THE CHRISTMAS BLANKET (Chapter -2)

 

THE CHRISTMAS BLANKET

Chapter - 2

River-a chu choka lamah a la che reng a, a kut pakhatin a beer no a keng a, a leh lamin spatula. A burger siam pawh a uk kharh tawh a, a rim a tui hle lehnghal.

Chutia chiang deuha ka en takah chuan engtin emaw tak hian ka awm nghulh a, a mitmeng leh a chezia zawng zawng chu kum 10 liamta atang daih a ka hriat tawh a ni a, kan pahnih a in kan luah dun hmasak ber atanga nupa kan nih thlengin. 

He pa hi chu ka hmangaih thin reng a ni

Kum 12 mi lek ka nih lai, hmangaihna awmzia pawh ka la hriatthiam hma a tawng tawhin ka hmangaih tawh. Engkim kan ti dun a, kawng tinrengah kan inthlawp tawn a, midang reng kan ngaihsak tawh thin loh avangin thian thenkhat chuan min haw fo a, thiktu pawh kan nei chawk reng a ni.

Ani chu ka tana mi bik a ni.

Ka graduate atanga thla hnihna a ka neih nghal a ni a, ka graduate atanga thla hnihnaah a nupui ni turin engmah hlauhthawnna leh timna nei miah lovin ka inpe a, thuthlukna ka siam sual ka inring ngai lo. Ani nen a engkim tawn dun ka inhuama, fa neihte, tar dun thleng pawhin.

Amaherawh chu nun hi a lo danglam theih khawp mai. Tunah chuan ka hma a ding mek, ka thlir mek chu ka tan engmah a ni tawh lo. Hmelhriat ngai loh mikhual ang mai a ni.

Ka aw ka thiankhar a, ka thawmhnaw thlak ho chu ka suitcase ah ka khung a, intih lum tumin meilum chu ka ai a. Moose-a pawh a ball te nen ka bulah a rawn bawk a, nuam tih hmel tak hian a mei a vai hliau hliau a.

“Eng nge i siam dawn a?” rei tawk tak kan ngawih dun vung vung hnuah a a be hmasatuah kan tang leh a.

“Zanriah tur”

“A nih chu” tih ringawtin ka chhanga. A thil siam lai chu a siam mawlh mawlh a, min rawn en eih lova, ka lam rawn hawi pawh a tum hmel loh. “Lalpa min pui teh!” rilru a ti chungin inchung lam ka melh chho zauh a.

“Enteh, helai hmunah kan tang dun ta sa sa, tha taka awm i tum teh ang” tiin choka lam chu ka pan ve a. Fridge chung a a chhang dah chu slice 6 ka la a, slice 4 a tan, ka tan slice 2. Chutih lai chuan toaster a a chhang ur lai pawh chu an rawn pawk chhuak chiah a.

River-a chuan min rawn en zauh a, a mitko a san ak a, a thil siam lai bawk chu a buaipui leh a.

“Nang leh kei, tha taka awm tum maw?” a lu a thing a. “Engtik atangin nge chutiang tih ngai a kan lo awm tawh a?”

A thil siamna bulah chuan kut kuangkuahin ka ding a, a gravy siam laia chi leh hmarcha dip a telh lai chu ka en reng a. “Ui, dik tak chuan a tui loh hmel ee” tih pah chuan ka nuihza chu ka insum zo lo. “Mahse a rim chuan ka ril a ti tam leh em em bawk si sia”

Zawite a a rum nghut bak engmah chhan letna ka dawng lo.

“I pa in tun a i siam ang tho min siam sak hmasak ber tum kha ka la hre reng asin” ka ngawih deuh vang vang hnu chuan ka han ti leh a. “Kum 14 vel kan ni em kha le ? High school a eng emaw kan lawm tum kha. Zu kan in a, kan rui viau a, i pa in min hauh dun hrep kha” tih pahin ka nui hak hak a. “School ah min rawn lam a, kawng tluanin min hau dun char char a, a tawpah phei kha chuan amah zawk kha a nuih a za a, tun a i siam ang kha min siam sak a nih kha” tih pahin a gravy siam lai chu ka va kawk a. “ A siam pah khan a pa sipai tan lai chanchin a sawi a, hetiang hi sipai an tan laia an ei nasat thute a sawi-”

“Chutiang chanchin hlui deuh deuh chu ka hre nawn kher peih tawh lo ve” tih pahin a bawngsa kan chu a gravy siamah chuan a zuk nawr a, a plate turah a dah a. “I ta tur chu i insuah ve mai dawn nia” min ti a.

Engmah sawi zawm tawh lo chuan a kal nghal hmak a, bathroom lamah a lut ni berin ka hria. Mak ti leh a ngaihna hre lo takin ka ding tlawn reng a, eng nge tawng sual ka nei emawni le tiin ka inngaihtuah ru nauh nauh a.

Helai cabin, tanin ang maia hrehawmah hian vur sur a reh hma chu ka tang dawn a nih hmel si a. Ngawi rengin ka eitur ka insiam a, ka ei a, ka ei zawh tawh lamah vaihlo rim nam vung vung chungin River-a chu bathroom atang a rawn chhuak a. A chin than thalo tak chu a la sim chuang lo a nih hi. Tumdang ang chu nise ka hau nasa leh viauin ka ring. 

Engtia rei nge helai hmunah hian ka la tan dawn tih chu Pathian chauhin a hria. Chuvang chuan a zawldawh thei ang bera ka awm ve rih angai. Zawldawh reng ngai erawh ka ning a ni. Chu chu kan inthen chhan tam tak zinga pakhat a ni.

Hun tam a ral ve ta. Kan titi na ho te te pawh a tawpah chuan inhauhna ah a chang zel a, eng emaw hlekah kan inmelh sala nghal zel a, chuvanga kan inkara khi lo awm ta pawh a ni reng a. Kei chuan he khua hi chhuahsana khawvel dang daidar ka duh a, zin kualte, hmun hrang hrang tlawh te ka duh a, ka rualin rawn kal ve se pawh ka duh. Ani erawh chuan he ta awm a thlang ta zawk a ni.

Chu buaina chu ho te a lang buaithlak ru zet mai a ni. Vawi duai lo ka hrilhfiah a, hmun dangah kan awm anga, kan chhungte tlawh tura kan haw fo tur thute pawh ka hrilh. Mahse a duh tlat si lo. Ani chuan hetiang khaw tereuhte nun dan hi nuam a ti zawk a, keiin ka peih tawh si lo.

Kan inneih dawn khan kan la naupangin hmangaihna khan min la bual a hneh ve em a, eng nge kan duh a duh loh zawng tih ngaihtuaha titi dun nachang kha kan lo hre lo a ni.

Hun a lo kal a, kan thil duh in an lohna chuan min pawt hrang ta reng a.

Inhualna zungbun ka bun lai khan kum 18 chauh ka la ni a, khatih lai kha chuan engkim hi a parvul a, ka duh ber chu River-a nupui nih a Wellhaven a chen chu a ni. Ka duh ber chu ka nu leh pa te neih ang chhenna in neih ve a, kawtzawlte neih a ui vulh te, fa neih te kha a ni mai. Mahse kum 23 ka tling chho a, tleirawl chhuah ngaihtuahna ang ringawt chu a lo ni lo khawp mai.

Kan thian tam tak college kal chhunzawm ta te chu khawpui atangin an rawn haw a, khawvel hmun hrang hrang an fang bik a. Internet atangin an thlalak tam tak ka hmu a, ram nuam deuh deuh an hmu bik te, hmun nuam tak tak a an kal leh eitur tui hmel tak tak an ei bik te, an college kalna leh an zirlai chanchin an sawi te, party na a an kal leh sport event nuam tak tak an chhim thu an sawi te, bar leh club a an hun hmandan an sawi ka hriatte chuan awhna nasa tak min pe a, chuta tang chiah chuan hetiang khaw tereuhteah chuan tuna kan nun dan bak hi nundang dang a awm chuang lo tih ka hriat phah ta a ni.

Khawvel dang chaka ka tuihalna chu ka sawi thiamloh khawp a nasa a ni a, ka suangtuahna ram a sang em em a, fa neih lam reng pawh a lang tawh lo. Ka mitthlain Italy bar nuam zeta River-a nen a no kan dawm dun lai a hmu a, Australia tuipui kam nuam lutuk a ni lum a kan inpho dun laite, Iceland ram vur hmun a tuilum a kan inchiah dun veng veng laite a hmu chuai chuai a, Oregon tlang nuam taka kan lawn dun laite chenin.

Chutiang chu River-a hian a chak ve ngai miah lovang tih hi ka awih pha ngai lo. Chung zawng zawng kan hrilh chu a thianpa laka ka uire thu hrilh ang vel ka ni. Ka duh ang chu engmah a duh ve lo a, helai hmun chhuahsan a hmun danga kal chuan a hip chhe te eih lo. Wellhaven chhuahsan chu a duh lo a ni tawp mai.

Chu chu kan inkara vur hlawm chhe te rawn tla hmasa ber chu a ni ta a ni. Chu vur hlawm chu a lum a lum a, a lianin a rit tial tial a, a tawpah chuan tih din zawh rual a ni ta lo.

Kan lo thlir dun thin; eng nge a duh a eng nge a lo inruahmanna tih lam reng chu kan thlir dun thei tawh lo.

Kan thlirna ve ve chu kan hloh dun ve ve tawh.

Tleirawl laia innei kan nih miau avangin mi chuan thil thlen dan tur rengah min ngaihsak vek a, innei hma nanana chu inthen leh pawh a sam an ti. Ka tan erawh chu inthenna chu ka nuna thil thleng pawi ber a ni. Khawvelah hian engmah hian rei a daih lo a ni tih ngaihdan min put tir a, rei tak keimah leh keimah dawt ka infah a ni ber.

Min ti chhia ti ila a dik ber ang.

River-a pawhin engmah ti lang lem lo mahse chu thil tleng chuan a nghawng hle a ni tih ka hria. 

Zanriah kan ei zawh chuan engkim tihfel chu ka hnaah ka dah tawp a, ka awm a nawm loh em avangin eng emaw khawih tur ka duh. Thleng leh bel ka sil zo a, eng nge tih leh tur ka hre lo. Inbiak chiam tum pawh awmzia a awm hmel si loh. Thawm dang lo siam tu tur TV han on mai tur lah a awm bawk si lo. A lan danah chuan ka kalsan atang khan River-a chu puk a cheng ang maiah a inchhuah ni berin a lang. Internet a awm lova, Tv leh phone pawh.

Thawm ri va dang awmchhun chu pawn lama thli thaw ri vuk vuk chauh chu a ni.

Thli chu a faifuk ta emaw tih mai tur hian a ri vuk vuk a, chu chuan kan awmna in, thing hmanga sak chu a chhem ri der der a, inchung chu vurin a delh rih em avangin a ri leh tek tek thin a. Pawn lam a thim tawh em avangin tukverh atang chuan engmah thlir theih loh mahse tukverh lam chu ka melh reng a, Moose-a pawh ka malchungah a rawn bawk a.

“Eng emaw tal ti rawh” rei ngial kan ngawih hnu chuan River-a chu a rawn tawng chhuak hlawl a. A lam ka va hawi phei a, chair ah thuin lehkhabu a chhiar a, a lehkhabu phen atang chuan min rawn en a. “I awm dan kha a ninawm hmel ngut ngut emai”

Thut ngawt ngawt loh chu tih tur dang awm hek lo le.

“Eng nge ka tih vak chuan anga? TV en tur a awm lo va, internet lah a awm bawk si lo. Nang lah titi pui theihin i awm bawk si lo”

A nui suk ri chu fiah lo te in ka hre thei. A lehkhabu lam chu a en leh daih a. “Lehkhabu ka ngah em hi”

“Ka chhiar ve peih hleinem”

“I peih emaw peih lo emaw i thu ni se. Mahse eng pawh ti la bengchheng lo la aw”

Aleh lawi si chuan ….!

Ring lenglawng chuan ka thaw chhuak halh a. Eng awm chhun chu bang kil a kawlphetha khawnvar sang deuh pakhat chu a ni mai a. Chu chuan a hmel chu fiah lo zet hian a chhun phak riai riai a, engtin nge eng hnungchhun zawng chuan thil a chhiar theih zawk tih chu ka hrethiam lo. Eng awmna lamah chuan thu se a hmufiah daih awm zawk sia. 

Hetiang hmun a kan han awm dun leh thut hi ka awm thiam lo a ni ber e. Ani chu ka mipa hmangaih thin a ni meuh mai, mahse ka in a nih ve miau loh avangin engkim mai chu mipa rim nam vek ni mai hian ka hria a.

Ka mit ka chhing vang vang a, chutih lai tak chuan ka darah min rawn kuah a. Baseball khel zo hlim a nih avangin thlan rim a nam hiam a, mahse chuti chung chung chuan a awmah ka bei a. Ka mit ka chhing leh a, kan in hmasa ber a ka arsa siam hmasak ber ka tih kan avanga ka tap min thlem lai leh min pawm lai ka hmu a.

Ka mit ka chhin apiang mai chuan kan hun kal tawh chi hrang hrang mai chu an rawn lang zut zut a.

Kan inah awm zawk ila ka ti hlemai. Ka nu leh ka pa leh ka nau Beth-i te bulah awm ila. Christmas movie en pahin pumpkin pie kan ei anga, christmas tree bulah thu khawmin christmas hla kan sa emaw kha a niang a. Chocolate lum in pahin ka nau nen kan tet laia kan tih thin angin chhang kan siam anga, kan chei kual vak vak emaw kha a ni leh awm si a.

Pasal hluite nen a cabin hlui tawh lama inbe mang si lova tan reng ang chuan a van nuam zawk dawn em.

Ka han hawi kuala, meichhemna leh tukverh inkarah chuan Christmas tree lian lutuk lo hi a inhung ve a, a lan danah chuan tu emaw in a an pek, kil khat a hun ve mai mai hi a anga. Light emaw; a khai chi emaw engmahin a chei lova, a awm ang ang chuan a inhung ve tawp a, christmas lah chu a tuk tukleh mai a ni tawh si. Chutah tak chuan thil tih tur ka hre ta.

“Ka tih tur chu ka hria e” tih leh thawh ka ruala, a bulah chuan va dingin “In hi ka chei dawn” ka ti a.

“Eng maw i tih dawn?” tih pahin a lehkhabu chu a keng hniam deuh a min rawn en a.

“In hi ka chei dawn. I in hian christmas rim a mamawh a nih hi”

A khap fuk a. “Christmas rim tih namna tur hmun awl pawh ka neih loh hi”

“A dik alawm. Mahse saw a pawimawh ber i nei alawm” tih pahin kil khata a tree hun deuh tawp chu ka kawk a. “Saw tianga hun tawp atan chuan a uihawm em mai”

River-a chuan tree chu a va melh a, a ngaihna hrelo deuh hian min rawn en leh a.

“A cheina tur thil eng emaw i neih ka ring tlat. Rawn la chhuak teh”

River-a thaw hak thawm chuan min ti hnual leh lek lek tep a.

“Tinge i nei lo ami?”

“Ceiling bulah hian” tiin min chhanga.

Chhuar chung ceiling hnuaiah chuan bawm pakhat hi a inhung a, lian tak erawh a ni lo. Khawih hnum lo tih hriat takin a paw phak a.

“I duh duhin han ti rawh. Min kalsan hun a thleng leh thuai awm si a” tih pah chuan ka awm ve tih hre lo ang maiin a lehkhabu chhiar lai chu a bih leh daih a. Min puih lohte chuan ka lawn thei dawn em mawni le?

A pawilo. A rukin min en reng dawn tho tih ka hria ti rilru chungin chhuar sir a rah chhan awmah chuan ka lawn chho a, ka phone flashlight chu on in harsa lutuk lo chuan a chung a bawm awm chu ka han la thei a. Pa hnih lai a lo awm a. Vut leh maimawirilin an lo bawh chiai na in tih tur ka hmu chu hlawhtling ka inti viau mai.

A lawn lam chu ka thei mai a, mahse engtin nge bawm keng chung chuan ka chhuk tak ang? 

“A va han buaithlak” tih leh thawh a rawn rual a, a lehkhabu chu dawhkanah chuan dahin ka awmna lam chu a rawn pan vat a. Chhuar buk tur chu a kut khatin a dawm a, a kut pakhat chu ka lamah a rawn phar chhuak a. “Khawi min rawn pe rawh”

Bawm ho chu min laktlak sak a, him taka ka chhukthlak hnu chuan a lehkhabu chhiarna lamah bawk chuan a kir leh a. 

Tree bulah chuan box chu ka hung hnai a, ka hna ka tan tak tak hmain ka kut chu meilumah kan hem lum te te a, Moose-a bawk chu a lo phur fal leh kher mai. Box chu ka hawng a, eng thil thar vak mah a awm lo. Tunhmaa keima lei sa deuh hlir kha an la ni. Light te chu tree a mi tur liau liau a ka duh tak ka thlan kha a ni a, a khai chi ball leh eng eng emaw pawh chu duh taka ka lei te vek tho kha an la ni.

Silver rawng dar lem chu ka nu leh pa min pek a ni a, Christmas putar; star wars costume inbel chu kum hnih kan inngaihzawnna champha a ka present a ni. A chhan pawh Star wars a duh theih thin em avangin. Sazuk lem pahnih chuan ka mit a la hle a, thiehnghilh theih rual a ni lo. An ngawnga ribbon sen intawnah chuan pentui dumin kan hming ve ve leh kan inneihni kan ziak a, chu chu fiah takin a la chuang kalh a.

Kha mi tum kha Christmas kan hman dun hmasak ber a ni.

Chutiang thil chu a awm a ni tih pawh hun rei tak ka lo hriat tawh lohte an ni a, ka hnuk a ti ulh lek lek mai. River-a lam ka han hawi chho a, ani pawh chuan min lo en reng a.

“Heng ho hi….heng ho hi i lo la kawl tha reng a ni maw” zawi sapin ka ti a, atthlak ka ti ru viau bawk.

River-a chuan muangchangin a lehkhabu chhiar lai chu a khup a, rawn tho chhuakin ka thutna lam chu muangchangin a rawn pan a. Bawm chhung chu a rawn zen a, Star Wars khaimawi pakhat chu a rawn la chhuaka.

Ka en reng a, engvanga hetiang thilte lo la kawl tha reng nge a nih tih chu ka hrechak a ni. Ka lo rin danah chuan khatia ka chhuahsan hnu khan min haw hle turah ka ngai a. Vawikhatmah min chelh lo va, a hmel atangin min chelh a duh nge duh lo tih pawh ka hre thei lo. Kei chuan ka rualin lo kal ve se ka duh a, chu chu a thei lo a nih chuan a tel lo pawha kal tho tho ka tum kha a ni a.

Bawm pakhat zawk chu ka hawng leh a, a chhunga awm ka hmuh chuan ka phu zawk mai. A chung berah a lo awm lehnghal. River-a lam ka hawi vata, ani pawh chuan engtin nge ka awm dawn tih thlirin min lo thlir reng niin ka hria. Dim te in chu puan hlui tawh angreng tak mai chu ka la chhuaka.

“River…..” tiin ka phun sep a, chu puan chu ka pawm a, ka lu ka thing a. A rim ka hnim vang vanga, a la zai rim tin mai chuan nunhlui hriat chhuah tur tam tak an keng tel a ni. Ni, pawn a vur tla ang maia tam a ni. Ka mit ka chhing a, duhthaw takin chu puan chu ka hmer a, ka mit ka men rual chuan “Christmas blanket kha..” ka ti chhuak sap a. Ka hmel chu nui hmelin a rawn zawm nghal a. “Kha christmas blanket kha i lo la kawl tha reng a nih hi” ka ti a.

A chil a lem khalh a, nui hmel lek lek hi a pu a. Min en reng a, nghah a nei tih pawh ka hria. A mitmeng hring nalh tak mai chuan kum tam tak kal ta; kan urlawk zan ni hmasa berah khan min hruai let leh a.

Khang hunlai khan mahni inchhung ngei a awm kha ka suangtuah thin a. Keimahni tree siam ngei, a cheina ho pawh keimahni siam ngei nei ila. In pawn lam thlenga kan chei dan turte ka suangtuah nasa thin. Mahse suangtuahna hi a tak ram a chantir tur chuan thil a awlai lo khawp mai.

Khatia innei ve ta rawih kha chu Wellhaven veng thlang lama apartment tereuhte pakhat chu kan luah ve a. Christmas a lo thlen pawh khan inchhung han cheimawina tur em pawh kan nei lova, christmas tree tla kawng lam, miin a an lei duh tawh loh, a tawp lama an sale pakhat chu kan lei ve a.

Ka thutna thutthleng hlui tawh tak atang chuan kan tree neih ve chhun chu ka en a, ka nu leh pa te bulah kha chuan a tha ber chi hlir kan neih thin avang khan ka lung hi a awi thei thlawt lo. Ka nu te min pek Silver dar lem pakhat leh a nu te min pek Sazuk lem pahnih, kan hming leh kan inneihni kan ziahna; chu zawng chu khai tur kan neih ve chhun kha a ni a,

Chutih lai chuan kum 18 mi ka ni a, River-a kum 19.

A lan dan chuan high school zawh hnu lawka inneih chu a nawm hmel viauin a lang a, River-a kha ka duh ber a nih miau avangin in mawi tak kan nei lo emaw kan inneih program a pui viau thei lo emaw honeymoon pawh kan hmang chhuak thei lo emaw pawh ni se pawi tihna ka nei lo. Amah a awm ve miau chuan kan apartment tereuhteah chuan ka lungawi viau thin.

Mahse tunah erawh kan tree kawng zet mai chu ka thlir a, ka ke a vawh em avangin mawza pahnih ka bun thuah a, chuti chung pawh chuan ka la lum zo lo. Chhuata bawk Moose-a pangtilum chu ka la rap tel bawk a.

Ka rilruah zawhna tam tak a rawn lut a, engah nge maw college te kha kan lo kal ve phawt zawk loh le? Kan inneihna te pawh ropui ve deuh hlek se, chumi atante chuan lo inkhawl hmasa ila. Pawisa lo inchhek deuh hlek ila, Bahamas ah honeymoon nuam lutuk te pawh kan hmang ve thei tur hi ania.

Tunah intereuhte ah kan awm a, Christmas a lo thleng a, kan thil neih ve zawng chuan ka lung a tiawi thei thlawt lo. Khawpuia dawrlian pakhatah kar khatah darkar 30 chuang hna ka thawk a, River-a lahin thawh mumal a la nei si lo. A chang leh pipe chhe siamnaah a thawk a, a chang leh car chhe siamnaah. A chang leh electrician a nia, a chang leh inchung tifaitu, a chang leh huan samtu. Thawh tur awm ang ang chu hlim leh phur deuh hian a thawk thei mai zel a -, a hnathawh hun chhung a rei em em a, a chau thin tih ka hria. Chu chuan a ti hlim miah lovang. Mahse kan tan nuam ti awm takin a thawk thin.

Bill eng eng emaw kan pek zawha a la bang tlem tlem chu kan khawl ve a, eng emaw chang lahin kan khawlsa zawng zawng kan hman zawh duak a ngaih chang a awm leh a.  Tunah urlawk ni a ni a, khua a vawtin vur a tla reng a, chuti chung chuan intihlumna tur heater takngial pawh kan nei lova, kan christmas tree a light khai tur takngial pawh kan nei lo.

River-a inbual zo chu ka bulah a rawn thu a, nilenga hna a thawh avangin a chau hle ang tih ka ring. Christmas lai takngial pawn hna a thawh angai si. A awmah chuan ka bei a, a rim fresh tak chuan ka hnar a fan chiai chiai a, min kuah a, a pangtilum chuan min ur ham ham a, mahse ka mit fukna ber erawh kan christmas tree chu a ni.

“I rilru chhungah hian rawn lut thei ila ka ti khawp mai” tih pah chuan ka lum zual deuh beiseiin min chul hliau hliau a.

“Chutiang a nuam a ni bik lo” ka ti a.

Chhetein a nui a. “I sawi duh chu sawi tawp rawh” min ti a.

Ka lu ka thing a, a aia nghet zawkin a taksa chu ka nek a. Ka chala min fawh pahin a aia nghet zawkin min kuah bet a.

“Sawi hreh suh. Mawlhtu che a awm tih ka hria. Sawi chhuak tawp rawh”

“Nakinah chuan sual min la ti ngawt ang” tih pahin a awmah ka hmai phum ka tum a, mahse ka khabeah min rawn dawm a.

“Han ti chhin la…” a ti sap a.

Ka thaw haka, tree awmna lam bawk chu ka melh leh a. “Eng lo…., ka pasal nena christmas kan hman dun hmasak ber hun tur hi hman atangin ka lo suangtuah thin a. Ka nu ta ang christmas tree lian leh mawi deuh ang kha ka mitthla thin a, a cheina mawi tak tak te. Pawn nalh tak taka an chei ang te kha ka awt ve a, urlawk zan a ar rawh ve te” ka sawi zawng chuan ka mittui a rawn hnam a. “Mahse hei zawng hi kan urlawk zan hman dan chu a ni mai si. Kan pahnih a nileng a hna kan thawh angai a. Kan chau em em a, chuti chung chuan christmas present leina tur emaw; in han chei mawina ve tur emaw pawh kan nei si lo. Chawlh laia eitur engmah chhek lawk kan neih loh avangin tukthuan i nu te in lama kan ei leh angai anga, zanriah ka pa te in lama kan ei a ngai leh bawk anga” tih pahin ka insut feih a. “Thlasik a vawt thei ropui si. Vawt ti deuh a awm reng te hi ka ning tawh. In te chu nei ve ila chuan meichhemna tur talte kan siam ve anga. Heater chhia pakhat chiah kan nei bawk si” ka ti a.

Ka hmui hnuai lam sai der der chu zawite hian River-a chuan a kutzungpuiin a rawn tuai a, a kutphaha ka hmai nghat chung chuan ka chhoh en a.  “Chumi avang chuan hrehawm ka ti lutuk e tihna pawh a ni chuang lo a nia. Ihh…, kan urlawk zan hmasa ber a hrehawm ka tih thu han sawi vak mai chu a awm lo viau lo maw?” ka ti leh hnuhnawh a.

 River-a chuan a lu a thing a, nelawm tak hian min nuih a. “Kei pawn pawi ka tia lawm” a ti sap a.

“I ti ve tak tak maw?”

A bu nghat a. “A pawi love Eliza. Hrehawm tih kha a pawi reng reng lo ania. Awh neih hi a tha a, chumi nei tur chuan kan bei zel anga. Kei pawn chutiang zawng zawng neih chu ka duh alawm. Ka duh-...”

A tawng lai chu a tawp chat a, a sawi zawm tur thil chuan a rilru a ti na a ni tih ka hre thei. A kut chu nghet takin ka vawn sak a, christmas tree in hunna lam chu a melh reng a. A thawh hma chuan vawikhat min han chul zuai a.

“Ti khan lo awm teh” a ti a, mut pindan lamah a lut a,. Ka kawrlum hak lai chuan intih lum tumin ka khum thlengin ka tuam a. Vawt tiin ka khur der der a, River-a pangtilum ka ngai nghal veng veng mai.

A rawn let leh chu bawm lian zet hi a rawn keng chhuak a, bawm chu chanchinbu hluiin a tuam a, pheikhawk hrui ribbon ang ve deuhin a rawn suih par bawk a.  Moose-a lah chu a phur em em a, a lo vir ve sek a, bawmte chu a hnim vut vut a.

River-a a rawn thut rual chuan ka nui chhuak hak a. “Eng thil nge a?” ka lo ti hu a.

“I christmas present tur” tih pahin inthlahnun hmel angreng zet hian a nui a. “Naktuk zingah zawk ka pe ang che ka lo tih ruk deuh kha a nia, mahse…, zanin a inpek hi a tha zawk dawnin ka hria”

Hlauhthawnna riau hi ka nei a. “River ! Present in pek lovah kan tih kha” tih pahin a bawm tuamna chanchinbu chu ka chul a. “Engmah pawh….i ta tur eng thil mah ka lei ve hleinem”

“I hawng dawng nge dawn lo ka pi ?”

Buk nghat pahin a tawnna pheikhawkhrui chu ka phelh a, dim angreng takin chanchinbu hlui te chu ka pawtthler a, bawm chu ka hawng ta a.

A chhungah chuan blanket mawi zet mai hi a lo awm a. Chu blanketah chuan milem chi hrang hrang a inchhu kai a, a lem engkim mai chuan christmas rim an kai vek a. Ranchaw pekna thlenga a mu laite, Mas putar lemte, christmas tree leh present bawm lemte thlengin. Ka han pawt pharha, a hlai tha em em mai lehnghal. A puan lah deh a nuamin a lum tha dawn tih a hriat nghal vek.

“A van mawi em em” nui vur vur chungin ka ti a, blanket chu ka pawm bet a “A lum nuam lutuk”

River-a pawh hlim takin a nui a, bawm ruak chu dah sawnin kan pahnih chuan kan insin tawm a. Lum nuam tak a nih piah lamah milem hrang hrang inthui tel chuan a ti christmas lehzual a. River-a thlazar hnuaiah ka kut leh ke vawt lutuk pawh chu reiloah a rawn lum ve tial tial a.

“Thil ropui teh lua a ni lo tih chu ka hria” River-a chuan a ti sap a. “Pawisa hmanna tur tam tak a awm tih ka hria a, chhang leh bawnghnute te, thingpui lumna tur thlengin kan nei tlem tawh tih ka hria. Mahse he blanket hi lei sak ngei che ka duh si a. Christmas tukah present eng emaw tal hawng ngei la ka duh a, chu chu i phu ngawih ngawih a ni” tih pahin a chil a lem khawlh a. “Hei aia ropui leh tha zawk pawh hi i phu tih ka hria”

A biangah dawmin ka lu ka thing a, mahse ka sawi ve hmain a thusawi lai chu a chhunzawm leh a.

“Kan christmas hman dun hmasak berna hi hetiang ang ringawt hi chuan kan suangtuah bik lo a ni tih ka hria. Mahse hei hi chu Pathian pawhin min hriatpui se la ka duh a ni, i awh leh i neih chak zawng zawng te hi ka la tihsak vek ang che Eliza. I awh em em thin In mawi leh tualzawl nuam tak ka la din sak che anga, thingkung mawi takte leh i duh ang thlap choka mawi tak nen. Tunah rih chuan he blanket tlawmte hi ka thutiam nemnghet tuah min pawm sak dawn nia. Hei hi rim takin ka thawk dawn a ni tih ka tiamna che a ni a, ka nun zawng zawng nen, ka theih chinah a tha ber zel ka tihsak ang che. I duh zawng tak In kan neih theihna turin ka theihtawpin ka tang anga, i suangtuahnate a tak ram chang turin ka bei ang” tih pahin ka hmuiah min rawn fawp a, muangchangin; rei tak min fawp a. “Kan tan chawl lovin ka bei zel ang” a ti sap a.

Ka mit atang mittui a rawn luang a, tuna ka mittui luang erawh a danglam hlak ta. A nghawngah ka kuah a, a hma aia uarin ka fawp a. Ka fawp a; ka fawp leh a; ka fawp bang thei lo.

“I van han lawmawm reuh tak” mittui nen ka nui hak hak a. “Nangmah hi a lawm thilpek a zawng a ka duh leh mamawh ber chu. Nang aia tha thilpek hi ka tan a awm leh tawh chuang lovang” ka lu ka thing a “ Chu thil ka lo hre reng lo chu min hrethiam ang che”

“Engtikah emaw chuan i duh ho chu i la nei vek ang” tiin min tiam a. Blanket inzawn chung chuan a aia nghetin min pawm bet a, a hmui lum ther ther chuan min rawn fawp leh a.

“Ka nei vek tawh zawk alawm”.  Moose a’n ka bianga min rawn liah takah chuan ka harhchhuak zawk a, ka blanket ken lai chu a rawn hnim a, a rawn nawk vak vak a.

Ka nui a, a dulah ka chul sak a. Kum tam liam tawh mahse ka hriatrengna chu tun hun ang maiin a la chiang a ni.

“He blanket i lo la kawl tha reng chu a mak hlemai” tih pahin River-a chu ka han melh chho a. Ani pawh chuan chu blanket chu a lo melh ve reng tho a, mahse engmah a sawi lo.