THE CHRISTMAS BLANKET (Chapter -3)

 

THE CHRISTMAS BLANKET

Chapter - 3

🎵 Christmas Eve - Gwen Stefani 🎵

“Min pek lai kha ka la hre reng a sin” nui sang chungin a puan chu ka chul a. “He puan lum hi chu awm lo se chu kha Christmas hun vawt zet kha ka tawrhchhuah theih pawh ka inring lo hial a ni” tih pahin ka nui hak hak a. “Kum dangah pawh kan hmang chhunzawm char char kha a nia. I la hre ve reng em? Thlasik a rawn thleng apiang mai khan ka la chhuak ziah a, han inkhuh lum hlun nan khan a van han tha tak em aw” ka tih lai chuan ka thinlung a rawn nghilh dup a. “Thilpek ka dawn tawh zawng zawngah hei aia hlu hi a awm lovang” ka ti sap a.

River-a lam ka hawi a, a Iris mitmu hring nalh zet mai chuan min lo en reng a.

Engmah sawi lo chuan a ding thut a. “Ka mu dawn” a ti a.

A ngaihna ka hre lo hle mai. Eng emaw sawi tuma ka an zuau lai chuan keipawh chu ka tho chhuak a “Lawkin….” ka ti a, ka lam hawia a lo inher leh takah chuan sawi tur em em pawh ka nei chuang lo a ni tih ka inhrechhuak a. Thil hmanlai tawh tak a ni. Kum 10 dawn a ral tawh, mahse engkim mai chu ka la theihnghilh lo. Inchhung min chei pui rawh ka ti ngam lo. Mahse lo awm ve se ka duh a ni. A chhan pawh ka hre bik chuang lo.

“Khumah sawn mu rawh” ngawi renga ka din takah chuan min rawn ti a. “Kei chu thutthlengah ka mu mai ang”

“Chutiang a ngai hleinem”

“Thutthleng a i mut ka remti hleinem Eliza”

Ka chil ka lem khalh a, ka lu ka bu a. “Awle, ka lawm e” tih pahin ka hnung lama bawm pahnih inhawng chu ka en a. “Ka lo bei rei deuh a nih pawhin i muhil ka tibuai em lovang che tiraw? Chei hram ka duh si a”

“Thlipui tleh karah pawh ka muhil thei tih i hriat kha” a ti hul hak a. “Moose lo kal rawh le” tiin a mal a beng thek thek a, ka lam a rawn hawi leh a. “Pawn a vawh em avangin inchhungah ka awm tir dawn a. Chhuatah a lo e a nih chuan min hrilh mai dawn nia” a ti a.

“Kei pawhin ka thian ve thei reng alawm” ka lo ti vat a.

“A ngai lovang” tih pahin min hawi san a. “Ka ui a nia lawm” tih leh mut a rual a.

A mutna chu ani ang tan chuan a tawngchham hle a, thutthleng ban chungah a ke a nghat a, a lukham pawh chu a te lam mah mah a ni a, a lian tha zawk chu khum lamah a awm daih avangin. A ban pakhatin a mit a hliah a, a zakhnuai zawn thleng blanket a sin bawk a. Rei lote a a thawk rik sek sek danah a muhil nghal mai a ni tih ka hria. Mipa chu khawi hmunah pawh,engtik hunah pawh an muhil thei zel mai ti a an sawi thin kha ka hrechhuak rum rum a.

Blanket chu a sirah fel fai takin ka thlep tha a, decoration light chu la chhuakin meichhemna chungah chuan ka zam phei a, plug ah ka vuaha, rawng pawl mawi tak rawn eng chhuak leh mei alh tek tek ri chu a inchawih hle a, pawna vur sur thawm zawng zawng nen. A dawtah a eng var chi chu ka zam leh a.

Chutia ka chei mawlh mawlh lai chuan ka rilru erawhin thil dang daih a ngaihtuah a. Kan khuaah let leh ka tum a, chutih lai chuan he Cabin ah hian River-a nen kan han intawng leh thut chu a ni mai si a. Khang kum 4 chhunga khawvel ka fanna leh ka zin kualna hrang hrang kha ka mumang ni ta se, kan in a ka khumah harhchhuak leh ta thut ila, chutiang ang chu ni maiin ka hria. 

Helai hmun hi ka in a ni lo tih chu ka hre tho nangin.

Mahse enga ti nge chutiang ang chuan ka feel si le? Enga ti nge ka tanna hmunah hian ka rilru leh taksa a hahdam em em si le?

In cheina tur mal tin ka lakchhuah rual chuan ngaihtuahna hran zel ka pu a, chu christmas blanket dawm chunga hun harsa tak ngaihtuah chhuah leh chu nuam ka ti bik hran lo. Kan inhauhna thu leh hla zawng zawng te, kar khat chhung vel River-a a ngawih tlat lai leh keiin a sawm chhuah phet ka tum laite.

Ka tana nasa taka bei thintu kha engtin nge a tel lovin ka chhuah theih le? Kha hmeichhia, a pasal mamawh ngawih ngawih thin leh a ui duat em em thintu kha engtin nge hetiang hi ka lo nih tak theih le?

Ka nu khan Woody Allen thusawi pakhat min hrilh chhawng thin a. ‘Pathian tih nui i duh a nih chuan i ruahmanna hrilh rawh’ tih hi.

Hmeichhe naupang ka nih lai kha chuan chu thu awmzia chu ka hrethiam viau khan ka inhre thin a, ka lo thang lian a ka hrethiam chho telh telh a, nupui nihna ka neih thleng pawh khan ka la hrethiam thin.

Mahse tunah erawh ka ruahmanna lo siam tawh chu ka ngaihtuah let a, ka ruahmanna awmze neih loh zia te, ka lo suangtuah ngai loh lamah daih ka nun a pawh kawih zia ka ngaihtuah chhuak a…..tunah chuan chu thu awmze dik tak chu ka hrethiam ta.

Pathian tana fiamthu hlimawm ber ka lo nih lek dawn hi.

A sira christmas blanket ka thleh fel ka dah chu ka la a, River-a mutna lam chu panin ka sin tir a. A muhil hmel chu ka en a, hmana ka pasal, ka inhriatchian tluka ka hriatchhian thin kha tunah chuan ka tan mihrang a ni ta. 

Heti mai hian kan inhmangaihna kan hloh a, tunah eng nge kan nih tak? Hmangaihna kalsantu mai kan ni em?

Mu tura khum a ka lawn hnu thleng pawhin chu zawhna chuan min umzui a, rei tak ka muhil thei lo. Rizai ah chuan River-a rim a nam veng veng a, kan pahniha kan lei dun ngei lukham chu ka kham a.

Coffee rim leh vawksa kan rim chuan ka muttui lai chu min rawn ti harh a. Men pawh meng mang lovin ka tho chhuak a, ham bai bai chungin ka zi mar a. Ka khum bul lawkah chuan Moose-a chuan lei chhuah that that chung hian min lo thlir reng a.

Ka mawza lum leh ka kawrlum ka ha a, puankawp a intuam hlun chungin tukveh atang pawn lam ka thlir a. Vur chu a la sur reng a, a vawt hle bawk. Boruak chuan ziaawm lam a la pan mang lo. Chhum a zing nasa in thli a la thaw vuk vuk a, hetiang reng hi chuan christmas hmain kan in pawh ka thleng hman miah lovang.

Choka a ka luh hmain bathroom ah ka lut hmasa a, ka sam te khuihin ka ha ka nawt bawk a. Darthlalangah chuan ka in en vang vang a. “Urlawkni chibai le” ka inti a.

Choka lamah River-a chuan vawksa ti a lo kang ri sar sar a. Kawr a ha lova vawt a ti velo ni awm tak hian a thlante chu a tla zawk niin ka hria. A dar, a ban leh a awm bawr te chu tum dang ai zawngin a lian tawh zawk a, jogger dum a ha a, a mal leh a mawngtam infun dan chu a nalh tawk chiah chiah khawp mai.

River-a hmel lam ka en chho a, min lo melh kur mai. A taksa vel ka melh lai chu a lo hmu chiang mai. “Vawt i va tih loh hmel bik ve” tiin zahzelah ka kawng kan dawm vel a.

Tawitein a nui sek a. “Ka workout zo deuh chiah a. Ka ti harh lo che maw?”

“Ti harh love” tih pahin coffee bel bul lam chu ka pan a. “Hei hi a in theih em ni?”

“Aw, lo inthlit mai rawh” tiin no awmna cabin lam chu a kawk zauh a, a rawngbawl lai chu a chhunzawm lehnghal a.

Coffee sa tha zet kan han in takah chuan ka taksa vawt ngut ngut pawh chu a rawn lum ve tan a. “Ka lawm e” tih pahin a lamah ka no chu kan chawikang zauh a.

A bu nghat a.

Artui a vawkeh a a kang lai chu ka thlir reng a, ka coffee no pang sa chu ka kut tihlum nan ka dawm reng bawk a. A siam dan chu ka duh thin dang ang tak kha a ni. A lo la hre ve reng a nih dawn hi.

“Hriatlawk miah lova mikhual dawn pawh i hnehsawh viau hi a” ka tih chuan a dar a chhin ak chauh a. “Christmas tree te saw i hmu em?” ka ti leh a, a bu leh nghat a.

“Mawi i ti em?”

“I chei hma atang tawh khan nalh ka ti sa alawm”

Nuai hak hak chungin ka lu ka thing a. “I van han nghal tak. Sawi ve mai la, a mawi i tih reng kha. A cheina zawng zawng deuh thaw saw nangma thlan vek a nia, i duh ber pawh saw ka khai saw” tiin kawngka lam ka kawk a. 

River-a pawn a artui kan lai a kang zo ta a, ka thlengah vawksa kan tlem nen min dah sak a. “Chhang thawp ur lum ka siam lo ania”

Lawm takin thleng chu ka lo la a. “Ka lawm e Eliza. Ka sawm chawp pawh ni lova inchhung min chei sak avangin”

“I sawi ang ngeiin ka bengchhenglo hle bawk. Kei pawh ka lawm e” ka ti a.

Zan hmasa a a lehkhabu chhiarna dawhkanah khan kan thleng ve ve chu kan chawi phei a, chaw ei hmain River-a chuan a kawr an ha veleh phawt a. A kawr chhana a tihrawl lian zet pawng talh mai chu hmuhnuam ka lo ti ru hle a.

“Englo…” kan ngawih vang vang hnu chuan ka han ti a. “Ti hian eng ber nge i thawh tak?”

“Boot barn(cowboy boot siamna) ah” tih pahin a artui kan chu a hmawm a, coffee a lem zui leh khalh a. “Pi Owens- i ta tur ka siam sak mek a. A fapa nupui neih hun a a present atan a duh a”

A lehkhabu chhuar bula a thil siam mek lai a dah chu ka hmu a. “I thing hman rawng chu nalh ka ti hle mai”

“Cedar thing a nih kha”

Bu nghat chungin ka coffee chu ka lem leh a. A thil siam lai chu ka en reng tho a. “Thing lam khawih chu em ni tun a i thawh ber chu?”

A dar a chhin ak a. “A chang changin. Ka nuam tih zawng a ni bawk a”

Chu chu ka ring. River-a hi chu lehkhazirmi a ni lem lova, a smart a, a themthiam bawk a, chu chu atan chuan eizawnna tling tak a ni. 

“A hlawk ve viau ang chu tiraw?” 

A dar a kan leh ak a. “Hlawk hran lo ve”

“Awmzia a va awm awm love”

“Ka nuam tih zawng thil a ni ka tih kha. Pi Owens-i tana a thlawn a ka siam sak tur a nih hi”

Ka lu ka thing a. “River, hetiang thilte hi chu a chakkhai ringawt pawh a to tham dawn nen, man man deuhin i hralh thei ang chu”

“Kum tam tak chhung Pi Owen-i hian thil tam tak min tihsak tawh a” tihpahin min rawn en a. “Kan tan. I la hre ve reng ang chu maw?”

Engmah ka sawi zawm tawh lo. A chhan chu ka la hriatchian em vang a ni. A pasal Pu Leila Owens hi High school ka zawh hlim a an dawr liana hna min pe tu a ni a, eitur hralh bang pawh vawi tam in lama min hawn tir thintu a ni. Chhiar dawn ila ka chhiar seng tawh lovang.

“Chumi piah lamah chuan Skidder (thingkih sa motor lian tak taka lo hnuk sawntu) hna ka thawk tel thin a”

“Skidder a..!? Tradesmen Certificate i neih hma chu ka chhawr dawn lo che a ti khan ka hre sia”

“Ti chiang e”

“A nih chuan engtin nge chutiang hnate chu i thawh sak theih zawk?”

“Certificate ka nei tawh alawm” awlsam deuh hian a ti a. Chutiang certificate nei tur chuan bei ve deuh hlek angai thin a, a hma pawhin vawi tam tak ka hrilh thin. Mahse amah ber hian neih kher a tulna ka hre lo a ti tlat zel thin kha a nia. 

“Chutia law..? Tradesman dik tak i ni tawh tihna a ni maw?”

A bu nghat a

“A van ropui em em River ! Ka han tih nachhan chuh….” la ang reng chung chuan ka lu ka thing a “I ti thei em em ang tih kha ka ring tlat thin reng a ni. Ka ring-....”

“Ka ti ang tih erawh i ring ngai lovang”

Ka ngawi ta hmak a.

“A pawi lo ve. Kei pawn ka inring bik hleinem. Mahse hun hi ka duh dan a hmang thei ka ni tih ka inhriatchhuah takah chuan awmze nei tak a hman kha ka duh a ni”

“Ka chhuang hlemai che” ka ti a. River-a chuan chiang zet hian min rawn en a. A mitmengah chuan lawm lohna leh riru natna tam tak a lang tih ka feel thei. Ka hawi chhuak ngam chiah tawh lo. A thin a phu deuh dup dup a, melh tur ka zawng ruai bawk. 

Aw then kharh pahin “Nang zawk eng nge i tih takzel?” tiin min zawt a. “I duh ang ngei chuan khawvel chu i fang ta em?”

Ka nui a. “A then a zarte chu fang ve e”

“A nuam bawk em?” min rawn en vang vanga.

“Thil mak deuhte, thil mawi deuh te, ropui leh dangdai deuhtein an khat a ni mai” tiin ka coffee no chu ka en rauh rauh a. “A chang chuan mahni chauh a awmte, mahni chauha zinte chu a khawharthlak thin. Mahse ram mawi tak leh tlang mawi takte, chaw tui tak ei leh rimawi ka la hriat ngai loh mawi tak tak ngaihthlakte chuan min chhawk dam sawng sawng hian ka hre thin”

River-a chuan nui sang chungin min en reng a. A mitmengah zawhna tam tak a awm a, mahse a sawichhuak kher lo. Kan ngawih vang vang hnu chuan “I nu leh pa an tha maw?” ka ti a. Engtin mah min chhang lo. A ngawi reng a.

Kan insang mar deuh a “Ka…kan inbiak tak ngai lohna pawh a rei ta hlemai. Ka chhuah atanga kum khat chhung vel kha chu min rawn be ve fo thin a, mahse min rawn be tlem telh telh a, tunah phei chuan min rawn be ngai tawh lo. Kan inkara rawn inrawlh vak loh an duh te pawh a ni ang. Keini lah kan lo inthen bawk si a….”

Ka tawng laklawh lai chuan River-a chu a ding chhuak thut a, a thutna chair pawh chu hnunglamah a tawlh dawrh a.

“River..?” ka ti vak a, mahse hria awm pawn a lang lo. A thleng leh ka thleng ruak chu a rawn la a, sil hmun lamah keng pheiin a sil mawlh mawlh a. Kei pawh chu a bulah pheiin ka va ding ve a. “Sawi loh tur thil ka sawi em ni?”

“An thi tawh Eliza !” a rawn ti thawt a. A mit a chhing a; thawk a la vang vang a. “Chu chu tun a thil nih dan a ni” muang ban chalh hian a ti a.

“Ka….” ka chil ka lem khawlh a. “Chutiang ka lo ngaihtuah lo va” tiin ka mit ka chhing a. “Eng nge an chungah thleng a?”

River-a chu a insut feih a, a thil sil lai chu a sil mawlh mawlh a. “Ka pa chu nasa takin a damlo a, a thih tak hnu chuan ka nu chu a tel lovin a nung zo lova, thla 7 hnuah a zui ve ta a ni”

Ka inrin hmain ka mittui a rawn luang chhuak a, ka thunun zo lo. Ka hmui ka hu pa a, ka lu ka thing nawk nawk a. Engtin nge? Engtin nge chutiang a thlen theih? Engtin laiin nge a thlen?”

Enga tinge ka chhungte pawhin min hrilh miah loh?

Enga tinge river-a pawn min rawn hrilh ve loh ?

Zawh tuma ka an lai tak chuan a kut a rawn phar chhuak a. “Khawngaihin Eliza, kan sawi rih lo-” a chil a lem khawlh a, a awm danah a la tuar hle a ni tih hai rual a ni lo.

Muangchangin a inher a, a thil sil lai bawk chu a chhunzawm leh a. Muangchangin a thil silna bulah chuan ka va ding a, “Ka lo hru hul ang” tih pahin towel chu ka la a, a sil zawh apiang chu ka lo hru hul zel a. Chumi tuk pum leh chawhnu lam thlengin kan tawng ta meuh lo.

Radio ah khawchin thlirna a ngaithla reng a, va tihbuai rih loh chu ka tih theih tha ber a ni tih ka hria. Radio lah chuan chanchin tha lam reng reng an la puang lo. Vur sur a la tam em avangin tumah pawn chhuah loh tur an la ti mauh mai si. An rin dan chuan zanin lamah thli a ziaawm anga, vur sur pawh a ziaawm deuh turah an ngai. A thleng dik a nih chuan Christmas chu kan in ngeiah ka hman theih hmel e.

Mahse hunin a la hril dawn chauh….

A radio a off hnu pawh chuan eng eng emaw tiin River-a chu a la intibuai rih hle a. A changin a hna a thawk a, a changin lehkhabu a chhiar leh zeuh a, a changin Moose-a a chheih kual bawk a, kei erawh min be lem lo. Ngawi renga chutia tut tlawk tlawk chu ka ning hle a, lehkhabute chu ka chhiar ve mai dawn nge ka hre lo.

Zawhna pangai deuh ka zawt ve emaw ka intih laiin zawhna pawi ber mai ka zawt a lo ni reng bawk si. River-a leh a pa inkawmngaih zia leh inngaih zia chu a khawpum hriat a ni a, chu chu River-a pawhin a tuar na ta reng a. Chung thil chuan ka ngaihtuahna a luah nileng a, ka awm pawh a nuam thei lo. Kan lo awm ho tawh dan hrang hrangte, River a’n a tet lai chanchin min hrilh thinte, a fapa an hmangaih zia leh kei pawh min duat ziate chu ka ngaihtuah chhuak awn awn a.

Phone a min lo biak hnuhnun ber tum a ka chuanna tur Rel nan hman loh ka hlauh avanga phone ka dah tawp tumte chu ka hrechhuak a. Chu chu anmahni ka hriatrengna hnuhnung ber tur a ni tih ka hre si lo. Kan inbiak hnuhnunna ber tur a ni tih lah ka hre si lo.

Chu cabin lian lo takah chuan nileng mai chuan boruak a rit em em a, christmas boruak siam tura ka light cheite pawh chuan awmzia an nei tlem hlemai. Mithi vuina hmun a awm ang mai niin ka inhria.

Chuvang tepawh chu a ni ang, ni a tlak meuh chuan ka chau riau hian ka inhriaa, khum a mut vat vat a chu ni chu ral tir vat vat ka duh. Thli chu a ri vuk vuk a, a rawn na tial tial a, in chu a sawi der der a. Moose-a pawh a bawhna a tanga rawn tho chhuakin a bau vak vak a, eng emaw tak a thleng dawn niin a lang.

“Khai lehh….!” River a’n a tih rual chuan light chu a thim nghal hmak a.

“Tinge a..? Current a awm lo em ni?” ka lo ti vat a.

“Awm lo chu a nih hmel khawp mai” tih pahin a thaw hak a. “A awm lo lem lo ve. Thli tleh dan ngaihtuah chuan nizan a kan la eng tluan theite kha mak ka ti viau zawk a. Bati leh torch light ka nei tho a, kan zawng a nge” tih pah chuan chhuar a dap nghal ruk ruk a.

Bati a rawn chhi diat diat a, “Ti khan kei chu nuam ka ti daih zawk” ka ti a.

River-a chu a nui hak a. “Thil tha lo a thlen chang pawh hian lawmna tur tawk thil hi chu a awm ve zel a nia” a ti a. Dawhkan bulah thuin a lehkhabu chhiar lai chu a la kang a, bati eng hnuaiah chuan a chhiar chhunzawm leh a.

Thil ka hrechhuak thut mai. Ka tho thut a “Zanin hi urlawk zan. Thil eng emaw tak kan tih angai” ka ti hluai a.

“Eng thil maw?”

Kan ngaihtuah vang vanga. Christmas movie en turin TV a nei bawk si lo. Game khelh han ti ila chutiang thil engmah a nei awm si lo va. “Radio on la. Christmas hla te pawh an play tawh maithei a sin. Chuan chhang te kan ur anga”

“Chang a ur theih loh. Current a awm loh hi” tih pah chuan a lehkhabu bawk chu a bih leh daih a.

Ka bula lukham chu ka la lawk a, “Hey…!” tih leh vawm ka rual a. 

River-a chuan a lo man chat a. Nui hak chungin lukham chu a zakzeh a, a lehkhabu khup pahin ka lam a rawn hawi a. “Current awm pawh ni se chhang ur nana thil tangkai engmah ka nei hleinem” a ti a.

Ka meng rang ralh a. “Awle, chhang ur chu kan cancel ang. A nih thil dang hlimawm deuh tur eng nge i neih?”

Eng emaw ngaihtuah tih hriat tak hian River-a chu an thaw ham ham a, eng emaw hriat chhuah a nei a ni. “Eggnog (artui leh bawnghnute atanga siam Zu) ka nei a sin. Rum pawh”

“A tha e. Khawi, Christmas chu i han urlawk teh ang hming” tiin phur takin ka thutna atang chuan ka tho chhuak a.