THE CHRISTMAS BLANKET (Chapter -5)

 THE CHRISTMAS BLANKET

Chapter -5

Ka ruahmanna siam ka hria a, chu chuan khawiah nge ka nun  a hruai tih pawh ka hria. Vur thli tleh khan ka nun kal lai erawh a sawi nghing chiang hlemai. Khang kum liam ta chhung khan thil tam tak ka tawng a, thil pakhat ka hriatchian em em chu Christmas boruak a rawn thawt a, christmas rim a nam tawh hi chuan kan in ngei a meilum aia, pumpkin pie ka nu siam ngei ei ka chak thin. 

New Zealand atanga ka rawn chhuah hma pawhin ka thawhpuite hnenah in ka thlen huna ka awm dan turte phur takin ka hrilh a, thlawhnaa ka chuan lai pawhin pumpkin pie ka ngaihtuah chhuak a nih chuan ka ril a tam nghal rawih rawih thei thin. Ka nu in a pumkin pie a siamna hmun ngei chu ka tan chuan ka in dik tak a ni tiin ka ngaihtuah fo thin.

Chu pie ngei chu tunah ka hmaah; ka inah ngei a inchhawp a, tumdang ni se tui ka tih a kah lim dawn tehlul nawn. Ka fork ken lai chuan ka hawlh ka hawlh a, ka ei hleithei tlat lo. A hmel a dik em em a, a rim lah chu hmun hla tak atang pawha ka ngaih veng veng thin ang ngei kha a ni. Mahse fiankhat takngial pawh ka ka ah a lut thei lo.

Hetiang ang em a ka awm hi ka hre ngailo asin le !

Ka pentawng lu nat deuh vang a ni ange ti tein chhuanlam ka han zawng a, pentawng damdawi River a’n min pek te chu kan mamawhpuh dawn ngial a, mahse hei erawh ka chiang si. Ka taksa lam chu ka tha e. Ka rilru leh ka ngaihtuahna lam zawk a damlo a ni thei mai angem?

Ka chhungte surprise tura haw ka nih ang ngeiin kawngka kan kik chu mak an ti in an phur hle a, kan inhmuh loh rei tawh em avangin ka nu leh pa phei chu an tap hian a. Min kuah a, min fawp a. Ka pi pawhin ka bianga min piai pahin min ngaih zia thu a sawi a, chutiang bawkin ka laizawnnu pawh. Christmas hla a in play rat rat a, ka chaw duh zawng hlir min siam sak a, inchhung a lum nuam em em a, ka chhungkua, ka hmangaihte hlir an awm bawk.

Chu tluka hmun nuam leh hahdamthlak ka tan a awm thei lovang.

“A chanve tal kha i ei loh chuan ka nuin nuam a ti dawn lo a nia aw” ka laizawn Beth-i chuan a thutna atangin min rawn ti a. Ka nu leh ka pa bakah ka pi chu choka lamah an la tul hle a, Kei leh Beth-i leh a pasal Robert-a chu thutkhawmna pindan lamah Christhmas tree hmazawn tak sofa ah kan thu ho thunga.

“A vai a ei zawh vek te chu ka duh alawm” tiin ka fork hmawr a tlem khai chu kan fawp fai a. “Ka pum lam zawk hi ala inpeih chiah lo a ni maithei a ni”

Beth-i chuan a pie eina plate ruak chu a sir lamah a dah a, a dul puar luah dawm chung chuan ka lam panin a rawn tho tual tual a. A dul chhungah chuan ka vahpa tur a pai mek a, mahse a rai thu pawh engmah min hrilh lo. Chutiang bawkin kum kalta a ka nu in zai a tawh chungchangte, ka pa in kum hnih liam ta a kan sakawr pahnih a hralh tak thute pawh engmah ka hre lo.

Kan inah ka chhungkuate nen chengho mah ila ka duhna lamah ka chhuaka, ka nuam tih leh chak zawk tiin ka buaia, helai hmunah hian eng thil nge thleng tih erawh engmah ka hre ve ta lo a ni. Chu ngaihtuahna chuan min ti mikhual lek lek a.

“I sawi tur neihte chu ka bulah i sawi dawn nge ti khan i eitur kha i chawk i chawk kual dawn?” Beth i’n min rawn tih chuan ka thaw hak a, ka fork chu plate ah chuan ka dah a. “Han sawi leh chuan tur pawh ka hre tawh lo. Thil thlen dan chu ka hri;h vek tawh che kha” ka ti a.

“Sawi tawh e. Mahse ni hnih chhung ngawt i pasal hlui cabin a i awm ve chhung khan eng ang ngaihtuahna tak nge i neih tih i la sawi hleinem” tih pahin choka lam a va melh zauh a, “In mu dun em tihte pawh” tiin zawitein a sawi zawm a.

Ka laizawnnu nen hi chuan kan lan danah hrim pawh kan inanglo hle a. Ka sam a dum a, a ngil viau laiin a ni erawh a sam buang kharh mai chu a kir bem a, a mitmu a pawl a, kei erawh a dum a. Kan hnar awmdan a in anga, kan nuih dan pawh. Kan thisen zama kal kan thisen pawh. Mahse ka chhungril a ka hlim loh dan a rawn hre thei erawh ka haw lek lek.

Thawk halh pahin ka pie ken lai chu ka en a. “Enga tinge tumah hian engmah hi min rawn hrilh ve ngai loh le?” ka ti a.

Beth-i chu a ngawi reng a, ka han hmelh chho a, pitar a hriatrengna bo tawh tur lainat deuha i thlir ang mai hian min thlir reng a. Chu mitmeng chu ka hua a ni.

“Ka nu lahin zai a tawh thu min hrilh lova, ka pa pawhin sakawr chungchang engmah min hrilh ve lova, i rai thu pawh min rawn hrilh l\ve lova” tih pahin a dul chu ka kawk a, ka kut pahniha ka mal ben rik thek pahin “Tuman River-a nu leh pate chanchin min rawn hrilh bawk si lo” tih pahin ka lu ka thing a.

“Chu tak chuan eng nge kan lak atangin i beisei Eliza?” a ngawih vang vang hnuah Beth-i chu a raw tawng chhuak a. “River-a chungchang engmah i ngaithla duh lova, i kal bo hnu atanga kumkhat a ral thleng khan a chungchang ka sawi apiangin sawi tawh lo tur leh i ngaihthlak duh loh thu i sawi thin a nih kha”

“Nia, chungte chu ka hria alawm” ka lo ti vata. “Mahse an thih thute chu thil dang daih alawm a nih”

“Chu pawh nise engtin nge i ngaihthlak duh zawng leh i ngaihthlak duh loh zawng ka hriat ang? Engtin nge i bula ka sawi tur leh ka sawi loh tur ka hriat bik ang?” tiin min hnial let a.

Kan pahnih chuan rilru hah hmel zetin kan thaw hak a, kan hma zawna tree inhung chu kan en reng a.

“He khua i chhuahsan khan he khua chanchin reng reng hre duh tawh miah lo ang mai khan i chhuak a. Chutianga i awm lohna tur chuan vawi tam dan che ka tum a, eng nge i mamawh ber tih hi vawi tam hriattir che ka tum thin asin”

Eng nge ka mamawh ber chu? Zawitein ka nui hak a. Enga tinge tupawh mai hian keimah lam ngaihtuah lo lek hian eng nge ka mamawh ber tih hi an lo ngaihtuah thin le

Ka pie chu dawhkan te ah chuan dahin ka bawp ka khawkherh a, ka kut ka kuangkuah a “Sangha khawmual a inperhchhuak ang mai niin ka inhria. Ka seilenna khua ngeiah ka rawn let leh a, thil engkim ala ngai vek a, thil pakhat tih loh chu.  River-a nu leh pa te an awm tawh lova, Beth…an thi tawh. Vawikhat tal mangtha pawh ka ti lova, ka tana an hlut thin zia pawh ka hrilh hman lo asin. Ka-...” ka tap tur chu dan hram hram ka tum a. “A hun harsat ber lai pawhin River-a bulah ka awm lova. A chaklohna laia pui turte, ngaithla turte, a nu leh a pa an vui laia a kut lo vuan tur pawhin ka awm lo. Chung zawng zawng chu amah chauhin, mal takin a paltlang chu a ni si a”

Beth-i chuan min rawn thut hnaih a, a kut dang bel chuan ka kut a rawn vuan a.

“A hre lawk vek a ni” ka ti sap a. “A pa kha thih ngamin a damlo a ni tih a hria a, a kal thuai dawn tih pawh a hria. Mahse engmah min hrilh lo”

“A hrilh lo reng ang che chu”  Beth-i chuan chang deuh fak hian min ti a. “A hmangaih che a, i hlimna tur a duh a, chuti chung chung chuan helai hmunah hian i hlim theih loh thu i hrilh a. I hlim lohna hmunah chuan engah nge a awm tir reng ang che?”

“Chutia sawi te chuan ho te angin a lang reng alawm” tiin ka chhang let a. “Harsa reng rengin a kum chung kan awm a. Chu avang chuan ani pawh nasa takin a thawk reng a, han hahdam chang emaw chawlh chang emaw, kartawp chawlh takngial pawh a nei ngai hleinem. Kei pawh dawrlianah ka thawk a, kan pahnihin kartluanin hna kan thawk a, a chang phei chuan inluah man leh ei in man thawkchhuak turin zan thlengte kan thawk thin asin” tih pahin ka lu ka thing a. “Chutiang chu nun dan tur a ni ngailo Beth. A tu a ve ve mah khan nun hi kan chen lo”

“Kei pawn ka hria alawm” tih pahin a dul a chul a, Robert-a a ngaihtuah chhuak tih ka hre mai. A tana a thawh nasat ziate, an in enkawl tura amah ngei pawh a thawh nasat ziate.    “I tan chuan chu chu hringnun kak phung tur a ni lo pawh a ni maithei e. Mahse mi thenkhat tan chuan hnathawh tur kan neih chuan chu chu a tawk em em thin. I hria em chu ka hre lo. Kei leh Robert-a pawh hian mi neih ang thil tha engmah kan nei bik lo. Vacation nuam tak pawh kan hmang ngai bik lo. Mahse ni a tla a, inah kan han haw a. Kan pahnihin kan movie duh zawng kan en dun a, a nih loh pawhin dil kamah ni tla turte kan thlir liam dun a, a changin khaw pawnahte kan han tlan dun a” tiin a dar a chhin a, a hmel a hlim nui hmel a rawn langa. “A chang chuan hun harsa i tawh lai leh in harsatna lai ngawr ngawr i thlir thin a, i lawmna lai tur thil chu a tam lo pawh a ni thei, chu thil chu thlir ve thin ta che. Hmangaih taka kuahtu i neite, nuihpui tur  i neih te” tih pahin a dul a chul leh a. “Nangmah avanga hringnun thar rawn zawh ve turte”

Ka chilh ka lem khal a. “Mi thenkhat chuan chung ringawt chu kan duhkhawp lo a ni mahna” ka ti a.

“A ni maithei” a ti a, mahse a nui hmel chuan thil dang daih a ngaihtuah a ni tih a tilang a. “Thenkhat chu eng hi nge kan mamawh ber tih hrelo in kawng kan bo pawh a ni maithei, chu chu kan hre si lova” tiin chiang deuhin min rawn en a. “Engvangin nge i pumpuiin engmah a pai theih lohna chhan ni ang Eliza? Enga tinge engmah i ei theih loh? Mut pawh tum la i thei kher dawn em ni? Nangmahah thil inthlak a awm a ni. Chu thil inthlak i hriatthiam theih si loh chuan chhunglam atangin rawn kaih harh che a duh a ni” tiin min rawn thut hnaih a, ka kut pahnihah min vuan a.

“Hei hi kan zawt teh ang che unaunu. I kalbo dawn khan i chak zawng leh nuam i tih zawng lampana i kal dawn thu i sawi a. Kum li zet i thang bo ta. Ram tak tak i hmu a, khawpui tam tak i fang a, lui leh dil, tlang leh phaizawl hmuhnawm tak takte nen. Tawng dangtein i tawng a, kawtthler i la kal ngai reng reng lohnaah kalin i la tawn ngai lo mi thar te i tawng a, nangmah pawh mi thar i lo ni ta a. Mahse hei hi min hrilh teh…..i thil zawn ber chu i tawng ta em?”

Chu zawhna chuan ka thinphu a ti rang nghal dawt dawt a

“I tawng lo a ni tiraw..?” a rawn tih leh phei chuan chhan dan tur reng ka hre tawh lo. A dar a chhin a, a nui seih a. “A chhan chu a awmna tur ni lovah i zawng a ni maithei asin. Chu thil chu helai hmun, i seilenna hmunah ngei hian a awm pawh a ni zawk maithei asin”

Ka nau duh tak mai chu ka en a, van angel ang mai a ni, nge mi a ang mai zawk, a nih loh pawhin a pahnih inkawp tal chu a ni ang. Kan ngawi vang vanga, ka ngaihtuahna a kal thui tual tual a. A thusawi engkim mai chuan ka ngaihtuahna a rawn luah a, ka lungngaihna ka lo thhup tang tang chu a rawn puak chhuak a.

“Ui lehh…!” ka ti thawp sat a. Ka kut a vawn chu la thlain ka hmui ka hup a. “I sawi dik. I sawi dik Beth. Ka….hria. Ka hrechhuak. Rei tang ta tang tih hi. Hun rei tak ka lo zawn thin chu….tuna ka awm dan ang hi a ni. Ka zawn tak chu a rawn thleng hunah engtin emaw tak ka awm ang ka ti thin reng a ni. Engtikah emaw chuan ka zawn tak mihring leh hmun chu ka la tawng anga ka tih thin kha tun hun ngei hi a lo nih hi. Ka inhrechhuak ta”

Beth-i chu a bu nghauh a, ka malah min rawn chul a.

“Ka hmu ta” ka tih zawng chuan ka mittui a rawn far a, mahse hlim hmel a ni ka put ni. Ka laizawnnu lam chu ka hawi a. “Ka hmu ta e. Europe ah a ni lo a, Asia ramah a ni hek lo. Tlang nuam tak leh tuipui kam mawi takah pawh khan a ni lo. Kha cabin tereuhte, boring zet kha, eng technology mawh awm lohna, chaw tui leh changkang leh thil changkang dang engmah awm lohna hmun kha. Meichhemna hmaah khan ka ding a, kha blanket hlui tawh tak kha ka sin a” ka sawi zawng chuan ka nui chhuaka, beth i’n min rawn zawm ve bawka. “Kha mi mawl tak leh ui mawl takte kha” tih pahin ka insut a. “Khalai hmunah khan engkim ka nei a ni. Khalai hmunah khan ka thlarau ka suangtuah pha a ni”

Chung thu ka sawi zawng chuan nipui laia thli vawtin a min chhem seng seng ang mai hian ka awma. “Mahse chu ngei chu ka tlansan si” ka ti sap a. “Hun tam ka lo zawn thin chu hetah, ka kalsanna hmunah ngei khan a lo awm reng si. Chu thil chu ka hmuh khan ka lo hrethiam lo mai mai a ni” tih pahin Beth-i chu ka en a. “Mahse a tum hnihna atan ka kalsan leh a ni” ka inhnit hlawp hlawp a. “Ka van han mawl tak em. Mi mawl tak ka ni”

“I mawl reng reng lo” tiin Beth-i chuan min rawn kuah a. “Kawng i bo mai chauh zawk alawm Eliza. Kawng pangaia kal reng aiin kawngbo te hian kawng an hre chiang zawk thin a nia”

“Eng nge ka tih tak ang?” beiseina chau tak chungin ka nau chu ka zawt a.

Min chhanna erawh a nui hmel chauh chu a ni. Ka chalah min fawpin ka plate dah sawn chu a la a, ka hma zawna rawn dah pahin “Pie hi ei rawh” min ti a. “Chuan i inah i haw dawn nia”

“In….” a tawng chu a khawk rum rumin ka hria. Plate chu ka la a.

Beth-i chu a bu nghat a. Ka khabe a rawn dawm pahin “Ni e, i in”

Min kalsan a, a pasal, ka nu leh pa leh ka pi te awmna choka lamah min luh san a. Ka thutna atang chuan ka thlir reng a…,an hlim a, an nui a, ka pa in ka nu darah a kuah a, Robert a’n Beth-i kutah a chelh bawk a. Kha cabin chhungah chuan chutiang hlimna ril chu ka nei tih hriatchhuahna chuan min rawn tuam a.

Ka in.

Chumi hrechhuak tur chuan ka kawng a va thui em. Ka hmangaihte rilru ka hliam a, hmun hla takah thlawhna leh lawng hmangtein ka zawng a, tlang chhip leh khawpuiah te ka zawng a ka hmu si lo. Ka mamawh dik tak chu River-a chauh chu a ni.

Ani pawhin min la pawm leh theih ngei ka beisei.

Knock- knock- knock

Kawngka rawn hawng tura River-a ka nghah lai chuan ka kutkawr chhunga ka kut chu a khur ru dar dar a. Moose-a bau that that thawm ka hria a, tukverh atang chuan inchhung lam a lum a ni tih ka hre thei a, chimney atangin meikhu a chhuak hlat hlat a.

Mipa aw zawi takina Moose-a bauh tawh lo tura a ti lai ka hre thei a, chutah kawngkhar chu a rawn inhawng a, River-a a rawn langa.

A hmela hlim hmel leh makti hmel ka hmuh chuan mak ka ti hran lo. A chil a lem khalh a, a mitmengah zawhna tam tak a lang a. Moose-a lah chu hnunglamah mei vai lauh lauh chungin a lo zuang a, pawna rawn chhuah ve phet chu a tum a.

“Hi” zawi sapin ka ti a.

Engtinmah min chhang lo. A mithmul a san ringawt a

“Ka lo lut thei angem?” tih pahin ka bawm ken chu ka keng kang a. Lehkhamawiin bawm chu ka tuam a, ribbon senin ka tuam bawk a. “Pawn hi a vawt teh mai a nia”

River-a chu ngawi rengin a la ding reng a, kawng min kian ringawt a. Inchhung ka luh rual rual chuan Moose-a chuan hlim takin min lo zuan tawr tawr a. Nui chunga a lu a chul pahin “Kei pawhin ka ngai che alawm” ka ti a.

River-a chu a rawn lut chhat chhat a, kawngkhar bul lawkah chuan ka ding reng a. Ka coat, ka kutkawr leh ka lukhum te engmah ka la phelh lo. River-a chuan ka awm ve a phal leh phal loh tur ka la hre tlat lo. Han sawi tur mai pawh ka hre bik lo.

“Christmas chibai le” tih pahin ka bawm ken chu a lamah ka lek kang a.

River-a chuan bawm chu a en a, min rawn en leh a. “Hetah eng nge i rawn tih dawn a Eliza?”

“Kha…” tiin bawm chu ka lek kang leh a. “Hei hi hawng rawh”

A nui suk a, bawm chu la in a tuamna a pelh a, a chhungah chuan note bu pakhat hi a awm a. Chu note bu chu a la a, a en reng a. Chu thil chu ka zinna zawng zawnga ka ken kual char char a ni a, chhah pawh a chhah tha viau mai. Min rawn en a.

“Keu rawh” ka ti sap a.

Muangchang leh uluk deuhin lehkhabu chu a keu a. Ka en reng a. A chhiar a, a chhiar zel a, a phek lehlam a keu leh a. A hmel chu mak tihnain a khat telh telh a, kei lah ka tin a phu dup dup a, ka lungphu ri chu ka beng pawhin a hre thei ni mai hian ka hria.

“Ka diary a nih kha” ka ti a. “Love letter pawh a ni mai thei a, a pahnih pawh chan a ni ve ve zawk maithei” ka ti a. “Vermont ka chhuahsan ni kha airport ah ka lei a, kartin ka ziak ta ziah a ni” ka chil ka lem khalh a. “I tana ka ziah vek a nih kha”

River-a chuan mak ti deuhin a chhiar zel a, a mitmeng atang chuan thil tam tak ka hmu thei. A chhan chu ka ziah dawn apiangin a tirah ‘Duhtak River’ ti a bul ka tan zel vang a ni.

Atan ka zinna chanchin ka ziak a, ka ram hmuhte, ka mihring tawnte. Hun hrehawm ka tawh atanga a nuam ber thlengin. Ka bula awm ve reng a, ka ngaihtuahna ang pu ve turin engkim kha ka ziang thin. River-a chuan phek dang a keu zel a.

“Engtik lai mahin ka theihnghilh ngai lo che” ka ti sapa. “Engtik lai pawh khan ka bula aw ve turin ka duh che a, i tel lo chuan ka kim lo tih kha ka inhria a ni”

River-a chuan phek dang a keu zel a

“Thil thar zawngin ka chhuak emaw ka intia a, mahse ka lo hriatchhuah ngai loh chu ka nun a thil tha ber ka kalsan tih hi a ni”

Chutah chuan a chhiar lai chu a a tawp a, lehkhabu la keng reng chung chuan ka lam a rawn hawi a. Ngawi rengin min en reng a, kei lah ka mittui a tling pam a.

“Ka zawn ber chu nangmah hi i ni River” ka ti thawp sat a, ka biangah mittui a rawn luang a, “Nang aia hlu ka tan an awm lo” tih pahin ka thaw halh a, “I tello chuan khawi hmun mah a nuam chuang lo”

River-a chuan a lehkhabu ken chu dawhkanah a dah a, min rawn din hnaih a, min kuah a. Ka kawngah nghet takin a kuahah, keiin a nghawngah ka kuah ve bawka. A darah beiin ka tap hlawp hlawp a.

“Khawpui lian deuh emaw ram dang emaw lam ka ngaihtuah tawh lo” mittui tla pur chungin ka ti a. “Hei hi ka duh ber chu a ni. Khawi hmuna awm pawh ti la, helai hmun ngei pawh hi ni pawh nise i awmna hmun a nih phawt chuan ka duh vek. Ka bula i awm dawn phawt chuan”

River-a chuan ka biang lehlam lehlamah min dawm a, kan chal leh chal a insi rat a. “Ka hloh leh ta che emaw ka lo inti hman asin” a aw chu a khur der der a.

Nghet takin ka vuana “Tunah chuan engtikah mah min hloh leh tawh lovang” ka ti a.

Ka coat min phelh saka, ka kutkawr leh ka lukhum, ka nghawngawrh leh ka boot thlengin min phelh saka. Thutthlengah thuin a malchungah min thut tir a, min kuah a, min fawp bawk a.

Chutia ngawi renga kan thut duna, kan inkuah a, kan infawh zawh hnu chuan a bak awm leh tawh chuang lo tur khawpin ka taksa a hahdama, ka taksa timut tinreng te chuan a tawp a tawpah chuan hahdamna an hmu ta.

“A pahnih pawhin i nei thei tho a nia” tih pahin River-a chuan ka biangah min rawn fawp a, a sawi awmzia chu ka man lo.

“Pahniha nei aa…!?”

“Aw. Kei leh i nuam tih zawng zinkualte”

Ka nui a, a bianga dawm pahin “Zinkual ka mamawh tawh hleinem. Nangmah hi a tawk ka tih kha”

Mei eng chuan a mitmu chu a chhun tle ser ser a. “Ti rawh i kal ang Eliza” a ti a.

“I kal ang aa..?!”

“Kum khat chhung chu he khavel zau tak hi i fang dun ang. Kan pahnihin”

Ka hmui a khur dar dar a “Eng-...eng nge i sawi awmzia !?”

“Kum khat chhung. Kum khat chhung hman thar tlawh leh zin kual nan kan hmang ang. Kan pahnihin. Tichuan eng nge nuam kan tih zawng kan hria anga, khawi hmun a awm nge kan tan tha ber ang tihte. Kal i duh tum khan ka kal tir che a, ka pa bula awm kha ka duh zawk a. Mahse a ni lo….” River-a chu a ngawi vang vanga, a chil a lem khalh a. “Kha ka duhthlanna avang khan pawi ka ang tih ka inring pha ngai lo, a chhan chu hun reilote ka nu leh pa nena hun kan hman kha a hlu ka tih avangin”

Nghet takin a kutah ka chelh a, khatih lai khan awm ve thei ila ka inti hlemai.

“Mahse chutih lai chuan nang ka chan che a. Tunah ka nei let leh ta che a, ka hriat tak chu i ta ka ni a, ka ta i ni bawk tih hi. Tihsual leh ka duh tawh lo. Chuvang chuan engkim tem ve ka duh a ni”

“I ti tak tak em ni?” phur takin ka lo ti vat a.

“Ti tak tak e” tih pahin a bu nghat a, ka biangah min rawn piai a. “I hmuh ang zawng zawng kha ka hmu ve duh a ni” a ti a.Khum bula christmas blanket a duh chu a va la a, kan pahnih malchungah Moose-a a rawn lawn bawk a. Chu christmas blanket hlui leh hlu tak chu kan pathumin kan sin a, mei lum chuan min rawn ur lum bawk a.

He blanket min pek tum khan thutiam a nei a, kan tan a zawng zawng a a beih tur thu kha. Mei alh hmaah chuan a kiangah thlamuang takin ka thu a, a darah ka bei a. Duat takin ka sam karah ka lu a chul a, ka chalah min rawn fawp a. 

“Christmas chibai duhtak” a ti sap a.

Ka nui a, ka nek na sauh a. Kha vur thli tleh avang khan ka van lawm em Lalpa. “Christmas chibai le”

A TAWP TA