THE CHRISTMAS BLANKET (Chapter -1)

 

🎄 THE CHRISTMAS BLANKET 🎄

Chapter - 1

🎵 I'll be home for Christmas - Cody Johnson🎵

Burlington Airport atanga ka rental car (man chawi a Car hawh theih) hman chuan zawimuangin kan in leh ka chhungte awmna Vermont lam panin ka inkhalh a. Ka car tape atanga Christmas zai in play ri riai riai chuan lung a tilengin thlasik khawvawt vur mai chuan kan in a meilum ai hlan min ti nghakhlel tawh hle a, mahse vur tlain kawng a tih nal em avangin lungleng a thil dang han ngaihtuah chiam hman pawh ka ni chiah lo.

“Ui lehh…!!” Car tawlh phut chu ka dang thei hram. Nghet takin a steering ka chelh a, ka thaw hak a, a hma aia ka tlan muan leh deuh a ngai. A tlanchak zawng tehna chuan 20 a kawk chang chang a, vur sur laia Vermount pan tur chuan hetiang a tawlh del del hi a ngai reng a ni. 

Steering ka hum ngheh lutuk nalamah ka kut changte chu a var pup a, thaw dep dep a awm chung chuan kawng a thui duh dawn ngei mai. Ni tlak hma a in thlen fel ka tum tehreng nen; khua lah chu a thim telh telh a, mahse Vermount a kan inah ka nu leh pa ten min lo nghak reng a ni tih hriatna chuan chakna min la pe ve zel a, mahse ka kalkawng erawh a ngaihawm loh teh ang chu.

Hahdam tak leh tang tung lutuk a awm lo turin thawk kan han la tha leh a, Christmas hla rawn in play leh chuan kan khuaah kum 4 zet ka haw tawh lo tih min hriatchhuah nawn tir leh a. Christmas boruak nuam zet mai ka hriat lohna a lo rei ta hle mai.

Ka nu leh pa te’n a Christmas tree an siam, thutna pindan sir a an hun thinte chu mithlain a hmu uar uar a, ka laizawnnu in in a chei laite, phur taka kan naupan laia christmas tree kan chei laite, ka nu pumpkin pie siam pawh a rim ka hre thei hialin ka hria. Ka pi chhang kan rim leh ka pa arsa rawh rimte pawh.

Ka pum rawn ri ruk ruk chuan min ti nui a, tunah vur sur karah la inkhalh ve beuh beuh mah ila rei loteah in ka thleng thuai dawn tih ka hriatna chuan min ti hlim a ni.

Thil dang vangin ka pum chu a rawn che leh lawih a, chu erawh ka riltamna vang a ni lo. Tun midangin nge min lo hmuak ang tih ka ngaihtuah vang a ni. Ani chuan ka haw dawn tih pawh a hre kher lovang a, a hmuh pawh min hmu chak kher lovang. Mahse khua ah chuan a awm ve ngei awm si a.

Vei lama thingtlang kawng lamah chuan pengin chu tatang chuan kan awmna tak Lake Wellhaven chu mel tam tak a ni tawh lo. Khang kum 4 chhung kha amah lak atanga inlak hran ka duh avangin vawikhatmah ka haw lo. A mitmeng mawi takte kha theihnghilh thei thin lo mah ila hriat tawh loh ka duh a ni.

Chutia ngaihtuahna vir kual vel paha ka inkhalh bek bek lai chuan ka car chu a buk ta lawih mai. Vurin kawng a khuh var vo avangin kawng khuar a awm a ni tih reng ka lo hre lo. Khua a tlai zel a, ni pawh a tla fel titih ta der mai. Khua a vawt zual sauh a, vur tharlam chuan kawng a ti nal sauh ni mai hian a hriat a.

Steering nghet takin ka chelh a, tawlh tlang palh hlau tak chungin ka car chu tlanchhuah tir hram ka han tum a, mahse awmzia a nei lo hlemai. Car hawh ve ro ro ah tlem a a lian deuh, vur kara tlan thei deuh tur, a tire thap deuh thlan chhuah nachang ka lo hre lo chu mawl ka inti hnuhnawh hlemai. Mahse hetiangin vur a sur dawn tih hrebik hek lo le. 

Theitawp a kan tan pawh chuan vur leh lei a per chuai chuai tih loh chu a motor lamin chhuah a tum der lo. “A tehhrep chuan le !” tih pah chuan na takin steering chu ka chum ri dup a.

Seat hnung chu ka ngheng a, ka hah leh hlauhthawn avanga ka thaw hlawp hlawp chu tihreh ka duh. Vur tla lah chu a chhah telh telh a, thli lah a na telh telh mai si. Car atanga chhuaha, rang taka ka motor tang tlan chhuah tir theihna tur ka ngaihtuah a ngai. A nih loh chuan reiloteah buaina lian zawkin min rawn nang thuai dawn.

Ka phonel signal ka check a, engmah a awm lo. Hetiang kawng rehah hi chuan a awm ngai lo tih chu chiang sa anih avangin ka pa call chu beisei bo mai a ni. Mahse thing tum emaw zawng ila, a tire hrul vela ka dah chuan ka tlanchhuak thei mai ang. Chuti chuan minute reiloteah kan in ka thleng thei tawh mai dawn a ni.

Ka coat ka kilh pum a, kutkawr leh beng tih lumna ka vuah bawka. A tawp nan thawk kan la vang vang a, i thei tur a ni ti a inhrilh chungin car atang chuan ka chhuak a.

Pawn kan chhuak chiah mai chu Car chhung nen chuan a boruak in anglo tak hi a ni ringawt. Eng ang pawhin in ha chhahin intuam phui mah ila vur sur karah chuan engmah lo mai a ni. Hetiangin a sur dawn tih hre lo ta chu ka boot lum ka lo keng tellote kha ka inchhir vawng vawng mai. 

Ka motor ke tanna lai ka va enna lamah ringawt pawh ka khur chhe zo tawh a, vur lah chuan a lo chhilh pil lo chauh tawh lehnghal. Thil kal dan hi a tha dawn lo tawp mai.

Ka phone flashligh ti engin ka piah a thingbung chu ka la a, ka motor ke tanna laia zuk kam tumin vur chu kan hai a, ka vawikhat haiah ka pheikhawk ka vur hlup a, a vawihnihnaah phei chuan ka kerek a rawn khuh tawh. Mahse tihdan dang a awm tawh chuang lo. Chubakah hetiang khawvawt hnuaiah hi chuan pawna rei tak awm hi a him lo lehnghal.

Thawk ka la a, vur chu theihpatawp hai a; thingtum a zuk kam tur chuan tan ka la leh ta, hai ka tum leh lai tak chuan  ka hnunglam atang ring taka min rawn au thawm ka hria a.

“Hey…! I tha em?”

Aw chu thli chuan a chhem kawi a, chiang tak pawhin ka hre thei lo. Min pui thei an awm tak mialin tiin ka hawi let a, hetiang khawkar kawnga tanpuitu tawn hi vanneihna tawpkhawk a ni.

Ka ban chu sang takah ka vai a “Puih ka ngai e. Ka motor a tanga” ka ti vak a.

Min rawn chhanchhuaktu tur; ka lam pana rawn phei chhat chhat chu a ruangam ka hmu thei ruai ruai. Khawvelah hian ka van han lawm ber tak em. Tunah chuan thing min kam puitu tur emaw, min namchhuah puitu tur emaw ka hmu ta. Ka zinkawng ka chhunzawm leh thuai thei dawn e. A nih loh pawhin motor lian tak a nei anga, min hnuhchhuah sak thei maithei asin.

Ka lawm lutuk chu a rawn thlen hma atang tawh chuan ka lo khi vur vur tawh. “Hetiang car hi chu vur kara tlan thei tur a siam a ni lo a nih dawn hi” tiin fiamthu nen ka lo phul hlut a.

Mahse reiloteah ka light chuan a hmel a chhun pha ta a, ka fiamthu nuihza chuan min daih reilo kher mai. A chhan chu chu pa chu min chhanchhuaktu tur ringawt a ni lo, ka pasal hlui a ni tlat mai. Thil thleng theilo tur a thleng a ni.

Minute 10 vel lek  vanduaina ka tawha leiah engtin nge kum 4 tehmeuh ka hmuh tawh loh ka pasal hlui nen kan intawn leh nawlh theih zawk le? Ka hmaa ding chu ka pasal hlui River Jensen-a a ni tih ka chiang lutuk tlat.

Mipa tam tak awmkhawm zingah pawh ani kher hi chu ka hre nalh ang.

A biang ki, kual ralh te chu ka hre em em a, a chhan chu hmul neih chhup a duh ngai loh avangin. An high school kal laia an inkhelh naah a hnar ruh a tih tliah tawh avanga a hnar ngul kual ta deuhte chu ka hre em em a, a taksa pian dan zawng zawng, a kawng, a malpui, a dar pharh dan, a englai mah chu ka hai lo. A lukhum khum hnuaia a sam rawng uk, buk kharh mai awmdan tur zawng zawng thlengin ka hre thei. 

A mitmeng te chu ka la theihnghilh lo reng reng.

Mak ti takin ka ding khawng reng a, hetiang ang dinhmunah ka pasal hlui leh kum li lai kan khua ka chhuahsan chhan nena kan han intawng leh chu a ngaihna ka hrelo a ni. Chuta karah ka car tang leh a puihna ka mamawhna zawng zawng nen.

“Nang elaw…!?” min rawn tih takah chuan rubber a perh harh zawk ang mai hian ka harh zawk a.

Pangai deuh a dinga, ka hmel siam rem pah chung chuan ka kut ka kuangkuah a. “Nang zawk elaw…!” ka ti let a.

River-a chuan ka hmel awm dan vel chu engmah a ngaihsak lo tih hriat tak hian a kutkawr lian tak chu a beng khu sulh a “Vur thlipui tleh karah enga tinge hetiang ang Car te i khal a Eliza ?”

Aw hniam thum chhar maia ka hming a han lam ri chu ka khur chhuak chuai a. Chu aw; ka hriat than tak leh ka hriat bel em em mai chu ka hriat tak ngai lohna a rei ta hlemai.

“Tun ang vur thli karah khawia kal nge i tum reng reng a? Chhuah hun pawh a nih loh hi” min rawn ti leh a

“Engtin aa !?” tih pahin ka awm ka dawm a. “Khati khan min lo ti vak suh. Helai em ka rawn thleng tawh a”

“A va awihawm loh zawk ve”

Ka inti pawr lui ve deuh a. “Airport atangin ka rawn inkhalh phei a. I hrethiam em? Ka tum danah chuan ni tlak hma a in thlen a nia. Mahse hei ka inchhut fuh ta lo deuh a nih hi” tiin ka lu ka thing a. “I la inthlak danglam lo hlemai”

Ka awmdan vel chu ngaipawimawh hmel a pu lo. Ka car tan dan vel chu a enfiah a. “I thlawhna ticket i book hmain khawchin thlirna i en theihnghilh bawk a nih chu” min ti duh lek fang a.

“En lo reng e” pawr lek lek hian ka han ti a. “Hetiang ang vur sur mai maiah te hi chuan mahni in kawngte chu kan bel ve alawm. Helai a seilian ka ni tih hi i hre tawh lo a ni mahna”

Min rawn melh zauh danah eng emaw sawi a tum tih ka hria, mahse chhetein a lu a thing a “ Vur thli tleh leh vur sur a inang hleinem” a ti sap a.

Chutia a han sawi takah chuan thli chu a vawt zual ta riau hian ka hria a, vur thli na tak chuan thingkungte chu a chhem ri sung sung a, ka hmai a thip rum a, ka mittui a rawn tla a.

“Pawn a awm rengna chi a ni lo. Ti rawh, inchhung lum lamah i kal ang” tih pah chuan River-a chu a rawn kalna lama let leh a tum a. A bula va tel ve chu ka duh ngawt bik nang. Ka dinna ngaiah ka ding nghet tlat a.

“I ti lawmawm. Mahse ka duh lo mai ange”

 “Ka duh lo mai ange aa!!? ” tih pahin ka lam hawiin a rawn inher a.

“A kamna tur thing bung ka lak belh anga, ka tlan chhuak thei mai ang” tihpahin thingbung dang ka melh nghal a. “Min puih i duhnaah ka lawm viau nangin keimah avang chuan khawtlai phah duh suh. I kalna tur lamah kal tawh rawh”

A nui suk a, a nui ri chuan min ti hrilhhai lek lek.

“Khatiang thingbung te lutuk khan engmah awmzia a nei lovang” a rawn ti a

“A hma pawn hetiangte hi chu ka ti fo alawm le aa…!” tiin ka tang lui ve tlat a,mahse awmzia a awm loh zia tur erawh ka hria. Ka thil tih lai chu tawpin mahni inringtawk hmel tak anga lang chungin a lam ka hawi a.

“A theih changte chu a awm maithei e. Mahse a ke chanve hmawk a pil a, khati kha chuan engtin mah i in lachhuak lovang.  I thing hmuh chhun lah a huhin a nal vek bawk si. Hmantlak a awm lo”

Ka thing lak ve chhun chu ka va melh zeuh a, a thusawi a dik a ni tih pawm chu tlawmah ka la ve bawk si, mahse tihngaihna dang a awm chuang bawk si lo.

Thli chu na tak hian vawikhat a rawn tleh leh huk a, ka vawt ti khur nasa tawh lutuk chu minute khat dang pawh pawn khawvawtah ka din theih ka inring tawh lo. Ka ke a chhah mup tawh a, ka kut pawh a khawng vek tawh. Thli avangin ka mit a thip thum a, boruak lum a ka awm vat loh chuan ka hnarte chu a khawng zo mai ang tih a hlauhawm zawk.

A bula kal ve mai chu ka thlan theih awmchhun a ni. Mahse ka lu ka la thing hram. “Tihdan dang ka ngaihtuah mai ang” tih pahin ka car ke tanna khuar lam chu ka pan leh ngat a, ka thing tum chhar khawm chu ka rem tha sauh sauh a, ka kut hit mu chum chum leh ka ke khawng lek lek pawh chu engahmah ka ngailo lui tlat a. River-a chuan min kian san mai ka rin teh nen beidawng hmel zet hian a thaw khu hlat a, min rawn kal pelin ka car kawngkhar chu a pawt hawng a.

“Hey!” ka suitcase a lak chhuah mek lai chuan ring takin ka au a, ka bag dangte chu a kokiah a pu nawlh a. “Ka thil kha dah let rawh”

Ka thusawi chu engah mah a ngai lo. Vur chunga a ke thla lang kulh kulh chung chuan a rawn kalna lam chu a pan nghauh nghauh a.

Ka hau chungin ka ding reng a, ka car ka en a, ka suitcase pu chung a a kal nghauh nghauh lai chu ka en leh a, chutiang chuan vawi sawm dawn ka en tawn ang. Vur lah chu a tam tual tual a, thli lah a ri vuk vuk tawh a, luhlul in awmzia a nei tawh lo. Thlan tur dang reng ka nei tawh lo.

Ka thinrim chu ka rum a; ring takin ka au chhuak a, mahse thli tleh ri avang chuan engmah a hre pha lovang. Car chu ka hawng a, ka purse ka la a, lung nilo tak chungin ka bungrua kenga kal mek pa chu ka zui ta nghut nghut a.

Boruak lumah ka awm anga, ka inti lum anga, ka pa ka phone ang.

 Kawngtluanin kan in be lo. Ngawi rengin a hnungah ka zui chhat chhat a, rei lutuk lovah a awmna cabin chu kan thleng ta. Kawngka kan thleng chu ka khawng lohna chauhin min dal tawh ang tih tur khawpin vawtin min hmet a. Inchhung kan han luta, boruak lum hiamin min lo ur ham ham nuam lutuk chu au chhuah vak mai te ka chak.

Ka sir ah ui a bawk tih reng reng ka hre lo. Min hnim thut thut a, min rawn liak ta mai. Ka phu nasa lutuk.

“A tawk a tawk Moose. Bawk rawh” a pu ina zawitea a han ti chu thu a awih ngang mai. Min barakhaihtu ber erawh a hming ka han hria chu a ni.

“Moose maw i hming?” tiin ui chu ka en a, chutah River-a lam hawi leh in “Kan Moose-a kha maw?” ka han ti a.

River-a chu chhetein a kiai suk a, engtinmaha min chhang lo chuan ka suitcase chu chhuatah a nghata.

Moose-a chuan a hming ka lam rik a hriat chuan ka hriat than tak a rawl chik ngher ngher chu a rawn chhuah a, a mei a then lauh lauh bawk a. A vutbuak rawng a ni a, a hnar bula ser awm, ramhnuaia kan chhar tum a a lo inhliamna te pawh a ngai te tein a la awm. 

“Awihaa..! Nangmah lek elaw lo ni a!?” Chhuatah ka thingthi a ka kuah a, a lianin a rit tawh hle a. Ka hmaiah chik nghur nghur chungin a rawn liak hluau hluau a, hlim avangin ka nui awr awr a.

“Phatsantu” tiin River-a chu zawitein; tuma hriat tham lovin a phun sep a.

“I lo la vulh reng hi a mak hle mai a” tiin ka chul mawlh mawlh a, rimtui viau lo mahse ka lunglenna rawn chhuak thar leh avang chuan ka pawmzam vek thei. He ui hi ka hmu leh ang tih reng ka ring phak ngai lo. Tunah ka kuah phakah a han awm leh ta chu a nia. Engtin nge ka lo kalsan theih zawk le?

“Ka pet chhuah ngawt bik i ring em ni?” tiin River-a chuan min rawn chhang let a. Eng emaw hi sawite hian a sawi belh sap a, mahse ka hre pha lo.

“Ring bik lo ve” aw nem takin ka ti a, ka thawh chhuah hmain  Moose-a chu a lu ah vawikhat kan chul leh thuak a.  Chu ui chu kum 11 bawr vel a ni tawh hial ang. Kan chhar lai khan a kum zat tur awmang kha kan hre mai thei lova. “Dam taka ka han hmu leh thei hi a mak em a, chu zawng chu a ni e” ka ti a.

“Chu vawiin chu thil mak hlir i tawng tihna a ni maw?”

Moose-a hlim leh phur lutuk chuan min tiphur a, mei chhemna bulah River-a chuan a boot a vur kai te a lo khawngthla ve mek bawk a. A lukhum leh kutkawr a hlip a, jeans dum leh kawr sei lam a ha a, mawza inkhing lo a bun bawk a. Eng thil mah chu a la inthlak danglam lo.

Ka kalsan lai ai kha chuan a lo upa ve deuh tawh a, chu pawh han sawi luam tham a ni hran lo. Tunah chuan a cabin chhungah, boruak lum nuam tak hnuaiah kan awm tawh a, mei eng atang chuan a hmel tlem a tla deuh bawih chu ka han hmu thei a. A hma a lubuk tak thin kha tawi tein a lo tan tawh a. A hma ai zawngin a ban bul a lian a,a awmbawr pawh. Infiam thang a nih avangin a pian chu mipa dik tak pian a ni a, tu emaw tan chuan thlir vawng vawng tham a ni.

Chutia ding meuh a ka thlir reng lai chuan ani erawh ka awm ve tih pawh hrelo ang maiin a awm a, choka a luh dawn a min rawn en zeuh tih loh chu vawikhatmah min melh lo.

In lian tak ni lo mahse thil engkim chu a awm chikim ve hle a, inchhungah chuan kawngka pakhat chauh a awm a, chu chu bathroom kawngkhar a nih ka ring. Choka lian vaklo bulah chuan dawhkan pakhat leh thir chair a awm a, a kil lehlamah khum lian ve tha tawk tak pakhat a awm leh tawp a, thutna lam pangah a pa hman hlui ni ngei a ka hriat thutthleng pakhat a inhung bawk a, meichhemna sirah lehkhabu chhuar a inrem bawk a.

Ka hrawk then kharh pahin ka nghawngawrh ka la thla a, ka kawrchung nen chuan ka khai tha a “Englo…, min puihna avanga lawmthu sawi tur chu ka ni meuh a, mahse i in a lut tura min nawr luih ang ai chuan min la pui tlem khawpin ka hria…”

“Khawvawtin a a hmeh hlum tur che lak a ta ka chhanchhuak che a nih kha” tih pahin a thil tih lai chu a ti mawlh mawlh a. “I lawmthu sawina chu ka pawm sak a che”

Ka meng rang ralh a. A theih anga ranga helai hmun chhuahsan vat hi ka tan a tha berin ka hria.

“Helai kawng reh lutukah hian signal awm tha chu ni se ka pa ka phone mai tur a nia” tih pahin ka ipte atang ka phone chu ka phawrh chhuak a. “I WIFI password min hrilh la kan text ang e, chuan tih dan a awm mai ang”

“WIFI ka nei lo”

Mak ti zetin ka phone chu ka la sawn a, chu chu ka beisei awm chhun a ni asin. “Ka nei lo aa…!?”

“Ka sawi i hriat reng kha Savate” tih pahin a beer in lai chu an sip zeuh a, a tih ngai bawk chu a ti leh char char a. Chu chu min koh duatna thin a ni, mahse tunah chuan a thawk vak rih lo. “WIFI a awm lo”

“WIFI a awm lo i tih chu eng tihna nge ni ngai?”

“Ka nei lo tihna a ni mai”

“A va han hahthlak tak” ka thaw halh a.

“Ka nei miau si lo va” muang ban charh hian a rawn ti leh a. “Ka mamawh lem loh neih kha a tulna a awm hleinem”

“Khawvel thil engkim in hriat tawnna a nia chu chu i mamawh ve lova maw !?” tiin ka lu ka thing a, mahse min rawn chhan let hmain ka ban ka phar vat a “A enga pawh chu nise i phone min lo hman tir mai teh”

“Chu pawh chu ka nei chuang lo”

 

“Eng a…!!?” mak ti ka hau chungin River-a chu ka en reng ringawt a, ka nuih te lam lam a za tawh zawk.

River-a chuan nui suk pahin a beer no chu ka lamah a rawn lek zauh a. “Internet awm lo. Phone pawh awm lo”

Mak hi ka ti nawn awn awn a ni ber. “A ni maw…? A nih chuan engtin nge i khawsak? Hna i thawk ngai love’m ni? Midangte i kawmin i be ngai love’m ni?”

River-a chuan a dar a chhin ak a. “Hnate chu thawk e. Mahse phone leh internet ka mamawh phah chuang hleinem. Mite chuan min mamawh a nih chuan ka awmna an hria alawm”

Ka hnar ka tuai zeuh a; ka thaw haka. Kan inhnialna ber kher chu dawhtheih a ngai dawn hlemai. “A tha e” ka ha chang ka thial bap a. “A nih chuan khawngaihin ka nu leh pate bul thleng min thlah thei angem?”

“Thei rih lovang”

Chutah zet chuan ka kawchhung a hnawhtu lian tak awm chu ring takin ka rak chhuahpui a. “I sualin i va han ngawhngawl em em ve maw le. Kan inthleng chu min thlah mai la tichuan Christmas a rawn thlen hma ngeiin he kan awmdan mangchhia ang maia ninawm hi a tawp mai dawn alawm mawle…!”

“Dik taka sawi chuan maw Eliza. Helai a awm i duh loh ang zet hian kei pawhin helai hmun a i awm hi ka duh bik hleinem” a rawl thum leh hniam zet mai chuan ka awm a rawn nghawr dawt a. A mitmeng hmuhnawm loh zet chuan min melh run a, thir bottle hum keh nghal rawp thei tur khawpin a kut a hum ruh a. “Mahse pawn lamah vur thlipui a tleh mek si a, i duh duh angin khaw awmdan a inthlak ngawt thei si lova. Tun ang boruakah khawiahmah ka inkhalh chhuak thei lo, nang pawn i thei lo. I pa pawn a thei hek lo. Chu chu thil awm dan dik tak a ni e” tih pahin a kut chung lamah a phar chhuak a. “I duh ang taka thil a kal lo erawh pawi ka ti hlemai. I hringnun zawng zawng hnutchhiah a i kal bo ta daih ang mai kha a ni e”

Pawn lamah chuan thli a thaw ri vuk vuk a, kan awmna cabin chu thing hmang a sak a nih avangin thli na lutuk chuan inchung chu a chhem ri tek tek reng a. Meichhemna bulah chuan lung ni lo fahran hian ka ding reng a. “Helai hmunah hian ka tang tihna a ni maw?” tih pahin ka kawng ka dawm a, “Chu pawh nang nen kher”

“Vur thli hi a reh fel hma loh chu pawn lama chhuah a him si lo a ni. I car tang te pawh tha takin kan la chhuak anga, kein mel 10 chuang a thuiah i haw peih te a nih ngawt loh chuan” tih pahin beer um dang chu a hawng leh a.

A sawi zawh rual rual chuan ka lu ka thing a, engtin nge hetiang thil hi ka nunah hian a thlen theih zawk le? Kan inthenna lehkha kan sign fel atang hian River-a hi tum khatmah ka hmu leh tawh lo a, kan thutiam kha thleng nawn leh tawh ngai lo turin Wellhaven kha ka chhuahsan a ni si a.

Ka thaw halh a, Moose-a chu ka en a. Ani tan erawh a hlim ni ber ni awm reng hian a mei a then lauh lauh reng a. Bathroom kawngkhar ni a ka rin lamah chuan ka lut phei a, lian lo te in bathroom a lo inrem fel thlap a, plastic no ah River-a toothbrush leh toothpaste a in hung a, a lian lo nangin a fai hle thung.

Ka hmai ka phih a, ka ha ka nawt bawk a. Ka thawmhnaw hak lai chu thlakin sweatpants leh oversized sweater ka ha a, wool mawza lum ka bun bawka. Zan khat tal chu ka riah ve ngei a ngai dawn tak si ah chuan ka chhuah hmain darthlalangah uluk takin ka in en a, rilru nuam lo tungin mei chhemna lam chu ka pan phei leh a.