel deuha min lo thlirtu mipate chu a melh let a, ka ta a ni tih melh hian chung mipate chu a melh let ve hlawma. Hetianga min lo thir dauh dauh hian kei chu ka thin a rim tlat zel.

“I bulah ka awm reng e” rawn tih sap pahin ka kawng ria raihah chuan min rawn kuah a. A awm thleng bak ka chen lo. A dar a han kuah ve turin ka tan asang lutuk a, chuvangin a banah ka vuan ta ringawta. Ka kut leh lamah a kut pakhatin a rawn vuana, rimawi rem chuan kan insawi duna.

Insawi pah chuan hnung lamah ka han lehhawi a, a mitmu dumpawl tak chu ka va tawng chata. Min lo en renga, Ashley-i a kuahna chu a hmer na sauh a, Ashley-i tan a nat theih hial ka ring. Chutah inthiamloh hmel takin Ashley-i chu a en leha.

Ka hawi let vata, Aiden-a mitmu paw ram mai chu nuihzatnain a khat a. “Eng nge nuihzathlak awm a?” ka tih veleh sir lamah min theh vir a, alamah min pawt let leh a, ka kawngah min vuan leh chata.

“Ka unaupa awmdan atang sawn engkim a chiang vek. A la pawm duh lo mai chauh a ni” tiin a nui haka.

“Eng tin a?!”

“Hmangaihnaah hian eng nge a kailawn hmasa ber?” ti a min zawh pahin chiang zetin min rawn en a.

“Eng angin maw?” tiin ka zawt leh hu a. A zawhna chhanna chu ka hre lo a ni. Hmangaihnaah chuan thil chi thum a awm ka ringa. Luanliamna, thuk zawka luanliamna leh zawng zawnga luanliamna.

“Mawina chu a ni lo phawt a” tih pahin min insawi pui leh a. A hla dawttu atan Ed Sheeran – Thinking Out Loud an rawn play leh chiaha.

Ian-a erawh a sir lamah Whisley dawmin a dinga, kan awmdan chu min en reng tih ka hria. Mahse Aiden-a chuan amah ka hmuh theih lohna turin min phen tlat zela. Ka beng bulah a rawn kun hniam a. Zawi sapin “A thik teh mai a nia” a rawn ti sapa.

Darthlalang keh ri chu hall chhungah chuan a ring kher mai. Rang takin aiden-a pawh a hawi let vata, thawm rawn chhuahnaah chuan amah chauhin Ian-a a ding a, chhuatah chuan darthlalang keh them a lo darh nuaih a. Enga tinge chutiang chuan a chet?

Ka hrethiam ta. Hnunglam atang chuan khatia Aiden-a ka beng bula a rawn kun hniam kha min fawp ang chiahin a lang dawn a ni tih hi. Ian-a chuan chu chu a rin dan tur chiah pawh a ni. A nih chuan a thik tihna. Engvangin nge a thik ngawt ang?

Aiden-a chuan ka lam a rawn hawi leh a, lawm deuh hian a nui sen sen a. “Khatiang anga lantir kha i tum reng a ni tiraw?” ka lo ti a. Engmah a nih loh kha ti ang maiin a dar a chhin ringawta.

“A tlai zawh vek hma a a nih tur ang ang nih tir hi a tha zawk” a ti a.

“Chutiang chu a ni teuh lo” ka lo ti a. Aiden-a chu a thaw haka. Ka darah rawn vuanin uluk takin min en a.

“Phat tum duh suh”

“Phat ka tum tihna a ni hleinem. Atthlak takin i che a nih hi” tih pahin a kut chu ka paih thla a, hall atang chuan ka kal chhuak nghala. Chutih lai mek chuan Ian-a pawh a car awmna lampanin a chhuaka, a hnungah Ashley i’n a zuia. Hmanhmawh taka pen ri ka hnung lamah ka hria a, ka inher a, tlangval sambuang hmeltha tak Aiden-a, heng thil zawng zawng thlen tirtu chuan min rawn umzui a.

“Nangmah vang vek a ni. He tlai boruak nuam tak tur hi i chawk chhe zo ta vek a nih hi” ti a ankhum pahin a hmaiah tak ka kutzungchalin ka kawka. A ngaihna hre lo takin a chal a chuar a. “Engvangin nge i tih?”

“A chhan chu nangmah i intih tlawm em vang a ni. Engkim hi atan vek i ti a. A hmangaih a neih nan, hlim taka a awm nan, nakin zel pawha hlim taka a awm nan. Engvangin nge thil pakhat leh talte chu i tan a nih ve lovang? I hmangaih i neih nante, hlim taka i awm ve nante, nakin hun thleng pawha hlim taka i awm nante?” ani pawh chu ani leh ni lo angin a awki a sang hlemai. Tlemin ka tawlh hnung a. A awki vang ni lovin, a thusawi avang zawk chuan.

“Oh ! Thil awmdan ka hrethiam ta e” engmah ka sawi hmain a rawn ti leha. “Mi dawihzep tak i ni. Ni e, chu chu i nihna chiah a ni. Nangma tana bei turin i dawihzep lutuk a, i neih ve ngei tur pawh nei tur a bei ngam lovin i awm a, a chhan chu a hnawl che hlauhna a i khah vang a ni” kut phar meuhin a tawng tawn tawna. Min rawn en a, ka mittui parawl mek chu min rawn hmu a.

Aiden-a chu a thaw hak a, ka bulah a rawn dingah. Ka biang tan tawna rawn vuanin ka mitah chiang takin min en a.

“A chhan chu hnawl nih hlauhna avangin i nei ve thei lo a ni Alison. I pasal a ni alawm. A la hmangaih ve em em ang che. Mahse tumna nena i beih loh chuan chu chu a thleng kher lovang. A tih nat che avangin i dem ngawih ngawih tiraw? Mahse hmeichhe dang tang bel tura nawr liamtu chu i ni love’m ni? I pasal a nih lai reng chung pawha midang a hmangaih phal saktu kha i ni love’m ni?” tiin min zawta.

A chhanna chu ka hrechiang khawp mai. Keima thiam loh a ni tih pawh ka hria. Aiden-a thusawi chuan awmzia neilo mahse thu dik a ni tlat si. Hei erawh min hriatchhuah tira. Ka hmangaih tan chuan ka beih angai. Ka duh nei turin ka beih ve angai. Ka duh chu Ian-a a ni a, ka ta chauh ni turin ka duh a ni.

Hmel thar pu chungin Aiden-a chu ka melh chho a, ka nuih saka. Nghet takin ka kuah vawng vawnga.

“Ka lawm e. Ka mit min men sak avangin ka lawm e” tiin a awm chhanah chuan ka phun sep sep a. Ka samah a rawn vuana, ka luah a rawn fawpa. “Engkim a tha vek dawn alawm” a rawn ti a.

“Min thlah haw ta che” ka ti a, min nuih saka, step-ah chuan min kai thla a. Car darthlalang vawt thlerah chuan ka lu ka nghata, kawng tluan mai chuan a reh tlawk tlawk a. Ka thin a phu dawt dawt a, ka kut a thlan vek bawka, ka ngaihtuahnaah thil pakhat chiah a awm.

Engtin nge a bulah ka sawi ang?

Chutih lai chuan Car chu a ding dawt a, seatbelt hreng lo ilang chuan ka insawh chawrh ang. “Enga tinge?” tih pahin ka seatbelt hrenna lai chu ka vuana, a sen nghal vek thei alawm mawle.

“Kan thlen hun hi a fuh vak lovin ka hria” ti a phun sup chungin Aiden-a chuan hma lam chu a melh ngawr ngawra. A hawina lam chu ka hawi ve thuai a, kei pawhin eng vanga chu thu chu sawi nge a nih tih ka hmu ve ta.

Tuin emaw i inrinloh laiin vur tuiin i chhip atang lei ta che se la, au chhuah vak i tum anga, mahse i hrawk a chih vek avangin i au chhuak thei lovang. Chu chu tuna ka awmdan chiah hi a ni.

Kawngka bulah chuan bang nghengin Ashley a awm a, a bawp pahnih chu Ian-a kawngah a kherh beta. A thawmhnaw tla hnuang atang chuan chiang takin a mal leh a chawn a hmuh theih a, Ian-a sam chu chulin a kutte chu a buai ruai a, awm ngaihna reng a hre lo. An hmui a inchuktuah mawlh mawlh a, Ian-a chuan hnuai lam atang a nawr at at reng bawka.

An nuam ti rum thawm chu chu zan reh takah chuan hai der theih rual a ni lo. Mak ka tih em vang a niang chu hawi sawnna chang pawh ka hre lo. Ka chakna zawng zawng sawmkhawmin ka hawi sawn a, ka sir a thu Aiden-a lam chu ka hawi phei a.

“I kal ang” ka ti sapa. Hrethiam takin ani pawh chuan Car chu a tinung a, ka pasal te gate atang chuan kan back chhuak leh a. “Khawia kal nge i duh?” min rawn ti a.

“Hla takah” ti ringawtin ka changa.

Chapter -15

 

 

Aiden-a chuan a car a khalh a, kei erawh ka thu ngawi char char a. A hma a ka lo ngaihtuah leh ka lo suangtuah ve zawng zawngte kha chu tukverh atanga vawm chhuah hlauh ang mai a ni tawh. Inhlanna kan neihna hmun lamah khan min letpui leha. Hall kawt kan thlen chuan car atangin a chhuk a, chuveleh driver seat lamah ka insawn phei a, belh nghet taka hrengin chu lai hmun atang chuan ka tlan chhuak nghala.

 

 

A ngaihna hre lo taka Aiden a’n min en zui vawng vawng pawh chu ka va hmu thei a, mahse min dan tum emaw pawhin min rawn au zui lo. Kalna tur bik pawh hre lo va darkar khat zet ka tlan hnu chuan a brake rapin ka ding dawta. Ka ban a kham hle a, chelo a ka thut char char avangin ka hnung pawh a kham hlemai. Khawi lai nge ka awmna tih pawh ka hre lo. Ka awmna chu kawngpui ruak sei tak mai a ni a, chu ngei chu a ni ka awm duhna chu.

 

 

Midang dal lo turin car chu a sirah ka park a, ka seatbelt ka phelh a. Ka phone chu tuin emaw min rawn biak a tum tih hriat tak hian a rawn eng leh zawk zawk thin a, mahse tumahin ka awmdan chu an rawn tihbuai ka duh lo. Ka phone chu lain ka off hmaka, pessenger seat lamah ka vawm phei daiha.

 

 

Thlifim rawn thaw heuh heuh chuan hmulthi ding ser ser khawpin min rawn chhem a, chu chuan chulai hmun reh zia chu a ti chiang lehzuala. Vanah lah thla a eng pup mai a, a bul vel zawng zawng chu a en eng phut mai a, riang taka vawikhat awm ringawtte chu thil pawi a ni hleinem. Hetah hian venghim tlat tur chein ka lo awm ang ti a min rawn hrilh ang mai hian ka hria.

 

 

Ka car chungah ka lawn chho a, a chung zawlah chuan muin van thiang tak mai chu ka zawhna zawng zawng chhanna kawltu ang maiin ka thlir a. Hrehawm tihna leh khawharnain min rawn man chawpchilh nghala, ka kawchhungte chu an rit luk a, ka thisen in pump chhuak thleng chuan a hahthlak thamin ka hria. Ka ngaihtuahna a thim vek a, engkim mai chu a reh tlawk tlawk a.

 

 

Kan hmangaih em em te hi an thih hunah arsi-ah an chang thin a, van atang khian min rawn en reng thin a ni ti a ka pain ka naupan laia a sawi thin kha ka hrechhuaka. Van a arsi tam tak lang zingah chuan a khawi khi nge ka nu ni ang tiin ka zawng kual nghala.

 

 

“Nu” tiin chu boruak reh tak hnuaiah chuan ka phun sapa. “Ka mamawh che a ni”. Ka aw chu miin an lo hre palh ang tih hlau tak ang mai hian a zawi hle a.

 

 

“Thil dang zawng zawng aiin ka mamawh che” ka tih zawh chuan ka mit ka chhing a, chuveleh thlifim a rawn thawn a, ka nu chu rawn kal ka sam a rawn chul ang mai hian ka sam chu a rawn chhem che hlep hlep a. Chu thlifim chuan sawithiam si loh hian thlamuanna mak tak a rawn keng a, ka thla a muang siai siai mai.

 

 

*** *** ***

 

 

Mei alh. Ka taksa khawilai mai pawh chu mei a kan ang mai a ni. Ka chal atanga thlan rawn luang thla chuan min ti harh zawka. Ka pindana nizungrawn lut chuan min em hmin mai dawn alawm le. Ka khumah chuan ka inlet a, mahse ka tla tep mai. Chutiangin ka khum a zim ka hre si lo va, chubakah hetiangin a ruh lo. Ka mit men ka tum zuai a, mahse ka chhing lehnghala.

 

 

Engvangin nge maw ka pindan chung chu a en em em mai ni le? Inti harh lui chungin ka tho chhuak a, ka mit chu ka nuai nghal nawk nawka. Kan meng chu a ngaihna ka hre lo ngei mai. Kawngpui pakhat hi tawp chin nei lo ang maiin a lo inkhamphei ruah a, a khat tawkin car an rawn tlan ve leh zauh zauha.

 

 

Ka in en a, nizan a ka thawmhnaw ngai tho kha ka lo la hak bakah nizan thilte chu ka hrechhuak leh uar uar a. Ka mit hmaah chuan engkim chiang em emin a rawn lang zut zut a, ka mit chhingin chung thilte chu hriatchhuah loh hram ka duh a ni.

 

 

Car chung atang chuan ka chhuk a, ka thawmhnaw chu pawt mar thain ka sam ka tawn tha a, car chhungah ka chuang lut nghala. Ka kalna lam[ang kawngah bawk chuan inherin ka let leha.

 

 

Thawm nghawr der der thawm ka hriat chuan ka thutna sir chu ka en a, ka phone chu a lo kher dar dar a. Mak ti deuhin ka phone chu ka zuk ban a, nizan khan ka off hmak khan ka hre si a. Vanneihthlak takin kawng a clear hlauh a, phone chu chhan tumin ka en a.

 

 

Phone screen-ah chuan Ian-a hming a lo lang kalh a. Ka la ang nge la lovang tih ka ngaihtuah buai chhungin a ring tawp leh daiha. Kawngsirah car chu ti dingin ka phone chu ka en a.

 

 

‘165 missed calls.

86 messages

43 voicemails’

 

 

 

Enga ti phiangsen em me nge mawni? Pahnih khatte chu ni se ka hrethiam. A za tel teh mai an lo awm mai chuh.

 

 

Chung missed calls ho chu kan scroll thla par par a, a tam ber chu Ian-a a ni a, Aiden a call a awm bawk. Message ho chu hawn ka tum lai takin ka phone a rawn thi a, a ngeiawm duh kher mai. Ka piah seat lamah chuan ka vawm phei leh thlawrha.

 

 

Rei mawi tawk tak ka inkhalh hnu chuan Ian-a in pawh ka thleng leh ta. Car atang chuan chhukin ka hmachhawn tur ang ang hmachhawn turin inchhungah chuan ka pen lut a. Mi zawng zawng an lo awm vek nia. Mi zawng zawng.

 

 

Ka pa, ka nu, Will, Ian, Aiden, Jake, Drake, Emily, Ashley leh Marie.

 

 

Ka nu leh Emily te chu an thutnaah an lo tap mawlh mawlh a,Ashley-i leh Drake-a te’n an lo hnem meka. A kil a chair inhungah chuan ngawi rengin Jake-a a thu a, Aiden-a pawh a lu dawmin a lo thu ngawi renga, ka pa leh Ian-a erawh chhuatah chuan an lo tei kual ngat ngata, an phone chu hmetin an bengah an chuktuah leh thin a.

 

 

Bang lam hawiin Will-a a ding a, vanvadak vaha bang melhin a rilru a hah hmel hlemai. Marie i’n a banah chulin a lo hnem meka.

 

 

Inchhung ka lut chu engmah pawh ka sawi hman lo. An zavai chuan makti hmel an pu a, ka lamah rawn pheiin pakhat chuan min rawn kuah nawlh a. Vawikhat mah min thlah leh tum tawh lo ang maiin min kuah nghet a ni.

 

 

A rimtui hman chu ka hnarah a mikhual lo. A ban lian leh a tihrawl chak takte chu ka vawikhat hriatna a ni lo. Kei pawh chuan ka lo kuah leta. Chutiang chu vawi tam tak ka duhthusam leh ka lo suangtuah thin a ni. Mahse ka suangtuahna erawh a thleng dik ngai lo. Harhchhuak thutin ka nam sawn a, ani chuan a ngaihna hriat loh hmel zetin min en a, ka chhip atanga ka keler thleng chuan min en chhuak vek a, inthiam lo zet hian a thaw chhuak halha.

 

 

“Hetiang hi ching tawh reng reng suh ang che” tih pahin tap chungin ka nuin min rawn kuah a, Ashley i’n a rawn zui a, chutiangin Emily leh Jake-a pawhin. Ka pa, Will-a leh Marie te pawn min rawn kuah zela. Aiden-a lam ka va hawia, ‘min rawn kuah ve i tum miah na nge’ tih nan ka mit ko ka va san khum a. A nui haka, ka bulah rawn kalin ka darah a rawn vuan a, nui var var chungin a thle zauha.

 

 

“A pawi ka ti lutuk lalhmeltha, keima thiam loh vek a ni” a ti sap a, a hawi kual a, chumi zawhah keimah bawk chu min rawn en leha. Keimah zawk chuan ka va kuah bet thlawp a, nget taka kuah chungin “engmah i thiam loh a awm lo ve” ka ti a, a awmah ka bei a.

 

 

Kan inkuah zawh chuan kan mitah tak kan in en a, a mitmengah chuan ngeiawmna hlimawm tak si hi ka hmu thei a. Ka nui hak a, a biang tawn tawnah vawn sakin chiang taka min en turin a lu chu ka lamah ka kuai kun a. “Ka unaupa i ni a, engtik lai pawhin min ngaihtuah em em renga. Chumiah chuan engthil mah dik lo a awm reng reng lo” ka ti a, ka nuih seiha.

 

 

“Unaupa a?!” midang tumah an tawng hma chuan Ian-a chu a rawn tawng chhuaka.

 

 

“Aw ni e. Ani hi ka unaupa tha tak, ka lo awh em em thin ngei chu a ni” ka ti a. Aiden-a chuan lo sawi zawm nghalin “Ani hi ka farnu duat tak, ka la neih ngai reng reng loh chu a ni” a lo ti ve bawka.

 

 

Ian-a chuan engmah a sawi tawh lo. A thaw hak a, a kal sawn ta daih a.

 

 

“Khawiah nge i kal daih reng reng a?” ka pa chuan min rawn ti a.

 

 

“Veng chuan hnuai lamah ka zuk hawi thawveng mai mai a” tiin ka chhanga.

 

 

“Enga ti maw?”

 

 

“Nu ni tawh mah ila intih thawvente chu kan mamawh ve tho love’m ni?” ka lo ti a.

 

 

“Hmeichhia chin hriat loha invah chhuah chuan chhungte zawng zawng tan rilru hahna inthlen a, phone call la thei bawk si lo. Chutiang chu thil tha a ni ngai lo” tiin ka nu chuan a lo tuihnih a.

 

 

“Tunahte chuan in lungngaih tawh loh hi” ka ti a, tumah kan tawng tawh lo. A reh thuap mai. Chulaia awm zawng zawng chuan mak tiin min en thup mai. Aiden-a ka va en a, ka awmdan chu a hrethiam a ni tih ka hria.

 

 

“Pasal nei i ni tawh” ka pa chuan sehchilh lek lek hian a rawn ti a.

 

 

“Rei tak a ni tawh lo maithei” tih pahin ka dar ka chhin ak a. An vai mai chuan mak tiin an ang phuau hlawm a, a hrethiam tlemte tih chauh lo chu. Anni ho chuan hun lo la awm tur atan hriattirna ka pe lawk a ni tih an hrethiam ngei ang.

 

 

“Eng tin maw?” Ashley-i chuan a lo ti hlawt a, a aw a thawk huaina leh hlim rukna rawn ri chhuak chu hai theih rual a ni lo. Ka dam hauh lo. He hmeichhia hian hmangaih a tawng a ni.

 

 

“Hunin a rawn la hril mai ang. Tunah rih chuan inthlak ka duh. Ka thawmhnaw hak hian min phuar tlat” ka ti a, inchung lama chhoin ka pindanah ka lut nghal daiha.

 

 

Ka pindan kawngkhar chu kharin ka thaw haka.

 

 

Tunah chuan a tawp ta. Kan inkar chu a tawp ta e.

 

Chapter -16

Ni a ral a, kar a liam a, mahse thil erawh a pangaiin a kal thei tawh lo. Ka awmdan avangin ka pa ka chungah a lungawi lova, chutiangin Will-a leh Marie pawh. Marie phei chuan a lungawi loh zia lantir nan eitur min rawn pek pawhin thleng a nghat ri bur thin. Tunah zet chuan ka mal ta hlemai. Tu hnenah mah eng thu mah ka sawi thei tawh lo va, ka biak theih chhun chu Ian-a chau a ni ta. Eng emaw chang changin a tie awrh tur ka la suih sak fo thin a, tih sak tawh loh ka tum zet nangin ka la thei ngai lo a ni. Engtikah emaw chuan chungte zawng zawng nen chuan min la kalbo san vek dawn si a.

‘Dear Diary

Dear ti a thu bul tan hi diary ziah dan tlanglawn tak a ni tih ka hria. Mahse tunah hian ka damlo a ni. Ka awmdan takngial pawh hrilh turin tumah ka tan an awm tawh lova, chu chuan min ti damlo zo ta.

Tunah hian September a ni tawh a, he hun hi ka ngaina a, ruah tlak tam lai ber a nih avangin ruah do a, tlan kual velte nuam ka ti em em thin. Tunah erawh coffee no dawm chungin tukverh bulah ka thu a, darthlalang a ruahin a a rawn theh tui luang ka thlir ta vel mai mai a ni si. Ka hlim mawlh lo a ni. A chhan chu thla 11 a ral dawn ta mai si a.

Thla 4 chhung zet chu tuman min hnaih tha duh tawh lo va, Aiden-a takngial pawhin min be ta mang lo. Ka thil tih lai mek hi min pawm pui theih loh avangin Emily pawhin min be duh ta lo va, a tir a a lo rindan chuan thla 12 chhung chuan Ian-a pawhin min duh ve tak tak hman ang a, hlim taka kan awm dun theih a lo beisei a. Kei pawhin hlim chu ka duh a, eng pawh chu nise a chungah hian ka lawm em em tho a ni. Ani pawhin kawppui tha tak Drake-a a tawnga, an hlim dun khawp mai. Ian-a leh Ashley-i te pawh a ni telin an inpawh tial tial a, an inkar pawh a nghet tawh lutuk.

He thil hi zo vat vat se ka ti hlemai. Ka hrehawm tawrhna zawng zawng hi dah bo vek tawh a, nun pangai tak neih leh tawh ka chak a ni. Hemi avang hian tlawmah ka inngai lo va, a tawp thleng rakin chhel takin ka bei zel zawk ang.

Ian-a chuan min biak a tum thin a, engvanga hnaih tha duh ta lo nge ka nih tih hriat a duh a ni. Eng thu nge ka hrilh chuan ang?

Engtikah emaw ani chu ka unaunu nen kut insuihin nupa tak tak an ni tawh anga. Hlim taka inkhata an cheng dun turte, inkaia an innuih tawn turte chu ka hmu ve reng thei dawn lova, chuvang chuan kei zawng ka inthiarfihlimte pawh a ngai tawh ang. Tun hi a vawikhatna atan leh a tawp berna atana ka diary ziahna a ni ang. Mahse chu mi hmain eng thil emaw khawiah maha ka la sawi ngai loh sawi chhuah ka duh a.

Ka hmangaih che Ian. Ka hmangaih reng ang che. Engtik lai pawhin.

*---*---*---*---*---*---*

Darthlalang hmaah chuan ka in en vang vanga, ka nipui thawmhnaw chu ka beng faia. Ka phone chu ka en leh a, a ni leh thla chu chiang takin ka en nawn leh a.

‘28th October 2017’

A tawp ta. Kum khat chu a lo zo ta reng mai. Tunah chuan ka kal tir thei tawh ang. Vawiinah inthenna lehkha vel ti fel turin ukil hmuh ka tum a, kan pahnih a kan sign ve ve hunah chuan engkim a tawp tawh ang. Ka purse ka la a, inhnuai lamah ka chhuk thla a.

Thutthlengah Ian-a a thu a, a sirah Ashley-i thuin Ian-a darah a ngheng a. An bulah chuan suit ha mi pathum an thu ve bawka. Step a chhuk mek an awm tih a hriat chuan Ian-a chuan ka lam a rawn hawi chho a. A mitmeng pawl nalh tak mai chu a ruak hiai mai.

“Ah ! Unaunu chu” tih pahin Ashley chu a rawn tho a, ka banah a rawn vuan vata.

“Enga ti teh rep rup nge a?” tiin ka lo zawt fiah a.

“Unaunu, inhlanna hman zawh a nih atanga in nupa inkara harsatna awm zawng zawngte kha kan hre vek alawm. Tunah chuan Ian-a hian i duh dan ang bera awm tir tawh che a duh a, chumi atan chuan lawyer pahnih leh judge pakhat a lo ko lawk sa a” ti a sawi pahin Ashley-i chu a nui seih a.

Ian-a chuan eng emaw rawn sawi a tum zuau a, mahse Ashley-i chuan a banah lo hmerin a lo khap thuai a. “Kan tan thei tawh mai em?” chulaia suit ha pakhat chuan a han ti a.

“Mahni a ukil hran ka neih a theih lovem ni?” ka lo ti a. A laia thu chuan “I duhte chuan theih tehreng mai” a lo ti a.

“A nihte chuan tunah tut tut kan ti lo ang a a ni mai alawm” Ian a’n a rawn tih chuan ka lo dang thuai a. “ Ni lo ve. Heti pawh hian a pawi lo” ka lo ti a.

Lekha chu pen nen ka lama rawn dah phei a ni a. “Eng zat nge pawisa i duh ang?” judge chuan a min ti a. “Engmah a ngai lo” ka lo ti a. Lehkha chu ka en a, chu lehkha phek khat chuan kumkhua atan min pawt then tawh ang.

“Engmah a? I duh zat sawi la, Ian a’n a pe dawn che alawm” tih pahin Ashley-i chuan Ian-a a en a. “Engmah a ngai lo ka tih chu mawle” ka lo ti ram hmarha.

Ka lehkha sign tur zawnah chuan ka pen hum chu ka lek phei a, ka maimitchhing vang vag a, ka mithla-ah zan tin ka hun hman liam tate kha an rawn langchhuak uar uara. Ian-a pawh chuan lehkha chu a la a, thinphu dep depin ka lo en reng a. Lehkha chu a thlek vang vang a, a hnuaia a hming sign na turah chuan a sign nghala.

“Tunah chuan dang ang takin in inthen ta e” Judge chuan a rawn ti a. Chu thu chuan a mi den dan a na khawp mai. Ka tho a, inherin in atang chuan ka chhuak a. Ka in ka lo tih ve thin chu. Ka mittui a rawn tla a, ka biangah a rawn luanga. Ka kehsawm vek. Inti chak lui turin eng chakna mah ka nei tawh lo.

“Alison” Ashley i’n min rawn koh chuan ka ding chawta. Rang takin ka mittui ka hru hul a, nui sang chungin a lam ka hawia. Ashley-i pawh chu a lo nui sanga, Ian-a erawh chuan a lehkha sign na paper chu a lo la melh vung vunga.

“Zungbun kha” a rawn ti a. Chuveleh kan inneih zungbun ka la bun mek lam chu ka melh vata. Dawhkan lamah chuan phei lehin ka zungpun chu ka phelh a, ka en vang vang hnu chuan dawhkanah ka daha.

“Happy wedding aniversary” tiin ka hriat tham lekin ka phun sap a, mahse Ian a’n a hre pha tih ka hria. Min rawn en vata, a vawikhat nan a mitah mittui a tling ve nia. Min chan dawn tak avang nge ni anga Ashley-i nen hun thawl nuam tak an nei tawh tur lawm lutuk vang tih erawh ka hre lo. Ka nuih sak a, inherin ka kalsan ta a. A nun atang ka kal chhuak ta.

Chu in atang chuan thinlung kehsawm vek chungin ka chhuak a, a charhkhawmna tur engmah a awm lo. Ka hma zawnah chuan ka tlan chiam ringawt a, ka ngaihtuahnaah engmah a awm tawh lo. Ka kawchhung a sa bulh bulh a, ka awm a tawt em em a. Ka theihna zawng zawngin a ni ka tlan ni. Ka ke chuan kawng laia tuitlingte chu a dai per chhawk chhawk a, ruah sur chuan min nan zawr nghal vek bawka.

Thlanmual gate lianpui ka thleng tih ka hria. Ka nam hawnga, pan bik neiin ka tlan leh char char a. Ka kal duhna tak ka thlen veleh hnim hnawng chungah chuan ka thingthi hnawka. Thlanlung a hming inziahna chu ka kutin ka tuai a.

“Nuu...” ka ti a, venthawn nei hauh lovin ruahsur hnuaiah chuan ka awrawl tawpin ka tap chhuak hawm hawma. Tap chungin ka nu thlanlung chu ka be mawlh mawlh a. A bula awm ka chak a, a malchungah muin tap kuang kuang ila, a zia deuh tur. Thil dang zawng zawg aiin ka nu ka mamawh a ni.

Vanah chhum a rawn dur khup khup a, a hma aia tam zawkin ruah a rawn sur a, mahse engah mah ka ngai lo. Ka nu bula thut a, amah titi pui chauh chu a ni ka duh ni.

“Tunah chuan kumkhua atan ka chan ta. Ani kha hmangaihna awmzia ka hriat atanga ka hmangaih hmasa ber a ni asin”. Ka khuh bawrh bawrh a, ka hrawkte chu a phui vek tawh.

“Enga tinge kei kher ka nih bik? Engvangin nge ka tana mi pawimawhte ka chan vek bik? Ka fel tawk loh vang em ni? Ka hmangaihte bula awm a hlim taka awm ve hi ka phu ve lo em ni?”. Ka hmai chu mittuiin a bual huh vek a, kum khat chhunga ka hrehawmna zawng zawng ka bunruahna a ni bawk a, mittui chhuak tur pawh a tam kher mai.

“Min chhang rawh ka nu. Eng emaw tal chu han sawi ve teh” tiin a au in ka au chhuak a. Ka thinlung a na vawng vawng a, ka awm ruh zawng zawng hi min phawrh sak vek ta emaw tih mai tur a ni.

“Engkim hi rawn ti tawp vek mai teh ka nu. A na emai” tiin keimah leh keimah ka inpawm a, awrawl tawpin ka tap chhuak hawm hawma.

“Shhh... ka awm alawm. Keimah ka awm e” ka beng zawnah ka pa a rawn phun sep a, ka bulah thuin min rawn kuah beta. A aw chu a tham tuak a, a fanu hetianga ka awm lai hmuh hi hrehawm a ti dawn lutuk. Nget takin ka kuah a, a awmah beiin ka tap hawk hawka. Ka samah duat takin min chula, ka lu ah min fawp vawng vawnga.

Ruah a banga, khaw a rawn thiang vuk a. Chung lamah erawh khawpui a ri kal ruah ruah a. Thlifim a rawn thaw heuh heuh a, pangpar rim a rawn nam chem chem a. Kan kiangah ka nu a rawn awm ve ang maiin ka hria.

END OF CHAPTER -16

Chapter -17

(The Bacheloratte Night)

“A nih hei hi ka inhmeh em?” atana ni pawimawh tak lo thleng tura a hak tur thlangin inthlakna pindan atang chuan Ashley-i chu a rawn chhuaka. Chu kawr var nalh tak mai chuan a taksa chunglam chu mawi takin a phuar tang a, a sirah chuan silver a siam a uaithla hniar bawka. Han sawisel lehna tur chuang a awm lo. Sawiselbo a ni.

Hmanlai victorian inthuamna ang mai a ni a, a thawmhnaw hak chuan a hma aiin a ti lang duhawm zual a, a hnute rawn pauh lah phei chu a ti hmuhnawm zual tu a ni. “I hak tur a thui tir ang mai alawm” dawr nghaktunu chuan phur sarin a lo ti a, a lu a a vuah tur veil a rawn khum tira.

Ashley-i chu darthlalang hmaah chuan a vir kual vela, a kawng dawmin a thle kual a, a hmel atang chuan amah ngei pawh chu mawi a inti hliah hliah tih a hriat theih a ni.

“Hei hi kan la ang e” dawr neitunu bulah chuan a ti a, inthlakna pindan lamah chuan a lut leh a. Ka lo awm ve reng nangin ka ngaihdan engmah min zawt ve hran lo a, chuti si engvanga min hruai tel ve kher nge maw a nih le?

“I kal ang le” a rawn tih veleh ka thutna atangin ka ding a, “In zo thei ta hram maw” ka lo ti a. Bag inkhai bawr tun chungin dawr chu kan chhuahsan a.

“Ian a’n min lo nghak a” tih pahin ding lamah Ashley-i chu a thle phei a. A kar ngheng a kuangkuah chungin ka pasal hlui chu a lo ding reng a, tarmit a vuah bawka. Thla 6 zet ka hmuh tawh loh hnuah pawh high school hallway a ka hmuh hmasak ber ni ang mai khan ka mit ala la fo mai. Thawk ka la a, Ashley-i nen chuan kawng kan kan dun a. Bag khaiin ka bawr hle a, Ashley-i lah chuan ka thlauh palh hlauin min lo au ve chhen bawka. Ka unaunu leh ka hmangaih em em chu ni lo se ka pet pawp tawh ang mawle.

A lam hawiphei ka tum lai tak chuan ka hming ngeiin Ian a’n min rawn au tuar a, a aw chu hlauhthawnnain a khat a. Rang takin lehlam ka hawi a, ka bula kal Ashley-i chu ka tha tawpin ka pawt dawrh a, kan hnung a chak taka motor rawn tlan chuan min su teuh fia fia ngei mai.

Ka awm vuanin ka thawh hlawp hlawp a. Tlem a tlemah ka thi lo chauh a ni. Ian-a pawh chu a rawn tlan thleng thuai a,”I tha em?” ka biangah dawmin na ka neih leh neih loh min en chhuak vek a. A vawikhatna atan a mitmengah min chan mai ang tih hlauhna ka hmu a, chu chu engvang nge tih erawh ka hre lo. Ka bu nghat a. Ashley-i lam ka hawi phei a, ani chuan Ian-a nen chuan ka hauin min lo en renga.

A nupui ni mai tur hmaah a nupui hlui hming a lam ri tuar a ni a, chutiang anga Ashley-i lo awm pawh chu ka dem lo. Rang takin min vawnna kut chu ka paih thla a, ka car awmna lam ka pan san vata.

Chu thil emaw Ian-a emaw engmah ka ngaihtuah chhunzawm tur a ni lo.

*** *** ***

Ka earphone ka vuah a, ka bengah chuan Archie aw bak engmah a lut lo. Ka khumah tshirt lian hnuk ha chungin ka thu a, ka malchungah laptop dahin Riverdale ka en a.

Series ka en mek nangin ka rilru erawh hmun dang daihah a awm thung. Zanin hian ka unaunu chuan bacheloratte night a hmang mek a, a thiante nen an party suau suau ngei ang. Chutah chuan kha mipa mitmu dumpawl nalh zet kha a changtupa ber a ni ang a. Ka ngaihtuah thin a, huat ka tum ve takngial pawhin ka hlawhchham let der zia ka inhriattir nawn a ni chauh zel mai si.

Ka mitthla-ah Aiden-a nena min hmuh laia a hmel leh car in min sut tep laia a hmel awmdan kha a reh thei lo. Tunah chuan a duh ber a nei tawh bawka hlim em em awm tak, kim lohna riau hmel a pu thin leh lawi bawk si.

Kan inthen atang khan kan inthen chhan leh engvanga khatiang thil zawng zawng kha thleng nge a nih tih ka pa in a hre chho a, a lung a awi thei hlawl lo. Ashley-i chu a hua e ka ti lo a, mahse a lakah lungawilohna lian tak a nei a ni. Inneihte pawh an la innei anga, ka pa bulah pawh a fanu a nih thu leh an inneihni-ah tal malsawmna hlan turin ka ti a, mahse chuthu chuan ka pa rilru sak tak chu a ti nem zo chuang lo.

‘Malsawmna ka hlan leh hlan lohin awmzia a nei hleinem. An inneh dawnte chuan an innei dawn tho tho alawm’ tiin min chang a.

Kan boruak hetiang a lo nih takah chuan Emily pawh inthiam lo takin a lo kal a, thupha rawn chawiin thian nih a tlin loh zia leh ka harsat lai bera min kalsan paw a tihzia a rawn sawia. He hmeichhe khawngaihthlak zet hian a feelings lanchhuah tir dan pawh a thiam lo a nih hi.

Chhuanah chuan thla a rawn lang a, mipa thla ngei a ni. Ka hit chuai a, ka thin a phu nghal dup dup a. Muangchangin ka earphone ka phawi a, thla rawn lamna lam chu ka hawi chho riai riai a.

A hmel ka han hmu chiah mai chu mak tiin ka meng phar awn a, ka ang huau bawka. Enge hetah a rawn tih?

Engtik lai pawha ka rilru a thi thei lo mipa kha hetah a rawn kal. Haider theih rual a ni lo. Ka pindanah ngei. Ka thaw chhuak riai riai a, bachelorette a kal ve tur a ni si a. Mahse ka pindan chhungah a rawn lut tlat. Engvang nge ni ang?

“Ian?” ka tih chuan harhchhuak deuh zawk hmel hi a pu a. An inneih nan zanin chiah hun a awm tawh a, chumi lawmna party chu an hmang mek a ni si. “Alisonnn...” a thaw haka.

“Enga tinge zaninah heta i rawn kal? Eng angin nge miin an ngaih ang che. Thil thleng theite engmah i ngaihtuah lo-“ a kut vawt thlar chuan ka hmui a rawn hup a, ka mengphawk chiang hlemai.

“I sawi zawng khan i nervous a ni tih hi ka hrilh dawn che nge midangin an hrilh dawn zawk che?” ka mitah tak en chungin a ti sapa.

“Ka nervous lo” tiin ka lo chhang leta. A hma aiin min rawn din hnaih sauh a, kan insi teuh ta hle mai.

“I nervous chiang alawm” zawitein a rawn ti leha. A aw chu a tham chhalh a. A mitmeng chuan ka thinphu a ti rang lo thei lo. Thir hipna ang maiin ka mit chu a hip bet tlat a, han hawisawn mai ka tum pawhin ka thei lo. Nge ka duh lo zawk?

“I awmdan hi a dik lo a ni” ka awki chu a hniam khawp mai. Ani lah chu a rawn ding hnai leh sauh a. Chuveleh kei ka lo tawlh hnung nghala.

“Mahse a dik hmel viau tho hi” a rawn ti a.

“Hetiang hian kan awm tur a ni lo” tiin ka lu ka thing a.

“A pawina a awm hleinem”

“Min then tawh kha” ka ti a, ka sawi zawng chuan ka aw a rawn lawi a. Chuveleh a ding chawt a, a awm dan zawng zawng chu a daglam nghal vek. Ka darah rawn vuanin nghet takin min hmer a, bang si rawt khawpin min nawr phei a.

“Then che kha ka duh ngai lo. Mahse eng nge a chhan ka hrelo. Ukil an rawn lan hma kha chuan kan inthen dawn a ni tih pawh ka hre tawh lo hrim hrim” a tawng danah chuan a thin a rim lek lek a ni.

“Mahse lehkhaah khan i sign tho alawm” ka lo ti a.

“Nang pawn” a rawn ti veleh kher a, chhanna tur ka nei tawh lo emaw a ti ngei ang.

“Ti lo thei ka ni lo. Ani i hmangaihna khan ti lo thei lovah min siam ta a ni”

“Ka hmangaih lo” tiin a au tuar a, a inher nghala. Kei erawh zeng ang maiin ka ding khawng reng a. A hmangaih lo maw? Eng nge chu chu a awmzia?

“Ni e ka sign alawm. Ka sign ngei, hmangaihna avang emaw tiin. Mahse kha kha chu high school kal lai hun atan chauh a lo ni. Mo thuam inbel a, i pa kuta kai chunga inneihna hmun i rawn luh atang khan engkim a danglam tawh. Chu mo thuam ha chu khawvela mo kawr inhmeh ber a ni a, ka mit a hmeichhe hmeltha ka lo hmuh tawhte zawng zawng khumtu a ni asin” tih pahin chiang zetin ka mitah min en a, min rawn din hnaih bawka. Min rawn din hnaih em avangin a thaw rim hiar chem chem leh zu rim nam chek chekte chu chiang takin ka hre thei a.

“Chutiang ringawt a awlsamin hmangaihna atang i zuang chuak lovang” ka lo ti a.

“A dik chiah. Chuvang chuan hmangaihna dik tak a ni lo tihna a ni mai” tiin min chhanga.

“In inneih hma zanah hetah rawn kalin chu thu chu i rawn sawi a maw? Thil dik lo tak i rawn ti a ni” tih pahin ka lu ka thing sawk sawka. A kut tak chak tak mai chuan ka biangah a rawn dawm a, a lam hawi turin min kuai dak awrh a. A mitmeng atang chuan eng nge a tih tum ka hre nghal.

“Ian, hetiang hi ti-“ ka sawi zo hman lo. Ka hmui leh a hmui chu a innang chawpchilh nghala.

Engtin nge ka awm ber pawh ka hre lo. Ka mipa hmangaih Ian a’n min fawp a maw? A thil tih hi a hrechiang em? Dim leh nem thakin min fawp a, kei erawh milim ang maiin ka meng phar hru thunga.

A hmui chu..Awi karei !! Ka lo suangtuahna ai pawhin a nem zawk. Engtik laiin nge ka lo tih ve pawh ka hre lo. Zawite tein ka lo chhanglet ve a. Chuveleh a nui suk a, min rawn pawt hnai a, min fawp nghal mawlh mawlh a.

Ka kawngah min rawn vuanin a taksa si ratin min pawm beta. A nghawngah vuanin a samah ka chul chho a, a sam dum nem hlap mai chu ka tham kual a. Min pawm darh a, a kawngah ka ke pahnihin min ka chep bet a, kan infawp lai thlah chuang hauh lovin bangah min nawr beta.

Ka tre that a, a kap rawn pawng chuan ka kap zawnah tak min rawn do a. Ka thinlung chuan tawp vat turin min duh a, mahse ka taksa erawhin a duh ber hmu a ni bawka a kham thei reng reng si lo. Thil dik lo a ni tih ka hria, mahse alan danah chuan engkim chu a dik thlap lawi si.

Mattress a min nghah takah chuan khum kan thleng tawh a ni tih ka hrechhuak zawka. Kan hmui kan inthlah a, Ian-a chuan chunglam atang min rawn en a, ka biangah a vuan bawka.

“Nang Alison Cullen-i hi ka nun a thil tha ber chu i lo ni a nih hi. Ka mamawh midang hnen atanga ka hmuh theih si loh chu nangman i lo kawl vek a nih hi”. A mitmeng hmangaihna a khat chuan Cullen tiin min ko tih pawh min hriattir lo lek lek alawm mawle . Ka hmuiah bawk a rawn tuan leh a, ka ngaihtuahnaah chuan engmah a lut thei tawh lo. Ka fim thei tawh lo a ni. Ka hriat zawng chu tun hunah hian Alison Cullen ka ni tih hi a ni.

Luhna dilin a lei chuan ka hmui a rawn hawl a, phal takin kawng ka lo hawn nghala. Kan lei chu chak zawk nih tumin a inbuan tap tap a, atawpah chuan ka tlawm zawk ta. Ian-a chu ka nam sawn a, in kiss laia thawchhama thih ka duh lo. Ani lahin chintawk lem a nei si lo. Ka nghawkah a rawn fawp a, ka vunte chu a pet dawk dawk a. Nuam tiin ka dak tawk tawka, ka ka atang nuam ti rum ri a rawn chhuak a. A lakah chuan ka inphal rai ta vek mai.

“Ka ta i nih hi” a rawn ti sap a, ka kawr hak lai chu a hlip nghala. Thifim rawn thaw chuan min rawn chhem hit seng seng a.

“Ka lakah engmah thuhruk i nei thei lovang. Ka ta i ni a, chutiang bawkin kei pawh” tiin ka awmah a fawp thla a, ka bra chu a hlim chho kawk a, ka hnute rawn pawk chhuak nawlh mai chu sapui koham riltam ang maiin a thlir dawk dawk a. A mitmu pawl nalh tak kha tunah chuan a rawn thim zo ta.

A lei hmawrin a ka hnute hmui an rawn hawl kual nawk nawk mai chu ka ek nghal awk a, ka tre chhuak nghal a. Ka hnute lehlam chu a ut lehlamin a tham a, a hmet tawn tawna. A chen dan engkim chuan nuam tiin min rum tir a, ka kap a rawn tuai nawk nawk thleng chuan.

Sir lamah ka sam a kawi nuai a, a hmaiah chulin a rawn kun hniam a, min rawn fawp a. A kawr hak lai chu hlipin chuatah a vawm phei a, a awm leh a dul nalh zet mai chu chilthli tla lo chauhin ka thlir a, ka hmui ro halh mai chu ka liak hnawng a.

A kawnghren kilhna chu ka phelh saka, min rawn en a, min rawn nuih saka. Chuveleh zahnain min rawn mana,ka sen tawn tawn a. Ka biangah a rawn fawp zeuha, min rawn phelh pui vata.

A kekawr chu ka phelh a, chhuatah ka vawm hlawm leh tawp a, chutiang bawkin a underpant pawh. A mipatna chu inchhuang tak mai leh a hnathawh tur thawk tura inpeih diam tawh a nih zia lantir nan a kawh khawng at tawha. A lian takzet. Inphelh vek tawh hnuah ka zam titih leh deuh. A chhan pawh ka la virgin si a, a lut leng ang nge leng lovang tih ka lo ngaihtuah thleng hman a ni.

“Eng a ti nge?” tiin Ian-a chuan ka hmaia ka sam kai nuai chu min rawn hui kian saka.

“Engmah a ni lo” ka lo ti vata.

“Nuamlo tih ruakna i neih chuan kan tawp thei tho a nia” a ti a, a nui seuh sunga. Tawp vat chu ka duh a, mahse-

Kan nuam ti tre ri leh au thawm chu inhnuai lama Ashley-i te bacheloratte party nei mek music play ri chuan a rawn hliahkhuh veka.

Ka pum rawn na telh telh avang chuan ka rum tuah tuah a, sir lamah ka inlet a, ka kawngah engin emaw min kuah a ni. Ka mit ka meng a, pindan chu a lo la thim veka. Light on tumin ka puan sin chu ka pawt hlim a, kan on eng chiah chu engin nge min kuah tih ka hre lo. Ka ang nghal phuau a, A kut ka dap a, a banah dap pheiin a dar thleng ka va dap pheia. Tunge a nih tih pawh hai rual a ni ta lo.

Ian-a chu naute tlei tak ang maiin a lo mu nui seng a. A chalhma sam chu a chalah an bet thler a, a muthilh lai chu a hmelthat zual lai a ni mai zawkin ka hria.

Ka au chhuah mai loh nan ka hmui ka hup vata. Eng thil nge ka tih tak mai le?

Ka mittui a rawn parawl a, kan pahnih chuan ruak ngal ngatin kan la awm . Min kuahna a ban chu dah sawnin khum atang chuan ka tho chhuaka, ka kap a la na vung vung mai. Vawikhat mah ka hmang nawn leh tawh lovang.

Ka unaunu nena an inneih hma zanah ka pasal hlui chu sex ka hmapui a maw? Unaunu rapthlak tak ka lo ni a nih hi. Ka mittui chu hru hulin ka in ha tha sawk sawk a, eng ber nge tih tur pawh ka hre lo.

Khawvar hun ka van han huphurh tehreng em. Thil thleng kha Ian a’n a han hrechhuak leh ang a, min haw dawn lutuk. Ni lo, a vawihnihna chu ka tuarchhuak zo tawh lovang.

Ka phone ka la a, Aiden-a number ka hmet chhuak vata, ka call nghala.

“Eng nge ni ta? Zing dar 4 ah te?” thophang aw zet hian min rawn chhanga.

“Kan inah i rawn kal thei angem? Tunah?” a tawpna chu ka lanm chang fat a, fiamthu a ni lo tih a hrethiam nghal ang.

“Thil a tha vek em?”

“Aw tha vek .Tunah rawn kal rawh Aiden” tiin phone chu ka dah nghala. Gate bulah mins15 zet ka ding a, tumah an la tho lo.

“Eng nge i rawn hak kha?” chu chu Aiden-a ka hmuh a ka sawi hmasak ber a ni.

“Nge ni a engmah ka ha lo zawk?” a rawn tih zawm a. Boxer nen chauh a rawn kal nia.

“A hmanhmawh thlak hmel sia, inhakna hun pawh ka nei hleinem. Ka ban phak hmasa ber ka inthawlh tawp a nih hi” a la ti ta deuh deuh a.

“I van tenawm tak” tih pahin a banah ka chelh a, inchung lam ka pan pui nghal a. Ka pindan ah kan lut a, kan ding dun chawta.

“Eng nge hei hi?”tih pahin a ham bui bui a, ka khum lam chu a pan phei a. Mahse thil tha lo zawk a thlen hmain ka va chelh vata. “Tunge hei hi?” ka khum a mipa mu puan sin a hmuh chuan a ti nghal vata.

“Eng thil nge ni ngai?” a hmel chu thinrimnaah a inthlak nghal a, a ha chang a thial ri bap a.

“Shhh.....i ti harh ang” tih pahi bathlar lamah ka nam chhuak vata.

“Ani nen khan in mu dun a maw?”

“Aih.., Aw ka tihna. Ihh, englo ania. Ngaihdam rawn dil turin a lo kal a, chuan min fawp tih chu ka la hria a, chuan thil dangah a kang kai zel ta a ni. A tha lo takzet, ka thiam lo takzet tih pawh ka hria. Hrehawm ka ti. A tukah nupui a nei tawh dawna, chuan sex kan lo la hmang a nia. Ka pa leh Ashley i’n hrechhuak ta se engtin nge min tih ang? Ui kareii...! A lo harh anga eng angin nge min ngaih tak ang? Ani kha chu a ruih vang tal a la nia.....”

“Ngawi rawh Alison. I nervous apiang hian i chiar nawk nawk zel tih hi tuin emaw an hrilh tawh che em?”

“Aw hrilh tawh tho mai”

“Lawkin, engtin nge i sawi khah?”

“Aw hrilh tawh tho mai ka ti”

“Ni lo. Khami hma khan”

“Ummm, A lo harh anga eng angin nge min ngaih tak ang? Ani kha chu a ruih vang tal a la nia tih kha maw?” ka ti a.

“Aw” tih pahin Aiden-a chuan ka biangah min rawn fawp zeuh a, ka khum lam panin inchhungah a lut lehnghal a. “Min rawn zui dawn em?”

“Eng nge i tih dawn?”

“Thawmhnaw ka hak tir dawn. Min rawn pui rawh” tih pahin chhuat a a thawmhnaw darh nuai chu a chhar khawm mawlh mawlh a. A chhar khawm zo ta maw tihah Aiden-a chuan Ian-a puan sin lai chu a hlip sawn a.

“Uikareiii Hmangaihna Pathian. Ka zak tur a ni lo. Ka vawikhat hmuhna pawh a nih tawh loh hi. Nizanah ka hmuh vek tawh kha. Min pui lul teh”

END OF CHAPTER -17

Chapter -18

(The Wedding)

Ian’s P.O.V

Darthlalang hmaah dingin ka hma zawn a mihring, a mitmenga chian lohna leh inringtawk lohna chhumpui zing mup mai chu ka thlir renga. Ka blazer hak chu ka pawt mar a, thawk ka la haka. Eng thil nge ka tih dawn tih leh eng nge ka chungah rawn thleng ang tih chu han ngaituah dan pawh ka thiam lo.

Zing ka tho chu la na bur chungin ka tho a, nizan a thil thlengte chu ka la mang hriat rei ruai a, mahse min tibuai tu ber erawh nizana ka awmna ni a ka hriatah khan ka awm ta hauh lo chu a ni. Zing ka thoh chuan ka thawmhnaw inha fel thlapin ka khumah ka lo mu reng a, nizana thil thlengte kha ka mumang mai ka tih dawn chuan a ni theiin ka hre chiah bawk si lo. Ka mumang a lo ni hlauh a nih chuan ka mumang neih tawh a zawng a nuam leh thlakhlelh awm ber a ni ngei ang.

A tak a thleng ngei nise ka ti a, a tak lo ni tak tak se khatiang khan Alison-i bulah kalin ka awm dan diktak ka sawichuah ngam ka inring si lo. A chhan dik takah chuan hlauhthawnna ka nei a ni. Eng ang mipa-ah nge min ngaih ang?

Thudik ka hriat chian em em chu kan inneih zungbun a phelh a, kan in atanga a chhuah atang chiah khan Alison-i nge Ashley-i zawk hi hmangaihna dik tak a ka hmangaih tih ka chiang ta lo hi a ni. Ka thinlung chuan va umzui a ngaihdam va dil a duh a, thil ka tisual a ni ti a va inlam let nghal a duh. Ka hmangaih a ni, mahse chu chu thil ni thei a ni si lo. Engmah tih theih nei lova a kal chhuak lai thlir liam tawp mai loh chu.

Ka ngai ngai lo ka ti a nih chuan chu thu ka sawi lai chu chiang taka dawt ka sawi lai a ni ang. Ka ngai em em reng a, mahse a mitah tak en a thudik hrilh turin ka huaisen tawk si lo.

Ka pindan kawngkhar a rawn inhawng a, ipte zen chungin Drake-a a urawn lut thak thak a. “I awm dan chu leh?” a rawn ti lut hluai a.

"Eng nge?" ka lo ti haw a.

"A hmasa a nupui i neih dawn a i phur loh hmel ang tho kha alawm tunah pawh i la put le. 'Eng thil nge maw uka tih tak mai le?' tih hmel i pu a ni" min rawn ti a.

Darthlalangah chuan ka uin en a, eng ti tehvaka han chhan ngaihna ka hre lo. A chhan chu thudik a sawi miau avangin.

A tawp nan ka inchei dan chu ka enchhuak leh vek a, mahse eng emaw kim lo a awm. Drake-a lam ka hawi a. "Ka e ng nge kim lo?" ka ti a.

Ka chhip atang chuan min han en vang vanga. "Tie ila awrh lo a nih kha" min ti a.

Darthlalang lam chu ka hawi leh a, ka kawr hmalam chu ala plain purh mai. "Alison-i ko rawh" ka ti a, ka thawmhnaw dahna lam panin ka tie dum chu ka la chhuaka.

"Alison-i i ti em ni?" tih pahin Drake-a chuan min rawn zuia.

"Aw Alison-i" ka ti leh a. A hnu deuhah pawh chuan pindanah ala awm reng tih ka hria. A lam ka hawi a. "Hun kan nei tam lo a nia. Che vat ta che mawle" ka ti a.

"Eng thil nge maw tih i tum tak mai le Ian?"

"Ka nupui neih tur chungchang hi em ni i sawi?" ka ti a, mahse ka tawng danah zawhna mai piah lam thil dang a ri chhuak t8el a ni.

"Aw, enga tinge?" a ti a, a kut a kuangkuah hmaka.

"A chhan chu ka hmangaih-" ka thusawi tur chu min rawn pawtchat chiang kher mai. "Ashley-i hi ka hmangaih a ni tih sawi tum miah suh. Chu chu thu dik a ni lo tih nang leh kei hian kan hria"

"A ni maw? A nih leh eng nge thudik chu?" ka ti let ve ngata.

"Ka thian duh tak, hmangaih hmasa ber leh hmangaihna dik tak tih hian in an lohna lian tak a nei a ni tih ka hrilh che kha tunah hian a awmzia i hriatthiam tawh ka ring" tih pahin min rawn pan hnaia, ka darah min rawn vuana.

Ka chhungril tawt lutuk mai chu paih chhuah hawk hawk ka duh. Drake-a chauh chu ka inbuanruah theihna a ni. "Ka tlai chhe lutuk tawh angem?" tiin ka phun chhuak sapa.

"Ka thian, 'Tiam tlat e' ti a i chham hmate chuan tlai lah love. Chu erawh i kohvah a innghat. I tana hmeichhe dik tak bula "Ka lo ti dik lo a ni e' ti a engkim thlak danglam vek nge i duh, hmeichhe dik lo zawk hnena 'Tiam tlat e' ti a i dam chhunga 'eng ka ti ta nge ni?' ti a inzawh reng i duh zawk? I duhthlanna a ni e" lainlat hmel taka min en chungin a ti a.

Eng zawk nge ka tih ang? Chu chu duhthlanna harsa tak a ni. Ani chu ko kir leh ta ila ka hringnun mai piah lamah a nun thlengin thil fel lo tam tak a awm phah ngei ngei dawna, chutiang thil chu a hringnunah ka thlen sak tam tawk tawha, chutiang thil ti nawn leh tur chuan ka huaisen tawk tawh lo a ni.

"Tunge i nih? I thian tha ber chungah hian eng thil nge i tih hi?" tiin ani chu zawhna ka zawt a.

"Ka thian duh tak, mi ka atanga chu mi zawhna ka dawn hunah chuan ka engah mah a thawk pha lovang" tih pahin min rawn nuih saka. "A chhan chu thil dik tak a tih avangin"

*Alison's P.O.V*

Vawiin hian ka unaunu avang ringawtin ka ngaihtuahna hi vawi za chuang ka seng tawh ang.

"I nalh lutuk Ashley. A tawpah chuan a tha ber i thlang chhuak ta alawm" tiin ka chhanga.

"Ka pasal neih ni a nih hi Al. Nalh ringawt ka duh hleinem. Sawiselbo nih alawm ka duh" a ti ner deuh nung a. A hnute te chu an dawm ching vela. Chutih lai chuan rapthlak tih hmel deuh hian ka pa chuan a aw a rawn thian kharh a, ka lo meng phawk hru a.

"Ka pa. Eng nge khatah i din reng a? Min rawn endik pui ve teh" tiin ka ding chhuak a, chuveleh ka pa chu a inher hmaka, ka va nanchin hmaiin a chhuak nghal daih a. Vawiin hian tu emaw chu a lungawi hlawl lo a ni.

"Sawiselna tur reng reng i awm lo Ashley" ka ti a, ka pa chu ka umzui nghala. Inneihna chu inhnung lam mual zawl a neih tur a ni a, chulamah chuan a phei ngei a nih ringin inneihna hmun tur lam chu ka pana. Chutia ka kal hlawk hlawk lai chuan tu emaw hian ka banah min rawn vuan ding chawt a. Ka hawi let vata tu dang ni lovin Drake-a a lo ni renga.

"Drake? Eng nge thil dik lo a awm em ni?" a ngaihna hriat loh hmel zet hian ka ti a.

"Ian a'n a pindan a rawn kal lawk turin a duh che" tih pahin mi lo hmutu an awm leh awm loh chian nan a hawikual zek zek a. Kei erawh mak tiin kalo meng phar awn a.

"Eng a ti maw?" hamhaih hmel zet hian ka ti leha. Nizan chungchang min sawi pui a duh vang chu ni lo hram se ka ti ngei mai. Engkim ala hriat vek chu ka ring chiah chuang lo.

"Alison, cake saw lo va enfel la ka va ti ve" hnung lam atang ka nuin min rawn au a.

"Keiman ka lo ti mai ang. Va kal la, va hmu vat rawh. Hun i nei tam tawh lo a nia" tih pahin a sana bun lai chu a en vata. Eng emaw chu ka hrethiam mai. Ka bu nghat a, a pindan lam pan chuan ka kal ta nghala. Kawngka ka va kik karh a, aw zawi raih hian min lo chhang a. A pindan ka lut chiah chu a lo vawt veng venga, chu chuan ka kawchhungah min man nghala. Darthlalang lian tak hmaah a lo ding reng a, a awmna lampan chuan ka phei a. Ka ke pen ri chuan chhuatah chuan a ri kauh kauh a.

A hnungah chiah chuan ka va ding a, ka thla pawh chiang takin darthlalangah chuan ka hmu thei a. Theite rawng gown ka ha a, lei a vaw siau a. Chu chu mawi taka lace a chei a ni. Ka banrekah sarin ribbon ka hreng bawka. Emily i'n make up hmang tura min tih tlat avangin ka mit tlem ka hnawih a, ka hmuiah naked lipstick ka inhnawih a, ka sam erawh tuipui kama ding ang mai ka ni. Ian a'n a min lei sak thi kha ka awrh bawka.

Darthlang atang min en vang vang hnuah muangchangin a rawn inher a. "I mawi...,lutuk ringawt" a rawn ti thawp sata. Thawk a la vang vanga.

"Min hmuh i duh em ni?" ka ti a, "Aw" tiin min lo chhang vata. A hrawk a thian kharh a, necktie pawl min rawn pe , ka lo nui ri haka.

"I ti tak tak em ni Ian?" ka tih chuan a dar a lo san ak a. Kei pawh chuan ka tih dan thin ang bawkin a necktie awrh tur chu ka suih sak leha.

"Nizante i muttui em?" min rawn ti a. Ka khawng vek dawnin ka inhria. Khur ru der der chungin ka thawchhuak de de a.

"Mutui a ni mai. Bacheloratte an hman khan min ti muhil lawk thei lo tih mai loh chu" tiin ka chhanga. A dikna lai chen pawh a awm

"A nih nang ve?" ka ti a. Thil hriat reng eng emaw tal a la neih leh neih loh ka hre chak ve reng renga.

"Mumang nuam deuh mai ka mang a" a ti a. Ka tawp deuh chawt a, mahse ka tie suih laiah chuan ka rilru ka pe leh vata.

Ka nui seih a, ka bu nghat a. "Alison, thil eng emaw hrilh duh che ka nei a

" a rawn ti sapa. Ka chil ka lem rikhawlh a. Khawngaihin ti suh. Ka unaunu hringnun hi tihchhiat sak lul suh tiin ka tawngtai nghal mawlh mawlh a.

"Lawk aw, i sawi hmain eng emaw thil hote in inneih present tur pek che ka duh a" nuisang chungin ka lo ti vata. Mak tih hmel deuhin min rawn en a, a bu nghata. Sawi mai tur a hre bik lo.

Min lo nghak lawk tura ka tih hnu chuan a hmaa ka pindan thin lam kha ka pana. Thla 6 zet kan inthen tawh nachungin ka thil engkim chu angai ang thlapin Marie i'n ka pindan thinah khan min lo la vawn that sak thlapa.

Ka thawmhnaw dahna lam ka pana, drawer chung ber chu pawt hawngin velvet bawm pawl nalh zet mai chu ka phawrh chhuak a, ka nui saka. Ka lai laite kha ka mitthlaah a rawn lang uar uar a. Kan honeymoon present atan ka pe ang ka ti a, mahse khatiang kha kan boruak a nih tak avangin tun hi pekna hun remchang tak a ni.

A pindan lama ka let leh chuan a dinna ngai chiah chiahah a lo la ding reng a. Nuisang chung a pe chungin "Hei hi i ta tur a ni e" ka ti a. A bu nghata, hriat chak deuh hmelpu chungin bawm chu a en a, a han hawng chiah chu a meng kawk a. Engtin nge a ngaih ang tih hrechak tak chungin ka hmui ka seh a, a hmel awm dan chu ka lo en reng.

Bawm chhung a sana chu a la chhuaka, lawm hmel taka nui sang chungin a en vang vang a. Ka thaw huai mai.

"A van ropui em em ve" a ti a, a hmelah erawh mak tihna ala awm. "Mahse a thi a nih hi"

A sana chu va laksakin dar zat dik takah ka herh saka, ka pe leh a. "Ti khan bun tawh rawh le" ka ti a. Sana chu a en vang vanga "A la thi tho" a ti a.

"Nghak deuh rawh" ka ti a, ka thaw haka. Tawng a rawn tum zuau a, mahse mitmeiin ka lo khap vata. Rei lote hnuah sana chu a rawn chek ta kerh kerh a. "Ti hian a dik tiraw?" a rawn ti a.

"Aw, i lungphu rinchhanin a rawn nung a nih kha" ka tih chuan a rawn nui sanga.

"A van tha ve. Ka duh lutuk ringawt"

"Hei hi hrereng ang che Ian. Engtikah emaw chuan sana ban kha ala ding anga. Chutih hunah chuan ka lungphu pawh" ka ti a. A nui hmel chu a tawp hmaka, lungchhe hmel hi a rawn pu a. "Maw?"

"Engtikah emaw chuan a awmzia i la hrethiam mai ang" ka ti sapa, engmah a sawi leh hmain pindan atang chuan ka chhuah sana. Ka laka a thil sawi tum laka ta a rilru ka lak pen sak thei ta hlauh mai. Inneihna chu ruahmanna angin tluak takin kal ngei rawh se.

Chapter -19

(Goodbyes)

*Preview*

Ka awm dan chu deja vu(thil kan tih a mumang a lo hmu lawk tawh tlata kan inhriatna) ang hi a ni ringawt. Mo thuam ha chunga ka luh laia rimawi an lo tum ang chiah kha an lo tum leha. Nipui thlifim a rawn thaw heuh heuh a, mitin mai chu kan ngawi thuap a, kan thutna atang theuh a dingin rimawi bak eng thawm mah hriat tur a awm lo. Beisei piah lamin inneihna lawmpuitu an tha hnem em em a, kil tinah chanchinbumi an ding fer fur a, ka thlalak hi a nalh ber tur a ni ti ang maiin an camera keng chu an lo hmet de chuai chuai bawka.

Puithiam hma a ding mopa lam chu ka hawi a. Nalh takin a inthuam a, a hmelah erawh hlim hmel ka hmu lo. Mo nu rawn lut mek lam ni lovin keimah chuah chu min rawn en a.

*Present*

Mikhual pindan lamah chuan ka let phei leh a, Ashley-i pawh a lo inpeih diam tawha. Darthlalang lian tak hmaah mo thuam famkim nen, a kut a pangpar bawr nalh tak keng chungin a lo ding nui ver ver a. Kei pawh chu tawitein ka nui a. Tunah tak hian tu emaw chu a hlim em em a ni.

“Tunah chuan monu hmeltha leh nalh, tuma tluk rual lova mawi leh hlim i ni ta” tiin ka pan phei a. A rawn inher a, nuisang chungin ka kutah min rawn vuana. “Alison” a ti a, thawk ala vang vang a.

“Ka nervous a ni” a ti sapa.

“Chu chu inneih dawna paltlang ngai hmasa ber a ni reng alawm” tiin a kutah chuan ka lo hmer leta.

“Nang pawhin i hria anga unaunute pasal hlui han neih chu thil awm lo leh mawi lo tak a ni. Mahse vawiin ni hian ka unaunu i nih avangin ka thla a muang a, ka lawm takzet a ni” a ti a, ka lo nui sak ringawt a.

“Ashley, kal a hun e” tiin ka pa a rawn lut a. Ashley-i lamah a ban a phar a, mahse a lo vawn sak lo. “Ashley?” ka pa chuan a ti a.

“Pa, hei hi tih dan phung a nih leh nih loh ka hre lo a. Mahse a theih a nih chuan Alison-i ngei hian min kai chuak se la ka duh a ni” Ashley i’n a han ti chiah chu chhung lam atang min rawn hnawh nghal tup tup a. Dik tak chuan inneihna-ah a mawi hnai atan ka lang ve zuai anga, ka kal bo daih ang ka lo inti a. A chhan chu an pahnih a thu an tiam dun lai hmuh ka duh lo a ni. Mahse tunah zawng ka ruahmanna zawng zawng chu a tlawrh dawn a ang ta hlemai. Engvanga chutianga tih duh kher nge a nih tih pawh ka hria. A chhan chu Ian-a hian keimahah feelings ala neih tih a hriat vang a ni.

Ka pa chuan hnial a tum zet a mahse ka lo dang thuai a.

“Chu chu ka tan chawimawina sang tak a ni zawk ang chu” ka ti a, Ashley chu a lo nui har har a. A lamah ka kut ka phar a, min lo vuan a, pindan atang chuan kan chhuak dun a. Ka pa chuan hrehawm ti takin leh min lainat tak chungin min thlir liam a ni tih ka hria. Mahse ka hriat loh der tlat angai. Tu lainat mah nih ka duh lo.

Reiloteah thing a siam kawngkhar lianpui chu kan thleng ta. Ka awm dan chu deja vu(thil kan tih a mumang a lo hmu lawk tawh tlata kan inhriatna) ang hi a ni ringawt. Mo thuam ha chunga ka luh laia rimawi an lo tum ang chiah kha an lo tum leha. Nipui thlifim a rawn thaw heuh heuh a, mitin mai chu kan ngawi thuap a, kan thutna atang theuh a dingin rimawi bak eng thawm mah hriat tur a awm lo. Beisei piah lamin inneihna lawmpuitu an tha hnem em em a, kil tinah chanchinbumi an ding fer fur a, ka thlalak hi a nalh ber tur a ni ti ang maiin an camera keng chu an lo hmet de chuai chuai bawka.

Puithiam hma a ding mopa lam chu ka hawi a. Nalh takin a inthuam a, a hmelah erawh hlim hmel ka hmu lo. Mo nu rawn lut mek lam ni lovin keimah chuah chu min rawn en a. Kan hnaih tawlh tawlh a, ka thinphu a rang tawlh tawlh a. Hei hi a ni Ian-a leh Alison-i te tawpna tur chu.

A bul kan va thlen chuan ka nuih saka, Ashley-i kutah vuanin Ian-a lamah ka pe phei a, mahse a rawn vawn sak lo. A mit chu ka chungah a la fu tlat a, a rilru chu inhnialna lian takin a la chamchilh mek a ni. Nui hmel pu chungin Ian-a kut chu ka va vuan a, Ashley-i kut lamah la pheiin invawn tir ka tum a, mahse a kut a hum ta tlat mai.

“Kei chuan ka thusawi kha ka hre reng” a mitmu dumpawlah taka en chungin ka ti a, muangchangin ka tawlhhnung nghala. Puithiam pawh a rawn pen hma a, kei pawh ka thutna tur dik takah ka thu fela. Ian-a chuan Ashley-i chu a en zauh a, keimah bawk chu min rawn zawng leh a. Kei chuan ka lo nuih saka.

“Tunah chuan kumkhua a pumkhat ni turin inthinlung hawng tawn ula, hmangaihna dik tak chu chawimawiin awm rawh se. Kumkhua a inchawimawi tawna inenkawl tawn turin, hlim taka awm a inti chak tawn turin, hlimni leh lungngaihni-ah pawh, harsatna karah leh lawmna karah pawh kumkhua a inhmangaih zel turin in intiam thei em?”

Ian-a leh Ashley chuan a rualin “Ka tiam e” an ti duna.

Thutiam an chham zawh hnu chuan zungbun inbun tir hun a ni ta. Ashley-i chuan Ian-a kut a zungbun bun tir chungin “He zungbun hian ka nemnghet e” a ti a.

Ian-a chuan a kut a a ken zungbun chu a lek kang veleh a. Kei erawhin ka en chhunzawm thei tawh lo. Ka inher a, pawn lam panin ka chhuak nghala. Pen tam pawh ka pen hmain Ian-a aw chu chiang takin ka hre zui nghala. “He zungbun hian ka nemnghet e”

Ka biangah mittui a rawn luang thla a, mahse hruk hul kher pawh ka tum lo.

A tawp ta.

*Ian’s P.O.V*

Ashley-i nen a kan inneih atang kar khat zet a liam ta. Ka lo tlai mah mah avang khan keimah ka inhaw tawp thei lo.

Khani kha ka hmuh tawpna ber a ni ta. Ka call a la duh lova, ka text pawh min chhang ngai lo. Aiden a’n amaha awm a duh rih thu min hrilh a, ani ngei pawh a call a pick ngai bik lo a ni awm e. Ka hmuh theihna chance neih chhun a hna atangin a lo bang daih a, Lucy i’n a hna a rawn zawm leh tawh bawk si. Hun kha kohkir leh theih nise ka ti rneg dawn ta a nih hi.

“Sir, Mr Clarke-a a lo kal a” Lucy in a rawn ti a.

“Aiden-a maw? Eng nge a rawn tih a?”

“Aw ni e Sir”

“Rawn luh tir rawh”

Vawiin hian eng dik lohna nge ka nih ka hre lo. Zing atang reng khan ka dik lo va, ka nelawm lohin ka thin a chhe tuk reng mai.

Aiden-a chu a rawn lut a, a hmel chu a uang hauh lo. Ka thutna atanga lo dingin lo chawn ka tum a, chutih lai tak chuan ka dawhkan chu a rawn hnek ri bur a. Ka tawlh hnung dawrh a.

“Eng nge ni a Aiden?” ka ti thawt a.

“Alison-i te ang hmeichhia i nei kha eng ang fakau a vannei nge i nih tih hi i inhre hlawl lo. Nang erawh chuan ho lam tak in i kal tir ta mai a maw? I kal tir ta mai kha i thiam lo a ni em tih chu ka hre lo va, ani pawhin mipa laktlak loh tak a lo hmangaih a ni mahna. A enga pawh chu nise tunah hian a pindanah awmin chu thil chuan natna vawrtawpah a hruai thleng ta a ni. Kei chuan chu chu ka hmu thei tawh lo a ni. Engti kawng mahin” a thinrim bawka a hachang a thial bap bapa. A mitmeng a dur khup a, a khawnga thisen zam inphiar tawn tawn chuan a thinrim zia a ti lang chiang khawp mai.

A awmdan a vang chuan ka meng bial kawk a, zawi muang ban chalhin “Min hmangaih a maw?” ka ti sapa.

Aiden-a chu sakawlh ang maiin ring takin a au a. “Tu phiangsenin nge nang ang mitdel, a thil hmuh reng pawh a awmzia hre map lo tu hi hetiang Company CEO tur a ruat che nge maw a nih le?”

A thusawi dang chu mumalin ka hre tawh lo. Ka mitthlaah ka nunhluite chu a mal tetein chiang takin a rawn lang zut zut a. A chian em avangin ka hmu ngam lo lek lek zawk a ni. Engtin nge khatiang a rei kha a lo tawrh theih le? Enga tinge engmah a sawi loh? Engtin nge kei ang hi min lo hmangaih theih?

“Ka duh chu ka unaunu neih let let hi a ni” Aiden-a aw chu a vawtin a chang hraih mai a, ka pindan atang chuan a chhuang nghala.

Rang takin ka phone ka la a, office bang darthlalang hlai pui hmaah chuan ka ding a, khawpui chu duhthusamin a lang chiang a. Alison-i number ka dial thuai a, ka bengah ka phone chu ka chuktuah nghala.

A ring a, mahse chhangtu reng an awm lo. Ka ti nawn zel a, achangin a in disconnect a. A tawp a tawpah chuan min rawn chhang ta. Ka lungphu a van tawp chiang em. Ka va call tak nangin sawi tur erawh engmah ka hre lo.

“Ian?” zawi raihin a rawn ti a. A ka atanga ka hming a rawn ri ringawt pawh chu ka mur ghal sung sung thei.

“Alison?”

Reilote chhung chu a reh vang vang a, kan thaw ri kan inngaihthlak sak a ni ringawt. Thil thaw ri ka hriat tel avangin motor-ah a chuang mek a ni tih ka hre thei.

“Khawiah nge i awm Alison?” ka ti a.

“Chu zawng i hriat a tul lo” tiin min rawn chhanga.

“Alison, ka....ka tihpalh aw” ka aw atang chuan ka tlawm zia a hre thei ang.

“Eng thilah mah tihpalh tih i sawina tur a awm hleinem”

“Awm tehreng mai. Thil tam takah a ni. A hmasa berah chaun i thinlung ka tihnat avang leh i nun ka tihchhiat sak che avangin” ka ti a.

A ngawih vang vang hnuah “Tunah chuan engmah a siam that theih tawh loh Ian” a rawn ti sapa,

“Kei hian eng thil tha mah tih ka nei ve lo a nih hi” ka ti a.

“Ian, ka hrethiam lutuk che alawm. Hlim takin i nun hmang la, ka lo tel ve tawhna kha chu theihnghilh daih ang che. Mangtha le” tih chu a thusawi hnuhnung ber a ni. Phone chu a kiu vung vunga.

“Chu chu ka beisei” ka ti sapa, ka phone ken lai chu chhuatah a tla ri thlawrh a, Chhuatah chuan ka thingthi hnawk a, ka biangah mittui a rawn luang zawih zawiha. Tun hi ka nu a thih tum tih lohah chuan ka vawikhat tah lehna a ni.

Thinrim takin chhuat atang chuan ka tho chhuak a, ka kutin a a tawh eng pawh mai chu ka vawm chhe pawp pawp a. Hmun tinah lehkha a leng darh chum chum a, furniture engpawh mai chu a keh rem rum a. Lucy pawh vawihnih ngawt a rawn lut a mahse ka chhuah tir lehnghal zel a. Ka mit a sen rum a, mittui nen. Nelawmna reng ka nei tawh lo.

Chhuata lehkha darh nuaih chungah chuan thuin ka khup chungah ka kut ka nghata. Ka phone pawh vawi tam tak a rawn ri a, mahse chhan tumin ka ban eih lo. Khua a thim a, ka office pawh chu a thimin pawn atanga eng rawn lut chuan a rawn kap eng cheche a.

Rei lote hnuah ka phone chu a rawn ri leh a, thim hnuaiah chuan phone eng pawh a chiang hlemai. Phone chu ka la a, number hriat ngai loh a ni.

“Hello?” ka aw chu ka tah nasat em avangin a chhang rut a.

“Sir, Porsche car eng E*R-77*3” hi i ta a ni tiraw” mipa pakhat hian a rawn ti a. A bul velah chuan siren ri a ri ruai ruai a, mipui an ri nuai nuai bawka.

“Aw, mahse ka nup-, ka nupui hluiin a khalh thin a”

“A pawi ka tikhawp mai Sir. Tunah hian chu car chu a accident a”. Chu thu ka han hria chu ka ding ngil zawta.

“Eng tia accident maw?” ka aw chu a khur der der a.

“A chhe hneh khawp mai. Puak zuiin a alh nasa hle a ni”

“A nih,...a nih, tuin nge khalh?” ka bing mup mup a, engkim mai chu a reh thuap veka.

“A pawi ka ti khawp mai Sir, inchhan hman ngaihna a awm ta lo a ni. Eng pawh nise inti pachang hram hram turin ka duh che a ni. Alison-i a ni e” a ti zawi raih a.

Ka phone chu na mangkhengin bangah ka vawm a, a keh sawm nghal veka. Ring takin ka au a, Pathian chuan tunge min laksak tak hi tih hre ngei se ka duh a ni.

Ka Alison-i chu min laksak ta. Tunah leh kumkhhua atan.

END OF CHAPTER -19

Chapter -20

(The Funeral)

Thawmhnaw dum.

Thawmhnaw rawngah kher kher chuan a dum hi ka ngainat loh zawng tak a ni. A chhan pawh thihna entirtu a nih avangin. Tunah erawh loh theih lohna avangin a vuina a kawr dum ka hak a ngai ta si.

Tunah pawh hian a thih thu chu ka la ring thei chuang lo.

Mahse ka thil hmuh engkim mai chuan a thih thu chu a nemnghet chiang em em mai bawk si. Chuti chung pawh chuan ka uthinlung erawhin a pawm thei thlawt lo a ni.

Car chhe keh nuaih mai te, mihring ruang kang ut vekte. Amah a ni ngei a ni tih tichiang turin a nu thi engtik lai pawha a awrh thin kha a awrh thlap a. A taksa chu za a 97 a kang chhe veka, ama duh ang ngeiin a nu ruang bulah zalh a ni ve dawn ta a ni.

Darthlalang lian tak hmaah ka ding a, chu darthlalangah chuan kawr dum ha mihring a ding a, a kawr ban chu a kiu thlengin a thlep chho a, kawrchung dum leh pheikhawk dum a bun bawka. A mit chu a sen vek a, lungchhiatna thuk tak a hmuh theih bawka. Chu mihring chu ka hriat ngai mi ni pawhin ka hre lo. Keimah ka nih tak tak leh tak tak loh pawh ka hre lo.

Ka thawmhnaw dahna sir a ka necktie thahnem tak, suih tu pawh nei lo va in bang fel thlap mai chu ka hmu a, Marie bulah paih bo vek turin ka ti a, mahse ka thusawi chu engah mah min ngaih sak duh lo.

"Ka fapa, kal a hun tawh e" tiin ka pa chu ka pindan chhungah a rawn luta. Amah pawh chu keimah ang deuh tho a ni. A mitmeng a dul ruih a, a sam a pawr far a, a hmaite chu meh fai lovin a buk chhap bawka. Alison-i thih thu chuan min thawng em em vek a, tu pawh an biangah mittui a luan tir a nih hi.

Thawk ka la vang vang a, ka bu nghata. Inherin ka pa pawh nghak tawh chuang lovin pindan atang chuan ka chhuak a, pawna kan chhuanna tur motor lo dingah chuan ka lut a. Rei loteah ka pa pawhin min lo zawm a, Browns chhungkaw ho awmna lam chu kan pa ta a.

Ashley-i erawh a nu leh pa te hnem turin an in lamah a lo awm lawk sa bawka.

Kan zingah chuan apa chu a rilru na fal ber a ni awm e. A neih zawng zawng chan ta ang maiin ni a awm ni. Ani chu ka hmeichhe hmangaih a ni tehmeuh mai, mahse atan chuan a fanu a ni a, an pasalte leh an mahni hmangaih tak tak tu te pawhin pa in a a nupui leh a fanu a chan nat tur zia chu an hrethiam ve pha lovang.

Ka kalna hmun tur kan thlen chuan Car chu a ding a, kan vai chuan kan chhuk thla theuh a. Kei erawhin mi zinga ka mittui thupna turin tarmit dum ka bun daih thunga.

Thli rawn thaw reng reng chu a vawtin a chhah tup mai a, engkim mai chuan chu hmeichhe rilru thianghlim tak fam chang ta chu an sun ve ni awm mai hian khuate chu a hnim ruih a. Thawk ka lak a piang mai hian ka rit belh huk huk mai tein ka hria.

Ka pa leh Marie zuiin Browns chhungkaw in hnung lamah ka luta. Alison-i khan a duh dan chuan a thih hunah mi tam deuh pungkhawm lovin a laina hnaite leh amah hmangaihtute bak tumah lo kal lo turin a duh a, a sawi ang ngeiin mi tam tak an pungkhawm lem lo.

Lei 6ft set a an laih khuar chu mitlemtein an ding hual thap a, an insut tliar tliar hlawma.

Ashley-i nu chu lungchhe takin a tap hawm hawm renga, a kiangah chuan Ashley-i a ding a, a nu chu a kuah a. A pa erawh a nu an phumna zawnah chuan kekawr ipte zen chungin a ding a, thlanlung chu a thlir reng ringawta. A piah deuhah chuan Emily a ding a, a bulah chuan Drake-a ding vein an inkuah a, Emily chu Drake-a awm ngheng chungin a tap renga.

Aiden-a erawh mi zawng zawng hnungah a ding a, kuang lam hawi duh lovin a hnungchhawn tlat a. Jake-a pawh thingkung buk hnuaiah dingin a inhru a inhru a, Marie pawhin ka pa ban a vuan a, a tap leh feih feih thin a.

Kei ve maw? A sir kil khatah dingin thlanlung chu ka thlir renga.

'Hetah hian Alison Brown chu a zal ta.

Kan fanu, kan thian leh kan unaunu chu.

15th April 1991 - 24th March 2018

Hmangaihnaah chuan rinna a awm reng ang'

Chu thu chu amah pawhin a a sawi fo thin leh a nunpui thin a ni. A thinlung a kehsawm vek lai pawhin hmangaihnaah a rinna a nghat tlat a nih kha. A thinlung ka tih keh chhiat sak avang leh ka hmangaih thu ka hrilh hman tak loh avang khan engtikah mah ka inngaidam leh tawh ngai lovang. Tun atanga ka damchhungin ka thinlungah hmun ruak a awm tawh dawn a, chu hmun ruak chu amah lo luah khat theitu tur an awm leh tawh ngai lovang.

Puithiam rawn thlengin vuina hun a hmang a, chumi zawhah a ruang awmna kuang chu kumkhua a lei dai a zal tawh turin thlan khung chhung lamah an hlang thla ta riai riai a. Thlan chhungah chuan an rose var ken theuh chu an vawrh lut sap sap a, tu pawh mai chuan thlahna thu an sawi sap sap a.

Keimah chiah ka bang ta. A thlan khur bulah chuan ka va kal hnai a, a dam lai ngei a hrilh ka duh, ka sawi hman tak loh zawng zawng kha bun chhuah vek ka duh a ni. "Hey, kei chu hlim taka ka awm tawh tur thu i sawi kha ka la hre reng asin. Mahse nang i awm ve lohte chuan chu chu engtin nge maw a thlen theih tehlul ang le?". Thawk ka la khur dar dar a. Marie chuan midang zawng chu kal sawn turin a lo hui thuai a, a chhan chu ka thlahna hnunghnung chham tur chu Alison-i chauhin a a hriat tur a nih vang a ni.

"I rilru na taka ka siam theih nan hun min pe a, mahse enga tinge chu mi chu siam tha a, thawi dam sak leh tur chein hun min pek leh si loh? Ashley-i ka hmangaih theihna turin hun min siam saka,mahse enga tinge nang ka hmangaih nan che hun min pek ve leh tak si loh?". Min chhan beisei takin a thlanlung chu ka en vang vanga, mahse eng chhanna mah dawn tur a awm si lo.

"Eng tiang chiahin nge ka lo hmangaih che tih hi i lakah ka lanchhuah tir hman ta si lova, mahse ka lungphu a phut tawp thlengin ka hmangaih reng ang che. Drake-a uthusawi kha a lo dik a ni. Ashle-i chu ka hmangaih hmasa ber a ni tehmeuh mai, Nang erawh hmangaihna dik taka ka hmangaih awm chhun i ni a, hmangaihna dik tak chu a thi ve thei dawn si lo. Chu chuan kan thinlungah hmun ruak lian tak a siam tawh ang a, chu hmun ruak chu Alison, nangmah bakin i luahkhat tawh ngai lovang"

Thlanlunga a hming inziak chu ka chula. "Ka hmangaih che Alison Every Cullen" ka ti sapa, ka mit atang mittui a rawn luangchhuak a.

"I thusawi chu a hria e" ka hnung lam atangin tu emaw hian a rawn ti a.

"A hria amaw?" tiin ka hawilet a, Alison-i pa mitmu uk kharh mai chu chiang takin ka hmu a.

"Aw, midang thusawi zawng zawng ai khan tuna i thusawi kha a hrechiang ber ngei ang. I mittui inthiam lohna a khatte pawh kha a hmu ngei ang. Mahse a damlai erawh chuan a hmu hman ta lo chu a nih tak hi" a tih chuan hrethiam takin ka lu ka lo bu a.

"Thil engkim mai hian a thawng em em vek che lo maw?" ka ti a, a thlanlung lam bawk chu ka hawi leha. A thlan bulah chuan ka thu reng a, ni a tlak atanga khua a lo thim tak hnu thleng pawhin.

*Kar hnih hnuah chuan*

"Lucy, hei hi eng nge ni?" tiin Lucy lam ka hawia.

"He lehkha hi nimin a sign tawh tur ka ni sia, engvanga tuna dawng chauh nge ka nih?" ka ti deuh pung punga.

"S-sir, nilengin meeting-ah i buai bawk si a" ka beng hrep mai ang tih hlau ni awm tak hian ti dekin min chhanga. Chutiang chu a chunga kan tih dawn loh nasat nen.

"A enga pawh chu nise min hrilh hrim hrim tur che ania, ka secretary i nih angin chu chu i hna a ni. Chu chu hlawh i lak chhan a ni" ka ti a.

"Ka tihpalh a ni Sir" a ti chuai raih a, hnuai lam a mel ngar ngar a. Tunlai chu nelawmna reng hi ka nei thlawt lo a ni e.

"I chhuak thei tawh ang ka tih veleh" Sapuiin a um ta emaw tih mai tura tangin a chhuak nghal vata.

Loh theih loh ni si le, ka hnaah chuan tui lo taka ka let leh ngei ngei a ngai si a. Tu lakah pawh mai chuan ka vinin ka thin a chhe em em renga, ka hnaah lah ka tui thei hek lo. Inah ka haw ngai mang lova, call pawh ka chhang ngai lo. Hremna ka chungah a tla pawh a ni mahna.

"I awmdan chu i va chhe ber bur ve" kawngka pawh rawn kik lovin ka office chhunah Aiden-a chu a rawn lut tlang tawpa.

"Eng nge i duh a Aiden?" tiin nin hmel takin ka mit ka lo chhinga.

"Eng thil mah" tih pahin a dar a chhin a, chair ruakah chuan a rawn thu a.

"A nih chuan ?" ka lo ti deuh hmuk a.

"I awmdan hi a tha lo a ni Ian. Hmana Ian-a kha lo let leh se ka duh a ni. Alison-i lo lan hma a mi Ian-a, mi fel tak kha. Ani khan a thlak danglam vek che a ni tih chu ka hria a, mahse i awmdan pangaia thlak danglam leh tur chein amah a awm tawh lova. Chuvang chuan insiam that i tum ve angai a ni"

"I thusawi kha kawi khat mahin ka hrethiam lo ve"

"Khanglang che chuan. I hrethiam i hrethiam" nin hmel deuhin a thaw haka. "A nih thil pakhat ka zawt thei che angem?" tiin min rawn thut hnaih a, dawhkanah a kut a rawn daha.

"Aih ti ta ila, i sawi loh phah angem?" tiin a mitah tak ka en a, ka nui suka.

Eng enge maw ngaihtuah awm tak hian a awm der a, "Aih" a rawn ti hul haka.

"A eng kha nge i ngaih ber?"

"Amah kha"

"A eng kha nge i hmangaih ber?"

"Amah kha"

"Amah hmangaih tir tur chein eng thil nge i chungah a tih?"

"Engthil mah" ka ti a, engkim mai chu ka mitthlaah a rawn lang chuai chuai a. Ka hmangaihna tur hian engmah tih hran a nei lo. A mitmu uk kharh maia ka en khan chhungrilah danglam a rawn awm mai a ni. Thlahlel taka min en te, min nuih dante, a mitmeng duhawm tak, engtik lai mai pawha min ngaihtuah em em tute, eitur min siam sak lai leh in ka chhuahsan dawn apiang a a ban a rawn vai lawp lawp thin te kha. Engkim mai khan min hmangaih tir a ni.

Aiden-a chuan chiang takin min en a, a thil tih tum ti hlawhtling ta ang mai hian min nuih suka.

"Engtin pawhin awm la ani kha chuan a duh em em vek a ni Ian. Mipa takin le" a ti a, a thutna atang chuan a tho chhuaka.

"Ani chu a kal tawh. Mahse hetah hian a awm renng tawh ang" tiin ka awm a rawn khawih a, ka pindan atang chuan min chhuahsan ta a.

Ka bana ka bun sana chu ka en a, amahin a min pek ngei sana chu second tina a kal bek bek lai nen chuan ka thlir renga. Khami ni a a thusawi kha chiang takin ka la hria.

"A la thi lo" tiin ka phun sapa. Sana min pek tuma a thusawi kha ka bengah a rawn ri nawn nghala.

"He sana hi a thih hunah kei pawh ka lungphu a tawp ve ang"

END OF CHAPTER -20

Chapter -21

(Sapphire Kingsley)

Rawng dum.

Thimna, malna leh bona entirtu a ni. Tunah hian nikhawhreloin ka awm mek a, chumi rawng zawng chu ka thil hmuh theih awm chhun a ni. Ka mutna bula khawl ni awm tak ri tet tet thawm chu ka hre thei a, ka hriat chian em em erawh ka tansa pum mai chu a na thum tih hi a ni.

Ka lu chu hetiang ang em em a a nat ka la hre ngai lo. Ka ke ler thleng mai chuan an tuam vek ni mai hian ka hria a, ka kut erawh chu chiang takin ka feel thei thung. A nat mai bakah a sa hut hut a, a thak em em mai bawk. Ring taka au chhuah chiam mai ka duh a, ka thei si lo. Engvangin nge ka harhchuah theih miah loh mai le. Ka chungah hian thil tha lo tak a thleng a ni lo maw? Ka harhchhuah theih loh rau rau chuan ka kut zungtang tih chet kan tum teh ang tiin tan ka la a, ka hlawhtling ta hlauh mai. Thawk tlem ka la leh a, chu chuan beisei bakin min ti chak hawk mai.

Rei vaklo ka chawlh vang vang hnu chuan ka tha neih zawng zawng sawmkhawmin ka mit meng ka tum ta a. Tlem a zawng eng ka hmu theih riau ruau a, mahse ka lu a rawn nat lutuk avangin chhin lehnghal loh theih a ni lo.

Na chu theihnghilh luiin men ka han tum nawn leh a. Ka bula khawl ri tet tet thawm kha a hma aiin a ring sauh a, a rawng zawk sauh bawka. Pindan chhung chu a thim rum a, sir lam atang light eng(yellow) a rawn lut a, pawn lam dangthlalang phen lam atang chuan light var a rawn lut bawka. Chu pindanah chuan keimah chiahin ka awm tih ka inhre thuai a.

Ka hrawk te chu thlaler ram ro, kum tam tak ruahtui hmu tawh lo ang maiin a ro huam huam a, tui ka mamawh. Ka awmna bul chu melh kualin thil ri tet tet ka hriat pawh kha ka mutna bulah monitor a lo inhung reng hi a lo nia. Chuta tang chuan hrui rawn chuakin ka taksaah chuan an thlunzawm fur a.

Damdawiinah ka awm em ni? Engvang nge?

Ka nngaihtuah ngial pawhin engvanga helaia awm ringawt hi nge ka nih tih ka hrechhuak zo lo. Chutih lai chuan ka lu um a rawn na leh vawng vawng a, ka khawhhmuh a rawn thim ruai ruai a, reiloteah thim bawk chuan min rawn bawh leh ta. Ka mit ka chhing a.

*** *** *** ***

Tu emaw inbe ru ser ser thawm ka hria a. Sir lamah ka lu ka thle a, ka rum haka, ka mit ka menga. Tunah chuan pindan chhung chu a lo eng pup tawh mai. Bang te chu rawng hmuh nuam taka chei a ni a, damdawiin pindan atan chuan lian tha lenglawng tak a ni. Ka hma zawn bangah chuan TV hlai tha tak a inkhai bawka. Keimah ka inen a, kawrfual var, dahlau deuh tak ka ha a, a hmazawnah chuan pangpar pawl lem a chuang kalh a. Blanket uk ka sin a, ka bulah chuan mi pahnih an ding bawka.

An pahnih chuan mipa ve ve an ni. Pakhat zawk chuan Doctor kawr a ha a, pakhat zawk erawh chuan t-shirt dum a ha a, a kawr hak chuan a taksa lian tak mai chu a phuar tawk hle a, jeans kekawr a ha bawka. Amah chu palian lam, sek tha tak a ni a, a hmel hmuh a nuam em em bawk. A sam chu a dum niin tawi tapin a met a, a mitmu erawh chocolate rawng ang maia uk a ni thung. A vun chu a uk deuh kharh a, mahse a eng nung sarh thung. Eng emaw file hi a keng a, Doctor nen chuan an inbe mawlh mawlh a. An rilru lal penna turin ka khuh ri kharh a, chu chuan ka hrawk a rawn ti za nghala.

An pahnih chuan ka lam an rawn hawi rual thawt a, mak tihna leh thaw huai hmel hi an pu a.

"Oh! I lo harh chhuak ta maw. Ka lo mangang hman tep tawh alawm le" doctor zawk chuan min rawn ti a. Chu tlangval ka hriat ngai loh pawh chu ka bula dawhkan bulah chuan a rawn phei a, tui inchhawp chu no-ah thliin ka hmui bulah min rawn ken hnaih saka. A tirah chuan muangchangin ka dawt a, ka in thei a ni tih ka hriat hnuah erawh a lemin ka lem khawlh khawlh a.

Chu pa chu a nui haka. "Hmanhmawh reng reng suh" a ti a, ka in zawh hnu chuan no chu a la sawna. Min en dan atang chuan a hmelhriat ka nih ka ring. Min hriat hmel tlat. Mahse enga tinge ka hriat ve reng reng loh?

"Ngati nge hetah hian ka awm a?" ka aw chu a chang tuau a.

"Engmah i hre tawh lovem ni?"doctor chuan min rawn ti a. "Eng thil nge i hriat hnuhnung ber Miss....." sawizawm rawh ti ni awm tak hian a mitko a rawn sana. Eng emaw sawi tumin ka ang zuau a, mahse engmah a ri chhuak lo. Ka hming ka theihnghilh tlat mai.

E heu! Engthil mah ka hre tawh lo nia. Eng emaw ngaihtuah tuma ka rilru ka han sen chiah chuan ka na chu a rawn zual a, ka bula an khawl dah chu a rawn ri ringin a ri rang nghala.

"Miss, thawk la la, hahdam takin awm rih rawh" tih pahin doctor chuan thawk a han la vang vang a, a tih ang chuan ka lo ti ve zela. Ka lu chhung erawh a nat hian a na vawng vawnga.

"Ti khan, engthil mah i hre tawh lovem ni?" min rawan ti leh a, a mit hnuai thim deuh ruih chuan a naupang chhe tawh lo tih a lantir a. Ka lu ka lo thing a, thil sawi pawh ka hlau zo vek tawh.

"Checkup thenkhat kan tih angai dawn a, chu mi chhung chuan lo che vak vak lo turin ka duh che a, a chhan chu i nau pai mek lai tan khan a pawi theih dawn avangin" a han ti leh lek phei chu a ngaihna ka hre tawh lo takzet.

"Naupai a?" aw khur dar dar chungin ka ti a. Tunge a pa ni ang?

"Aw ni e. I naupai hi tuanah thla 2 leh a chanve a ni mek tawh alawm. Car in i accident a, chuanin he tlangval hian hetah a rawn hruai ta che a ni. I accident hma khan vanneihthlak takin i malchungah thil dum eng emaw i lo dah hlauh a, chu chuan i pum chu vengin i naupai lai pawh a venghim ta a ni. Thil mak tak a ni" tiin nelawm takin min rawn nuih a. "Lo che lo la, lo tawng rih lo bawk la. Ka kalsan phawt ang che" tiin doctor chuan file ah eng emaw a ziak a, min chhuahsan ta a.

Naute? Naupai? Accident? Hriatna hlauh? Ka hringnun chu a van hahthlak dawn veleh

"Caleb-a ka nia" chu tlangval chuan a ti a, ka bula stool-ah chuan a rawn thu a.

"Inzawh awm lo tak chu a ni nangin ka hmelhriat i ni em ni?" ka lo ti a.

"Ni deuh reuh, ni chiah lo maithei. Thla khat liam ta khan Miami tuipuikamah kan inhmuh kha" a ti a. A sawi zawng chuan a nervous ang reng hle a, a nuihzathlak duh khawp mai.

"A nih leh min rawn hmuh lai chuan engtin nge ka awm a tunge ka bulah awm i hria em?" ka ti leh a.

"Engmah ka hre bik lo. Nangmah chauhin a ni i lo awm ni. Tunge awm ve a, tunge i hming tih pawh ka hre lo. I thusawi chiang taka ka hriat chu "Ka inthiarfihlim tawh ang e" i tih zawng kha a ni" fiamthu ti tih deuh hian a ti a, ka zak chu ka lo sen tawn tawn a. Chutiang thute ka sawi a maw?

"Ka hming pawh ka sawi tel ka ring deuh tlat" ka han ti fiama. "Ih e, engmah rilru hahna tur a awm lo a nia. Thil i hriat chhuah leh hma chu nunthar kan tan tha leh a ni mai a. I pum chhung a lo piang tur nen hian" tiin ka pum chu a rawn en a.

"Kan a!?" tiin ka mithmul ka sana. Lai angreng deuh hian a nghawng a dawm a. "E taka, i hming tur chu ngaihtuah ila a thain ka hria" tiin kan thil sawi lai chu a rawn thlak daih a.

"Chumi hma chuan hei hi pek che ka duh a. I accident hnu a ka va lak hman am chhun a nia" tiin a ipte atang thi a rawn phawrh chhuak a. A simple viau nangin a nalh khawp mai.

Mittui shape niin chu chu lunghluin a huala. Chumi inkarah chuan vur tla lai ni awm tak lem sapphire a siam a awm bawka. "A van mawi ve" tiin ka va khawih a.

"I hming atan chuan Diamond ti ila" hre tha inti deuh hian Caleb-a chuan a rawn ti a.

"Aih" ka lo ti vata. A nalh lem lo emai.

"A nih leh Sapphire ti ila?" a rawn ti leha. Kan ngaihtuah a, a tha dawn riauin ka hria. Ka duh a ni tih lantir nan ka va nuih saka.

"A nih engtin nge kan phuah chhunzawm ang?" a ti leha.

"Kingsley kan ti mai dawn em ni?" ka bula an chanchinbu dahah chuan Simon Kingsley tih hi a lo chuang kalh a, chu chu a nalh riauin ka hria.

"Tha lutuk. I hming kan phuah zo der mai" tiin Caleb-a chu a nui ver ver a.

"Sapphire Kingsley" tiin ka phun sapa. Chu hming chuan eng hringnun nge min hmachhawn tir dawn tih chu a dawt leha thil thleng leh tur a ni ta.

*IAN'S P.O.V*

Ka office-ah thuin lehkha pawimawh ka khawih a, chutih lai chuan Lucy a rawn lut a. Mr. Brown-a (Alison-i pa) a leh mipa pakhat leh ka pa min hmu tura an rawn kal thu min rawn hrilh a. Ka lo meng a huih a. Eng nge hetah an rawn tih dawn?

"Lo luh tir rawn" ka ti a, ka file khawih lai pawh chu ka khup nghala.

Kawngka a rawn inhawng a. Ka pa a rawn lut a, Mr. Brown a'n a rawn zui a, a hnungah mipa pakhat, sang palian zet mai, kum 40 bawr vel suit ha a rawn lut tel ve bawka.

"Ka pa, Mr Brown" ka thutna atanga dingin ka hma a thutna awlah chuan thu turin ka ka kut ka lo phar chhuak a. Alison-i thihna avangin Mr. Brown-a chu a la pawr fuap a.

"Hei hi Alex James, detective(hnuchhui thin) a nih hi" tiin ka pa chuan Alex-a chu min inhmelhriat tir a. Ka lo bu nghat a, ani pawh chu a lo bu ve a.

"Alison-i accident chungchangah khan eng emaw sawi duh a nei a" Mr. Brown-a chuan tawng harsa ti tak chungin a rawn ti a.

"Miss Alison-i kha accident avanga thi a ni hleinem. Thah a ni zawk e" Alex-a chuan a rawn ti zawm nghala. Ka hma a thute pahnih chuan an hre lawk vek tawh a, ka mak ti hmel erawh turu tak a nih ka ring.

"Alison-i kha thah maw a nih?"

END OF SEASON -1