The Bride (S02 Ch 11- 26)

 

Chapter -11



"Raine, damdawiinah an dah" ti a ka sawi laite chuan ka hmel chu hlauhthawnnain a khat a. Caleb-a pawh chu a rawn meng phawk nghal kawk a. "I kal vat ang" tiin ka banah min rawn vuana, elevator awmna lam min pan pui hlawk hlawka. "Min lo hrethiam phawt mai teh u. Emergency thil a ni e. Kan rawn la tlawh leh zawk ang che u" Emily leh Drake-a te nupa bulah chuan Caleb-a chuan a ti a, elevator lamah chuan kan inzui lut a. Ian-a chuan min rawn thlir reng a, kan invuan a hmuh chuan a hmel a danglam deuhin ka hria. Mahse elevator kawngka a inkhar tak avangin kan inhmu zui thei ta lo.


Kaawng tluan chuan ka rilruin ka tawngtai mawlh mawlh reng a, ka naute chungah chuan eng thil chiah nge uthleng tih pawh chiangin ka la hre si lo. Ka hmel hlauhthawhna a khat chu Caleb-a chuan a rawn hmu a. "Hlauthawng reng reng suh. Engtin mah a awm lovang" a rawn ti a. Thut tawite mah ni se chu lek pawh chu ka thlamuan pui a ni.



Kum 6 zet ka lo awrh tawh Lunghlu leh sapphire a siam ka thi awrh lai chu ka khawih neuh neuh renga. Ka hringnun chu kum 6 chauh la hmang mah ila an mahni avang chuan ka hlim em em reng a, an chungah thil tha lo engmah a thlen ka phal lo.


Kum li mi lek ala nih laiin park-ah kan len pui a. Naupang dang ho karah infiam ve in a tlankual a, a nui awr awr renga. Chutih lai chuan leiah a thingthi hnawk a, nikhawhreloin a awm ta mai a. Rang takin damdawiin kan pan pui a, doctor chuan ashtma chak chi a nih thu leh minutes rei lo te in tlai hman ilang chuan an chhan hman a rin loh thu min hrilh a. Inhalers hmang turin ala naupang lutuk si a, thlan tur dang kan nei lo. Kawng awm chhun chu mi anga a tlan ve vak vak lohte, a nuih ve vak vak lohte chu a ni maia.


Damdawiin kan tlen rual rual chuang a rang a rangin Car atang ka tlan chhuak a, reception-ah chuan Raine awmna ka zawt vat a, min hrilh zawh hnu chuan elevator min kawh hmuh a. rang takin Caleb-a nen chuan kan lut dun vata.


Elevator atanga kan chhuak chiah tihah Pi Smith-i steelc chair a lo thu chu ka va hmu vata. "Khawiah nge a awm?" tiin ka va zawt nghala.


"Pindanah an dah rih. Doctor in a tha tawh a ti e. Kan va hmu dawn nia" a tih takah chuan ka thaw huai a, hnar a hlit phawi ang hlauh a ni. Caleb-a kutah ka vuana, a lam ka hawi a. Hrethiam takin a lo bu nghat a. Pi Smith-i hoin pindan lamah chuan kan inzui lut a.


Nau lo awm tur bika kan chhor Sophia-i chu waiting room-ah a lo thu ran a, min hmuh veleh a rawn tho chhuak a. A kutah vuanin ka bu nghat a, engmah sawi lovin pindan atang chuan a chhuak nghal vata. Ryker-a a thu tlat a, kum
mi lek la ni mahse a unaunu hi a ngaihtuah em em reng a, chu chu a chanvoah a ngai ve tlat a ni.


"Keima thiam loh vek hi a nia" inthiam lo tak chungin Ryker-a chuan a rawn ti tham chial a


"Eng vang ngawtin maw?" tiin a lu-ah ka va dawm a. Inthlahrung tak chung leh mittui tling pam chungin a rawn hawi chhuaka.


"A naute lem ngainat ber kha ka laksak a, min pe leh rawh tiin min um vaka. A thusawi kha ka ngaihthlak sak lova, chuanin leiah a tlu ta a ni" tiin a thiam ang tawkin a han sawifiah ve a, a mittui chu a hru zauhva.


"Bawihte, i thiam loh a ni reng reng hleinem. In infiam a, i lo theihnghilh palh hlauh a nih chu. A lehpekah chuan i fimkhur tawh dawn alawm tiraw?" tiin ka hnem a, a bu ve nghat nghata. A chalah ka fawh saka. "I unaunu a nihna angin i ngaihtuah em em thin a, i venghim tlat thin ang tih pawh ka ring. Mahse chumi avang chuan tihsual palh i nei thei lo tihna a ni chuang hleinem. Kan tihsualte atang hian alawm kan inzir zawk thin ni" tiin ka fuih a.




"Tirawh le, i va lut ang. I nauin a lo nghak reng che ania" tiin ka kai a, kawngka chu hawngin Raine mutna khum lam chu kan pan a. Khum leh a bang zawng zawng chu rawng senno vek a chei a ni a, han en mai pawhin hmeichhe naupang damlo awmna tur bik a siam a ni tih a hriat theih nghala.


"Anu..." tiin aw chhang tuau hian Raine chuan min rawn ko a. A bulah va kalin a chalah ka fawh saka. "Anu hi lungphu chawlin min tluk tir lo chuah alawm" tiin a biang senno chek chu ka chul saka. "Ry..Ry.." tiin inkiltawih taka kawngkhar bula ding Ryker-a chu a va ko a. Kun nghial chungin a rawn phei a, Raine chuan 'inthlahrunna tur engmah a awm lo a nia' ti ni awm takin a biangah a lo chul saka.


An pahnih a hun pek dun ka duh avangin pawnah ka lo va chhuak a, Caleb-a chuan Sophia-i hnenah thil awm dan a lo zawt fiah mek a. Sophia-i chu en reng reng pawhin a nervous hle a ni tih a hriat theih a. "Thutthleng a ka homework ka tih laiin Ryker-an Raine a ko vak thawm ka hria a. Rang takin ka va tlan phei a, Raine chu chhuatah tlu in a lo thaw tawk tawka. A inhaler ka zawn sak vata, mahse a lo ruak tawh si a. 911 ka call zawhah Pi Smith-i ka ko nghal vat a ni" tiin thil thlen dan a lo sawifiah mek a.


A darah va vuanin nui sang hmel pu chungin "Hlauhthawnna tur a awm tawh lo ve. A tlai tawh si a, Pi Smith-i rualin haw ve ta mai che" ka ti a, tha takin kan in mangtha a.



*** *** ***


A tuk lawkah Raine pawh damdawiin atangin kan la chhuak a, kan pathumin hlim tlang takin kan awm ho leh ta. School a Ryker-a ka thlah zwh hnuah dan pangai angin Cafe lam ka pan a. Caleb-a sumdawnna thil a a buai vanglai a ni a, meeting pawimawh an neih reng avangin Bus chan mai awlsam zawk a ka hriat avangin Bus stand lam panin ka kal a.


Chutia ka kal lai chuan ka sirah Car dum rawn tlanin ka bulah tak a rawn ding a, driver seat atanga Ian-a rawn chhuak lai chu ka lo thlir reng a, ka hrawk te chu thlaler ang maiin a ro nghal huam huam a. A thawmhnaw hak zawng zawng nen chuan uluk takin ka lo en a, ka lo hisap hman ti ila tawng mawi lo a ni lem lovang.


'Engthil nge maw i ngaihtuah tak le Sapphire? Ani te hi chu mi pa a nih bakah Caleb-a bussiness partner a ni tih hre ta che' tiin ka inhau nghal mawlh mawlh a.


"Khawiah nge i kal dawn a?" min rawn ti a.


"Oh..umm, ka haw dawn a" ka ti a. "Caleb a'n min rawn lam hman lova, vawiin chu bus in ka haw mai ang"


"Ka thlah thei tho che alawm" tiin a Car lam chu a melh zeuh a, hnial ka duh viau nagin ka tan thil awlsam zawh a lo ni bawk nen, ka nuih suk a, Car-ah chuan ka lut ve mai a.


"Khawi laiah nge in awm?" ti a min zawh chuan "Maple street" tiin ka lo chhanga.


"A va tha leh zel ve. Chulai hmunah tho chuan Nathan-a thian pakhat a damlo a, kan kan lo tum mek a" a rawn ti a. Hnung lam ka hawi a, a hnung seat-ah chuan Nathan-a a lo thu reng a. "Ohh...!" tiin ka va nuih saka.


"Enga tinge Car i neih lova? Tunlai angah chuan mitinin an nei vek tawh sia" tiin Ian-a chuan min rawn zawt a.


'Caleb-a hian a phal tlat lo alawm" ka mamawh zia ka ngaihtuah a, ka sawi zawng ringawt pawh hian ka thin a rim thei.


"Eng nga tinge a phalna lak kher angai em ni?"


"Chutiang lam pawh a ni lo. Kum 6 liam ta khan Car in ka accident a, khata tang khan Caleb-a hian min hlauhthawn pui tlat tawh a" ka ti a. Ian-a hmel chu thlemin a rawn danglam deuh a, mahse rei a ni lo. "A atthlak khawp mai. Ka rawn lam ziah thei tho che alawm a ti tlat a, mahse hei a hman lo tan ta chu a nih der hi" ka ti a. Kar lovah kan apartment pawh kan thleng ta der a. Ian-a chuan GPS hmangin an kal tumna lai chu a lo set ve bawk a. Min rawn en a "Kan rawn kal tumna chu in in tho hi ava nih hmel ve" min rawn ti a.


Elevator-ah Ian-a leh Nathan-a nen kan awmna floor lam panin kan chho a, a mitmeng pawl nalh tak mai chuan eng emaw ti tak hian ka thinlung a dek a, a bula ka awm chuan zam rukna leh phur rukna ka nei kawp ziah bawk.


"Nathan, Raine kan turin maw i lo kal a?" tiin ka zawt a, kan in kawngkhar pawh chu kan thleng nghala.


"Raine maw? Ryker-a i ti emaw ka lo tia?" tiin Ian-a chuan a o zawt ve vat bawka. "Ryker-a chu Raine unaupa a nia" ka lo ti a.


"A nih an eng tur nge i nih?" tiin Ian-a chuan min rawn zawt a. Kawngkhar chu ka hawng a. "An--" ti a chhan ka tum lai tak chuan naupang ho thawm a rawn ri a.


"Anuuuu...."

Chapter -12



* Ian's POV *


Nipui chawhnu ni tlak dawn lam tawh a ni a. Hnim chungah ka mu a, kamis van rawng leh kekawr var ka ha a. Ka kut pahnih suih zawmin ka chal ka dawm a, ni in ka taksa a rawn emna chu a nuam veng veng a. Thlifim thaw heuh heuh leh Sava chiar nauh nauh ri chuan boruak a ti thawveng vawng vawnga.



"Apa.., apa. Anu in chocolate min pe ve duh lo a nia" tiin ka fanu chu a rawn kal tau nghawng nghawng a. Kei pawh chu ka mutna atang chuan ka tho chhuaka. "Tukinah khan i ei tawh a ni lawmni?" tiin a chal hmasam chu ka hui kian saka.


"Aw.., mahse ka duh leh alawm" tiin a tum buau a. Hetiang hmel a put hi chuan ka lainat thar tlat zela, huat sak tur hi kan zawng ruai zel mai zawng a nih hi. Ka fanu chu ka pawm a, leiah chuan Indian ho thut dan angin ka thut pui a, ka malchungah ka thut tira. Eng emaw ngaihtuah ngun hmel deuh hian kan hawi vang vanga. "A van buaithlak dawn ve aw..! Engtin nge kan tih tak ang?"


"Helai ramhuaite hian anu a lo hek leh tawh elaw?" tiin ka hmangaih-i chu kan bulah a rawn phei a, ka fapa a rawn kai tel bawka. A sam dum hlap mai chu ni zungin a rawn kap tel ser ser a, a biang no chek mai chu a mawi leh zual a. A kawr senno hak pan tak mai chu thlifim chuan a rawn chem leng hlap hlap a, a hmel ngaihnobei zet mai ka hmuh hi chuan chhan awm lo hian ka lo nui leh ver ver thin.


“Niang chu mawle” tiin ka lo chhanga. Alison-i chu ka bulah chiah rawn thuin kan fapa chu a pawm a, ka malpuiah min rawn vuana.


“Tih dan tur ka hria” ka han ti hlut a. Alison-i chuan nuihzat hmel lek lek hian min rawn en a. “Engtin?” phur tak mai hian ka fanu chuan a lo ti vata.


“I pum chhunga mi chocolate chu keiman ka ei anga, chuan ka pe ve che anga” ka ti a. Ka thusawi a hriatthiam hmain ka man lawka, van lamah ka theh kang a, a pum chu ka hmai a nawrin ka ei sak der a. A za ti nui awr awr ri chu ka fapa chuan a lo chhunzawm vat a, ka bul a awm ve hmeichhia, ka phel leh lam ti a a hming ka vuah pawh chu mawi zet hian a o nui ve hak hak bawk a. Chung Sava chiap ri zawng zawngte nen chuan rimawi ngaihnawm tak a van ni tehreng em.



Chutiang chu han ni ngat se chuan he khawvel a mipa hlim ber hi ka van ni dawn em. Tunah erawh ka fapa leh ka fanuin nui var var chunga an nu Alison-i an kuah lai lo thlir mai loh chu tih theih ka la nei rih si lo. An mitmeng pawl ram maite chu ka mit ang chiah chiah a ni a, hai rual a ni lo. Ka fate ngei ka hmu a, ka thinphut dan pawh a danglam zo ta.


Alison-i bulah chuan ka thingthi ve a, chung naupang pahnihte erawh chuan mak ti hmel angreng tak hian min em thunga. An banah vuanin ka lamah ka pawt hnai a, ka awmah ka pawm vawng vawnga. Kei hi an pa ka nih thu leh khang kum 6 chhung khan second tin mai hian ka thinlung an luah reng thu ka hrilh a.


Ka infiam pui a, thilpekte leisakin kan nui ho a, thil an tihsual pawhin tha takin ka hrilhfiah bawka. Ka fate ka en chuan ka lo than len tak hnua ka la suangtuah phak ngai loh thil ka hmu tih ka inhria a, an mahni ang mai a naupan that leh ka chak a, mahse kei erawh tunah chuan pa ka lo ni ta.


Pa ka ni. Mahse an tana ‘Pa’ tih hlutna pe chhuak turin eng thil mah ka ti lova, an mahni hringtu ka ni ve a ni tih chauh mai loh chu. An thisen zamah chuan ka thisen a kal tel ve a, mahse chung zawng zawng aia min ti hlimtu zawk chu Alison-i nena kan fate liau liau an ni tih hi a ni.


Chu thil chuan kan inneih hma zana thil thleng kha ka mang mai a ni lo tih a rawn nemnghet a, engkim kha a tak vek a ni.


Naupang kut nem tak mai chuan ka bing mup mup na ata chu min ti harh a. Ka mit chu ka hma a hmeichhe naupang ding, ka biang rawn khawih mektu mit nen chuan a inthlunzawm ran a. Ka inhriatchhuah leh meuh chuan ka tap a ni tih ka inhrechhuak nghala.


Ni e, Ian Blake Cullen-a chu a tap mek a ni. Ka mittui chu hlimna vang nge lungngaihna vang a nih tih pawh ka hre lo.


“Tap suh” tih paha a lu a thin zawng chuan a vawk mei sap chu a inthen lep lep a. A dawt leh a a tih chu ka mittui min rawn hruk sak nia.


Ka fanu ngei chuan ka nghawngah min rawn kuah a, ka darah a khabe a rawn nghat a nih chu mawle. Ka thinlung chu hlimna avangin a puak darh a, hun khawh ral ka phal lo. Rang takin ka lo kuah let a, ka pawm vawng vawng a.


Ka kuah a ni. A vawikhatna atan ka fanu ka kuah ve ta.


Hrawk thian kharh ri chuan khawvel tak takah min thangharh tir ta. Ka awmdan avanga Alison-i hrilhai dan tur zia reng ka lo ngaihtuah lo.Thinlung rit nghulh chungin ka fanu chu ka pawm sawn a, nuih var var chungin “Ka tap hleinem bawihte. Ka mitah eng emaw a lut a” tiin ka mittui chu ka hru hul a.


“Raine a nih kha” tiin mipa naupang chuan a rawn pawt sawn a, a lamah a pawt phei a. Chiang deuh hian min rawn en kalh a. A awmdan chu ka tet lai ang chiah a ni. Keimah ang chiahin a farnu a chhan a ni tih ka hriat chuan inchhuang takin ka nui chhuaka.


“Raine maw..! Hmeltha tan chuan hming mawi tak a nih chu” tiin min lo nuih let mek tu ka fanu chu ka va nuih a. “A nih nang ve tunge i hming?” tiin ka fapa lam chu ka hawi veleh thunga.


“Ryker” tiin a awm chu tlemin a rawn ti pauh deuh a. “Mipa pa tak hming atan hming pa tak a nih chu” tiin ka nuih a, min nuih ve lo. Tu emaw chuan a rawn len hunah min chhun dawn hlemai le.


“I hmai chu rawn phih fai ta che” Alison-i...ka tih, Sapphire-i chuan min rawn ti a. Ding chhuakin a ngaihna hre lo zet hian ka en a. “I mit a thil a luh thu kha i sawi sia, i hmai chu rawn phih fai la” a rawn tih leh takah chuan ka bu nghata.


Nathan-a chuan min rawn kai a, inchhung lamah kan inzui lut a. In chu a lian lo nangin a fai hle a. “Dada” tiin Nathan-a chuan zawitein min rawn ko a. A thisen zamah ka thisen a luang ve lo va, mahse ka fapa a ni a, Ryker-a ka hmuh a ka feeling ang chiah tho kha a laka ka feeling a ni. A rawn pian hlim atangin ka pawm a, ka fapa a nih lohna a awm reng reng lo.


“Engmah hlauh tur a awm lo a nia Nate. Hei hi i thiante in a ni a, Sapphire-i pawh i ngainat em em kha” tiin a chalah ka chul a, nui var var chungin a bu nghat a. Tunah chuan pangai takin a thu ve thei ta.


“In thianpa Nathan-a hi in pindanah va hruai ula, va infiam rawh u” Sapphire i’n a tih chuan phur takin an tlan phei am nui var var chungin an inkai a. A bak chu kan hmu tawh lo.


“Coffee i in duh angem?” choka atang Alison-i chuan min rawn ti a, ka thutna atang chuan amah ka hmu thei lo. “A tih chi khawp ang chu” tiin ka lo chhanga. Chutih lai chuan ruah a rawn baw hawk hawk a, thovin balcony lamah ka tei phei a.


Balcony a ka dah chhuah a piang hian Alison-i hnena ka hmeichhe hmangaih dik tak ka hrilh tum kha ka hrechhuak leh thin. Hun hi pawh kir leh ka chak thin. Alison-i kha lo nghak deuh hlek ni ila tunahte hian inchhir hauh lovin hringnun ka hmang ve thei mai tur. Ka fate bulah hun hmang ve in an tawng theih hmasak ber laite, kal an thiam tan tirh ni leh an hun tawn zawng zawngahte an kiangah ka awm ve thei tur hi a nia.


“Coffee” Alison-i chuan ka sir lam atang a rawn ti a, no hringah Coffee a rawn keng a. “A lan dan chuan thlipui a hnaih hmel khawp mai” tiin van chhum chhap mup mai chu a thlir a. “Nia” tiin ka lo chhang a. Heng thlipuite hi chu ka chhung rila thlipui tleh mek nen chuan tehkhin rual a ni lo.


Ding chungin ngawi rengin Coffee kan in dun a, a tu ve ve mah kan inbe lo. Ka mit sir in ka va melh leh zeuh thin a, a mo thuam nen a a rawn luh lai ai mah khan a hmeltha zualin ka hria.


Theih nise a malchunga lu nghah a tah hawm hawm ka chak a ni. Khang kum kal ta a ka tawtna, khawharna leh mal ngawih ngawihna zawng zawngte kha bun ruah vek ka duh a, ka hmaah ngei, hrisel tha leh him taka a rawn lan leh avangin lawm taka tah ka duh a ni. Amah ni reng chunga midang a lo nih tak avagin tah ka duh a, min hriat tawh loh avangin tah ka duh a ni. Ka fate ngei ngei pawh ka fate anga ka koh theih loh avangin tah ka duh a, ka tah theih loh avang hian tah hawm hawm ka duh a ni.


“Thil eng emaw ka zawt thei che angem?” tiin ka lam hawiin a rawn inher a. “Tun hmain ka intawng tawh em?” tiin in min rawn zawt a.


“Aw tawng tawh e” tiin ngaihtuah pawh ngaihtuah mumal hman lovin ka chhang a. A nui hak a, ani erawh mak tiin a lo phawk hru a. “Emily te nau lawmnaah kan intawng tawh a, chumi hma chuan Cafe-ah khan kan intawng tawh bawk a. Chumi hma leh chuan kan inah in rawn kal tawh bawk a, chumi hma lehah office-ah kan inhmuh tawh bawk kha” tiin ka chhang leh a. A lo nui haka. “Chumi hma chuan mawle. Ka tih tak zawk chu office a kan inhmuh hma khan”


“Ka hre tawh bik nang. Tinge chu chu min zawh a?” tiin ka zawt let a. “A chhan chu i mit hi...” tiin a ngawi a, ka mitah min rawn en a. Chiang zetin eng emaw hmuhchhuah tum ang mai hian ka mit chu a rawn en a. A hrechhuak dawn takngial a ka hriat avangin ka hawisawn vata. “Enga tinge ka mit chu?” ka ti daih a.


“Ka hmuh tawh hnu a ang lutuk a” tiin thil dang daih sawi duh angin a awm leh daih a.


“Mitmu pawlte chu mi tam tak kan awm alawm. I fate ngei ang te pawh. A nih leh zawhna pakhat ka zawt ve thei che angem?” tiin a mitah ka va en a. Ka zawhna tur chu a chhanna ka hria sa a ni nachungin zawh ve tal erawh ka duh si a.


“I mitmu rawng a uk a, Caleb-a pawh chu ti tho. Engtin nge in fate hi an mitmu a pawl daih thung si a?” ti a ka zawh lai reng pawh chuan chhungrilah ka na vawng vawng a. Lai tih hriat tak hian a rawn sen tawn tawn a, avan han duhawm tak em.


“Ani te chu an pa a ni hleinem. Ka rin dan chuan ka pasal chu a mitmu a pawl a nih ka ring” ti a nui sen sen chungin min rawn en a. “I mitmu ang hian” a tih lai chuan thawk ka lo la hawka. An pa ngei ka nih thu ka sawi chhuah lohna turin ka insum hram hram a.



END OF CHAPTER -12

EXTRA -2

Chawlhlawk lai a ni a, tleirawl ho chu phul chungah chuan infiamin an rawn tlan kuala. A sir thutthleng a thu nu pakhat thawmhnaw pawl ha chuan a tarmit chu tlemin an ti hniam deuh a, ani pawh eng tik lai emaw kha chuan an ni ang saw a ni ve thin tih a ngaihtuah rauh rauh a.


Mahse chu aia a ngaihtuah ber zawk erawh chu zanin party naah eng nge a hak ang tih a ni. A hma hun tur helhkhamin a awm mek a, chu mi chinfelna tha ber chu pawisa a ni. A neih theihna tur a nih chuan tih hreh a nei lo. A ngaihtuahna kal kual a talangin a bulah thu ve an awm a ni tih pawh a lo hre lo a.


“Vanglai i ngai a ni maw?” nui lek lek hian a bul a rawn thu nu chuan a rawn ti a. A bul a lo thu ve nu lam chu a hawi vat a. “I lo buai ve na tur a awm lo ve” a tih khum hmaka. Chu nu chu a nui hak a. “A nih leh ka lo buai ve na tur lam kan sawi dawn em ni ang?” tiin a bag atang emvelope a phawrh a, a rawn pe a.


Chu nu chuan a tin sei zet hmang chuan envelope chu a pawt thler a, a chhung a lehkha intuam uluk zet chu a phawrh chhuaka.


“A lan dan chuan Zawngi chu kum 6 zet a lo buai tawh a nih hmel” tih pahin a cigarette a tana. A meizial chu an fawp vang vang, a hnar khu chhuah hlat hlat a.


Chu nu chuan mei khu chu a ngaithei lo tih hriat tak hian a hnar a lo hup vat a, mahse a ngaihtuahna erawh envelope chhung a hmeichhe sam dum, naute kum 1 vel mi pawm lai thlalakah chuan a awm daih thung a. Thlalak chu kum 5 vel a upa a ni tawh a, naute a han hmu chiah chu a meng kawk a, a nui zui nghala.


“Fa a nei tawh a nih hi” a han ti a.


“Pakhat chauh a ni hleinem” chu nu chuan a lo ti leh vata.


“Buaina tur a awm lo. Ian a’n mipa dang lakah fa a nei a ni tih a hriatchhuah hunah chuan a kalsan vang vang tawh mai ang” tiin a nui var var a. “Engmah kan tih ve ngai lovin harsatna chu sutkian a ni dawn e” a ti a. A bul a thu nuihza insum zo lo nui awr awr thawm avang chuan a nui hmel pawh a reh leh vata.


“I hlim lai ka tih reh sak dawn che avangin min lo hrethiam la, mipa dang laka a fate an ni reng reng hleinem” tiin a nui hak hak a. “Amaherawh chu he Zawngi leh a fate hi ka that chimit vek dawn a ni” tiin thinrim zet hian a inhrosa kuk kuk a. “Mahse chumi hma chuan ka tichhe leh vek phawt ang. A hma ang bawk khan a rilru ka ti kehsawm sak leh vek anga, chu mi zawhah nangin i duhtawkin i lo ching phar ve leh thung tawh dawn nia. . Tunah rih chuan miin min hmuh tam hma a kan kal vat angai. Kan inhmu leh dawn nia” tiin a tho chhuaka.


Chu hmeichhe nun tihchhiat nawn sak leh turin ruahmanna a siam a, a Car lam a pan thuai a.

Chapter -13


“A nih leh zawhna pakhat ka zawt ve thei che angem?” tiin a mitah ka va en a. Ka zawhna tur chu a chhanna ka hria sa a ni nachungin zawh ve tal erawh ka duh si a.


“I mitmu rawng a uk a, Caleb-a pawh chu ti tho. Engtin nge in fate hi an mitmu a pawl daih thung si a?” ti a ka zawh lai reng pawh chuan chhungrilah ka na vawng vawng a. Lai tih hriat tak hian a rawn sen tawn tawn a, avan han duhawm tak em.


“Ani te chu an pa a ni hleinem. Ka rin dan chuan ka pasal chu a mitmu a pawl a nih ka ring” ti a nui sen sen chungin min rawn en a. “I mitmu ang hian” a tih lai chuan thawk ka lo la hawka. An pa ngei ka nih thu ka sawi chhuah lohna turin ka insum hram hram a. Ka sawi chhuak lo nangin Dr Reed-a thusawi erawh ka hrechhuak zawka.


Alison-i, ka tih Sapphire-i ka hmu hmasak ber ni atang khan detective ka ruai a, tunge a doctor pan thin tih pawh ka hre thuai a. Ani chuan Alison-i hnena a tun hma hun sawi chhuah loh chu thil tha ber a nih thu min lo hrilh a. Hliam te hi chu a rei a, a dam ve mai ang deuh hi a ni. Amaherawh chu a tun hma hun kan hrilh vak chuan a zo lo thei a, chu chuan harsatna lian tham zawkah a hruai lut thei tlat a ni. Ka Alison-i kha chu a thi tawhah ka ngai nghet tlat a, engtikah mah a rawn let leh hi ka ring tawh ngai lo.


Mahse tunah chuan ka awm tawh alawm, pa nihna pawh hlen zo lo leh mahni hmangaih pawh hum zo lo chu. “Mahse Caleb-a nen hian in inzawm ngheh hmel ropui sia” tiin kan thil sawi lai chu thu dangah ka thlak daiha.


“A nia lawm. Mahse i ngaihdan ang kha chu a ni lo. Ka mit ka men hmasak ber atanga ka bul a awm a ni a, hun hlimawm leh harsa ka tawh lai pawhin ka kiangah a awm reng thin. Ka tan chuan mi ropui tak a ni. Ani hi awm lo selang chuan hman a hmanah ka tlu tawh ang” hla tak thlir chungin a ti a, a sawi zawng chuan a nui ver ver a.


Chu pa ka Alison-i lo duat em em tu chu ka ngei rual rualin a lakah thil tam tak ba ka nei a ni tih ka inhre tel bawka. Ani chu awm lo ni se tunah hian ka hmu leh kher angem? Ka thinlung chuan haw ru viau mahse ka chhungrilah tak erawh ka ngaisang a, ka zah em em bawk.


“Ka mit ka men hmasak ber i tih chu eng nge a awmzia?” tiin dilchhut takin ka zawh chhunzawm leha.


“Thawnthu sei tak a ni” tiin a lu a thing a. A thawnthu lungchhiatthlak tak chu a thian tha tak ka ni phawtte a nih loh chuan min hrilh kher lovang tih ka hria. Chutih lai chuan ka phone a rawn ri a, Marie hming a lo lang kalh a.


“Uihaa...biak i va han har em em ve. Khawiah nge i awm a?” a rawn ti a.


“Hetah Sapphire-i te inah ka awm mek” ka tih chuan a aw pawh a rawn hlim hmel ta deuh a. “A nih chuan rawn haw kha chu hmanhmawh vak a ngai lo a nia” a rawn tih chuan dak deuh ha hian “Rawn haw ka lo tum deuh mek a” ka ti a.


“Rawn haw lovang Ian. Thlipui tleh avangin kawng an khar a, Police in tumah in atanga chhuah loh tur an ti a, kawng laka tangkhang an awm a nih pawhin zaninah chuan riahna tur zawn mai a tha an ti bawk” a rawn ti a. Rei lote kan inbia a, phone pawh chu kan dah zui lehnghal mai a.


Phone ka dah zo chiah tihah chuan current a rawn thim a, naupang ho chu an tre nghal chel chul a. “In awmnaah khan lo ding tlat ula, lo inkai rawh u. Kan lo kal dawn e” ka han ti a. Ka phone phawrhin flashlight ka on vata.


“Sapphire?” ka han ti a, chu hming chu ka leiah hi chuan a sak deuh tlat thin.


“Aw” a rawn ti a. Ka phone light chuan a mitah lo deuh ka va chhun a. “Lo kal rawh” tiin a lamah ka kut ka phar phei a. Ani pawh chuan min rawn vuan ve mai a. Min rawn vawn zawng chuan eng emaw tak hian ka hit nghal chuai a, ani pawh chu min rawn en dan atang chuan ka awm ang chiahin a awm ve a ni tih ka hre thei.


Flashlight chuan kan vel vel chu ka en kual a, ka hnungah ka din tir a. “Saw lamah sawn” tiin kawngka awmna lam chu a kawk a, kan inzui phei a. Kan fate chu khum bulah nghet taka inkai chungin an lo ding thap a. “Rawn kal tawh rawh ule” ka tih chuan an mit an rawn meng a. Raine leh Ryker-a te chu rang takin Alison-i bulah an tlan phei a, Nathan-a chu ka lamah a rawn tlan ve thunga. Ka lo pawm vata. Alison-i pawh chuan Ryker-a chu a pawm a, Raine erawh a pawm ve thei chiah lo.


“Kha, hei hi lo keng rawh” tiin ka phone chu ka pe a, ka ban lehlamin Raine chu ka pawm ve thung a. Lawm tih hriat tak hian Alison-i chuan min rawn nuih saka.


“Nangin kawng en rawh le” ka ti a. Alison-chuan kan hma lam zel chu a en a. Balcony panna kawngkhar bulah kan ding a, darthlalang chhanah chuan fiah lo te in thla eng a rawn inkap lut raiha. “Bati ka va chhi ang e” Alison-i chuan a ti a, Ryker-a chu chhuatah a hlang thla a, Kei pawh chuan Nathan-a chu chhuatah ka daha Raine erawh ka la pawam reng thunga. “Thlipui tleh avangin kawng an khar vek a” ka ti a.


“A pawi hleinem. Hetah Nathan-a nen inriak mai dawn alawm. Hetiang a khua a awm dawn chuan naktuk pawh school an khar ka ring” tiin bati keng chungin Alison-i chu a rawn let leh a.


Naupang ho chu ka en a, ngaihdan thar ka nei deuh thut a. “Mattress chuang in nei mial em?” tiin Alison-i chu ka en a.


“Aw nei e” tiin a lo bu ngata.


Chhuat a mut ho dial chu a nuam dawn riauin ka hria.

Chapter -14



Ian's P.O.V



Ka nghawng zawn rawn thaw seng seng chuan min ti harh hlawl a, a tirah chuan ka awmdan chu ka hrethiam lo lek lek a, mahse inchung ceiling var ka hmuh chuan khawiah nge ka riah tih ka inhrechhuak chiah. Ka fanu hmeltha em em mai. ka awm ngheng a tui taka muhil siai siai hmel chu ka thlir a, ka awamah a kut a nghat a , a ke tereuhte chuan min rawn khan bawka. Ka thlir reng a, ka hlim a ni. A sam chu dimtein ka chul saka, mattress chungah chuan tha takin ka mut tir leha.


Ka mutna atang chuan tho chhuakin ka hmai chu ka tuai thuak a. Nizan kha zan nuam leh ropui tak a ni. Chhuatah chuan mattress pahnih kan phah zawm a, chumi chungah chuan board game kan khel ho a. Naupang ho chu an zuang a, a chhang leh an nui awr awr a. A nuam lutuk a, hun kha a kal zung zung maiin ka hria. Engtik laiin nge kan lo muthilh tih pawh ka hre lo.


Ka fapa lam chu ka va hawi leh thung a, ani erawh chu maimawm ang mai a kak in a lo mu dawrh suah a, Ryker-a chuan Nathana hmai zawnah tak a ke a lek phei a. Nui hak chungin a ke chu ka dah that saka. Nathan-a hmel ka en a, chutiang ang renga hmel hahdam pu a a mu hmel chu ka hmuh lohna chin pawh ka hre tawh lo. Mipa naupang mai a la ni chung hian a nun tibuaitu an awm em ni tiin ka zawt fo thin a, ani erawh chuan chutiang an awm lokh thuin min chhang leh mai zel bawk si a. Ka fate ho zawng chalah chuan ka fawp diat diat a, Alcison-i hmel erawh hmuh tur a awm ve lo.


Ka mutna atang chuan ka tho chhuak a, boruakah chuan coffee leh waffles rim a lo zam chiai chiai a. Choka-ah chuan tukthuan siam pahin rock music a lo play a, Alison-i chu a lo lam paha. Chutiang chu a ni tuktin ka thawh apiang a ka hmuh atana ka duhthusam chu.


“Good morning” ka han tih chuan a lam tui lai chu a phu dawrh a, zah avangin a biang a rawn sen tawn tawn a. “I va lam thiam ve” ka han tih leh lek phei chuan a sen zual sawt a.



“A ni maw? I va ti lawmawm ve” ti a kun de chungin a sam chhawlleng rawn uai thla chu a bengah a hui phei a. Kei erawh chuan nui ver ver chungin ka lo en reng a. “Hei Waffles te ka siam a, in ngainat zawng a ni ang chu maw?”


“Tunah chuan khua a thiang tha ta bawka, Nathana nen kan haw mai tawh a niang chu” ka ti a.


“Tukthuan tal ei ve ta che u. Nathana phei chu a duh a nih chuan nilengin awm ve rawh se. A thian phirte nen hian an inkawm thei khawp ang chu” tiin min chhanga. Nathana chu ka va thlek a, a lo ula muhil tui khawp mai. Hlim taka hun hman ve chu a phu a ni. Chumai bakah Alison-i hmuh lehna chance ka neih phahna tur a ni bawk lehnghal.


“Aw le, a duh a thu” tiin ka chhanga.


“I duh chuan mikhual pindan lamah sawn i inbual thei ang. Amah erawh chu inthlakna tur erawh kan nei tel hauh lo. Caleb-a hian formal dress bak engmah a dah lova” tih pahin ranwg a bawl mawlh mawlh a.


“Engtin a? Hei hi Caleb-a ta maw?” tiin ka t-shirt dum hak leh sweatpants hak chu ka en a.


“Niang chu” Alison-i chuan a rawn ti ringawt a, a hna chu a thawk chhunzawm mawlh mawlh a. Mikhual pindanah chuan lutin ka inbual fai a, nizan lamah ka thawmhnaw ho chu ka ha nawn leh a.
Ka chhuah phei leh meuh chuan naupang ho pawh an lo tho kim tawh a, thutkhawmna pindanah chuan an lo in um laih laih a.


“Dadda !!” min hmuh veleh Nathana chuan min rawn ko a, ka lam panin a rawn tlan phei a. “Good morning” tiin ka biangah min rawn fawp a. “Good morning ka fapa” tiin a biang lehlam lehlamah ka fawp tawna. Chutih lai chuan Raine te unau chuan min lo en reng a ni tih ka hmu a, an mitmeng lah chu a ngui nghiai lehnghal. Engvanga chutiang ang hmel chu pu nge an nih tih ka hria a, chu chuan ka thinlung a ti na takzet.


“Nang pawh i rawn kal ve dawn lo em ni hmeltha-te?” ti a nui sanga ka han tih chuan ka lam panin chak zetin a rawn tlan phei a, “Good morning” rawn tih pahin ka biangah min rawn fawpa. “Nang pawh good morning le” tiin a biangah ka lo fawp let a. “Good morning” Ryker-a erawh chuan chair a thu chungin a rawn ti mai a, kei pawh chuan chhan let pahin ka nuih saka.


Alison-i’n chaw ei a rawn siam a, chung naupang ho nen chuan hlim taka nui ho chungin kan kil za a.


Office lama ka let leh a uhun avangin Nathana chu an zing a lo awm turin ka thlah a, elevator a ka luh thleng chuan Alison-i nen chuan kan mit a inchelh reng a. Elevator a inkhar chiah chu ka nui ver ver a, hun rei tak hnu a nuih tak tak a kan nuih leh hmasak berna a ni. I chhungte nen ngei inthlah thlap a ni bul tan chu khawvel a feeling nuam ber a ni.


Office ka thlen veleh ka thu hahdam a,ka number hriat loh atang message pakhat a lo awm a.


“Ka office-ah min rawn hmu rawh. –Caleb”


Chhun lamah eng eng emaw tih fel tur neuh neuh ka neih avangin tlaiah Alison-i ka va hmuh hmain ka hmu kawi zuai mai ang ka ti a, ka hna ka thawh sana. Nileng mai chuan thil pakhat chiahin ka rilru a kap a, chu chu tlaia Alison-i ka hmuh leh hun tur mawlh chu a ni.


Mitin mai chu an mahni in lam panin an haw suau suau ua, kei erawh ka nun zanwg zawng thlak danglam vektu Caleb-a office kawtah ka ding rana. A secretary chuan a office lamah min hruai phei a, dawhkanah file chi hrang hrang chhawp nuai chungin a lo awm a, a hmelah chuan a nuam sam lo a nih ka ring.


A hma a a hmel fai tak thinah khan hmul a lo tho phung a, a kamis pawh chu pahnih ngawt a kilh lo. A awmdan chu a hma a ka hmuh thin dan nen in anglo tak a ni.


“I awm dan chu leh!” ka han ti a, a hma a chair-ah chuan ka va thu a. Ka tawng dan avang chuan a lawm vakin ka ring lo. Mahse rin loh takin a rawn nui mai mai a, mak ka ti viau zawk.


“Min han hrilh ve teh le” a rawn ti a.


“Eng chungchang nge sawi dun i duh a?” tiin ka lo zawt let a. Caleb-a chuan minute 1 awm vel zet hi min rawn melh vang vang a. A pawhdawh a envelope chu phawrhin a hawng a. Dawhkanah chuan dahin ka lamah a rawn nawr phei a.


“Hei hi” tiin lehkha chu a melh zeuh a.


Lehkha chu ka la a, ka bih vata. Min thawng a, engtia han tih tur nge pawh ka hrethiam lo. “Hei i hre tawh alawm” tih ringawtin ka chhanga.


“Khatia Sapphire-i doctor nena kan inbiak zawh hnu khan a inah ka tlan let vata, a fate pahnih mitah sawn nangmah ka hmu thei che a ni. Tichuan an DNA ka test tir ta a, nangmah ngei an ni e” tiin sehchilh aw lek lek hian a rawn ti a. Midang chu nise chutiang ang aw ki a min biak avangin ka ngaithei hauh lovang. Mahse tun tumah erawh hi chuan engmah sawi tur ka hre lo.


“Ani pawh saw i ta tho a ni” a rawn ti a, a hmelah chuan a tlawm hmel ngawih ngawih a.


“Ni lo, ani chu ni ve love. Ni e, ka hmangaih a ni tih ka pha lo. Mahse amahin a duh ve a a sawi a nih ngawt loh chuan ka ta a ni ve lo. Chumi tur chuan tunge ka nih tih min hriatchhuah phawt angai a ni” tiin ka chhanga. A mitmengah chuan min lainat takzet a ni tih ka hre thei.


“Eng tin nge i theih zawk a?”


“Eng chu maw?”


“Engtin nge i vawikhat hmuhna ang maiin a der a i awm theih?”. Ka nui haka. “A lan ang ngawt ai hian a harsa teh a nia”


“Enteh Caleb. DNA reports i hmuh atang phei hi chuan i hmuh dan pawh a danglam tawh ngeiin ka ring. Mahse ka ngen duh che a ni khawngaihin a hma ang khan awm leh rawh. Sapphire-i ala ni reng a, a fa phir te pawh a hma a mi ang kha an la ni reng. Tu emaw atana awm tur a mamawh lai hian khawngaihin atan ulo awm sak leh rawh. Amah leh ka fate neih let leh chu ka duh ber alawm. Mahse an thian tha ber chhuhsak tel erawh chu ka duh lo a ni. A la mamawh reng che a, naupang ho pawhin an ngaina takzet che. Chu chu ka chhuhsak thei lo a ni” ka ti a, ka thutna atang ka tho chhuak nghala.


*** *** ***


Sapphire/ Alison’s P.O.V


“Anuuu...! Ryker-a leh Nathana ten ka choco min pe duh lo ania” tiin Raine chu ka bulah a rawn vui nung nung a. Ka chawhmeh siam lai chu ka siam chhunzawm mawlh mawlh a. “I nau hi lo duat rawh uuu...” ka han ti nangin ka thu an zawm loh hmel khawp mai. Ka hmangaih te vek an ni. Mahse naupang chimawm zet pathum enkawl chu a hahthlak khawp mai.


Nathana a rawn tlan phei veleh, ka ril a tam a rawn ti bawk. Nathana hi cafe a ka hmuh hmasak ber atang khan engvang a ser nei nge a nih tihte leh engtin chhiah nge a nu leh pa kar a a seilen dan hi zawh ka chak thei em em a. Ka hmuh tirh phat atang khan naupang inkiltawih tak a ni tih ka hria a, mahse ze danglam tak erawh a nei. Apa a ngaina hle a, a pa bul lovah chuan a tlei zo lo emaw tih mai tur a ni. Apa in chhun lama heta awm tura a tih khan a hlim em em a, chu chu naupang lakah chuan thil pangai a ni lo.
Hmun dangah hlim lohna a nei em ni ang?


Ka rin dan chuan tu emaw amah tiduhdahtu leh kutthlak thin tu an awm a nih ka ring a, nizana an awmdan atang kha chuan chutiang anga ti thintu chu Ian-a a nih ka ring bawk si lo.


“Nate?” tiin zawh deuh rawih ka tum chhin a. “Tu emaw hlauh deuh i nei em ni a?” tiin ka zawt deuh tawp a. “Nate, i duh phawt chuan ka bulah engkim i sawi thei ang. Tuin emaw kut a thlak thin che a, chu chu i hlau a ni tih ka hria. Ka bulah sawi la tuman engtin mah an ti na leh tawh ngai lovang che” tiin ka thlamuana.


A ngawi vang vang a, a hnu fe ah a rawn dak chhuaka. “Sawi chu ka duh alawm. Mahse ka pa chungah natna a thlen a ni mai” tiin min chhanga. “Ka sawi a nih chuan nang pawh a ti na ang che” tih pahin a tlan let leh daih a.


Chu naupang lainatawm zet chuan ka thinlung a ti na khawp mai. Engmah sawi lo mahse a mitmeng khan engkim min hrilh vek thung si. Sawi chhuah chu a duh a, mahse sawi ngam loh tirtu eng emaw a awm a ni. A harsatna chu chinfel sak ngei ka duh a, chu mi ka tih theih nana ka tih tur hmasa ber chu Ian-a biak phawt a ni.

Chapter -15


Alison/ Sapphire P.O.V


Ka rilruah nimin thil thleng kha a awm reng a. Tlaiah khan Nathana lam turin Ian-a pawh a rawn kal leh ngei a, eng emaw ka zawt ngei ang ti a ka lo inpuahchah ve lai takin Caleb-a a rawn thleng veleh a, Ian-a chuan Nathan-a chu a hawpui leh ta daih a. Chuvangin eng mah pawh ka zawt fiah hman ta lo. Hemite pahnih hi puitling ve ve si eng vanga inngaih loh rukna riau nei nge ka hra lo a, mahse engtikah emawni Ian-a chu ka la zawt chhuak tho tho ang. A chhan chu engtikah emaw sawichhuah hun ka la nei dawn tho tho.


Thutkhawmna pindan a ka charge lai ka phone chu a rawn ri ral ral a, ka chem hum lai ka dah a, towel-ah ka kut hru hulin phone chu ka va la a. “Hey Judy!” inthiamlo angreng tak hian ka ti a. Tunkar chho vel kha chu dawr lamah ka hun ka hmang meuh lova, engkim mawhphurna zawng zawng Judy ko a nih vek avangin inthahrunawm ka ti angreng khawp mai.


“I inthiam lo a ni maw? Chutiang a awm angai rneg reng lo Saph. I duh chen chen i fate bulah khan awm rih rawh. Helamah chuan kei ka awm alawm” a rawn ti a.


“Ni e, ka hria alawm. Mahse naktuk atang chuan ka rawn kal veleh thei tawh ang” tih pahin thutthlengah chuan ka thu a.


“Inthlahrunna tur a awm hleinem. I cafe a nia, i duh duh hunah i rawn kal thei alawm. Ka lo phone zawk nachhan tak che hi chu i coffee nutella cupcake siam dan i ziahna hi ka hmu mai lova” a rawn ti a. Eng emaw thil thar ka siam chhauh apiang hi chuan a siam dan hi midangin a an hriat ve theih nan ka ziak chhuak thlap thin a. Mahse hei bik erawh hi chuan ka ziah theihnghilh a ni tih kei pawhin ka inhre ve chiah.


Ka theihnghilh thu leh ka hriat mai tawh bik loh thute, ka lo inen that leh a ngaih thute chu ka hrilh luam a. Chutih mek lai chuan Caleb-a pawh inchhungah a rawn pen lut ve chiah a. “Hey..” rawn tih pahin a tie a rawn pawt loose a, a ban lehlamah a kawrchung a bat bawka.


Naupang ho lah chuan an hmuh rual rualin a hmingin an lo ko chel chula, a hah leh hah loh pawh ngaihtuah lek lovin an lo va bawr ang tuau tuau a.


“Vawiin lam eng nge hna a an?” tiin ka lo zawt a. “A tha a ni mai” tih ringawtin min chhang a, counter bul a stool inhung chu a pawt chhuak a, a thu a. “Eng nge thil dik lo a awm em ni?” ka lo ti vata. Min rawn en vung vung a.


“Ka kalbo dawn” tiin min rawn chhanga. Rang takin a lam ka hawi vata. “Engtin a? Khawiah maw?” ti a ka zawh laite chuan ka thin a phu dup dup thei hial nia.

“Aw ni e, naktukah New York atang hian kan kal bo rih ang” a rawn ti a, “Kan aa?” ka lo ti vata.


“Ian-a, Mr Brown-a leh keimah nen” tiin min chhang leh a. “Eng vangin maw?” ka lo ti vata. “A chhan chu kan hotel hmasa ber tur kan sa tan tawh dawn a. Chumi atan chuan architect leh insatu tur tam tak kan ruai alawm”

Chutianga hla taka min han kalbosan tur chu ka ngaingam lo viau nangin a hmalam hun atana malsawmna lian tak tur a nih si avangin ka lo dang ngawt thei bik si lo. Ani pawhin kal chu a chak hran hauh lovang tih ka ring. Ka tan chuan ka thian tha ber a ni.


A kutah vuanin a mitah chiang takin ka en a. “Tluang takin va kal ang che u. Kei leh naupang ho hi chu ngaihtuah kan ngai lo ania. Tha takin kan lo awm ang” ka ti a. Ka kut chu a kut pakhatin a rawn vuan veleh a, chumi chungah chuan a lu a nghat a. “Naupang nen chauh a kal san che u hi ka duh lo a ni. Eng thil emaw lo thleng palh ta se?” a rawn ti a. Ka lo nui hak a. A tukhumah ka kut ka nghata, thlamuan nan a tukhum chu ka chul saka.


Kei pawh chuan ka thiam ang tawkin ngaihtuah kan ngaih loh ziate chu ka hriattir ve luam a. “A nih chuan in mangthana zanriah kan kil ho dawn em ni ang?” a rawn ti a.


“Chutin tih suh. Kan in mangtha dawn reng reng lo” ka lo ti vata. “Mahse zanriah chu tui tak kan kil ho ang”. Mahse chutin eitur em em ka siam tehchiam si lo a. Pizza kan order a, naupang ho nen chuan hlim takin kan kil za a. Caleb-a a awm hi chuan naupangin an ngaina ngang bawk a, kan ri chel chul a, kan nui uar uar zel mai a nih hi.


Thil ei zawhah naupang ho ka inbual fai tir a, kei erawh tv enin ka thu khawmuang a. Chutih lai chuan ka phone a rawn ri a, number hriat loh atangin a ni. Ka phone chu lain bathlar lam ka pan a. “Hello?”


“Hey, Ian-a ka nia” phone atang chuan a rawn ti a.


“Eng nge ni ta?” ka lo ti a. “I hre tawh thoin ka ring a New York kan chhuah san a ngaih thu vel kha. Ka maid Marie hi ka hruai tel ve a ngai dawn sia, Nathan-a hi min lo enkawl sak dawn em ni ti a rawn ngen tawp che ka tum a” a rawn ti a. “Marie hi rei tak a rawn cham ve dawn chuang lo va, kan rawn la leh thuai ang”


Nathan a’n min lo fin tur chu keini lam atang chuan eng harsatna mah a awm lo. “Nathan-a i hrilh hre reng reng tawh em?” ka ti a.


“Aw hrilh tawh e. Ama sawi chhuah mah mah mawle” a rawn tih chuan ka nui haka. “A nih chuan rawn dah ta che”


“Zing kara chhuak tur kan ni si a, zanin hian rawn dah ta mai ila a pawi angem?” a rawn ti a. Apartment lam ka hawi phei a, Caleb-a a la awm ve reng a. A ngaihdan a ni lo hran lo turah ngai ang. Tichuan a zan la la a rawn dah mai turin kan inti fel ta a.


Chutih lai chuan Caleb-a pawh a rawn chhuak ve a. Sweatpants a ha a, tawnzau nen. Inbual zo tih hriat tak hian a sam chu a la hnawng hlap a. “Ka ngai dawn khawp mai che” ka ti a. A awmah ka kut nghatin ka kuah a. Ani pawh chuan ka chhipah a khabe a rawn nghat a. “Kei deuh hian a nia ngai dawn che u”


“Engtia rei nge in thang dawn?”


“A lo berah thla 6 vel tal a niang”. Ka phu zawk a, ka nam sawn nghala. “Thla ruk a!?”. Chu kher kher chu a rei mah mah a ni. A nui haka. “Lungngai mah ta che. A kar lakah ka rawn haw dawn alawm”


A tel lova thla 6 ngawt lo khawsak chu eng emaw ti riau hian zuam lohna ka nei a. Ka hriatna ka hloh atang khan a tel lovin chutiang ang chen chen a rei ka la awm ngai lo. Tunah erawh a buai ve ta em a, Lo dan ngawt theih lah a ni bik si lo. Chutih rual erawh chuan ka hma chiah ka hai thei bik lova, thla 6 chu a zawt vat vat ngei ka beisei.


Chutih lai chuan doorbell a rawn ri ral a. “Ka va hawn ange” tih leh kawngka lam pan ka rual a. Chutih lai tho chuan naupang ho inbual zo pawh an rawn chhuak tawh a, Caleb-a bul bawk chu an rawn bel a. Ani lah chuan a lo fiam nui har har hlawma.



Kei pawh chu nui bawk bawk chungin kawngka lam ka pan a, ka hawnga. A mitmupawl ram mai ka hmuh zawng chuan hriatthiam theih si loh hian ka pumah mawlhtu ka nei ziah zel.


“Hi” kan ti ringawt a, ka thaw te lam a chham dawnin ka hria. Kan nui lui deuh ringawt a, engvanga chutianga awm ringawt zel nge ka nih tih erawh ka inhre bik thak lo.

Chapter -16


Alison/Sapphire P.O.V


Caleb-a leh Ian-a te an zin atanga nithumna zanah chanchin duhawm lo zet mai ka dawng a, chu chu kan cafe a kang chhe vek tih hi a ni. Police-te sawi dan chuan current kal sual vang a nih rin a ni. Mahse ka va kal chuan khawnvartui rim pawh chiang takin ka hre thei a, tum reng vanga hal ni tlatin ka ring a, mahse hma han lak vak ngaihna ka hre bawk si lo.


Vanduaina a thuah hnih ngei mai. In a ka let leh chu kan in neitupa a lo awm run a, a chhungte tu emawin in chu rawn luah an duh avangin a rang lama chhuahsan turin min rawn ti tawl mai a. Vawikhatmah inluah man pek loh ka nei ngai lo va, chutiang teh thut a thil a thleng chu mak ka ti ru khawp mai.


Vanneihthlak takin a tuk lawkah an hnathawhna atangin Marie pawh a rawn haw a, ka mi rin tak a nih avangin ngaihngam takin Nathan-a pawh a kutah ka hlan fel leh thei ta a ni. Vanduaina erawh a inkahpuk chho nawk mai.


Ka pawisa neih ang angte la chhuak turin bank-ah ka va kal a, mahse lakchhuah tur a lawi ka lo nei reng reng lo. Dollar 200 a lo la awm a, a bak zawng chu lakchhuah vek a lo ni tawh. Police hnenah ka report vata, an lo chhui zui tur thu leh thil hriat an neih veleh min rawn hrilh thuai tur thu min hrilh a. Chutiang thil ka chung a a thleng thut mai chu mak ka tiin a ngaihtuah pawh ka ngaihtuah pha ngai lo. Ni tha chauh hi a inherchhuak reng lova, ni tha lote pawh kan tawn a ngai ve thin tiin inhnem ka tum ringawt a.


Fate enkawl lai ka nei a, anni chu khawlaiah ka vahvaih pui ngawt thei lovang. Riltam leh hrehawmin ka siam dawn lova, chuvang a he hna thar pawh hi dil ka ni.


Minutes 20 zet bus a ka tlan hnuah ka interview na tur restaurant chu ka thleng hlawl a. Ka hma zawna restaurant lian tak mai ka hmuh chuan ka phur hle a, chutih rual chuan eng nge beisei ka neih tih ka inzawt a, ka huphurh ru hle thung. ‘Sizzle’ chu Chicago a restaurant lian ber tih ngam a ni a, nimin khan pastry chef (chhang siamthiam) an mamawh thu advertisement ka chhiar fuh hlawl a. A hlawh pawh a that avangin he hna hi ka mamawh ngawih ngawih a ni.


Ka va luh chuan an khualchawn nula chuan min lo pan vat a, kei chuan interview tura kal ka nih thu ka hrilh a. Thutna min kawhhmuh a, an Head Chef min koh sak tur thu min hrilh zawhah min kal san a. A koh chhungin kei erawh washroom lam ka lo pan a Ka high heel bun mawlh mai chuan min ei hlum loh choh. Ka tih than loh takin marcara leh hmeichhe thil eng eng emaw ka inhnawih ve a, ka sam ka khuih a, coat nen. A smart thei ang ber turin ka inchei a.


Washroom atanga ka chhuak tur chu hmeichhe pakhat nen kan intawk hlawl a, ka hmui chak loh zet hmeichhia a ni. Pelh mai ka tum zet a,mahse amah zawk chuan min rawn ko a.


“Ms Kingsley” nuisung chungin Ashley-i chuan min rawn ko a.


“Ashley” ka lo ti ve vat a, mahse ani chuan “Ms Cullen ti a min ko zawk turin ka hrilh tawh chein ka hria” min lo ti a. “Chutianga zah taka koh nachhan tur che ka neiin ka hre lo che tih hi ka sawi tawh thoin ka inhria” ka ti let ve ngata. Mak tih hmel zet hian min en haw a, chutah a nui chhuak haka. “I lo danglam ta hlemai” a ti a.


“Ian-a in a min hmuh tum a mi kha ka la ni reng e” tiin ka chhanga. A in a ni ve tho nangin ‘Ian-a in’ tiin ka sawi lui deuh kher a.


“Awileh hmeichhia. Engtikah emaw chuan i la hrechhuak mai ang” thil eng emaw ka hriat ve loh hria ang mai hian min rawn ti a, “A eng a pawh chu ni se..., hna i dil dawn a ni maw?”


“Engtin nge chu chu i hriat?”


“Bawihi, hriat loh engmah ka nei hleinem” tih pahin min rawn nuih suk a. “Keini pawhin hnaruak chu kan nei a sin.
I ulo thawk duh angem?” min ti a. “Eng hna maw ni a?” ka lo ti ua. “Awmpui tur kan zawn belh mek a” tiin ngeiawm fahran hian min rawn nuih a.


Chhan pawh ka chhang peih buai tawh lo. Buaina a chhuah phah dawn tlat. “Thurawn pakhat ka lo pe ang che. Ngun takin i kawng en la, tumah ring suh ang che” thutak deuh hian a rawn ti a.


“Ka lawm e” tih pahin washroom atang chuan ka chhuahsan a. Vanneihthlak takin nula pawh kha a rawn la let lova, thutnaah chuan thuin ka lo nghak leh a. Rei lote hnuah a rawn let a, a awmah chuan a hming ‘Amanda Menezes’ tih a inbel a.


Amah zui turin min rawn hui a, zam tak chungin an Chef awmna lamah chuan kan inzui phei a.
Chef lar tak mai Chef Steven Moss-a hmaichhan a kan hmu meuh chu mumang a ang rum rumin ka hria. 6’5ft vel zet a sang a ni a, a sam a buang a, a mitmu a dum kak a. TV ah leh lehkhabu lamah ka hmu fo tawh nangin a takah erawh dang tak a ni.


“Nangmah hi maw patisserie hnaruak eawn dil tu chu?” min ti a. Ka bu nghat a. Ka hmahaih lutuk vang zawk a ni. Rang zetin “Aw ni e Chef” ka ti leh vata.


Engmah pawh sawi lo chuan a kal leh daih a. Eng nge a awmzia? Min la nghal tihna em ni? Nge ni a engmah sawi lovin min hnawl zawk? Hrilhhai angrneg taka ka din reng lai chuan apron var keng chungin Chef Steven-a chu a rawn chhuak leh a. “Kha hei hi ha vat rawh. Hun kan nei tam lo a nia” a rawn ti ta mai a.


“Eng a?” ka ti ringawt a. Interview tura ka inchei nalh ve tehreng neng.


“Chair a thu chungin zawhna eng eng emaw ka zawh kual che i lo ring elaw? I eitur siam alawm ka hmuh duh. Zawhna chhanna ni lovin. Chuvang chuan apron kha hreng la, choka lamah va phei rawh”


Choka lamah chuan ka lut phei a, bawlhlo chi 4 chiah hmanga cake tui tak siam turin min ti a. Mins 20 chiah hun min pe lehnghal. Thil awl tak a ni hauh lo. Hmanhmawh leh tha thlah miah lovin ka buaipui char char a, ka zawh veleh ka cake siam chu endik turin an la hang a, ka lo nghak reng ringawt a.


Thinphu dup dup chungin ka thi awrh lai chu ka khal noh noh a. He hna hi ka mamawh takzet a ni. Chenna tur in kan nei rih lova, pawisa nise engmah ka nei bawk si lo. Kei leh ka fate tan he hna hi ka mamawh takzet.


Khawngaihin hna ka hmuh thu min rawn hrilh se ka van ti em.

Chapter -17


Vawiin hi ka hna thar tan ni tur a ni. Ka usam mawi takin ka tawna, choka lamah chuan ka lut ve nghala.
Tu pawh mai chuan hmel nuisang min lo hmuh vek a, kan hna theuhah kan bur nghal mawlh mawlh a.


“Chef, mikhual pawimawh tak mai kan nei a, desert atan ‘Blueberry pie’ an duh a nia” pakhat chuan a rawn ti a. Ka mitko ka lo tun hru a. Hetiang anga restaurant ah te chu tiang an order thin a maw?


“Tu pawh hi mi pawimawh bik anga en hran an ngai lo ania. Kan customer pakhat an ni ve mai. Chutiang chuan ngai ula intan pawh hnathawh a sam khai zawk ang” kan Chef Steven-a chuan a ti a. Kan siam nghal mawlh mawlh a, reiloteah kan peih thuai a.


“A tu chu nge kan mikhual pawimawh chu ni reng reng a?” tiin Amanda-i chu ka zawt a, ka kut sil faiin kan chawchhun eina tur dawhkan lam chu ka pana. Ani hi helai a ka hmelhriat hmasa ber a nih mai piah lamah kan inpawh nghal em em a. Chicago-ah chuan ka hmeichhe thian neih hmasak ber a ni dawn a nih hi.


“Ian Cullen-a a nia” tih pahin ani pawh chu a rawn thu ve a. A sawi zawng chuan ka lo khawng lo chauh a ni ber e. “Tu nge chu chu?” ka han ti leh a. “Ekhai aw...! Tunge a nih i hre lo a maw? Mi hausa lutuk mai Billionare a lawm a nih. A la chhelo em em mai lehnghal” tiin a tlar tawp ber chu ka beng bulah zawitein a rawn sawi sapa.


“He Hotel pawh hi a thil neih zinga pakhat tho a nia”J a la ti ta deuh deuh. Ka meng phawk tawh hlemai. Engtin nge ‘Sizzle’ hi a ta a ni tih ka hriat loh theih?


A nih chuan Ian-a chu ka boss tihna maw? Ui karei !. “I
hre nange?” tih pahin Amanda-i chuan carrot a seh tuam tuam a. Ka lu ka lo thing ringawt a. “A neitu dih tak chu Mr Nicholas Brown a nia. A nupui thi ta leh a fanu hriat reng nana a sak a nia. Ani chuan an ni chu a hmangaih hle a ni ngei ang. Chicago a ‘Sizzle’ din hi a nupui thi ta suangtuahna thin niin an sawi bawk a” ti a sawi mawlh mawlh pahin ka eitur min rawn suah saka.


“Tlang kam atanga ka hriat danin Ian-a chuan Mr Brown-a fa hmasa zawk chu nupuiah a nei a,mahse a nupui chu a thi ta a. Chumi hnuah a nupui a fa rawn chhawm nen an innei leh a. Ti ti leng vak a tam phah khawp mai. Thenkhat phei chuan khatia a unaunu pakhat a han thi ringawt mai kha tun a a nupui ni ta thah a nihte hi an ring fur a” tiin Amanda-i chuan a sawi mawlh mawlh a.


Engtin maw? Engtin a ni? Thil ni thei a ni dawm em ni?


“Tunge chu nu chu a hming?” tiin ka sawt let ve a. Amanda-i chuan a han ngaihtuah vang vanga. “Alison-i. A nupui hmasa chu Alison Cullen a ni awm e”


Alison maw?


Engvangin nge chu hming chu khawi hmunah mai pawh hian an sawi vel vek mai ni le? Ian-a pawhin chu hming nen chuan kan hmel a in an thu a sawi lang tawh a, mahse chu nu chu a nupui a ni tih erawh a sawi awm ka la hre lo. Tlai lamah Chef hoin training kan nei a, chu mi zawhah kei pawh in lamah ka haw a.


Ka apartment-ah lutin naupang ho pindan lam ka pan ding a. Ka phir fate pahnih chu tui takin an lo muhil siai siai tawh a. An chalah ve ve fawpin an bulah chuan ka inthawlh ve a.


*** ***


“Nilaithawhtan-ah kan inhmu leh dawn nia” tiin Amanda-i chuan a car chhung atang min rawn au a. Kei chuan ka ban ka lo vai lawp lawp a, ka apartment luah lam ka pan ding nghala. Kar hnih ka thawhna a ni ve ta reng mai. Zingah thoin ka insiam a, naupang ho ka insiam pui a, an school bus thleng ka thlah a, chu mi zawhah hotel lam ka pan veleh thin. Tlaiah relin ka haw tlangpui a, khum ka deh rual rualin ka muhil deuh nghal mai zel. Ka chau ve thin hle a nih ka ring.


Zing tin mai hian Ian-a chuan kawngka a rawn kik ziah thin a, mahse ka hawn sak duh ngai lo. Naupang ho nen chuan innel lutuk lo se la ka duh a ni. School an ban veleh a rang thei ang ber a rawn hruai haw nghal vat zel turin Sophia-i ka chah a, a hna a hlen khawp mai.


“Eng nge rawn tih i tum?” kawngka bulah chuan dingin ka hma a Ian-a ding reng lam chu ka hawi a. “Min hmu duh lovin min hel zel bawk si a, chuvang chuan heta din tlat mai loh chu tih theih ka nei tawh hleinem” tih pahin min rawn en kalh a. Mi hrang hrangin min en kalh tawh thin tho nangin hepa en kalh nih hi chu ka hlau deuh reuh tlat zel.


“I bag leh i fate ka car-ah an awm tawh. Khawngaihin min lo zui rawh” tih leh inher a rual a, elevator lam a pan nghal nalh a. “Engtin maw i tih a?” a ngaihna hre lo a ka hawi buai lai chuan a liam mai dawn.


Hmanhmawh takin ka va um vata. “Eng thil nge ti a i inhriat a?” ka aw-ah chuan ka lungawi loh zia a hriat theih ngei ka beisei. Muangchangin a rawn inher a. “Ka hruai haw dawn che u”


“Chutiangin-..., in kan nei reng reng hleinem” muang ban chalhin ka ti chang fak a. Ka sawi zawng ringawt pawh chuan ka na vawng vawng thei. Nutling fa pahnih nei, ka in ti a sawi tur pawh nei lo ka han ni ringawt mai chuh!


“Chu chu nakin lamah kan la sawi zawk dawn nia. I chau tawh a nih kha. Chutiang bawkin Raine leh Ryker-a pawh. Chuvang chuan in a hahchawlh in mamawh a ni. I thinrim a kut hial min thlak duh a ni pawhin chawl hahdam phawt la, chu mi zawhah i duh tawkin min la khawih dawn nia” tiin a inher a. Mahni in a mut siai siai chu ka chak khawp mai. Mahse a car a chuang a, ‘in’ ti a a sawi kan han pan ringawt tur chu a ngaihna ka hre hlawl lo a ni.


“Ni lo ve. Kan awm thei lutuk. Kan awm ang ang hian min kalsan rawh” awki sang fakin ka ti a. Min rawn en a, a mitmengah a thinrim tih ka hria. Enga tinge a thinrim ve rikngawt? Ka banpuamah min rawn chelh a, a lamah min pawt phei dawrh a. Kan hmai pawh a insi teuh thar thar hlemai. Ka thinrim chhan chu chiang deuhin ka hria a, chutianga a awm ve ngawtna chhan erawh ka hrethiam hauh lo.


Ka thinphu rang zet mai chu a hre pha ang tih ka hlau zek zek. Engvangin nge ka taksa a tawh apiang hian hetiang a ka awmziah? Chu ngaihtuahna chuan ka thinrim a belh chhah zual sauh a.


“Naupang ho hi ka rualin ka hruai dawn a, nang pawh i tel ve ang. Ka tih luih hma chein Car-ah chuan lut mai rawh” tiin ka banah min rawn man a, passenger thutna lamah chuan min pawt lut a. A hnung seat-ah chuan ka fate chu an lo muhil siai siai a.



IAN’S P.O.V

Steering wheel ka vawn ngheh lutuk a luatah ka kut changte chu a var vek thei a. Engtin nge hetiang thil hi a chungah a theih? Hetiang zawng zawng a chung a thlen tir tu hi lungin ka tan tir ngei tur a ni dawn lawmni?


Chu thu ka ngaihtuah zawng ringawt pawh chuan ka ha chang ka thial rap rap a. Alison-i thih dan case ka chhui tir Detective Blake-a pawh kha ka biak vat angai dawn a ni. Ani chu ka bulah thuin tukverhah chuan a dak dauh dauh a. Alison, heng thil zawng zawng i chung a a thlen chhan hi keimah vang vek a ni tiin keimah leh keimah chu thiamloh ka inchantir mawlh mawlh a.


Rareview mirror atang chuan a hnung lam seat a ka fate pahnih tui taka muhil mekte chu ka en a, ka nui saka. Tunah chuan mipakhat chauh ni lovin mi pathum lai venhim tur ka nei ta. An chungah eng thil tha lo mah a thlen ka phal ngai lovang. Hlim tak leh him taka awm tir chu ka tih tur a ni. Ka venghim ang.


Kan tlan vang vang hnuah kan inkawt kan thlen chuan ka ding a. Kan inah chuan zanriah ei turin a hma pawhin Alison-i chu ka lo sawm tawh tho a, kan in pawh nuam a ti viau chuan ka hria. Eng pawh nise ala ngaina dawn chauh. Hei hi a nu in thin a ni a, anu nen chuan an thil duhzawng a in ang hle tih pawh ka hria.


“Kan thleng ta e” tiin a darah ka va sawi harh a. Rei tak phei chu a muhil hman lo nangin kar kalta chhung zawng khan a hnaah a chau hle tih erawh ka hria. Steven-a bulah a tuk thleng chawl pe rih turin ka ti a, hahdam takin awm ve rih se ka duh a ni.


Keiin Raine ka pawm a, Charlie a’n Ryker-a min rawn pawm sak bawka. “Hello dear” nuisangin Marie chuan Alison-i chu lo lawmin a lo kuah a. An pindan turah a hruai nghala. Phir te chu master bedroom tih lova room lian berah a awm tir a, a tirah chuan an tan thil thar vek ala nih dawn avangin an tlangnel hma chu heti hian room khatah an awm rih anga, chu bakah phir pawh hran chu thil awlai a ni lo. Pindan chhung pawh chu an rawng ngainat zawng ang taka chei vek a ni a.


Chutiang bawkin Alison-i pawh chu a pindan turah ka hruai veleh a. Marie chuan min lo thlir renga, kan intihfel hnu chuan a bulah ka va phei a.


“Engtikah emaw chuan a lo let leh ang ka tih kha. Mahse tunah erawh amah chauhin a ni ta lo” Marie chuan aw lawi rat chung hian a lo ti a. Ka lamah pawt pheiin ka kuah a, a hnungzangah ka chul a. “Ni e, Alison-i chu a rawn haw leh tawh e” ka ti a

Chapter -18


IAN’S P.O.V

“Sir..?” min hmuh veleh Blake-a chu ka lam hawiin a rawn bu zeuha. “Khawiah nge chu pa chu a awma?” ka lo ti vata. Chawpchilh taka Alison-i a uinluah lai atanga chhuah tir tupa chuan a thil tih man chu a hmu let leh khawp ang. “Hetah hian a awm e” tiin Blake-a chuan kawngkhar chu a hawnga. A chhung chu pindan lian angreng tak hi a ni a, chutah chuan ka hmuh duh pa chu amahte chauh a thut tir a ni a. A mitmeng atang chuan a hlauhthawn hmel hle a, a chal ngalh tle hlap mai pawh chu thlan fimin a bawh hnawng hlap a.


Va pan hnaiin a hma zawna thing thutthlengah chuan a lam hawiin ka thu a. A mitmeng dawizep tak chuan min rawn melh zeuh a, a hlauthawng hmel chuan ka nuihte lam a ti za a. Mipa mawl leh dawihzep tak a nih dawn hi.


“Enga tinge hetah hian ka awm a?” a rawn ti tial ruai a. Pindan kil tinah chuan guards kawr dum leh kekawr dum ha palian tak tak an ding kual vek a, an kut an kuangkuah thapa. “Ka hre bik nang. Engvanga helaia awm nge i nih tih chu nangman min han hrilh zawk la” tiin thutthleng nghenchhan chu ka ngheng a. A mitmeng khawngaihthlak awm takah chuan hmeichhia a fate nen chauh a cheng han hnawtchhuak duh awm hmel pawh a pu lo.


“Ka-...ka hre bik hleinem” tap mai tur hmel hi a pu a.


“Tun kar kal ta khan thil tha lo leh mawi lo tak tih neiin i inhre ve lo maw John? Han ngaihtuah nawn leh teh” tiin ka kun hnaia, dawhkanah ka kiu ka nghat a. “I hre chuang lo em ni? Kan pui ang che aw? Hmeichhia a fa nen chauh a awm; eng hriattir lawkna mah awm lovin i in atang i chhuah tir a ni lawm ni? Chutiang i ti dawn a nih chuan ni 60 tal hun i pe tur a nih laiin ni hnih chiah hun i pe a. Dan kalhin a ni i chet ni” ka han ti a. Thumal khat ka lam chhuah a piang mai chuan ka thinrimna a pung sauh sauh a. Ani erawh dang bel leh ngui nghiaiin a thu a.


“Tunah hian police kutah hlan chein an niin an duh dan ang angin an lo chingfel tawh ang, Anni mangang a an awm laiin nang erawh i inah nuamsa takin i lo thu er er a. Ani chuan police hnenah tanpuina ngiatin a kal a, mahse engmah an ti thei lo. He thil phenah hian tu emaw inrawlh an awm a ni. Chu chu tunge a nih tih hriatchuah ka duh” tiin a kawr awmah ka tham a, ka lamah ka pawt hnaia. “Dawp kher ngai lova i sawi theih ka beisei. A nih loh chuan ka mitin khua a hmu meuh tawh lo a nia” tiin a thutna lamah ka nam let leh thuai a.


A meng zek zek a, a kutzungtang a ti che neuh neuh a. Minute 2, minute 5...ka dawhtheihnain a tlin tawh lo. Ka tho a, inherin kawngka lam ka pana. “A hmel hmuh tlak a awm tur a ni lo” guard bulah chuan ka ti a, guard chu a nui suk a.

“Lawkin, ka sawi ang. Ka sawi ang” a rawn ti chul a. Ka inher leh a. “A tha e. Mahse dawhtheihna engmah ka nei tawh lo”


“Hmeichhia a nia. Ka inah rawn kalin Sapphire-i hnawtchhuak turin min rawn ti a. Chumi ka ti a nih chuan ka fanu treatment man tur zawng zawng min pek sak vek tur thu min hrilh a. Ka hnar thei lo a ni” a ti a, a mittui a rawn luanga.


“Engtikah nge chu nu chu a lo kal?” ka ti leh a. “Sapphire-i ka chhuah tir hma ni chiah khan. Ani phei chuan a ni la la a chhuah tir nghal turin min rawn ti a, mahse Sapphire-i hi nu tha tak a ni a, ni hnih hun ka pe ta zawk a ni. Chu aia rei ka pawhsei sak chuan kan deal a tawp tur thu min hrilh a” ti a a sawi pahin a rawn tap chhuak hawk hawk a. Ka thaw haka, ka phone chu ka dah thla a.


“A nih chu nu chu hei hi a ni em?” tiin ka ipte atang Ashley thlalak ka phawrh chhuaka. A mit chu hruhulin thlalak chu a en vang vang a. A lu a thing a. “Chu nu chuan a hmai a khuh vek” a ti a.


“A nih leh amah kan zawn hmuh theih dan tur hriat i nei em?” ka tih chuan a lu a thing a. Tho chhuakin pindan atang chuan ka chhuak a, Blake-a chuan min lo zui ve bawka.


“Chhuah ula, an inah lo va thlah ang che u” tih pahin Car chhungah ka luh sana. “A fanu chu zawng chhuak ula a treatment man tur zawng zawng lo pe bawk ula, atan doctor tha ber in lo rawih sak dawn nia” ka ti a. A tirah kha chuan a nat dan tur ka hriatthiam sak lo a, tunah erawh ka hrethiam tawh. A chhan chu pa ka nih ve tho avangin.


*** *** ***

ALISON/ SAPPHIRE


“Awi nilo! Lo va hahchawl rawh” tih pahin a pancake siam pui ka tum chu Marie chuan choka atang min nam chhuak rawk rawk a. Tih vak ngaihna awm lo le. Dinning table bulah ka thu a, hlim taka lam chunga a pancake siam lai chu ka lo thir ringawt a. “Nangmah anga hmeltha leh nunhlima ang hi nang ang rual ka nih ve hunah ka neih ve theih ngei ka beisei” ka ti sapa.


Naupang ho chu zingah an han harh anga, an awm ngai lohna pindan a an han awm thut tur chu an awm thiam lo viau awm mang e ka ti zet nangin kei aia hmain an tho a, tual zawl phul chungah Nathan-a te nen, Charlie a hoin an lo infiam nui uar uar tawh a.


“Khawiah nge Ian-a hi?” ka ti a. Rin ai takin helai chu awm a nuam lo hran lo. Mahse ka in a ni lo tih erawh nghet takin ka vawng reng dawn a, a in awm dan erawh ka ngainat zawng tak a ni.


“Ani chu tlai dar 4 velah a lo haw chauh ang. Zanah a chhuak leh bawk ang a” tiin pancake chu plate-ah a dah a min rawn chhawp saka. Chumi ringawt pawh chu ka tan chuan thil nuam tak a ni. Ka nu a la dam veleh ve loh ka hre lo a, chutiang chu ka tun hma nun lamah ka lo tawng ve tawh angem? Ian-a awm lo tur ka hriat chuan eng emaw deuh taka lungawilohna hi ka nei deuh a. Aman he inah hian min hruai lut a, a zan hmasa ber talte chu min awmpui ve se ti a phut deuhna rilru ka lo pute pawh a ni mahna.


“Lungngai mahte che. A rawn haw vat mai ang” nuisang chungin Marie chuan a ti a.


“Tu chu maw lo haw hma dawn a...?”. Hnung lam atanga Ian-a aw ka hriat chuan rang takin ka inher vata. Kan lam panin a lo phei mek a, sui dum leh var nalh zet mai a ha , min hmuh chuan a rawn nuisanga. “Morning. I mutui em?” tiin a rawn thu ve a. “Ka ril a tam teh a nia” ti a nuisang chungin Marie chu a va melh a, pancake a rawn chhawp sak ve a.



Engvanga nuisang hmel lo pu ve ringawt nge ka nih ka hre lo. “Thil ka zawt che ania” a rawn ti leh a. “Aaa ! Aw ,mutui lutuk e” tih pahin ka lai lutuk thup nan pancake chu ka ei nghal sawk sawk a.


Engati nge la laih ve rilngawt? La thinrim zawk tur ka ni a sin. “I chungah ka la lungawilo khawp mai” kan ti leh ringawt a.


“Al-“ a rawn ti zuai a, a hrawk a thian vata. “Helaia ka hruai nachhan che u chu Ryker leh Raine ka ngaina takzet a, kan duh zawng pawh a in ang hle a. Chenna mumal tak nei lova naupang awm tir reng chu an tan a tha lo thei a. Chubakah Nathana’n kawm tur a neih phah a, atan tak khawhar hnemtu in lo ni lehzel a” tiin a han sawifiah a.


“A tha alawm. Amaherawh chu in luah tur ka hmuh veleh heta tang hian kan chhuak ang” ka ti a. A mit a thim deuh khap a, mahse a lu erawh a bu ve mai a. Ngawi rengin kan ei a, kan ei zawh veleh kal leh mai a tum avangin kan in bye bye a. A kal tur chiah chu a hmingin ka ko a. “Awiahh..?” tiin a rawn inher vata.


“Tie i awrh dawn nange?” tiin a nghawng chu ka kawk a. A awm a en zuai a, ka lam a rawn hawi chho leh a. Ka awm ang thoin a awm ve a ni tih ka hre thei. Ka awmdan chu ka sawithiam chuang lo nangin ka thinlungah erawh a chiang. “Awrh dawn lo. A chhan chu a suih thiam lova” nuisang chungin Marie chuan a lo chhan saka. “I suih thiam mial lovem ni?” tiin Marie chuan min rawn en a.


“Ummm, thiam tho e” ka chhan tur ni lo ang hrim hian ka ti zawi sapa. “A nih chuan lo nghak lawk rawh aw” tih leh Marie chu inchung lama tlan chhoh a ruala. Ian-a chuan “Marie..!” a lo tivata, mahse Ian-a kohna chu hreawm pawhin a lang lo.



A ngaihna hre loin ka ding tlawn reng ringawt a. “Kha le” tiin Marie chuan tie la suih loh chu min rawn pe a. Marie a nui var var a, Ian-a nen erawh milim ang maiin kan ding reng a.


A lam pana ka kal laite chuan min en reng a. “Ka lo suih sak dawn che em ni?” ka han ti a. A chil a lem khalh a. min rawn en a, a bu nghat a. A kawng nghawng ka tih chhoh saka, ka kutin a nghawng lum ther ther a khawih laite chuan ka thaw halh a. A kawr nghawngah chuan tie chu ka vet a. Ka kut leh ka mit chuan an thawh tur an thawk mawlh mawlh a. ka rilru erawh hmun dang daihah a awm thung.


Ka suih zawh chuan a kawrnghawng ka ti thla a, ka zo fel ta. A mitah ka en a, thil dik lo a awmin ka hria.


“Tih dik loh ka nei em ni?” ka ti sapa. A lu a thing a. “Tih dik loh engmah i nei lo” tiin a tie chu a khawih a. “Ka lawm e” tiin a inher a, hmanhmawh takin a chhuak nghal a. A chhuah thleng chuan ka thlir renga.


Engvangin nge a hmain chutiang chu thleng tawh thlata hriatna ka neih le?


*** ****


Zing lama Ian-a awmdan avang khan Amanda-i thu min hrilh kha ka ngaihtuah chhuak uar uara. Ian-a nupui hmasa chu Alison-i a ni a, mahse a nupui chu thah tirin Asley nen hian an innei ta a ni ti khan min hrilh a. Nizan khan helai hmunah hian kan riak tawh a, khawiah nge Ashley-i chu? Helaia cheng tumah hian a hming an lam ri miah bawk si lo.

Chapter -19


Cullen chhungkua kan fin atangin kar hnih zet a liam ta. Engkim a tha vek a, buaina em em engmah kan tawk lo. Naupang hlei hleiin nuam an ti a, an tan in chu a lian tawk a, infiam a duh tawk a tlankualna tur tual zawl a awm tha bawk nen. Chumai bakah engtik lai pawhin Nathan-a thian an nei tawh a, a hah ber leh naupang ho bitum ber erawh Charlie-a a ni. Nau-awm a tlin em em a, a inbual turte hi an au teng tung hmasa phawt zel.


Kei ve maw? Mut nan hun tam zawk ka nei tawh a, zingah naupang ho Marie i’n a lo buaipui vek zel a. Chhun lamah hnaah ka kal a, tlaiah ka haw leh a, naupang ho nen tual zawlah kan infiam ho thin. Marie i’n hun min raawn hman pui ve thin bawk. Ashley-i pawh ni tlemte kal ta khan a rawn haw ve a, an in a kei leh ka fate min hmu erawh a hlim vakin a lang lo. A hmai sen tawn tawn leh a kut humruh lai kha hmuhhmaih theih a ni lo. Khami ni atang khan ka la hmu leh ta miah lo. Khawiah nge a kal bo thin tih ka hre lova, Ian-a pawh chuan ngaihsak hmel a pu ngai lo.


Chutih rualin Alion-i chanchin erawh ka hre chiang chak takzet. Ashley-i hi a thattu chu a ni thei nagem tih ka ngaihtuah a. Mahse mi nupui hlui chanchin lo ngaihtuah ve vak chu ka tih tur niin ka inhre si lo.


Ian-a maw? A hming ringawt pawh hian hlim hmel min put tir thei. A nui hawk hawk laite, a nui seih laite leh a mit tuipui ang mai a pawl fim kak maite chuan keimahah thu ril tak an sawi niin ka hre thin. Eng emaw sawi duh a nei thin niin ka hria a, mahse a thusawi tur chu a leiin a phuar tlat zel. Engmah daidangtu awm lovin a sawi duh chu ka bulah sawi thei se ka ti thin ngawt mai.


Thil pakhat erawh Marie i’n tihpalh thil thuiin a sawi chhuak palh a, chu chu kum 6 chhung zet amah leh amah Ian-a a inhrem tih a ni. A hun tam zawk hnathawhna lamah a hmang a, in a a awm ve chhunah Nathana bulah hun a hmang leh a. Engvanga Nathan-a chu Asian rawng kai daih bik nge a nih tih ka zawh erawh chuan kan thusawi lai thupui a thlak nghal vata.


Ka chian tak em em erawh tu pawh mai hian ka lakah sawi chhuah duh loh thil an nei tih hi a ni. An sawi chhuah duh loh thil chu Ian-a nen inzawmna thuk tak neiin ka hre bawk. Eng tikah emaw chuan chu zawhna chhanna chu ka la hmu thei ngei ang.


Bathlarah thuin coffee thlum tui tak ka in a, favang thlifim chuan min rawn chhem harh sawng sawng a, tual laiah chuan thingkungin an hnah rawn an rawn thlauh darh nuaih a, kan piah hla takah chuan tlang sang zet mai a ding luah a, chuta tang chuan zing tin ni a rawn chhuak thin. Tun hun hi fur tih lohvah chuan ka hun nuam tih lai ber a ni.


Ka fate erawh hi chuan thlasik nuam an an ti ber a, vur leh Christmas vangin. A chhan pawh Christmas ni chuan eng prank pawh neih theih a ni a, chulai te chu nuam an tih ber a ni. Kum tin an hmaih ngai lo. Tun kumah pawh hian engtin nge min tih leh dawn ka hre lova, Nathana a la awm belh tawh lehnghal.


Ka ngaihtuah let hian Ian a’n a in nuam taka min dah lut ve hi ka lawm thin. Tuna ka thawhnaah hian thla 3 hnuah hlawh a pung dawn chauh a. Ka fate school fee, inluah man, an mamawh eng eng emaw leh Raine damdawi man tur nen chuan ka tlin kher lovang.


Caleb-a ka ngai ngawt mai. A pawisa te chu ka hman sak duh hauh lo ang a, mahse hetiang hunah erawh hi chuan ka mamawh takzet. Keimah chauh chuan nutling nih ka tlin kher lovang.


“Eng nge i ngaihtuah vung vung a?” ka hnung lam atanga mipa aw ka han hre thut chu ka phu chiang lutuk. Ka awm ka dawm a, hnung lam ka hawi a. Ka hnungah chuan mitmeng mawia chu a lo ding reng tawha. “Khatiang a in melh kha ka duh lo a nia. Phung hmu ang mai” tiin a rawn nui suk a.


Ka thin a phu nasa em a ni. Kan nui veleh hnuhnawh a. Ka bulah chuan a rawn thu ve a, dar leh dar insi rialin kan thu dun a, ka thinphu pawh a reh leh nghal sawng sawng a.


“I tawng zawi ee. Sawi i nei ami?” a rawn tih chuan phawk deuh hian ka melh a, ka lu ka thing a. A mitmu pawl erawh hmuhnawm tihnain a khata.


Ka thinphu pangai leh vat chu a lawmawm hlemai. Ni lo se chu ka thawk thlengin a pangai dawn si lova. Ka thawk zawng a piang mai chuan a rim chu ka hnarah a rawn lut siai siai a, vanram rim ang mai a ni. Nghenchhan chu nghengin ka va mitsir a.


“Ka zawhna ila chhang lo a nia” a rawn ti a. Zawhna maw? Eng zawhna maw? “Ohh...! Engmah ni lo ve. Engvakmah ka ngaihtuah lo” tiin dawt var kan sawi nghal deuh tawp a. “Ka lakah daawt i sawi thei ngai lovang” tiin min lo chhang vata.


“Umm..,naktuk hi kan hlawh lak ni a ni a, in luah tur ka dap ve mai tawh ang chu ka lo ti deuh a. Mahse chutin ala thahnem vak lo a, daih phei chu min daih lo deuh anga, mahse insurance ah pawisa tlem ala awm ve a, chu chu ka hmang then mai ang chu ka lo tia”


“Thil eng emaw ka lo sawi ve i remti em?” tiin min zawt a.


“Aw?” tiin ka chilh ka lem khalh a. “Hetah hian i duh chen chen i awm thei tih i hriat kha. Keini lamah inthahrunna tur emaw venthawn tur engmah a awm lo a nia. Chuvangin i hlawh chu i fate tan hmang la, insurance erawh khawih lovin emergency atan dah zawk rawh. Tunah rih hi chuan in aiin pawisa i mamawh rih zawk. I hlawh i khawl anga, nakinah in i la lei zawk dawn alawm.Naupang an lo lian anga, in in a la zo lo thuai che u anga. Insawn kual reng kha ala buaithlak ang. Chuvangin vawiin chauh niloin thui tak i ngaihtuah dawn nia” tiin zaidam takin min hrilh a.


“I fate pawh hetah hian an hlim em em a, Nathan-a pawh in rawn awm atang hian hmuh theih khawpin a nun a inthlak danglam a, a hma zawng aiin a hlim a. A hmain hetiang ang renga a hlim hi ka la hre nang lo. Marie leh helaia thawk dangte pawhin an ngaina vek che a, chuvang chuan inthlahrunna tur emaw, chhuah mai duhna tur ang thil emaw awmin ka hre lo. Mahse a tawpa thuthlukna chu i thu thu a ni e” min ti a.


A thusawi engkim chu uluk takin ka ngaithla a, a sawi chu diklo pakhatmah a awm lo. Kei pawhin helaia awm hi nuam ka ti a, han chhuahsan ngawtna chhan tur awmin ka hre bik lo. “Nang eng nge i ngaih ve dan?” tiin kan zawt khawl maia.


Ka lam a rawn hawi a, kan mit a intawng chata. “La awm rih turin ka duh che a ni” . A sawi zawh chuan ka lungphu a tawp nghal maiin ka hria. Lawm avangin ka nuih seih a. “A nih chuan kan la awm rih ange” ka ti a, ka biang a rawn sen nghal tawn tawna.


Ka leh hawi hmain a lawm hmel kha ka hmu hman. Mipa naupang a motor lem awh ber nei ta ang maiin a ni a awm ni.


“Nathana hi tun hmain hlim taka a nui sangte, infiama inchhunga a tlankual laite hi hmuh tur a awm ngai lo. Mahse i fate an rawn tel ve atang chiah hian a naupan hun nuam lai tak tur chu a intan chiahin ka hria.


“A nih leh Nathana hian engtik lai mai pawh a kawr fual tak leh kekawr chhah tak a ha ziah hi eng nge i ngaihdan?” tiin ka zawt a. “Ni e tiraw. A chhan chu a ngaina lutuk a” tiin min chhanga. A dik, chu chu Nathana pawhin a min chhan dan a ni. Ani ang naupang kumah chuan naupang fing tak leh hemi kawngah hi chuan dawtsawi thiam tak a ni ka ti tlat.


Ka mit ka chhing a, ka lu ka thin khum a. Ka mit ka men chuan a ngaihna hre lo takin min lo en reng a.


“Ian, ka ngaih ve dan chuan Nathana hi nghaisakna hnuaia seilian a ni”

Chapter -19


Buzz... Buzz... Buzz..

Coffee table a ka dah ka phone chu ka la a, a hming ka hmuh atang chuan ka nui nghal sanga. “A tawp a tawpah chuan min rawn call nachangte i hre ve ta a ni maw.?” Tiin phur zetin ka chhanga. Ka mitthlaah a mitmu uk kharh a min en kalh tur lai chu a rawn lang nghala.


‘Nang pawhin min rawn call ve tur che a nia” a rawn ti a. “Mi buai tak i ni tawh si a, rawn call che pawh ni ila i la hman dawn chuang lo tih ka hria a, chuvang chuan ka lo call duh lo che a lawm” tiin ka nui chhuak lek lek a.


“Ka ngai thin lutuk che” phone atang chuan a rawn thaw haka.


“Ngai thin chauh maw? Tunah min ngai tawh nange?” ka lo ti let a.


“Hnial khan lah hi i hre thei sia Saph” tiin a nui haka. “I sawi dik e. Tunah pawh hian ka ngai che” ti a a tawng sap ri chuan ka nuih a rawn ti za a. “Kei pawhin ka ngai che Caleb” tiin ka nuichhuak haka. Ka harsatna hrang hrang tawhte chu hrilh kher ka duh lo. A chhan chu amah chauh pawh chuan harsatna tam tak a hmachhawn dawn a ni tih ka hria a, a belhchhahtu mai ka ni dawn si a. Nakinah thil engkim ala fel leh vek anga, chutah chuan ka la hrilh ang.


Thu ho lamte te sawiin rei vak lo kan titi a, chu mi zawhah phone pawh chu a dah veleh mai a. Phone ka dah fel chauh tihah Ian-a, hlim lo hmel zeta a rawn kal chhat chhat chu ka va hmu a. Rang takin ka thutna atang ka tho chhuak a, a chalah chuan thlanfim a bawl tek tek a.


A lam panin ka phei vata, a hma zawnah dingin ngawi rengin hnai set sawtah kan in en a. Ka inrinlawk hmain min rawn vuan thut a, a awmah min pawm beta. Mak tiin ka ding ringawta. Ka sam zawnah a thaw haka, dik tak chuan namsawn lehnghal vat ka duh viau nangin ka rilru tak tak erawh chuan nuam a ti em em thung si. A hlim a, nuam a ti veng veng a ni. Ka chet tir pawh ni miah lovin ka kut chu a rawn che tual tual a, a hnungah ka kuah let ve ta.


A inhnit feih a ni tih ka hria. A kawr hnung chu nghet taka thamin a rim chu ka hnim veng veng a. Harhchhuak thut ang mai hian ka meng kawk a, min kuahna atang chuan ka nem sawn vata. “Ummm, tui i in duh em?”


“Aih”


“A nih thil sawi duhte i nei em?” tiin ka tawlhhnung a. Nui chungin a lu a bu nghata.


“Coffee kan siam phawt ang e” tiin choka ah ka lut a, coffee no hnih ka siam zawh hnuin ka let leh a. Ian-a chu thutthlengah a lo thu a, a bulah chuan ka va thu ve a.


“Mangchhia ang mai a ni” tiin a rawn sawi chhuak sep a. Ka lo ngawi rneg ringawt a, a sawi duh chu duhtawkin sawi rawh se. “A accident na hmunah chuan ka va kal ve a. Car dawr a kan kal tirh atang reng khan Yellow Porsche khan a mit a lain a ngaina nghal em em a. A tuk zingah chuan a Car awh ber mai chu kan inkawtah atan ka hun sak a. Engvanga han leisak ta mai nge ka nih ka inhre lo. Lei sak turin min dil lova, mahse chu chu a nihna a ni tlat si. Chuvang erawh chuan mamawh engmah a nei ta lo ve tihna erawh a ni lo. Chumi ni chuan a hlim em em a, a hlim hmel khan keipawh min ti hlim a ni”. A thusawi lai chu a chawl deta, rei lote hnuah a sawi chhunzawm leh a.


“Zanlai pelh tawhah chulai kawnglaiah chuan ka ding reng ringawt a, Police motor leh ambulance in kawngpui chu a khat vek a, ka hmuh ve chhun erawh Car eng alh hluah hluah chauh chu a ni. Tap tur pawhin engkim mai chu a rang tehthut lutuk a, mahse kan vuini atang chiah khan ka tawrhna chu a intan dawn chauh mai si” a kun a, a coffee no chu a en reng ringawt a. A tawp tawh tih ka hria. A bak chu a sawi chhunzawm tawh lovang.


“Eng ang hmeichhia nge a nih?” tiin ka zawt a. A hming erawh sawi lam kher angai tawh lo. Chuveleh thim a kiang ta maw tih ang mai hian a rawn nui chhuaka.


“Mawinain a khat. A chhung lam leh pawn lam” a tih chuan thawk ka lo la hak a. “Mahse chu chu a thih hnu chiah khan ka hrefiah ve chiah” tiin chiang takin min rawn en kalh a. “Ka lak atanga rawn let leh tawh ngai lo tur a lak bo a nih atang chiah khan ka lo hmangaih zia hi ka hrethiam ve chauh. Min mangthana hnunhnung ber a sawi hma kha chuan a tel lova ka awm theih loh rinna ka nei lova, a kal ta a ni tih ka hriat chiah khan a tel lo va ka ruak zia ka inhrethiam ta a ni. Ka hmangaih zia ka hrilh hman tak loh avanga ka inchhirna hi engtiang a teh phak nge a nih ang tih ka hre lo” a ti a.


A thusawi chuan ka thinlung chu hriau tam tak a chhun ang maiin a ti na a ni. A mitmeng mawi tak phen a a rilru hrehawm na tur chu ka hmuh pui thei ri ruai a, mipa dik tak thinlung leh hmangaihna lungphum a awm a ni. A nupui hlui a hmangaihna chu. Chu a na hmel chuan kei pawh min ti na a ni.


Tum lawk miah lovin a biangah ka va dawm a, a mit a chhing a, ka dawmna lamah chuan tlem a rawn thle a. Raine i’n min rawn koh takah chuan kei pawh ka harhchhuak thut a. “Aw ka lo kal” tih pahin ka tho chhuak a, ka mittui chu ka hre zeuh a.


EXTRA:

Hmeichhe pakhat hi chu pindan zau takah chuan thinrim takin a lut a, chair a thut pahin a hui pap a, a shawl rawn uai thla pawh chu hnung lamah a theh leng lawp a. “Kha pa khan sawi a nei tawh em?” ti a a zawh chuan a thurualpuinu chuan awlsam angreng tak hian a lu a lo thing a, chu chuan a thinrimna chu a belhchhah zual sauh a.


Chu nu chuan thinrim tak hian a thutna vawnban chu a han chum bur a. “Tunah chuan kha Hmeli pawh kha Ian-a inah inti neitu takin a khawsa tawh a, tunah phei chuan Nathan-a nu emaw a inti hial tawh. Mahse tun a kan mi hren lai hi kan chhuah a, a ka a an vaih zawngin man chuah kan ni nghal a ni mai” tiin a rum nghut nghut a.


“Lungngai mah ta che. A sawi chhuak ngam teuh lo mai. Eng nge kan tih theih a hria alawm” ti a nui hak pahin a sawi chhuah huna Alison-i fate chunga thil thleng tur chu a ngaihtuah paha. “Tunah chuan a tawk tawh e. Tih chhiat kan tum a, mahse kan hlawhchham. Saw mi lakthlak loh saw a bula a awm chhung chuan engmah kan ti thei lovang. Chuvang chuan kan thah mai a ngai ang” chu nu chuan dawhtheihna a tlachham tawh hle a.


“A nih engtin nge Ian-a saw ni ang? A venhim theihna tur a nih phawt chuan eng zata tam pawh sen ral a hreh lovang”


“Ani pawh chu kan that tel ve anga a ni mai alawm” chu nu chuan awlsamtein a lo chhanga. Pindan kil lam chu a melh phei a, chutah chuan an mi hren pa chu phuar behin a awm a, na ti leh tal chhuah tumin a lo rum hak haka. Chu pa lam pan chuan a phei a, chu pa chuan chiang kalh hian a lo melh let a, a mitmenga chuan huatna leh thah mai duhna a pu a.


“Tunah hian min thah i chak ngawt ang tih ka hria. Mahse chumi hma chuan i fanu leh i makpa saw ka that hmasa phawt ang” tih pahin ngeiawm zetin a nui su su a. “Tunah zet chuan negti kawng mahin i chhan thei lovang. Ian-a pawh ni se. Thah a ni anga, a thi ngei bawk ang”


Nicholas-a chuan chu nu chu a rum khum nghat a, tal chhuah tumin a bei leh tuau tuau a. An nanchin hma ngeiin a fanu chu a humhim angai a ni. A chan tawh a, chan nawn leh a duh tawh lo.

Chapter -21


“Nate, i naute pahnih kha tha deuhin lo awmpui rawh aw. Nang chu i upa deuh hlek tawh a, i puitlin zawk bawk kha” phone atang chuan ka ti a. “Aw le Saph. Ka kal thei tawh angem? Apiin noodles min chhum saka”


“Aw le. Tui deuhin in ei dawn nia. Ka lo haw har lovang. Ka hmangaih che u” tiin phone chu ka daha. Naupang lo enkawl tu tur awmpui an awm tho nangin a la mi thar deuh hlek a, chuvangin Ian-a bulah naupang ho chu in lamah lo awm mai se, Marrie in lo awmpui se ka duh zawk thu ka hrilh a.


Ian-a thiannu Emily in a tuibawm a keh thu a sawi veleh Car ka la chhuak a, a thianpa Jake-a hoin damdawiin lam panin kan tlan nghala. A na ti rum thawmah chuan ka hah vek hman. Kei pawh chu nau vei ang maiin a boruak chuan min awm tir ve hman thelh a ni.


Nau neihna kawtah kan nghak thap a, Drake-a erawh nautepa tur a ni bawka, a awm hle hlei thei lo. Jake-a ve thung chu ang huauin a lo muthlu bawrh bawrh a. “Ian, Mr
Brown-a awmna chin hi i hria em? Tunlai a vang riau mai” tiin Ian-a chu ka zawt ua.



“Aw, min rawn call alawm. Hna chungchangah California a a zin a ngai thut alawm mawle. A ngaihtuah khawp mai che. I chanchin hlir a ni min zawh” tia min chhan chuan ka lo nui sanga. A tha tih hriat ringawt pawh chu a hahdamthlak e. Hmani carnival a ka thlalang hmuh chungchang kha Ian-a chu zawh ka duh hle a, mahse a hun leh hmun niin ka hre rih si lo.


“Sapphire!” chu pa aw chu ka hriat than tak a ni. Ka mit chuan a mitmu dum kalh mai chu a va tawng uchat a, eng tiang chiahin unge ka ngaih tih hi ka sawi thiam lo. Ian-a min vawnna chu thlahin a lam pan chuan ka tlan phei a.


A rim ka hriat than tak mai chu ka hip lut vang vang a, chu chuan amah ngei a ni tih a tichiang lehzuala. “Ka ngai thei lutuk che” tiin a awmah ka bei thlawp a. “Kei deuh hian alawm ngai che” tih pahin ka lu chungah a khabe a rawn nghat a.


Ka vawnna chu ka la thla a, a ban pawh chu ka nam per lawp a. “Engvangin nge min rawn call ngai rengl reng loh? Ka call lah chhang thei bawk si lo” tiin ka thinrim a rawn chhuak thut a. “Ka tihpalh lutuk. Bussiness theiah ka buai em a tin ni” a ti a. A sawi zawng chuan a mit hnuaia dark circle awm raih chu ka hmu a.


A biang lehlam lehlamah chuan ka vuan a. “In enkawl tha rawh ka tih che kha” zawi raihin ka ti a. “Ka tihpalh” chu zawng chu min chhanna a ni.


“Sapphire?”

“Awihah?”


“Tunah khawiah nge in awm?”. Chu zawhna kan dawng chu thu thinthawng tak dawng ang mai ka ni. Ka chhan ngei angai a, mahse ka chhannaah a lawm dawn lo tih ka hrechiang ropui mai si a.


“Tluang takin naute a piang e. Mipa a ni e” tiin nurse nu chu a rawn chhuak a, ka lawm ngei mai. Zawhna chhan hmabaka ka awm lai tak lehnghalin.


A lo muthlu ho pawh chu an inkaitho sap sap a, “Tunah chuan pa ka ni ve ta” tiin Drake-a pawh a phur khawp mai. Vawilehkhatah chu naute rawn piang chuan boruak a rawn thalk danglam vek a. Kei pawh chu naute en tur a kal ve ka tum a.


“Sapphire!” ka ding chawt a. A hma a kan thil sawi tho kha chhunzawm a ngai leh dawn tih ka hria. Engtin pawhin pumpelh zawng mah ila Caleb-a lak atang hi chuan ka tlan chhuak thei ngai lovang. Min rawn pan a, ka hmaah rawn dingin ka kutah a rawn chelh a, corridor a thutthleng ruakah chuan kan thu a. Zanlai a nih tawh avangin light pawh a dim angreng hle a.


“I sawi tan dawn nge ka zawt tha leh dawn che?” a rawn ti nghala. Tihngaihna a awm chuang lo. Sawi tho tho a ngai.


“Aw le, a vaiin kan hrilh law law ang che” ka ti a. Ka dawr kangte, a hnua kan thil tawnte leh hotel a ka thawh dan thleng chuan ka hrilh fai kel a. Aiden a’n a in atanga min hnawhchhuah lai thlengin.


Caleb-a chu thinrimnain a khat a, a hmai a senin a inhum ruh hle a. A kut chu ka chelh sak vat a. “A pawi ka ti lutuk. I rilru a na tih pawh ka hria. Mahse tul lova chutianga i awm ka duh lo a nia”


“Tul loah aa? Sapphire, in leh hnathawh pawh nei lova i awm hi. Chu chu thil tul lova rilru hahah min ngai em ni?”


“A pawi ka ti lutuk. Mahse minpui turin Ian-a a lo awm hlauh a. Ani zarah thil engkim a pangai leh tawh a, kei pawh keima kein ka ding leh thei tep tawh alawm. Nakin lawkah chuan engkim a pangai leh tawh thu ka la hrilh ngei ang che” ka ti a.


“Kum 6 zet hringnun kan intawm a. Engvangin nge ka ngaihtuah loh tehlul ang che? Ian-a a awm hlauh i tia mi?” a mitmeng a thim vek a, a ngaihnatawmna zawng zawngte chu lakbo vek ang mai a ni. “Aw” zawitein ka ti sapa.


“Heng zawng zawngte hi a thlen tir a ni lovang tih tunge sawi thei? Chung thil a thlen hnuah chuan a inah a la lut che anga, thil tha ti anga a lan theih nan” a rawn tih chuan ka en let kalh a. “Engtin nge chutiang chuan i ngaih theih zawk a?” tiin ka zawt let a. An pahnih hian inkawmngaih tak an ni lo tih ka hre tho nangin thil kal dan hian a chhe lam a pan dawn tlatin a lang.


Caleb-a chu a nui hawk hawk a. “Sapphire, i hmu ve thiam lo em ni? Hepa hian a duh tawh che a nih hi”


Tawng tumin ka ka ka ang zuau a, mahse engmah a ri chhuak thei lo. Chu thu chuan min thawng viau na a chungrilah tak erawh chuan min ti lawm a ni. Chutih rual erawh chuan Ian-a lakah pawh zawhna ka nei a, ka zawt ngei bawk ang.


“Kan kal tawh ange. Nakinah kan inhmu leh dawn nia” tiin ka thutna atang chuan ka tho a. Caleb-a chu a ngawi renga. Emily awmna lama phei ve ka duh a ni. Chutah chuan Ian-a pawh a awm tih ka hria. Ka kal tur chiah chu Caleb-a chuan min rawn pawt her lawp a,kan hmui leh hmui a inchuktuah nghala. A ngaihna hre lovin ka meng kawk a, ka che thei tawh lo. Ka khawng nghal vek. Min fawhna a thlah thleng pawh chuan ka la che thei chuang lo.


A mit a chhing a, muangchangin a tho siai siai a. Rei vak lo hnuah a mit a rawn meng a. “Duhthlan tur i nei Sapphire. Amah nge keimah?”



*** *** ***


“Enga tinge tun thleng thleng a i la mut lova?” in a ka luh chuan thutkhawmna pindanah Marie a lo la thu meng kar a. “Ka lo la nghak che mawle. Ian a’n a lehkha chhiarna pindanah a nghak che tih hrilh tur che in. Fimkhur ang che. A thin a rim teh ania” tiin ka biangah a rawn chul a, a pindan lamah min luh sana.


Enga tinge a thinrim ve rikngawt? Keimah zawk hi alawm thinrim tur chu. Caleb-a nena kan inbiak khawtlai leh avangin mins10 hnu velah Emily pindanah ka lut phei ve thei chauh a, a lo awm tawh reng reng hleinem.

Ka pindan lamah ka lut hmasa te te a, thlalak ho chu envelope ah ka khung a, a lehkhachhiarna pindan lam chu panin kawngka ka kik a, ka lut tlang nghala.


A computer table atang chuan a rawn hawi chhuak a, thip zet hian min rawn melh a, eng mah a sawi lo. Ka rilruah thil pakhat chiah a awm. Caleb a’n “A duh che” a tih kha. Mahse Caleb-a chu ka first kiss a ni tawh tlat. Sapphire Kingsley-i mipa kiss hmasa ber.


A dawhkan chu a chum ri bur a, ka phu chiang hlemai. “Min chhang rawh” a rawn ti thawt a.

“A eng chu maw ka chhan dawn che?”


“Halloween zan khan khawiah nge i awm?”


“Carnival ah” tih ringawtin ka chhanga.


“Eng nge carnivalah chuan i tih?”


“Naupang ka hruai a, kan intihlim”


“Tunge midang tel ve?”


“Engvangin nge chutiang mai mai min zawh vak vak a?” ti el zet hian ka tih khum a.


“A chhan chu dawt min hrilh tih ka hriat avangin” tiin min rawn en khalh a. “Dawt ka sawi ngai lo” tih pahin kei pawh chu ka thutna atang ka ding chhuaka.


Dawhkanah chuan thlalak a rawn theh chhuak chuai a, Carnival a kan awm lai thlalak a ni. Raine nena kan infiam laite. “Engah nge i lo ngaihtuah ve vak? Ka fate an nih hi” ring leng lawngin ka ti tuar a.


“Ka fate an ni ve tho alawm” ka awki aia ring mah chuan Ian-a chuan min lo ti let a.


“Eng nge i sawi chu a awmzia?” zawi sapin ka ti a. “Keimah hi Alison-i ka ni tiraw? I nupui hlui Alison-i kha?”


Ian-a chuan a lu a thing a, mak tih hmel zetin min en a. “Chutiangte tunge sawi a?”


Ka envelope ken chu hawngin ka phawrh chhuak a. “Hei..” tiin ka kawhhmuh a. Thlalak chu ala a, a melh reng ringawt a. Hawi pawh a rawn hawi chhuak lo.


“Keimah hi Alison-i chu ka ni tiraw? I nupui hmasa thi ta, a thih avanga kum 6 chhung nun hrehawm zet i neih phah nachhan kha?” ti a ka zawh lai chuan ka biangah mittui a rawn luang a. Ani erawh chu a ngawi renga.


“Min en la ka zawhna che chu min chhang rawh” ring takin ka ti a. “Min chhang ta che Alison-i chu ka ni em?”.


Ian-a chuan thlalak chu a la melh char char a, a rilru a insual mek a nih hmel. Muangchangin a rawn hawi chhuaka. “A tha e. Engkim ka hrilh vek ang che”

Chapter -22


Ka thin phut nasat dan em em chu lungphu chawlin tlu tawp dawn pawh ni ila a awm lo ka ti hauh lovang. A tawp a tawpah chuan thudik ka hre ta a, chumi mil a nun hman zir chu ka ngai dawn ta. A lehkha chhiarna pindan kil lamah chuan keimahin ka thu a, Ian-a chuan a thutna atangin min lo thlir reng a. Ka mit ka chhing a. “Ian, khatianga min melh reng lo khan i awm thei angem? Ka lu i ti na a nia” tiin ka chal ka dawma.


“I tha meuh a maw? Chawlh hahdam rih i duh em?” a rawn ti vata. “Ni lo, thudik zawng zawng chu ngaihthlak zawh vek ka duh zawk. Sawi chunzawm leh zawk rawh” ka ti a.


Thawk an la vang vanga, Ian-a chuan a sawi chhunzawm leha. “Duh ni ilang chuan dawt pawh ka phuahchawp teuh thei a ni tih i hria. Mahse hei leh chen thil i lo paltlang tawha, tunah chuan thudik hriat hi i phu tawh a ni. Ka sawi zawh hunah meuh chuan min haw hluah hluah maithei a, kumkhua atan min kalsan zawk maithei bawk”. Ian-a chu a thaw leh haka, a thutna atanga thoin ka lampanin a rawn phei a. A rawn thlen hma loh chuan ka awmdan chu ka thunun hram hram a.


“Alison-i leh kei chu school khat a kal ho thin kan ni a, mahse chutiang vakin ka hrechiang lo. Ashley-i unaunu a ni tih bakin. Ashley!” a hming a sawi zawng chuan za angreng tak hian a nui haka. “Chutih hunlai chuan chu nu chu ka ngaizawng em em thin a, mahse chu thu chu tunthleng hian a bulah ka la sawi chhuak ngai lo. Sawi chhuak turin ka huaisen tawk tawh lo te pawh a ni ang e. Chutih lai chuan ka pa in New York lamah kumkhua atana kan insawn tawh tur thu a rawn sawi thut mai a. Ashley-i pawh chu ka thlah a lo ngai ta a. Mahse engtik hunah emaw chuan kan la inhmu leh ngei ka ring tlat thin” a thusawi lai chu tawpin a thaw haka. A thawnthu tak takah kan lut tan dawn a ni tih ka lo hre nghal mai.


“Kum 6 a liam leh hnu chuan ka pa nihna kan company CEO chu ka chelh a lo ngai ve ta a. Mahse ka pa chuan thudelhkilh a nei a, ama min thlan sak ngei nupui a ka neih chauhin chu nihna chu ka nei thei ang. Ka tette atangin engtikah emaw kan company enkawltu lu ber nih chu ka lo suangtuah thin a ni a, chutia ka pain min han tipawh chu awlsam angreng takin ka lo aw ve mai a. Inneihna lam reng reng ka la ngaihtuah chhin ngai lo va, ka nupui tur chu tunge a nih tih pawh ka hre chuang lo. Ka pain ka nupui min thlan sak lai chuan kei erawh chawlh hmangin ka zin bo daih a, ka haw leh hnu chuan ka pa chuan ka nupui tur chu Nicholas Brown-a fanu a nih thu min hrilh a. A tirah kha chuan Ashley-i a nih ka rin em avangin phur takin ka aw vata, tichuan Brown chhungkua ho nen chuan kan inhmu ta a, chutah chuan ka tisual a ni tih ka inhrechhuak ta vata. Ka pa chuan Ashley-i chungchang reng reng a sawi ta hauh lo mai. Ka nupui tur chu Alison-i zawk a ni. Chumi tlai chuan engmah ka sawi lo. Mahse kan haw hnuah erawh ka pa nen kan inchai nasa khawp mai. Ka pa bulah chuan Ashley-i zawk chu ka hmangaih a neih ka duh zawk a ni ka tih pawh chuan ka pa chuan a pawm thei thlawt si lo.


“Thlan tur bik ka hre lo. Mi pahnih hringnun tichhe vek thei dinhmunah ka ding a, a bik takin Alison-i. Ka tan chuan hmeichhe pakhat ve mai a ni a, hmeichhe fel tak leh rilru tha tak a ni tih ka hria a, a nun tihchhiat sak ka duh lo. Mo thuam inbel a kan inneihna tur a rawn pan lai, rimawi a rik ruai ruai lai ngei pawh khan ka rilru a la insual a ni. Inneihna chu tih tawp mai tur emaw ka tih lai chuan mo nu ka hmuh tawh zawng zawng nalh ber a la ni lawi si. Tlai ni tla turin a a kawr mawi tak leh a mitmu uk kharh mai an chhun set set kha chu ka lei te kha tawn beh ang hmak a ni a, chu chu alaka rilru ka pek hmasak berna a ni. Inneihna pawh chu ka ti tawp thei ta bik lova, a tawpah chuan ‘Tiam tlat e’ ka ti ve ta a ni”


“A hnuah erawh thil tihsual lian tak ka nei tih ka inhrechhuak a. Inneihna ringawt piah lamah a nun tichhe tu ka ni dawn. Ka laka beisei a neih tak tak hma a thil nih dan hrilh vat mai chu ka duh ta a. Kan inneih zan a ni a, ka chhing lo reng reng. A tap ri hre reng chung khan hnem turin ka che thei bik si lo. A hnuah chuan tunge ka hmeichhe hmangaih chu tih min zawt a, dawh hrilh ka duh a, mahse ka thei lo. Ka hmangaih chu a farnu a ni.” Sawi nuam a ti lo hle tih a hmel atangin ka hre thei a, mahse tih theih awm hek lo le, ka lo nui vel ringawt a.


“A farnu chu amah zawk chuan min tihpui tha leh a, engkim ruahmanna a lo siam a, chutia a farnu min tihpui mek lai chuan a lakah ka luangliam tan tih ka inhria. Mahse chu chu ka pawm thei lo. Ka hmangaih chu Ashley-i tih chauh kha ka rilruah khan a lian ber em em renga.Mahse chuta tang chuan hmangaih hmasak ber leh hmangaihna dik tak awmzia ka zir chhuak ve ta a. Kan inneih zungbun a phelh lai khan ka tap a, khami zan phei kha chuan ring takin ka tap chhuak nghe nghe”


“A hma a ka dinna ngaiah bawk khan ka ding nawn leh a, thuthlukna siam harsa tak nen. Mi pathum hringnun ka tichhe dawn a, chu chu a thlen ka duh lo. Ka hmangaihin a min kalsan lai chu ka enliam a, khami tum khan chelh ding thei ka ni a, chu chu ka duh dan pawh a ni. Mahse Ashley i’n thil min lo hrilh tawh avang chauhin ka danng thei lo zawk a ni”


“Ashley chuan eng nge a hrilh che?” tiin ka lo zawt vata.


“Nau a pai thu min hrilh a. Chu chu Nathan-a hi a nia” a ti a, a sawi chhunzawm leh a. “Alison-i khan a zawng zawngin min lo hmangaih hman a, a thinlung tihnat ka hlauh avanga ka invenna zawng zawng khan awmzia a nei zo lova, keimah avangin na tak a tuar ta a ni. Engtin nge amah a a paltlang theih ka hre lo, mahse a paltlang tlat si. Keimah avanga chutiang dinhmun a ding a ni tih ka inhria a, ka inngaidam leh tawh ngai hek lovang”


“A hnenah ngaihdam dil turin ka kal a, chu ta a sawi chu ‘theihngilh daih rawh. Keite chu i lamah ka awm reng dawn a,chu chuan min ti hlim em em alawm’ tih hi a ni a, chu chu a aw ka hriat hnuhnun ber a ni. Nitin a thlan tlawh ziah thei lo mah ila ka kal apiangin a pangpar ngainat ber ka keng a, a thlan chungah ngaihdam ka dil no fo thin. A chang phei chuan a thlan chu darkar 1 chuangte ka bia a, la dam reng chunga bia ang mai hian ka be thin”


A bianga mittui rawn luang chu ka hmu a, va thawh a, va hruk sak ka duh viau nangin chu thawnthu chu ala tawp lo tih ka hre si.


“Thla a ral a, Ashley-i chuan naute a nei tan ngei a, mahse chuta ka hriat tak chu ka fa a ni lo tih hi a ni. Ka zawh a min chhanna chu ‘engtik lai mahin i fa a nih thu ka sawi ngai hleinem. Nau ka pai ka ti mai chauh a ni’ tih hi a ni. Khami ni atang khan Alison-i thihna chungchang thlengah ka dem a, chu chu pangai deuha ka biak tawpna a ni. Nathana erawh ka fa ni lo mahse ka mawhphurna a ni a, a hnuah phei chuan ka fa tak tak a nih lohna a awm tawh lo. Kan thisen in ang lo mahse kan thinlungah a nghet thung a ni. Kum 6 a liam a, la nung ve reng mah ila mi nung lo ang mai ka ni”.


Kum 6 chhung tal tap kha ka nunhlui ngaihtuah reng rengin hun ka hmang ral a, ka suangtuahna bak engmah thudik ka hmu bawk si lo. Mahse vawiinah hian ka zawhna zawng zawng chu chhan a ni ta. “Zawhna pakhat ka la nei a?” ka han ti a. Ian-a chuan a lu a lo bu nghata. “A nih nang hi...?” ka sawi lai chu kan tawp leh rih a. Mahse Ian-a chuan ka sawi dih chu a lo hre sa vek. A lu a bu nghata.


“Aw ni e. Raine leh Ryker-a hi ka fate an ni” tiin ka ngaihtuah lai mek chu min rawn chhan saka.


“Engtin? Engtik laiin?” ti a ka zawh lai chuan ka biang a rawn sen tawn tawn a.


“Nupui ka neih dawn zanah. Rui tak chungin in inah ka rawn kal a, chutah chuan hmangaihna kan chen dun a ni. Mahse zinga ka thanharh chuan kan in a, thawmhnaw ha sa vekin ka lo awm leh daiha. Khami zana thil thleng kha i fate ka hmuh hma kha chuan ka mumang mai emaw ka la ti char char. Chumi chungchang chu Aiden-a ka hrilh a, ani chuan ka mumang mai a nih loh thu min hrilh ta a ni”


*** *** *** ***

Ka thinlung chu muangchang a pawhsawm ang mai hian a na a ni.


Chu chu ka sawithiam dan a ni. Carpet a ka ke pen reng rengte chu a nghet cherh chawrh vek a, ka awm ka dawm a, ka tap hlawp hlawp bawka. Ka awm zawn na lutuk chu ka en a, ka awm ni lovin ka thinlung zawk a ni na ni. Ka hrawk a phui vek a, ka tah erawh a tawp chuang lo. Ka biang a mittui luang chu chhuatah chuan a far thla a, pawn ruah surah erawh ka mittui a hmuh theih ta bik loh.


Chulai hmun atanga hla taka inkhalh chhuah chu ka thuthlukna a ni ta. Ha tap lai hi ka pain min hmu tur a ni lo. Chutih rualin ka mitthlaah Ian leh Ashley te inkutsuih lai kha a rawn lang nawn leh thin a, chu chuan min vel nawn leh thin,


Chutiang dinhmun a min din tir bik avangin Pathian ka dem a, he khawvel a ka lo pian chhuah ve kher avangin ka nu leh pa ka dem a, min hmangaih let ve theih loh avangin Ian-a ka dem bawk. Kei aia a hmelthat bik leh a hmangaih ber a neih theih bik avangin Ashley chu ka hua a, khami ni he mitmu pawla ka hmuh tirh ni leh a zun a ka uai tanna ni kha anchhia hlawh hial ka duh.


Harsa takin ka thaw hram hram a, ka tah lai lah chuan tawp tange a ti bik si lo. Ka thinlung na chu eng taksa na mah nena han khaikhin phak rual a ni lo.


Ni a liam a, ka natna chuan zia lam a pan thei chuang lo. Ka phone ka charge lohna chin ka hre tawh lokva, a thoi hmak chu ka tan a tha zawk hlei hlei.


Tuk khat chu pangpar tui ka pek mek laiin nu pakhat hi ka lam panin a rawn kal a, a hmel chu ka hmuh tawh hnu a ni nangin chiang tak erawh chuan ka hmu thei lo. Ka zawn a rawn thlen chuan min rawn kuah a, duat takin ka samah min rawn chula. Ka din ngai rengin ka lo ding reng ringawt a.


“Darkar khat hnuah i Car a rawn thleng anga, engkim ruahman vek a ni tawh. Kal turin i lo inring dawn nia” minrawn ti a. “Khawiah maw ka kal dawn?” ka ti a, ka aw te chu a mak vekin ka hria. A chhan pawh kar 1 zet tawng mumal lova ka awm tawh vang a ni.


“Italy. Chulaiah chuan tuman an rawn zawng chhuak tawh lovang che. Tibuaitu awm lovin i awm thei tawh ang” tih pahin ka darah min rawn vuan a, in lamah min nam phei a.


Ka hriat leh chu ka darthlalang hma zawna ka din chu a ni. Ka thawmhnaw hak chu nalh viau mahse a hatu erawh thlarau emaw tih mai tur a ni. Ka hmai a ki in ka mit hnuai a dum ruih a, ka hmel a thim a, a hma zawng aiin ka cher zawk bawk.


“Car a rawn thleng tawh a nia. I bag kha rawn la la i kal vat ang Alison” chu nu bawk chuan a rawn ti leh a. Tunge a nih chiang takin ka la hrethei chuang lo va, mahse ka laina hnai tak zing ami a ni tih erawh ka hria.

Ka sunglass ka bun a, a hnung seat-ah chuan ka thu lut a, ka hmelhhriat loh hmeichhe pakhat hi driver seat-ah chuan a rawn thu lut a, min rawn nuih saka. Mahse ka nuih let ve lo. Car chu a tlan ta. Hun eng emaw chen ka on tawh loh ka phone chu ka han on a, a rawn vibrate nghal char char a.


594 voicemails
982 messages
86 missed calls


Ka thaw haka, ka notification zawng zawng chu ka clear nghal vek a. Ka pa phone ka tum a, chutih lai tak chuan Ian-a call ka dawng leh hlawl a. Ka mittui a rawn hnam leh mai dawn emaw ka tih laiin chutiang thil engmah a thleng lo. Ka a chhawlh a, chu chu ka tan hmasawnna a ni hrim hrim. Lak loh ka tum zet nangin chu chu a aw ka hriat hnuhnun berna tawh tur pawh a ni maithei tiin lak ka tum a, tichuan ka nunhluite chu kumkhua atan ka kalsan tawh ang.


Phone ka la chiah chu a inthiamloh thu leh pawi a tihzia thu a rawn sawi nghal char char a, mahse ka ngaihdam thu emaw engmah ka sawi lo. Min theihnghilh turin ka hrilh a, min rawn chhan hmain phone pawh chu ka dah nghal hmaka. Tawng vak thei dinhmunah ka la ding rih lo.


Ka pa erawh message ka thawn a, ka hmangaih thu leh ka rawn call vat tur thu ka hrilh a.


Driver nen chuan titi tlem a zawng kan neih hnuah kan tlan rei reuh phian avangin a hnung seat-ah chuan ka mi zal a, ka lo muhil daih a.


Ka han thanharh leh meuh chuan a hma seat-ah ka lo thu daih tawhah, ka awmah nghet tawh takin seatbelt ka lo hreng bawka. Car ke chu a ri tuar a, darthlalang kek chhawk leh thir insu ri burin a zui nghala.


Car chhungah chuan Car lum dan ang ang chuan ka vir nawk nawk a, mahse ka cushion nghen kha ka awm zawnah ka pawm bet tlat a. Mang chhia a cheng ang maiah ka in ngai a, mahse ka ka chhung a ka thisen rawn lut chuan mumang mai a nih loh zia min rawn hrilhfiah nghala. Ka khawhmuh a vai a, chutih lai chuan ka sir lamah pen ri ka hria a.


“Min pui rawh” ka aw chu zawitein a ri chhuak chang changa. Chu mihring chu ka bulah a rawn thu hniam a, a mitmu pawl kak mai chuan min rawn en a.


“Heta hi Alison-i chu a awm e. Nun nuam tak i hman ka beisei” tiin chu nu chu a nui haka. “Nuam takin thi rawh ka tihna zawk a nia”tiin nuam ti takin a nui hak hak a. Chutih lai chuan motor dang thawm ka hria a.


“Athena, mi an rawn kal a nia” tiin pakhatin a rawn ko a. “Mangtha le Ali” chu nu chuan min rawn ti a, a bak chu engkim a thim nghal vek.


Ka harhchhuah rual rual chuan boruak ka hip kawk a, ka chal ka khawih a, thlain a lo bual huh dup a.Ka taksa ka en a, eng hliam mah ka nei lo. Mahse midang tumah an awm lo.

*** ***


“Alison” ka sir atanga tuin emaw min rawn tih chuan ka zuang lo chauh a ni. A hmel ka hmuh erawh chuan ka hahdam leh suai suai a. “I tha em?” tih paha min rawn khawih a tum a, mahse ka lo dang vata.


“Ka tha” ka lo ti vat a. “Kha le..” tiin tui min rawn pe a. Ka lem nghal khawlh khawlh a, ka in zawh veleh bang ngheng chuan ka thu hle hle a. Ian-a erawh ama chair-ah a thu a, min la en reng tho a.


“Chawlh hahdam rih ka mamawh” ka ti sapa

Chapter -23


“Anu?” passenger seat atangin Ryker a’n min rawn ko a. “Engtikah nge Nathan-a te nen kan inhmuh leh dawn?”


“In inhmu leh vat dawn nia. A rei tawh lovang bawihte” tiin ka chhang a. Tun hi accident ka tawh atanga pangai taka car ka khalh awm chhun ala ni. A zawhna ka chhan lai chuan a lam takngial pawh ka hawi duh lo. A chhan chu a mitmu pawl nalh tak chu ka pasal hlui mitmu ang chiah chiah a ni a, amah min hriatchhuah tirtu mai a ni.


“Nu...?” Raine zawk chuan min rawn ko veleh a. “Engtikah nge pate Ian-a nen kan inhmuh leh dawn?” a rawn ti a. “Ka ngai tawh e” a rawn tih chhunzawm a. “Kei pawhin ka ngai alawm” zawite a tih pahin ka thaw haka.


“In school kan thleng ta e” tiin phur hmel takin ka nui lui hram hram a, kei pawhin engtikah nge Ian-a chu kan hmuh leh dawn tih ka hre bik lo. Kan inbiak hnuhnun ber atangin thla khat lai a liam ta. Ka ngai hle tih ka inhria a, mahse va biak erawh ka tum ngai hauh lo.


Naupang ho nen chuan kan in bye bye a, an school a ka thlah fel hnu chuan kei erawh ka thawhna hotel lam pan turin ka tlan chhuak lehnghala.


Ka thawhna hotel ka thlen dawn laite chuan ka thin a phu deuh dup dup a, kar 3 zet ka kal tawh loh hnuah ka han tan veleh dawn chu a nia. Ka kal loh chhan Chef Steven-a hnenah ka sawi thlap nachungin a ruk tak chuan inthlahrunawm tak a ni.


Ka thaw ri haka, hotel-ah chuan lutin choka lam ka pan ding nghala. Ka chef coat ka ha a, choka chhung chu ni dang ang thoin a ri leh luih luih tawh a.


“Sapphire” hmeichhe aw ka hriat than zet hian min rawn ko a, chu sam sen ka thiannu thar chu ka lam panin a rawn kal a. ‘Eng nge i an tawh?” min rawn ti a.


“Ka tha lutuk aw. Chef Steven hi tunah a awm hnai em?” hlauthawng ti tih deuh hian ka zawt a. Amanda-i chu a ang zuau hman a. “Heta hi ka awm e Chet Steven-a chu” ka hnung lam atang a rawn ti mai chuh. Ka mit ka chhing a, ka thaw chhuak haka. Muangchanga inherin a lam chu ka hawi phei a.


“I lo kir leh ta maw!” a ti thawp sat a, a kut kuangkuahin a min hmul a rawn sana. Insawifiah tumin ka ang zuau a, mahse sawifiah kher angai lo tih nan a kut a rawn phar kanga. “He restaurant neihtupa nena in inlaichinna chu eng pawh ni se, he choka a i rawn luh hi chuan hnathawk dang ang ve tho i ni a, kei hi nangmah chhawrtu che ka ni. Ka sawi awmzia chu a chiang em?” min ti a. Chhan leh chuanna tur ka hre chuang lo. Ka bu nghata.


“A tha e. A nih chuan kan menu a awm tel lo chhang eng emaw i duh duh min han siam sak teh. Ka lungawi ngeina tur” tih pahin min chhuah sana. Amanda-i chuan nuam lo tih hmel zet hian min lo en reng a, keimah zawk chuan ka nuih saka, ka thil siam turna lam chu ka pan sana.


Cherry dark chocolate cake ka siam saka, chu chu Steven-a ngainat zawng tak a ni tih ka hria. Chumai bakah Strawberry cheese macaroons cake ka siam bawk a, chu chu Nathan-a khan a duh thei hle. Chu cake chuan min hriatchhuah tir a, ka ngai thar leh hle mai. Chumite pahnih chu ka va chhawp saka, a hmel atang chuan a lawm a ni tih ka hre thei.


Chhun chawlh a hun a, chaw kan fak zawkah kan hna bawk kan chhunzawm leh sap sap a. Chuta choka lam pana ka kal dawn lai tak chuan ka hma zawnah tak Chef Steven-a chu a rawn ding a. “I haw thei ang” a rawn ti tingawt a, min ti hlauthawng ngei mai. “Enga tinge? Tih dik loh ka nei em ni? Ka dik lohnaah chuan i ngaihdamna sang ber ka dil e. Khawngaihin chance min pe leh rawh. I duhthu a sam thlap tawh ang tih ka tiam a che” ka hmel chu hlauhthawnnain a khat a. A nui suk a, a hnung a ding Amanda-i lamah chuan a thle phei zauha.


“Saph, i hlauthawng a nih kha. Ban i ni dawn reng reng hleine, I fate school a i va lam a ngaih kha. I haw hma dawn tihna a nih chu” tiin Amanda-i chuan min rawn hrilhfiah a, ka dam huai mai. Ka thawmhnawte chu thlakin hotel atang chuan ka chhuak a. Pawn boruak chu vawt deuh vurin thlasik rim a nam tan tawha.


Ka coat hak ipte zen chung chuan ka car dahna lam ka pana, school ka va thlen chuan an ban nan darkar khat zen zawn ala awm a. Ka Car chu lock in park a lo len kual vel mai mai ka tum a. Ka coat ipte zen chung chuan park a thing hnah tlakawlh tawh mawi angreng tak takte chu ka thlir kual a, chumi pah chuan ka hringnun kan ngaihtuah tel lo thei lo. Ka fate pahnih enkawl paha Cafe tereuhte ka neih thin lai kha kan ngai ta ber mai. Khatih lai kha chuan mipa fel leh hmeitha tak mai thian tha tak ka nei thin bawk kha a nia, tunah erawh mahni chauhin ka tla hrang ve ta. Ka hringnun chu ka chanchin dik tak hria, mahse dawt hlir min hrilh thintute in a an hual vel ni mai tein ka hre thin.


Khang ka laichinte ho nen a kan inbiak tak miah loh atang khan thla khat lai a liam ta. In ka chhuah san laia Marie tap laite, Nathan-a hmel khawngaihthlak takte kha ka mitthlaah ala cham reng a, anni avang chauh pawh khan chhuah kher kha ka duh lo. Mahse kha mitmu pawl-a vang khan ka chhuah ngei a ngai ta si.


Caleb a’n min fawh zan atang khan a hmel ka hmu leh ta miah lova, mahse a chet dan avanga ngaihdam min dilna erawh min rawn thawn a. Engkim kalsan ka duh hnu chuan apartment man to vak lo chenna tur ka hmu fuh ta hlauh a, chutah chuan inbengbelin car khalhte ka zir a, barista cafe tereuhteah ka thawk bawka.


Hotel ka chhuansan nachhan pawh a neitupa chu Ian-a a nih vang a ni. Amah nena inlaichinna nei ang chi zawng zawng kha chu kalsan vek kha ka duh a ni. Amaherawh chu inluah man leh eng bill bill emaw pek lo ngai nen, reiloteah ka pawisa neih chuan min daih dawn lo a ni tih ka hria a, chuvang chauh chuan a ni Hotel a ka let lehna chhan.


Park chhungah chuan mi an tam vak lova, a then chu an fate nghak ve tho an ni a, a thente erawh chuan an ngaihzawngte an nghak thung a. Hnim chungah chuan pheiin thutna awlah chuan ka thu a. Thli vawt a rawn thaw leh heuh heuh thin a, ka coat hak pawh chu ka pawt mar deuh hlek a. Khawchin pawhin karleh lam atanga vur thla mai thei a nih tawh thu a sawi a, kei phei chu ka thaw khaw hlut hlut tawh.


Park-ah chuan ka hawi kual a, mitmu pawl ka hmuhnaah chuan ka mit a fu chat a. Hmeichhia tu emaw hi a kuah a, tunge an nih hre lo mah ila an awm anga awm ve chu ka chak a ni. A mipa chu Ian-a ni se, a hmeichhia zawk chu keimah. Chutih lai chuan Caleb-a thusawi kha ka hrechhuak zawk a.


“Tu zawk nge i thlan dawn? Ani nge keimah?”


Eng tin nge duh ka thlan tehreng ang? Caleb-a thlang ila Ian-a ka chan anga, Ian-a thlang ila Caleb-a. A tu amah mah chan ka duh lo.


Ka phone a rawn ri a, kan en chu Emily a lo ni a. Tu biak mah ka duh lova, mahse tu emaw biak ve tawh chu ka mamawh ve tawh a ni. Emily biak chu thil pawi a ni lem lovang.


“Hey..” ka han ti a.


“Hey..Al. I tha maw? Khawiah nge i awm a?” a rawn ti a.


“Aw tha e. School bula park-ah. Ka fate ka nghaka”


“Nathan-a rawn tlawh i tum miah nange?” a sawi ruala a hnung lama tap ri rawn ri chu chiang takin ka hria a.


“Ka la rawn tlawh ang” ka ti zawi sapa. Kei pawhin kan gai takzet a ni.


Engmah sawi lova kan ngawih vang vang hnuah chuan “I hringnun a thil tam tak hriat duh i nei a ni tiraw?” a rawn ti hlawl a. “Lo vuan lawk rawh aw..” tih pahin eng emaw hi a khawih ri rawk rawk a, nghakhlel fahrian hian ka lo thu reng ringawt a. Engkim mai chu a reh thuap a, an chawl ta vek emaw tih mai tur a ni. Emily rawn tawng leh hun chu ka lo nghak deuh tawpa.


“Dear diary” tiin a rawn chhiar tana. “Tunah hian ka damlo a ni. Ka natna chu ka awm dan leh ka rilru chhungrila thil awm tuma hnena ka sawi chhuah theih lohna hi a ni. September thla a ni a, ka hun nuam tih ber thin a ni. Ruah sur ka thlir a, a chang chuan ruahsur hnuaiah tlan chhuakin ka va in do huh vek thin. Tunah hian tukverh bulah thuin coffee ka dawm a, tukverh darthlalang ruahin a rawn theh thet thet a, darthlalanga tui far luangthla chu ka thlir reng a. Ka hlim mawlh lo. Thla 11 lai a liam tawh a, thla 4 zet mumalin tumah ka be tawh lo. Aiden-a takngial pawh ka be lo va, Emily lahin min be duh hek lo. A chhan chu awlsam taka Ian-a midang kuta ka hlan thei kha min hua a ni. A ngaihdanah chuan hun a ral anga, kumkhat a ral meuh chuan min duhna rilru a put ve theih a ring a, nupa pangai anga hlim taka kan la awm theih a beisei tlat a ni” a chhiar zawng chuan a rawn nui haka.


“Chu thil chu kei ngei pawh hian awih sak theih ka changa, chu tih rual chuan ani erawh ka lawmpui khawp mai. A mipa duh ber Drake-a nen hlim takin an awm a, an la inneih vat pawh ka beisei. Chutiang bawkin Ian-a leh Ashley te pawh nitin mai hian an induh thar telh telh a. Kei erawh engtin nge ka tawp ve ang tih ka inhre ta lo” Emily chu a inhnit feih a, a chhiar chhunzawm lehnghala.


“He ka hrehawm tawrhna hian min kalsan ve hunah chuan heng harsatna zawng zawng atang hian ka zalen ve tawh anga, chutih hunah chuan a chak lo zawk ka ni tawh lovang. Awlsam takin ka tlawm ngawt dawn lova, chak lo chung chung pawhin ka tuar tang tang anga, ka la tuar chhuak em em ang tih hi ka ring tlat a ni. Ian-a pawhin min rawn biak a tum fo a, eng vanga hlat tlat nge ka nih, eng nge a chhan tih a hre duh a ni. Engtin nge ka chhan ang? Tun hi ka diary ziah hmasa berna leh a tawpna ber a ni dan a, mahse thil eng emaw, ka la sawi rik ngam loh sawi chhuah ve ka duh a. Ka hmangaih che Ian..., ka hmangaih reng ang che. Kumkhuain”


A chhiar zawh chuan kan ngawi dun vang vanga, ka mittui ka bianga rawn luang thla chu ka kutin ka hru hul a, thawk ka la vang vanga.


“I pa in kan vuih zawh hnu lawk che khan min pe a” a aw chu a zawiin a khur dar dar a. “Min vui a maw?” tiin ka zawt vata.


“Aw.., i accident tih kan hriat khan car chhungah ruang kang chhe vek tawh hmuh a ni a, tunge a nih tih hriat theih a ni tawh lo. Mahse chu ruang chuan i nu thi kha a awrh a, chuvang chuan nangmah ngei i nih kan ring ta a ni” ti a min hrilhfiah lai chuan nikhawhrelo a ka awm lai kha ka mitthla chhuak uai uai a.


“Ka mumang mai mai a lo ni lo a nih hi” tiin ka phun chhuak sapa. “Engtin maw i tih a?” tiin Emily chuan min rawn zawt vata.


Chutih lai chuan ka hmelhriat pakhat hi bawm eng emaw zat khai chungin ka lam panin a rawn kala. “Engmah ni lo ve. Nakinah ka rawn be leh dawn che nia Em” tiin rang takin phone chu ka daha.


“Jane” tiin ka thutna atang chuan ka ding chhuak a, amah pui tur chuan a lam panin ka phei vata. A ding chawt a, zawn nei ni awm tak hian a hawi kual te te a. “Sapphire, bawihi. I tha a maw?” tiin a bawm ken chu a kawng zawnah a la chho a, nghet takin a pawma.


“Ka tha e. Khawiah nge i kal dawn a? Khawi ka lo ken pui ang che” tiin a bawm ken chu ken pui ka tum a. “A ngai lo ve bawihi. Ka keng thei e. Kan pu in a cabin chei that a tum a, chuta mi tur chu a nih hi. E taka...hei hi kan pu drawer ah a lo awm tel a, a pawimawh hmel angreng sia, min lo pek sak theih chuan” tiin envelope var min pe a. Ka bu ngat a. Ani pawh chu a car awmna lamah a let leh vata.


Chu envelope chu hawn tawh hnu a ni a, park chhuah sanin school lam ka pan a, chu mi pah chuan envelope chhung a lehkha chu ka phawrh chhuaka. Ka ding chawt a, ka pum a rawn ni nghulh a, chu thu tlemte mai chu ka chhiar nawn awn awn a. “Caleb a’n a hre chhuak tawh. Engkim a hre vek tawh”. Awih har ti takin chu DNA paper chu ka keng reng ringawt a.


Chutih lai chuan ka zawnah tak truck tum a rawn ding ri tuar a, a kawngkhar chu rawn inhawngin tu emaw hian truck chhungah chuan min pawt lut lawp a. Ka au tuar a, truck chu rang takin a tlan zui nghala. Ka lu a ri pawp a, ka tre chhuak that a, thil eng emawah ka intauh tih ka hre mai. Na tak a ni. Tuin emaw chemtein min vit ta emaw tih mai tur a ni. Ka khawhmuh a thim mup a, chu bak chu engmah ka hmu zui tawh lo.

Chapter -24


Ka lu um a na ut ut a, ka thluak ka sawh tel ta emaw tih mai tur hian min vit nger nger reng a. Muangchanga men ka tum a, ka mithmulte chu thisenin a lo char khawng veng tawh avangin men pawh ka meng lawk thei lo. Ka chakna zawng zawng sawmkhawmin hnung lamah kan leh hawia, inchung lamah chuan ceiling var ni awm tak hi a awm a, a thim avangin chiang tak erawh chuan ka hmu thei lo. Ka ding leh veiah thing bang chhah tak a awm ve ve bawka.


Chutah tak chuan khawiah nge ka awm ka inhrechhuak chiah. Chutiang hmun a hlau taka awm tura min dahtu chu tunge a nih ka hmu chak a ni. Chu ngei chu Sapphire-i min nih tirtu niin ka ngai a, engtikah emaw chuan chu thudik chu ka la hmuchhuak em em ang.


Thawk ka lak vang vang hnuah chhuat vawt thler maiah chuan in beng kangin ka thu chhuak a, bang chu nghengin tlem a hahdam ve deuh hlekin ka thu ve thei ta.


A hnu deuhah chuan chhuata pheikhawk sang ben ri kurh kurh chu ka hre thei tana. Ka mit ka lo meng vata, ka tanna thing hung phen atang chuan tu hmel nge rawn lang dawn tih chu nghakhlel takin ka lo thlir reng a. A hmel a rawn inlan ta. Thawklehkhatah ka thinphu a rawn ranga, mak tihnain ka khat a.


“Unaunu” Ashley-i chuan min rawn kiai khum saka. “Ashley !!” ka aw chu a ri chhuak tawk tawk a ni. Syringe a damdawi a thun mawlh mawlh laite chuan ngawi rengin ka lo thlir reng a. “Hei hi eng nge a nih i hria em?” tih pahin in la no deuh hian min rawn nuih a, a syringe ken chu a rawn keng kanga. “Keiman kan sawi mai ang e, he damdawi hian a ti chau ngawih ngawih dawn che a ni” tih pahin ka hma zawnah a rawn thu hniam a. Ka kut a rawn la a, kei pawh chuan a ban rekah lo vuan letin a hmel chu ka en tlawk tlawk a.


“Thil sawi dun tur tlemte kan nei vein ka hria Unaunu” ka ti ram hmarh a.


*** ***

Pa satha tak mai hian nghet takin ka banrekah min vuana, ka tanna atang chuan min hrawm chhuak nawk nawk a. Tunah tak hi chuan ka thisen kal zawng zawng pawh an chawl vek tawh niin ka hria.


“Kal ta che maw le !” pa pakhat chuan min lo tur chhen bawka. Min nam hlawk hlawk a, kan hma zawna awm thir bawm lian tak chu hawngin dimna reng nei lovin min nam lut dawrh a, thing thutthlengah min thut tirin ka kut leh ke chu nghet takin min phuar sak a. A rek lutuk a a thip vung vung mai. Mahse han tal tur takngial pawhin chakna ka nei lo. Ka kutzungtang takngial pawh ka kan thei lo va, hnung lamah thlein ka maimitchhing a, theih nise ka thil tawn mek chu muthilh san daih ka duh.


Phone a rawn ri a, an zinga pakhat chuan a chhang vata. Rei vak lo an inbiak hnu chuan phone chu dahin “Boss chu darkar chanve hnuah a rawn thleng chauh ang. Chumi hma chu duhtawkin kan lo che thei e” tih pahin ka hma zawnah a rawn ding a, ka biangah chuan min rawn beng thle lawp a, ka tre chhuak thawt a.


“Kha aia ring khan i tre thei lovem ni?” tih pahin min rawn beng leh sawka, ka khabeah tak min rawn hnek richawk a. Ka na ti lutuk chu ka mittui a rawn baw chhuak zawiha. “A tawk tawh” tiin hmeichhe pakhat hi a rawn au thawt a, boruak pawh ka hip ve thei ta e. Thawk ka la kawk a, ka chuap tawt nen ka khuh thawt thawt a.


“Kal sawn rawh” chu nu bawk chuan a rawn ti leh a. Eng thil nge thleng tih hmuh tumin ka mit chu ka han meng a, ka hmaah chuan Ashley-i anga mitmupawl nei pakhat a ding a, mahse Ashley a ni lo. “Amelia (a nuhrawn)?” mak ti takin ka phun sapa.


Eng emaw sawi leh tumin ka ang zuau a, mahse ka sawi chhuah hmain ka khuh zui leh bawrh bawrh a. “Tui i in duh em ka fanu?” ti a nui suk chungin dawhkana tui bottle awm chu a va la a. Ka hma zawnah a bottle chu rawn thingin min in tir ngei dawn ni a ringin ka ka ka lo ang a. A chhinah chuan tlem a thli a, ka khabeah a rawn leih bua a. “Uithaw...! Ka tibaw palh” ti a nui uar uar chungin bottle a tui awm zawng zawng chu chhuatah a leih baw veka. Ka thinrim lutuk chu ka khabe a sai ngar ngar a, mahse chet pawh ka che thei mang si lo.


“Ka nu, hei aw i thutna tur” tiin Ashley chuan Amelia-i chu chair a rawn pe a. “Ah! Ka lawm e, ka duat” tiin a fanu chair rawn laksaktu chu a nuih ver ver a.


Ka mit a rit lutuk a, ka meng hlei thei tawh lo. Mahse intih harh tlat reng ka duh avangin ka lute chu kan thing deuh nawk nawk a. “Chuanin Alison...ngeni a Sapphire tiin ka ko dawn zawk che? Alison tiin ko che ila a chiang zawkin ka hria” an ti hmasa te te a. “Alison, zanin hi nuam i ti ve em?” ti a min nuih pahin pindan chhung chu a melh kuala.


“Ti tehreng mai” ka aw chu a chang fek fawk hlea. Chu veleh za tak mai hian a nui chhuak uar uar a. “Damdawi a chiu i ni a, sawi sak i ni bawk a. Tunah pawh khan i thisen kha hlauhnain a la khat mek a nih kha tiraw?” ti a min zawh mek laite chuan a nui hmel chu ala ngai renga. “A enga pawh chu nise thil surprise tur che kan nei a. I inring em?” tih pahin kawngka awmna lamah chuan a kal phei a. Amelia-i chuan kawngkhar chu va hawngin tu emaw hi a rawn hruai chhuak . Mr Brown-a, tun a ka pa ni ta chu nikhawhreloin wheelchair-ah an rawn nawr chhuak a, chu leh kan detective rawih ber Blake-a te an ni.


“Blake...?” awih harsa ti zet hian ka ko a. An lam tang lo ni rengin. Chutiang a nih chuan engtin nge a chhui chhuah theih lul ang ni. “Pa...?” ka thei tawka ringin ka ko a. “Ka pa...harh teh” a hmel dang bel mai ka hmuh chuan ka mittui a rawn tla zawih zawih a, a mit duk ruih maite chu an sawisakna a ni tih a chiang em em mai si. Chutiang hmelpu a ka han hmu chu ka rilru a na thar ngawih ngawih a.


“Khatianga lo au vak vak kha angai lo” tih pahin na mangkheng hian Amelia-i chuan ka biangah min rawn beng hawi sawka, mahse ka na pawh chu ka hre chang tawh lo. Dak chhuah leh vatin Amelia-i chu ka melh kalh a. “A chungah hian eng thil nge i tih?” sehchilh nawk nawk chungin ka ti a.


“Lo thlaphang mah ta che. A la thi hleinem” tih pahin tuiin ka pa hmaiah chuan a va theh a, ka pa chu a rawn khuh chhuak thawt a. A khuh bawrh bawrh hnu chuan a mit a rawn meng a, kei pawh chu min rawn hmu ve ta. Tunah chuan a rawn harhchhuak leh tawh.


“Alison...awi karei! Ka fanu khawngaihthlak” min rawn ti chuai raiha. “Ka hrilh che a ni lawmni, ani hi chu khawih suh tiin. In ti na lo a nih phawt chuan kei hi chu in duh chen chen min man rawh u. Tlan chhuah ka tum ngai lovang tih ka tiam e” tiin Amelia-i lamah chuan a ang tawn tawn a. Tunah rih chuan chhuah tir tum pawh ni se a chhuak thei lovang, a taksa a chau lutuk.


“Ka hria e. Mahse ka dawhtheihna ka hloh zo ta. Tunah chuan ani nen hian heng thil zawng zawng hi tih tawp vek ka duh tawh a ni” tiin min rawn en a. “I pa nen hian inremsiamna kan nei a. Ian-a a phone anga, a that thu leh hna a thawh mek thu a hrilh ang. Tichuan i pasal mawl tak khan vawi hnih pawh ni lo, vawithum ngawt-“ an ngawi leh deuh dat a. “Oh ! Ka tihpalh. I pasal hlui zawk mawle. A at a an at zia chu. Hnaah a kal tak tak emaw tiin a lo awih duam duam a nih chu mawle” a ti a. “Nang leh i fate hi chu tihnat ka tum a ni hran lo ve. Mahse i awmdan hi ani hian a kham ta em a, ka bulah a sawi thin a, chuvang chuan nang pawh helaiah hian ka hruai tel ve ta che a ni” min ti a.


“Tunge ‘ani’ i tih chu?” tiin ka lo zawt a. Sawi tum a a ka a an lai tak chuan kawngka chu a rawn inhawng ri bur a. Kan vai mai chuan mak ti takin kawngka awmna lam chu kan en theuh a. An hmel ka hmuh rual rual chuan ka natna chu a zual ta emaw tih mai tur a ni.


“Alison !” “Sapphire!” mipa aw a ni . Tu dang ni lovin Ian-a leh Caleb-a. Mahse an kut chu hnunglam a hnungkhirh ve ve a ni tlat. “Enteh u...min rawn tlawhtu khual zahawm kan nei a nia Athena” hmeichhe pakhat hian a rawn ti a. A mitmu hring nghal mai ka hmuh rual chuan ten hmel zet hian “Lilly!” ka ti sapa. “Hello Alison” tiin min rawn nuih suk a.


“An pahnih khan chhuah rawh u” tiin Caleb-a chu a rawn au tuar a. “Guards te u, phuar bet ve nghal rawh u” ti a Lilly i’n a han tih chuan guards te chuan an pahnihin chair-ah an phuar bet ve nghala. An pahnih chuan damdawi a jection an ni ve nghala. Helai hmunah hian ka hriat chian sa mi 3 Ashley. Amelia leh Lilly te an awm tawh a, mahse tunge Athena chu ni ta ang. Nichin khan Lilly khan Athena tih hming a lam tel tlat a ni.


Chutia Amelia i’n damdawia a chiu zawh chuan ka pa chu huatna zawng zawng mitmeng hian a melh a. “Thil tam tak i lo tih tawhte kha tunah hian i hriat chhuah uai uai ka ring Nick” a ti a, chutiang reng reng a huatna mitmeng chu ka la hmu ngai lo.


“Eng thil nge ka tih a?” a ngaihna hre lo zet hian ka pa chuan a zawt a.


“Aw le. A nih thawnthu pakhat kan hrilh ang che” tiin min rawn en a. “I nu tak tak thih dan thawnthu. I thil hriat sa vek tawh a ni tih hre mah ila i lo theihnghilh ve tawh pawh a ni thei a, chuvang chuan ka han sawi tha leh mai a niang chu. I pa thil lo tih tawhte hi han khuh mawi vak ka tum dawn lova, thlamual a thil thlengah khan kan let leh angai dawn a ni” tiin a han chawl det a.


“Ni e, khami tum khan ka awm ve reng a ni. I fanuin a pasal a then ni, lungchhe vankai a a nu thlan chunga a tah lai a a kut i vawn sak lai khan. Ni e Nick, khatih lai khan kei pawh ka awm ve reng” tih pahin ngeiawm zet hian a nui suk a. Ian-a lam ka va hawi a, ani pawh chuan min lo en ngar ngar a,mahse an damdawi pek chuan a ti chau zo tawh.


Caleb-a erawh thinrimin ala insehruh hle a, a thinrimna avang chuan a hmai zawng zawng a sen vek a.
Guard palian tak tak kutkuangkuahin an ding a, Lilly chu dawhkan chungah silai hum chungin a thu a, a ke a then leuh leuh a. Ashley pawh a nu hnung deuh chair-ah a thu a.


“Ka thusawi lai bawkah khan han let leh ila. Khami zan khan i nu khan zan rei tak thleng hna a thawk a, a zawh meuh chuan zanlai a pel tawh. Thlahtu tur a neih tawh loh avangin i pa hi amah lam a hruai turin a phone a. Chutih lai chuan i pa chu a muhil sawih sawih tawh a, mipa mutchuak chu zurui ai pawhin an laktlak tawh lo zawk tih i hriat ka ring. Mahse i pa chuan a va hruai ta ngei a,. I nu chu a chauh em avangin car-ah chuan thlamuang takin a muthlu a, i pa lah mutchhuak chung chunga Car khalh a nih avangin a car khalh lai chu one way lane-ah a khalh lut a. Chumi tum chuan an lam pana motor rawn tlan nen insu in chumi atanga ni rei loteah i nu chu a thi ta a ni”. A sawi zawng chuan eng emaw hi a mitthla chuak uai uai a ni tih a hmelah a hmuh theih a.


“Eng nge chu chu i tan a tangkai na? Khami tum khan ka tana mi pawimawh tak ka chan asin, Nang ni lovin” ka pa chu harsa ti chung chungin a rawn tawng chhuak a. Chuveleh Amelia-i hmel chu a alh nghal phat a, “I mi chan bak i hre tawp nang. Khami ni khan ka unaunu leh ka makpa ka chan a sin. Khami ni khan Ashley hian a nu leh pa a chan asin”


Chu thu ka han hria chu ke meng kawk a. Ashley chuan hnuai lam a melh reng a. “A dik alawm. Amelia hi ka nu ni lovin ka nutei zawk a ni. Ka birthday ka nutei te inah kan lawm a, ka nu leh pa erawh sumdawnna thil a an zin angaih avangin birthday min lawmpui zawh veleh airport lam panin an kal nghal a, mahse an rawn let leh tawh lo” ti a sawi pahin Ashley chu a nui hawk hawka.


“Chuta tang chuan phuba lak ngei kan duh ta a” tiin Amelia chuan a rawn chhunzawm leh a. “I nunah rawn langin i nupui nih ngei a engkim tih chhiat vek ka tum ta rana. Mahse i lak atang khan Ashley i’n pa hmangaihna engkim a dawn tak avangin amah a rawn puitlin a, thil engkim a hriatthiam hun ka nghak ta zawk a ni. A rawn puitling a, chu hmeichhe rilru tha tak mai chuan a ngaidam che. I hria em chu chu Nick? A nu leh pa i thah sak hnu pawhin a la ngaidam che a, i lakah eng phuba mah lak ala duh lo cheu a nih chu. Kei ngei pawhin ka rilru lo put thin chu ka thlak. Mahse thil engkimah Alison-i i tih tak bik zelah chuan ka rilru mu tawh hnu chu rawn tho lehin Alison-i dinhmun a Ashley-i zawk a awm theih nan ruahmanna ka siam chho ta a. Mahse ka ruahmanna ang chuan thil a thleng lo. A chhan chu Ian a’n Alison-i ni lovin Ashley zawk a hmangaih a ni tih ka hriat tak avangin” ti a sawi pahin Ian-a lam a hawi a.


Ramhuai mitmeng ang mai hian min rawn en ve leh a. “Rilru natna aia min ti na thei thil dang a awm lo tih ka hriat avangin ka inrawlh tul ka ti rih lo. Thah mai pawh kha thil harsa a ni tawh lo. Khatah khan lo thi ni selang chuan ani hi tunah hetah a awm ve kher lovang” tiin Caleb-a lam a hawi a.




“Mahse Ian a’n Sapphire-i a tawn leh chiah khan i thil duh chu i hmu ta lo chu a nih kha” Caleb-a chuan a lo ti let ve saka.


“Ni lo ve. Thil engkim hi a kal harsa ta vek a nih hi. He nu vang hian” lungawi loh hmel zetin Amelia-i chuan Ashley chu a en ve ta thung a. “Ani te hian Ian-a chelh zo lovin Asian tlangval lakah sawn te ka pai e a lo ti a. An nupa inkar pawh kha tih tawp mai a duh a, mahse ka remtih loh avang chauhin ka la dang hram hram a nih hi”


“Nangmah hi a ni maw Nathan a’n a lo hlauh thin em em chu. Ashley ni lovin?” Ian-a chuan a rawn ti veleh a. “Ni chiah e. He naupang vang hi a ni ka duh ka neih theih lohna chhan chu. He naupang hi a nu pumchhung a a awm lai a ta tawh ka haw tawh. Chu chu nitin hian min hriatchhuah tir thin”


“A awmzia chu Ashley hi i nautelem angah i hmang kual vel mai mai tihna a nih chu” ka lo ti veleh a. Ka lam a rawn hawi a, a nui suk a. “Ni chiah e. A ni reng bawk ang”


“A nih enga tinge Lily hi hetah a awm ve?” Ian-a chuan a rawn ti a.


“Lily ka ni tak tak hleinem. Samara ka ni e. I unaunu”

Chapter -25


“Eng nge i unaunu ka ni i tih awmzia chu? Ka pa hian keimah bak fa a nei lo” Ian-a chuan Lily, tuna Samara ni ta hnenah chuan a ti a.


“I nu a thih hnu khan i pa hian hmeichhe dang a rim leh loin i ring em ni?” tiin chu nu chuan a rawn zawt let a. “Rim chiang e. Ka nuin kei min hrin hnu hian i pa chuan min kalsan a, mahse ka nu chuan beiseina sang tak nen i pa chu a va pan leh a, mahse i pa chuan hmeichhe hur ang maia lo chhuahin kei pawh chu a fa ka nih loh thu a lo hrilh a. Ka nu rilru na lutuk chu ka hmuh lai ngeiin inchhawng sang atang a zuanthlak phah ta a ni. Chutih lai chuan hmeichhe naupang kum 6 mi lek ka la ni. Fahrah enkawlnain a dah ka nih hnuah nupa pakhat hian fa atan min rawn la a, mahse ka hrehawm tawrhna chu a la intan dawn chauh. Ka pa thar chuan min ti duhdahin nitin min pawngsual ta thin a. Fahrah enkawlna atang chuan vawikhatmah min rawn ngaihven zui tawh lo. Min la that duh mai dawn a ka hriat avangin ka tlanbo ta a ni.


“I pa khan a fa atana min pawm theih nan huaisenna chhete tal chu lo nei selang chuan khatiang thil kha a thleng lovang. Ka nu kha a duh lo a nih pawhin a inenkawl theihna tur pawisa tlemte tal lo hnutchhiah sak chu ni selang chuan tunahte hian a la dam ve tur. Tichuan phuba lak ngei ka tum ta tlat a. Marie tunu anga awmin in inah chuan ka rawn lut ve ta a ni. Rilru natna hi chuan tih hreh reng hi a lo nei lo. Rei lote hnuah Athena thil tum leh Browns chhungkua tih chhiat a tum dan ka hre veleh a, keimah chuan engmah ka ti thei dawn lo tih ka hriat avangin ka zawm ve ta a ni”


“A nih leh tunge Athena in tih chu
?” tiin ka lo zawt ve a. Amelia chuan chhan chak taka min rawn nuih sang pahin. “Keimah hi mawle bawihi. Miin min hriat theih loh nana ka nihna thupna atan”


Samari-i erawh a nui ve thei lo. A hun kal tawh zawng zawnga a lo thinrim tawhna kha a la alh dawn chauh. “Ka thei tawh lo Amelia. An vai hian that ila, he thil hi i ti tawp teh ang” tih pahin a silai a rawn phawrh chhuak a, Caleb-a chalah tak chuan a chuktuah run a. Amelia-i chu eng emaw sawi tumin a ang zuau a, chutih lai tak chuang kawngkhar chu a rawn inhawng ri bur a.


“Che tawh suh u !... Chicago Police kan ni e”



DARKAR TLEMTE LIAM TAAH KHAN KIR LEH LAWK ANG *

“Thil sawi dun tur tlemte kan nei vein ka hria Unaunu” ka ti ram hmarh a. Ashley-i chuan a kut chu a la sawn hmak a. “Nang nena inkawm chu ka peih zawng a ni rih love” min tih khum a.


“Ashley, tihsual engmah i nei lo tih ka hria a, hengte hi i nu vang veka thleng zawk a ni tih ka hria alawm” zawitein ka ti sapa. Ashley chu a ding dawt a, min rawn en a, chuta a hmelah chuan thil inthlak danglam ka hmu thei thlat. Mahse a rilru luhlulna chuan a tuang a la tih chhah tir tlat a. “I sawi awmzia ka hre lo ve. Helaia hruaitu che chu keimah hi ka nia, heng thil zawng zawng thlen tirtu pawh hi keimah tho ka ni” a ti a.


“Ni e, nangmah vang chu a nia lawm. Mahse heng zawng zawng thlen tirtu hi chu midang an ni. Halloween ni a thil thlengte kha. Khami ni khan ka chhiatna tura in thil ruahman zawng zawngah khan nang chuan min puina tur kawng i zawng tih ka hria alawm. Kawngka ka hawn theih nana hreipui lo hnutchhiahtu kha nangmah i ni a, Raine a bo laia ka zawn hmuh theih nana thawm lo siamtu pawh kha nangmah tho i ni tih ka hria asin” ka ti a. Mahse Ashley-i chu ala hawisawn tlat a.


“Ni lo. Chutiang thil engmah a awm lo” a la ti fana. Mahse a aw-ah chuan danglam a awm tawh. Thudik a hmin theih ngei ka duh. Ani chauh chu helai atanga min hruai chhuak theitu tur a ni tlat.


“Khami ni a dawhkana phone lo dahtu pawh kha nangmah i ni tih ka hria. Ti teh Ash. Kum 5 mi lek ka nih lai atang tawhin ka hre tawh che a, keiin a ka hriat chian ang che hian tuman an hrechiang ve lovag che. Pawl 6 kan nih laia chirh a min nam thlutu hmeichhia i hnek lai atang tawh khan ka lam i tang reng thin tih ka hria a ni” ka ti a.


A rawn inher a, a mit chu mittuiin a ti de ser ser a. “I lo la hre reng a ni maw !” awih loh hmel zet hian min rawn ti a. “Tehreng mai. Khata tang chiah khan a ni min chhantu turin unaupa kher ka mamawh lo tih ka hriat ni” kei pawh chu ka lung a chhe hlemai. Ashley erawh a insum zo tawh lo. Ka lam panin a rawn phei a, min rawn kuaha, ka darah a khabe nghatin dan rual lovin a inhnit hlawp hlawp a.


Kei pawh chuan ka lo kuah let ve a. “Ka tihpalh, ka tihpalh takzet” tiin a tap hlawp hlawp a. “Ka ngai thei lutuk che. Ka ngai thei lutuk che asin” min kuah chung chuan nausen ang maiin a tapa. “Lungngai mah ta che. I bulah heta hi ka awm tawh hi” tiin ka lo chhang leta.


“Ni lo. Min kalsan ngai lovang ti a i intiam kha. I intiam chiang alawm” ka awm ve reng a ni tih ringhlel ang mai hian nghet takin min kuah a. Engtia han chhan tur nge ka hre tawh lo, kei pawh ka tah ve mek avangin. Kum eng emaw zat chu kan inhrethiam lova. Kum eng emaw zat chu tunge a ni tih ka hre tawh lo. Kum eng emaw zat chu min ti na tu a ni ti a inthiam lo reng rengin hun a lo hmang tawh thin. Mipakhat kan hmangaih dun avangin kan inthen mai chauh zawk a ni.


Chutiang chuan darkar khat vel kan pahnih chauhin kan awm a, Ashley-i chuan a rukin tui in tur leh chaw min pe a. “Aw le, Ash. Hun kan ngah tawh lova, chuvangin thil engkim min han hrilhfiah teh” la ti a.


Hetiang hian min hrilh chho tan ta a. Ian-a min chhuh sak nachhan chu ani pawhin high school atanga a lo star tawh mipa ve tho a ni a, a lo hnar thei bik lo a ni. Mahse Wang Dae nen intawngin chu pa nen chuan hmangaihna khurah an tlu lut dun a,mahse Amelia-in ti tura a nawr luih tlat avangin Ian-a chu a nei lo thei ta si lo.


A hnu lawkah Dae-a fa chu a pai ta ngei a, mahse chu chu Amelia-i chuan a hrechhuak a, accident anga lantirin a hmangaih Dae-a chu a thah sak ta a ni. Ian-a nena inneih reng chung siin nau chu a pai chho ta a, naute a lo pian veleh Ashley-i chuan Ian-a chu ka bula lo let leh tur a min hlanchhawn leh a lo tum reng thin a,mahse Amelia-i khan kei min thah duh em chu a lo ring bik lo. Ka thihna chungchangah khan ama thiam lohah ngaiin amah leh amah a indem ngawih ngawih a, a fapa Nathan-a pawh chu a bula a awm tam lutuk chuan Amelia-i chuan a thah sak leh duh mai ang tih ringin a hmangaih nena a fa ngei Nathana chu a hlamchhiah ta a ni.


A chan ka ngaihtuahin ka khawngaih ngawih ngawih a, tih theih ka nei si lo. Nghet taka kuah mai loh chu. “Tunah chuan ka chhuah theih nan min puih ka ngai a ni” ka ti a.


“Engtin nge ka puih ang che?”


“Ruahmanna ka nei alawm”


Ka ruahmanna chu hetiang hi a ni. Heta lo kal turin Ian-a a ki anga, mahse tihpalh thil thu a rawn kang angin lem a chang ang. Thil thleng zawng zawng leh an thusawi zawng zawng a record theih nan a kawrah camera thuhruk a vuah ang. Duh tawka an inpuan hnuah eng tik lai pawha rawn lut thut thei turin Chicago police ho pawnah an lo biru anga, signal kan pek veleh an rawn lut ang.


THIL THLENG MEKAH LO LET LEH TAWH ILA *

“Nang hian min bum a ni” awih lo zet leh thinrim zet hian Amelia-i chuan Ashley-i chu a rawn ti a. “Ka tihpalh lutuk ka nu. Mahse ka tih a ngai miau si a. Phubalakna awmze neilo neih tumin kum tam tak i lo khawhral tawh a, a nihna takah chuan nangmah vanga miin na an tawrh hi hmuhnawm i ti ber zawk a ni” Ashley chuan a ti let ve a.


“Awlsam tak chuan ka chhuah hauh lovang che u” Lilly chuan a rawn ti a. Police hoin a an rawn man hma chuan a silai ken chu ka pa hma zawnah a lek kang a, a hmet puak ta.


“Ka duh thei looo....!!” ka au tuar a, mahse a tlai lutuk tawh. Silaimu chuan ka pa lung zawnah tak a verh tlang pawp a. “Paaa....!!” ka khawhmuh engkim chu a phe nghal veka.


Police ho pawh chuan an rawn nangching zui nghal a, mahse ka pa erawh a awm ve ta lo. Ka pa lama ka tlan tur chu min lo danga, rei tak ka hma a a lang reng chungin ka pa a ni tih ka hre lova, tunah ka hre ve tan chiah tihin chutiang thil chu a thleng ta si. Min hmangaihtu tur ka mamawh ber hunah pawha ka tan a awm reng tur, min hmangaih em em tu ka pa leh kei pawhin a ka hmangaih em em a chu.


Tu emaw hian ka kawngah min rawn pawm bet a, tu nge chu chu ka hria. A rim atang ringawt pawhin ka engkim hian a hre thei. A rawn che anga, a rawn harh leh ang tih ka ring tlat. Hlang a an rawn zawn lai thleng chuan beiseina ka la nei fana.


Tunah chuan ka la hre reng a ni tih hrilhna hun takngial pawh ka nei ta lo. Ka ngaih thin zia te, kuah ka chak theih ziate, ka hmangaih a ni tih thute pawh ka hrilh hman ta lo.


Tunah chuan tah a ngaih hunah tu awm nghengin nge ka tah tak ang? Tuin nge ‘Ka fanu duat’ tia min ko leh ang? Tu chu nge ‘Pa’ ti a ka koh ve tak ang?

Chapter -26 (Last Chapter)

ALISON/SAPPHIRE

Vuina hun kan hman zawh hnuah chuan a tam zawk chu mahni in lam panin an haw darh sang sang a, kei erawh chu thlan chungah chuan ka la ding renga. A tu amahin min rawn chu kha hran lo. A chhan chu ka la haw duh dawn chuang lo a ni tih an hriat avangin.

Hetah hian a zal ta e
Nicholas Joe Brown
Pasal tha tak, Pa tha tak, Pu fel tak
10th February 1965 – Kan thinlungah i thi tawh lovang
“Naktuk a thi mai turin inring rengin awm la, rei tak dam turin nung ang che”

Chu chu ka pa thlana thu inziak a ni. Ka nu thlan nen chuan ka en kawp a, dan rual lovin ka mittui a rawn luang a, hmangngaih takte then avanga mittui luang chhuak a ni. Chulai hmunah chuan engtia rei nge ka din ka inhre lo. An thlan chungah chuan ka ding reng a, ka nunhlui ka hriat chhuah tawh lohteah khan engtiang chiahin nge hun kan lo hman ho tawh ka hre lo nanga, hun hlimawm tak kan lo hmang tawh thin a ni tih erawh chiang takin ka hria a ni.


“Ani kha pa tha tak a ni” ka hnung lam atangin Ashley-i chuan a rawn ti a. “Ka hria alawm” tiin ka lo chhanga. “A zawng zawngin a hmangaih che a ni” a rawn ti leh a. “Ka hria alawm” ti bawkin ka chhang leh a.


A ngawih vang vang hnuah chuan “A laka thupha chawina hun takngial pawh ka nei ta si lova” a rawn ti a. “Pa in fate a ngaihdam na turin ngaihdam dil kher a phut hleinem” ka pain a min hrilh tawh hnu chu ka sawi chhawng veleh a. “A fa ka ni ve hleinem” za lo taka nui hak chungin a ti a. “I ni alawm Ash. Keimah min hmangaih ang chiahin nang pawh a hmangaih che a ni” tih pahin a kutah ka vuana.


“Nang chauh hi chhungkua ka neih chhun i ni ta” tih pahin nghet takin ka kut chu a vuana. “I tan Cullens chhungkua an awm reng alawm, chubakah fapa enkawl tur i nei bawk a” ka tih chuan a lu a lo thing vata. “Ni lo ve. Ani chu Ian-a fapa alawm anih. Kei chu a hringtu chauh ka ni. Chubakah a nih tur angin ka hmangaih tawk tawh lo tih ka inhria a, ani pawh ka tel loin a hlim zawk. Tunah chuan mi zalen ka ni tawh a, ka nihna dik takah ka kir leh tawh ang” a ti a, a thusawi chu ka pawmpui a, chuvangin engtin mah ka chhang tawh lo. “Mahse i hmangaih a ni tih hriat hi a phu hliah hliah a nia” ka ti a.


“A hria alawm” tiin min chhanga.


“Eng emaw tak chu i hrilh ngei an ngai ang” rei tak kan ngawih vang vang hnuah Ashley chuan a rawn ti a. “Ka hria alawm. Ka hrilh a nih chuan Caleb-a rilru a na dawn a, Ian-a erawh-“ ka sawi laklawh laiin min rawn pawt chat a. “I hriatrengna lam ni lovin i thuthlukna zawk a nia ka tih. Thuthlukna i la siam thei reng a nia” tih pahin min rawn en a. Chiang taka ka mita min en pahin ka darah a kut pahnih a rawn nghata.


“Ali, thil tam tak i paltlanga, mahse mahni hma i sial tlat a, chu chuan thinlung natna chiah a thlen che a ni. Mahni hmasial chu a tha lo e ka tihna erawh a ni chuang hauh lo. A tha e, mahse a chang chuan inphahhniam hi a tha zawk fo. Ian a’n a ngaih dan tur leh Caleb-a engtin nge a awm ang tih vel chu theihnghilh rih phawt la. Chiang takin i thinlung kha ngaithla la, thuthlukna chu siam rawh. Chumi hnuah hahdam takin i awm vang vang dawn nia” ka lu ka bu nghata, ka nuih saka.


“Ashley ! Mikhualte pawh an tin ta e” hla deuh hlek atang hian Marie chuan a rawn ti a. Ashley chuan lu bu nghauhin a chhawn a, ka biangah min rawn fawp zauh a, in lam panin min kalsan ta a. Ka thaw halh a, khua a vawh avangin boruakah chuan a khu rum rum a. New Tork chu Chicago aiin a vawt daih zawk a, chubakah khawchin thlirna atangin vawiin chu vur sur mai thei a ni. Ka coat dum hak chu ka awm zawnah pawt chipin ka nu leh pa thlan bulah chuan ka thingthi a. Ka kut pakhat ka pa thlan chungah, a lehlam ka nu thlan chungah . Thil sawi tur tam tak ka nei, mahse thu pakhat chiah ka ka atangin a ri chhuak thei.


“Ka van ngai tak che u em!”

*** *** ***

Ian-a leh Caleb-a te chu ka la be lo ve a, thuthlukna chu ka siam tawh, mahse ka hrilh ngam lo a ni. Ka tana mi pawimawh tak ve ve an ni a, a tu amah mah chu hloh ka duh lo. Mahse engtikah emaw ka sawi chhuak ngei ngei ala ngai dawn tho si. Chutia rilru buai angreng taka ka awm lai chuan ka phone ka phawrh chhuak a, Caleb-a hming chu ka hmet chhuak a. Ka en vata, Dial tih hmeh pahin ka nui saka.

“Caleb!”

“Ekhai aw Alison. Min rawn phone pawh ka lo beisei ngam hleinem”


“Nia, i beisei tawp nang mawle” ka nui deuh haka. “mahse ka ngai tawh lutuk che a, ka rawn call lo thei lo che a ni” ka han ti a. “Chu chu ka ring. Ka zun a uai tawh laklawh hi chu an heti tlat zel” a tih chuan kan nui dun hak hak a.


“Ka ngai lutuk che” a aw-ah chuan lungngaihna lam a ri deuh mah mah a. “Kei pawhin ka ngai lutuk che” ka ngaih miau avangin chu thu chu ka sawi lo thei bik lo. A der a sawi ka ni lova, ka ngai tak tak. Ka tana mi pawimawh tak; kum 6 chhung teh meuh min enkawltu a ni.


“Khawiah nge i awm a?” naupang au thawm ka hria a, tu dang ni lovin ka fate ngei an ni. “Ka rawn call nachhan che chu hei vang hi a nia. Marie i’n naupang ho a hmu chak lutuk a, chuvangin an school ban veleh ka va lenpui e ka tia. I ngaihdan lo a ni lem lovang chu maw!”


“Ni lo lo ve, list zingah i tel alawm” ka ti a. Khatia Samara te police in an man atang khan school atanga Raine leh Ryker te hruai haw theitu tur list siamin an principal kan pe a, chumite chauh chuan an hruai haw thei ang. Ian,Caleb. Ashley leh kei chauhin.


“Ian-a a awm tel ve em?” tiin ka zawt a. “Aw, naupang ho nen an infiam mek” nuih deuh vur vur chung hian a rawn ti a.


“Aw le, min lo nghak rawh u. Kei pawh ka rawn kal ve dawn e” tih pahin ka Car lam panin ka kal ve nghala. “Enga timaw i rawn kal ve kher dawn?” tiin Caleb-a chuan min zawt a.


“A chhan chu in pahnih bula thil sawi tur ka nei a” ka tih chuan Caleb-a chu a ngawi deuh vang vanga, ka thusawi tum chu a hria niin ka hria. “Aw le” a rawn ti zawi raiha

*** *** ***


A ngai te tein naupang ho chu an lo harh leh hle a, an eitur a ka lei sak ka pek hnu chuan engtin tin emaw a thlemin Marie-i bulah ka awm tir thei ta hrama.


Caleb-a khabe ah chuan pem thar lam zet mai hi a lo duk raiha. “Eng thil nge thleng a?” hlauthawng angreng deuh hian ka zawt a. “Hei hi tu tih nge?” tiin a pem chu ka kawk a. Ian-a chuan a kawr nghawng chu an pawt thawl a, inla eng emaw deuh hian min rawn en a.


“Engtin nge Caleb-a hi i tih?” tiin ka zawt a. “A chhan chu a phu reng vang a ni” tiin Ian-a chuan min chhanga. “Hetah hian eng emaw sawi duh neiin i lo kal a ni tiraw Alison? Chumi hma chuan Caleb-a hian eng emaw hrilh duh che a nei a, ka office ah ka lo va awm anga, darkar khat hnu velah ka lo let leh ang” tih pahin ngeiawm angreng deuh hian Caleb-a chu a nuih khum saka.



“Eng nge thil awmzia hi?” a ngaihna hre lo angreng tak hian ka ti he hu a. “Ka hrilhfiah hunah che engkim i hrethiam mai ang. Khawngaihin thu rawh” Caleb-a chuan min ti a. Kei pawh chu thuawi takin min tih ang chuan ka thu mai a.


Kan ngawi vang vanga, a tu a ve ve pawh chuan thusawi tur kan nei ve ve niin alang a, sawi kan hreh hmel ve ve bawk. Ka sawi hmasa zawk dawn emni chu ti a ka ngaihtuah lai tak chuan “Engtin nge i ngaih ang awhh....?” tiin a lu a dawm a. Thawk ka la vang vanga. “Eng thu pawh nise sawi rawh Caleb. Ka lo ngaithla ang e” aw dam tak leh a rilru tur venpui tak chungin ka ti a.


“Aw le. Ka thil sawi tur hian i thuthlukna siam chu a ti buai pha maithei a, a tibuai lo maithei bawk. A hmasa berah chuan rei tak i laka ka lo zep tang tang avang hian ka inthiamlo hle a, he thil hrilh tur che hian huaisenna ka nei thlawt thin lo a tin ni” a ti a, ka mitah pawh min en ngam tawh lo. “Eng thil nge ni Caleb? Min han hrilh teh” ka ti a.


A mit a chhing a, boruak a hip lut vang vanga. A awmdan chuan ka hmulthi a ti ding sung sung a. Ka thin a phu dup dup a, ka hre chak tho bawk si, mahse a rilru ti na tu nih ka hlau bawk si. A chalah va dawmin ka lamah a lu ka nawr chho a. “Eng thil nge ni le? Min hrilh rwh” ka ti a.


“Aw le. I tan chuan engmah phei chu a ni lo anga” tiin a mit a ching leh vang vanga, ka lo huphurh pui ngawih ngawih tawh. A la sawi theih chuang lo a nih leh keimah zawkin ka hrilh hmasa tawh mai ang. “Gay ka nia”. A thusawi chuan ka ngaihtuahna zawng zawng chu thawklehkhatah a ti ding nghal vek. Ka mit chu mak tihnain a phawk hru a.


“Eng aa...!?” ka han ti deuh haw a. A mit mengin ka lam a rawn hawi a. “Gay ka ni” a rawn sawi nawn leh a, hemi tum hi chuan a aw-ah pawh a confi hmel deuh sawt a.


Ka thaw hawk a. “A nih chu chu engtik atang nge i inhriat tan?” ka ti a. “Hmangaihna a ka luanliam atangin” tiin nui deuh chungin min chhanga. “Ka va hrethiam lo ve!”


“Kan sawifiah vek law law ange. New York a ka kal khat mipakhat ka va tawng a, chuta tang chuan ka khawvel zawng zawng chu amahah chuan a lut ta veka. Mahse chu ka mi tawn chu mipa tho a nia. A ni telin a zunah ka uai deuh deuh a, mutmu ka tuah tha thei lo va, chaw ka ei hleithei lova, hna pawh ka thawk tha thei meuh lo. Engkim mai chu ka tan chuan chhiatna hi a ni ringawt” a nui haka. “Amah ngei pawh chuan min lo duh ve reng hi a lo nia. Min duh ve thu min hrilh atang chiah chuan engkim hi a hma aiin a buai leh zuala. Ka hnar a, a chhan chu straight pangai ka nih theih ka inring avangin. Zankhat chu he thil hi ka ngaihtuaha. Nang ka hringnuna i rawn luh hma kha chuan tumah hmangaih ka la nei ngai lo. Nangmah atang chiah khan chutiang feelings chu ka nei tan chiah. Vawi tam tak kumkhua a nang nena hun hmang dun turin ka suangtuah thin a, i fate nen hlim takin kan awm anga, kan nuiin kan infiam ho thin anga. Mahse nang nena innei a, nupa anga awm tur hian ka lo la suangtuah ngai hauh lo tih ka inhrechhuak a. Chu ka mi tawn thar pa ka tawn hma kha chuan hmangaihna leh hmangaihna dik tak danglamna hi ka lo la hre ngai reng reng lo a lo nia”


Min rawn en in ka kutah min rawn vuana. “Alison, nangmahah hian chhungkua ka hmu a, mahse amahah chuan ka chhungkua tur ka hmu a ni” a ti a, kei pawh chu ka nui lo thei lo. “A nih chuan min hrilh duh miah lohna chhan chu ka hriatthiam loh i hlauh vang leh ka rilru a nat i hlauh vang tihna a ni maw?” a tih chuan a bu nghata. “A nihte chuan thian tha tak, gay ka nei tihna a ni mawi alawm” tiin fiamthu ka thawh zui nghal a. Mahse Caleb-a erawh a lo meng deuh kawk a, chutah tak chuan tu nge a ngaihzawn pa chu ka hrethiam ta chiah. “Ngawi hmak rawh!” ka ti thrawt a.


“Eng a ti nge?” Caleb-a chuan a rawn ti a, a beng sen tan tan danah zah rukna deuh a neiin ka hria. “I hmangaih chu Jake-a a ni tiraw?” tiin Caleb-a nghawngah chuan ka vuana. ‘Ka mipa thian tha berte pahnih an inngaizawng dawn tihna ania” ka thaw halh a. “Eng thuruk dang nge zep in la neih?” tiin ka dawp pah deuh nghak bawka.


“Ngawi lawk teh. Min kiss tum kha..., khami tum khan i sexuality prove nan min lo hmang tihna a ni maw?” ka tih chuan Caleb-a chu a khuh kharh a. “Keimah aiin Ian-a i hrilh hmasa zawk a. Chuvang chuan emni a hnek che a?” tiin chhanna ka hriat sa tho chu ka zawt nawn leh a.


*** *** ***

“Goodbye Ian” ka ti sapa, inherin kal mai ka tum a. “Ni lo” a rawn ti sapa. “Ni lo, ka kal tir thei lo che” tiin a rawn ding a. Eng emaw sawi ka tum zuau a, mahse a kutin ka ka a rawn dang vata. “Hetiang ringawtin ka hringnun a ka hmangaih ber hi ka kal tir ringawt thei tawh lo a ni. Tu emaw hmangaihtu leh nangmah duata enkawtu tue che hi i phu a ni. Tu emaw zinga i restaurant a thlahtu tur che leh bana kawngka bula lo nghak che a, hruai haw tu tur neih hi i phu a ni. I fate nena hlim taka infiam ho a, zanriahte siam sak che a, i hlimna leh i lungngaihna i tawm pui theih tur, zan tin kuah che a, in mangtha nana fawp thin tu tur che tu emaw neih hi i phu a ni Alison. Tu emaw ni tur chuan khawngaihin hun tha min siam sak leh rawh” tiin min ngen a. A thusawi zawng zawng chu mittui tling pur chungin ka lo ngaithla a, ka hma zawna Ian-a a rawn thingthit lai phei chuan ka tap chhuak hawka. Ka hmaah thinthiin ka kutah min chelh a.


“Khawngaihin, khawngaihtakin ka hmangaih takzet che a ni tih ka lantir theih nan leh ka chak ngei theih nan remchang min siam sak leh hram rawh. Rei angai lovang. Ka theihtawp ka chhuah ang. Ka tiam a che” ti a min ngen lawm lawm chungin ka kutphah hnungah chuan a chal a nghata.


“Aw le” ka ti sapa. Ian-a chu a rawn hawi chhuak vata. “I ti tak tak em?” ti a min rawn zawh chuan tap chhuak hawk chungin ka lu ka bu a. Ian-a chu rang takin a rawn ding chhuak a, min kuah vawng vawng pahin “Ka lawm e” a ti a. Rei tawk fang kan inkuah vang vang hnu chuan ka mittuite chu min hruk hul saka. Nui var var chunga min en pahin “Eng tikah mak ka tah tir leh tawh ngai lovang che” min ti a.


THE END