The Bride (S02 Ch 1-10)

 

Chapter -1

Her New Life

*Sapphire's P.O.V*

Chhungkua.

Chu thumal khat chauh maite chuan lungawina nasa tak ,im pe a ni. Tu pawh mai hian tu emaw, min enkawltu, min ngaihtuaha min hmangaihtu leh kawng engkima min venghil tlattu neiin kan inhriat theuh ka ring. Ka hringnun hmasa lamah khan chutiang mi chu ka neih leh neih loh ka hre lova, mase tunah erawh tu emaw chhungkua ti a koh theih ka nei a. Chhungkaw te reuhte, chhungkaw hlim em em mai si kan ni.

"Morning Saph" hla tak atang pawhin Caleb-a aw hi chu ka hai lo.

"Hetah ka awm" choka atang chuan ka auh lauh lauh a, pancakes siama ka buai lai tak a ni. "Nang pawh morning le" tiin ka lo nuih let a. Ka bulah rawn kalin ka biangah min rawn fawp zeuh a, va bazar tura ka tih angin a chakkhai lei ho chu dawhkanah chuan a rawn daha.

Tunah chuan thian mai piah lamah thian tha ber kan ni tawh a, chutih rualin ani ah chuan thian mai piah lam thil a awm tanin ka hria a, mahse kei erawh chuan chutiang anga en loh hram hram ka duh. Ka tan chuan ka mipa thian rinawm tak a ni a, engtik lai pawhin ka kiangah a awm reng thin. Hmeichhia in a innghahna tlak mipa kan zawng ang ang hi a nei zo vek awm e.

"Sapphire?" tiin Caleb-a chuan ka hma zawnah min rawn kawk a. "Eng nge?" ka lo ti hu a.

"I ramchin i pel leh tawh ania" tih pahin a chin than dan angin min rawn dek leh chiam a, ka nui nghal awr awr a. "I va kaitho dawn lovem ni? An school kal a hun leh mai dawn a nia"

"An i tih zawng khan i nervous deuhin ka hria" Caleb-a chuan a ti a, a kawrchung chu hlipin thutthlengah a dah a.

"Nervous loh nakah. Naupang dangin an lo chhaih nawmnah thei asin. A nih loh vek pawhin Raine i'n asthma a nei thut anga, a pump kha hmu zo ta lo se engtin nge ni ang?". Ka fate hi ka ngaihtuah em a ni. Caleb-a chuan ka biangah rawn vuanin ka mitah tak min rawn en a.

"Chutiang thil chu an chungah a thleng hauh lovang" mi tih huaisen tum zet hian a ti a. A tih mai mai leh tih mai mai loh a mitmengah en ka tum a, mahse ka zawn ang chu engmah ka hmu lo. Ka fate leh Caleb-a hi ka ring tawk tur a ni. Ka lu ka bu nghata.

"Kan han kaitho tawh ange" tih leh inchung lam a tlan chhoh a ruala. Ka nui sek a, ka eirawngbawl lai chu ka chhunzawm leh nghala. Darkar chanve a liam meuh chuan inchhung chu hlimna a ti khan turin an form thar nen an tlan kual a, vawiin hi an vawikhat school rah vena ni tur a ni.

"A nuuu..." Raine leh Ryker-a te chu ka lamah an rawn tlana ,ka ke-ah min rawn pawm chawta. Nui awr awr chungin ka thu hniam a, kuahin ka lamah ka pawt hnaia.

"Good morning munchkins" tiin an hnarah ka piai saka. An mitmu pawl ram mai chuan min en kalh a, ka pasal hual nge ka pasal ni lai pawh ka hre lo..., a mitmu a pawl a niang te ka ti ta vel mai mai a.

Caleb a'n min hmuh hmasak ber tum a zungbun ka bun thu min hrilh a, mahse pasal ka neih tawh leh neih tawh loh erawh a hr bik lo. Han mitthla a hriatchhuah ka tum ngial pawhin chutiang mipa mitmupawl hmel awm ang takngial pawh chu ka ngaihtuah chhuak zo lo.

"Ka ril pawh a la tam lo a nia. Heiii..! I mawl lutuk" Caleb a'n a chaw ei dawhkan tura a pawm kan lai chuan Raine chu a phun zawt zawt a. Ryker-a lahin a farnu chu lei a lo va chhuah khum thul.

"Raine, khatiang kha tawng dan tur em ni?" tiin ka melh kawk a. "Ka tihpalh" te chu a ti veleh maia. Chutia farnu ka hauh veleh Ryker-a chuan mi a melhrum veleh thunga. A chang hi chuan an awm dan hi ka hrethiam chiah lo thin. An intibuai a, an insual fo va, mahse an inchhan leh em em thung lawia.

"Tukthuan ei tawh tur le" tih pahin Caleb-a chuan Raine chu a va dek nui leh awr awr a. Ryker-a pawh chair a lawn tumin a lo dingdihlip lauh lauh a, va pawn kangin a thutna turah chuan ka thut that tira. An hma zawnah theuh chuan ka pancake siam chu ka chhawp sak theuh a.

Ryker-a chaw ka barh chhungin Caleb a'n Raine a lo barh ve thung a, an mahni a an ei chuan an hmaiah leh an kawrahte an tih kai nuaih thin vang a ni.

"Hmanhmawh rawh u" tiin driver seat atang Caleb-a a lo au tawh a. Ryker-a chu a seatbelt ka hren sak a, chumi zawhah Raine ka hren tir veleh a. Chumi zawhah a hmaah kei ka thu ve thung a. "Tinge a mawlh tu nei i va ang ve Caleb?" ka ti a.

"Karlehah khian hotel neitu lian tak takte nen meeting kan nei dawn a, kan inbiakna hi a hlawhtlin chuan New York lama awmte pawh a ngai maithei a ni"

"A van tha tehreng em Cal. Inbe fel thei ula ka ti khawp mai"

Rei vak lovah school pawh chu kan thleng thuai a. An bag tereuhte, lawmawm tak chu an darah kan ah tir ve ve a. "Tha deuhin aw ka hrai duhte u. Thian tam deuh va siam ula, fel takin va awm ang che u" tiin Ryker-a sam chu a chal atang ka huikian saka. "Chuanin Ry, i farnu hi veng tha hle ang che" Caleb-a chuan a lo ti ve bawka. Ryker-a chu a bu nghat a, a farnu chu a kai nghala.

In bye bye lauh lauh chungin kut inkai rial a an kal dun lai chu an liam thlengin kan thlir duna.

"He mi dawn chiah cafe hi a ni tawh a nia" Caleb-a chu a ha var siau lang chungin a rawn nui a, kei pawhin a tih ang bawk chuan ka lo nuih let ve a. Ngawi rengin kan tlan a, radio a classic hla ri ruai ruai bak chu eng thawm dang vak mah a awm lo. Caleb-a chu a zam hmel riau hian ka hria a, a mit hnuaia dark circle awm ruah avang chuan mutmu a tuah tha lo tih a hriat theih mai a.

A mal chungah ka kut ka va nghata. "He thil hi i tan a pawimawh viau ang tih chu ka hria alawm Caleb. Mahse nangmah kha in ngaipawimawh ber la a tha ka ti a ni. Nimin pawh khan chaw chhun leh zanriah i ei lo tih ka hria a nia. Zan i mu tha lo tih a hriat bawk si" ka ti a. Min rawn en a, a malpuiah chuan ka o hmer na sauh a. A hma aia chauh zawk hmel a rawn pu a.

"Kei pawhin ka hre bik lo a ni Saph. Hethil hi chu keima kutkawih ngei a ni ve tawh dawn a. Joseph McKenzie tih ni lovin Caleb McKenzie tih hming pu ve tawh tur a ni a" tiin a dar a chhin a. A darah chuan ngaihtuah tih hriat takin ka va chul a. Cafe pawh chu kan thleng chawpchilh nghala.

Midang ang lo takin Caleb-a hi chu mahni ke a din tlan tum a ni a, ka ngaisang khawp mai. "Caleb, ka ring che a, ka phir fate pawhin an ring che a, Joe a pawhin a ring che a, tunah chuan nangmah leh nangmah i inrin a ngai ve tawh a ni. Sumdawngmi angin in buatsaih lo la, Caleb McKenzie-a, mahni ke a din tum angin in buatsaih zawk ta che" tiin nuisang chungin ka lo fuih ve bawka. Ka mitah min rawn en a, a nui saka, a bu nghata.

Ka in pahnihna Cafe chu kan thleng a. In bye bye chungin Caleb-a chuan min tlan san leh ta. Accident ka tawh atanga kum reiloteah eitur siam leh coffee siam thiam tak ka ni tih ka inhmu chhuak a, chu pawh Caleb-a leh ka thiante atangin.

Kum 4 zet min thlem hnuah he Cafe hi Caleb a'n min sak saka, khawpui daifem a awm a ni a. Mi tam tak, khawpui chhuah sana hahdam chakt an rawn kal khawm thin a, khaw thlirna tha tak a awm bawk nen. A lun ve thin khawp mai. Inchhung ka luh chiah chuan kawngka lu chunga kan khai darte chu a inkhawng ri ral ral a, coffee rim a lo nam chum chum bawk a.

"Sapphire?" mangang hmel deuh hian Judy chuan min lo ko vata, chutin customer an la tam em em lova, engvanga lo mangang ruai nge maw a nih le?

"Eng nge ni ta Judy?" ka lo ti vata.

"Red velvet cake chhawngthum an rawn order a, zing dar 5 khan an rawng thleng tawh" hmanhmawh hmel zet hian a lo ti a, ka nuih seih a.

"Lungngai mah ta che. Kan che sawk sawk a nge aw" ka ti a, choka-ah lutin apron ka hreng nghala. "A fate hoin hmani deuh khan cake an rawn ei a, tui an ti a niang an nu birthday cake turin an rawn odrder lenghal a" Judy chuan min lo hrilh zung zunga.

"A ni maw? Birthday cake tur a nih phei chuanl a hma aia nalh leh tui a kan siam angai dawn a nih chu" tiin ka che nghal zung zung a. Judy pawh customers te lo chiau au turin a chhuak lehnghal vata.

Darkar 5 zet ka siam hnuah ka zo ta hram e. Chhawng thum a ni a, mahse eng emaw la belh ka duh. Chutih rualin ka rilruah erawh ka fate ringawt an awm a. Nuam an ti angem? An lo va inhau angem? Ngaihtuah tur a tam lutuk.

Nu thinlung tak hi chu.

Chutih lai vek chuan care order lamtu tur pawh a lo thleng chawpchilh ve nghala.

*** *** *** ***

Mut ka tum lai tak chuan kawngka a rawn inhawng a, kei tih lovah chuan pindan chabi neitu awmchhun chu Caleb-a a ni. Tun ang zanlaiahte eng nge a rawn tih dawn le? Light ka on a, Caleb-a chu a lo ding reng a. Tukin ai khan a chauh hmel zawk a, engtik lai pawh a mar at thin a necktie te chu a loose hneng hnuang a, a kawr hakte chu a kawrkilh thenkhat a inphelh a, a kawr ban chu a kiu thleng a thlep chho bawka.

Ka ngaih a tha lo kher mai.

"Caleb?" tho chhuakin ka va kai a, ka khumah chuan ka thut tira. Eng emaw sawi tum hian a ang zuau a, mahse tawng tur pawhin a chau tawngkhawng lutuk. Tawng rih lo turin ka lo khap thuaia.

"Chawlh hahdam i mamawh a nih kha" tiin ka mut tira, a pheikhawk leh mawza ka phelh saka, a tie phelhin a kawnghren pawh ka phelh thawl a. He mi khawngaihthlak tak hian tibuaitu nei lova mut siai siai a mamawh a ni.

A sam chu hui kiangin a hmel hahdam ta hliah hliah chu ka thlir reng a, a chalah fawpin puan ka sin tira. Light ka off a, ka fate chu an mu tha nge tha lo tiin ka va en fel leha.

An ni pawh an school thar chu nuam an ti hlemai. An rawn haw veleh an thian tharte chanchin an sawi sap sap a, naktuk lo thleng tur pawh ka ngam ta sarh mai.

Chapter -2

His Proposal

Thutthlengah ka thu tum bur a. Nizana ka ring ka delh sual chu a la na angreng hle a, tho kangin ka lu chu ka thle kual vela. A na in a kham bur a. "Vawikhat mah thutthlengah ka mu leh ngai tawh lovang" ti a phun bui bui chungin ka room lam ka pana.

Khua a la thim vek avangin ka room chhung light chu ka on a, ka khum a Caleb-a lo mu mek chu ka hmu a, ka nui chhuak haka. A van han mangchhiat theih ngai em ve aw. A taksa chanve khumah, a chanve dang khum pawnah. Va siam remin ka mut that tir a, puan ka sin that tir zawh chuan bathroom lamah ka lut a. Ka ha te nawtin ka inbual fai a, nipui kawr pawl ka inbela.

Caleb-a leh naupang ho chu an la mutui hle a, tukthuan ka siam zawhah ka kaitho mai ang tiin choka lam ka pan a. Ka sam ka tawn tha a, artui ka kanga, serthlum tui leh toast ka siam bawka. Naupang ho tan pancakes leh bawnghnute chhuan lum ka siam sak tel a.

Ka kut bal chu ka apron hrenah chuan ka tat a, tunah chuan ka pancakes hnuhnung ber tur pawh ka peih fel ta a. Kaitho tawh tura ka intintuah lai tak chuan ka pindan atang Caleb-a pawh a rawn chhuak ve chiah a. Thawmhnaw a ha lo va, towel chauh chu fual angreng tak hian a venga. Amah pawh chuan min rawn hmu thuai a. Awi lehh...a six pack han mawi zia chu.

"I- i thawmhnaw chu thutthlengah ka dah tawh kha" tih leh hnungchhawn ka rual a. "Naupang ho pawh David-a va thlah mai turin ka lo tia" ka ti a. David-a chu Caleb-a driver a ni. Ka hnung lamah pen ri ka hria a. Chuveleh ka hmai ka hup ringawt a. Caleb-a chu za takin a nui a. "Good morning rawn tih mai che ka tum a nia" a ti a, a kal sawn leh thuai a.

Kei pawh ka awmdan thing tak avang chuan ka nuih a za ve viau mai. Ka apron hren ka hlip a, dawhkan chu tukthuan eina atana tifaiin naupang ho kaitho turin ka kala. An khumah an lo la mutui khawp mai. Ryker-a chu ka pana.

"Good morning muchkin. Thawh a hun tawh e" a beng bula zuk tih pahin a biangah ka fawpa. A rawn inher a, ka nghawngah min rawn kuah a. "Ka tho paih lo" a rawn ti bui bui a, ka lo nui haka. "Chocolate pancakes ka siam a nia aw" a tih veleh chuan a rawn meng zau kawk a. "Pancakes maw..?" tih leh thawh a ruala, bathroom lamah a tlan lut nghala.

Raine khum lamah ka kal leh a, a mit chip takin a lo chhing tlat a. Lemchangthiam lalnu tur ala nih hi. "Raine, tho tawh rawh le bawihte" tiin a beng bulah ka zuk zaia. Chu veleh a rawn nui kar kara. "Ka la tho peih lo" tih pahin a puan sin lai chuan a inlukhup daiha. "A nih leh pancakes zawng zawng khu Ry a'n ei vek mai rawh se" ka ti a. Rei nghah a ngai lo. Khum chu a ruak thuai a, a ke tereuhte chuan a tlan a, bualin lam a pan nghala.

Ka inbual dun tir thin a, mahse tunah chuan a theih tawh loh. Raine hi chu ka pindan a bualinah kher a inbual duh tlat zel. An inti puitling ve tan tawh a, mahni a inbual chu puitlinna rahbi pawimawh takah an ngai ve tlat. A tir chuan ka hauh phah thin a, mahse Caleb a'n pawmthiam tura min hrilh angin tunah chuan an lo lian tan ve tawh a ni tih chu dam takin ka pawmthiam ve ta.

An rawn thanglian ve ta chu ka lawm rual rualin ka huphurh tel bawk a. A chhan chu hmethainu chauhin an hrethiam ang.

Choka lam ka pan a, Caleb a'n chanchinbu a lo chhiar mek a, tunah chuan ani pawh a lo insiam peih at tawha. "Good morning" tiin a bulah ka va thu a, ka tukthuan tur ka ei nghala. "Morning. I khum a min mut tir avangin ka lawm e" tiin min rawn nuih seih a, a thil chhiar lai chu a chhiar chhunzawm leha. .

Naupang ho pawh an school form nen an rawn tlan chhuak a, an chair a kan pawm kan nghakin an rawn phei a. A ngai ang pawhin an chair-ah ve ve kan hlang kanga, Ryder-a ka hrai a, Caleb a'n Raine. Caleb-a nen an school-ah kan va thlah leh a, chumi zawhah kan kalsan a.

Caleb a'n ka cafe-ah min thlah veleh a, chumi hnuah a office lam a pana. Vawiin pawh nidang ang thoin kan buai leh khawp mai. Cake thar siam chhuah ka tum a, ka ti hlawhtling hleithei lo. Thil eng emaw dangdai leh tui bawk si ka ngaihtuah chhuah angai a ni.

Ka ngaihtuah chhuah hmain dawr khar a lo hun leh ta mai a. A tih thin dang angin ka cafe kawtah nuisangin Caleb a'n min lo nghak leh a. A vawikhat nui hmel ringawt pawh hi hmeichhe thenkhat tam tak chuan a vawikhat nui hmel ka hmuhnaah ka hmangaih nghal an ti thei hrim hrim ang.

"Eng nge i vawiin a an a?" seat belt ka hren mawlh mawlh lai chuan min lo zawt a.

"Chu zawhna chu nitin min zawt a, ka chhanna che pawh nitinin a ngai reng a ni tho a. A pangai a ni mai" tiin ka nuih a.

"Kei chu ka hah khawp mai" tiin a tho haka. A banah ka va vuan vata. 'engkim a tha leh vek mai ang' tih hmelpu chungin ka nuih a.

"Motor khalh hi zir ve ila a tha ang. Zing tin kan inah i rawn kal a, ka fate an school-ah thlahin kei cafe-ah min thlah leh ziah bawka. I lo va lam leh ziah tih pawh ka hai lo a nia" ti tak deuhin a mitah ka en a. Amah tak chuan a va lam hman lo nangin lo va lama lo va buaipui turin hmeichhe pakhat Sophia-i a lo ruai a, ani chuan school-ah a lo va lama, eiturte pein ka haw hma chu inah a lo awmpui a lo nia. Sawi buai ka tum pawhin ka hnathawh na lama rilru ka pek zawk theih nana ti a nih thu a sawi leh daih bawk si. A thusawi chu ka ngaithlak a, ka zawm a ngai ngei bawk si a.

"Chutiang sawi suh Sapphire. A chhan chu i hriat kha" a ti a. A khabe ruh a ti che ralh ralh a, nghet takin steering chu a vuan a.

"Caleb, tunah chuan ngaihtuahawm ka ni tawh hleinem. Kum 6 zet a nih tawh hi" tiin ka accident chungchang kha ka sawi chhuak a. Caleb-a hian vawikhat mah motor min la khalh tir leh lo a, zir pawh min zirtir duh lo. A chhan chu thil eng emaw ka chunga a thlen leh palh a hlau a ni.

"Khang kum chhunga i harsatna tawhte kha i hre tawh lovem ni? I rai lai a i buai nasat ziate kha. I theihnghilh ta vek em ni?" thinrim lek lek hian min ti a.

Ka hria. Ka laa hrechiang lutuk. Ka chala ser awm hian theihnghilh duh pawh ni ila min hriatchhuah nawn tir fo thin. Phir ka pai avanga harsatna ka tawh nasat zia te. Mahse vanneihthlak takin kan pathumin kan dam chhuak hlauh a, mahse Raine erawh chuan chuap lamah felhlel a nei ta thunga. Doctor in tihdam theih a nih loh thu leh treatment la tura a la naupan lutuk thu min hrilh lai te. Tunah pawh kum 6 chauh a la ni a, engkim kha ka la hre vek a ni.

Ka appartment building kan thleng a, chhuk tumin kawngkhar chu hawn ka tum a, mahse Caleb a'n min lo danga. "Biak lawk che ka duh a ni" a hmel atang chuan a huphurh angreng hle maia. "Aw le. Eng nge ni ta?" tiin a lam ka hawia.

"Sapphire, ka-" tiin a tawp leh daiha, a mit chhingin thawk a la vang vanga. A mit chu rawn mengin ka mitah tak min rawn en a. A mitmeng thutak lutuk chuan ka lungphu a ti rang thelh mai. Eng thu nge a sawi dawn?

Hawi sawnin a car hma lam chu a melh a, kei lahin ka lo hre chak tawh bawk nen. Eng nge dik lo awm tih chu zawh mai ka tum a, mahse ka zawh hmain a mah zawk a rawn tawng chhuaka.

"Naktuk hi sawrkar chawlh a ni a. Picnic turin naupang ho kan hruai dawn em ni ang?" a ti a, min rawn en leh a. Ka lo nui suk a. Chu chu thil tha tak a ni. Ka bu nghata. "Mahse kei hi-" ka tih lai chuan min lo pawtchat thuai a. "Nikhat lek i kal loh avang khan a cafe chuan a tlakchhiat phah kher nang" tiin min rawn nuih a. Ka nui haka, kawngkhar chu hawngin Car atang chuan ka chhuak a.

"Lo inpeih hma ru aw" tih leh tlan a rual a. A tlan liam thleng mai chuan mi a ang maiin ka ding nui vur vur a. Ka appartment-ah ka lut a. Sophia-i chuan tha takin naupang ho a lo buaipui a, kan zanriah tur min lo chhum sak vek bawka. Ka inbual a, naupang hoin an homework an ti mek bawka.

Sophia-i hi nula kum 20 bawr vel a ni a, a roomate nen a cheng dunin Chicago University a kal lai mek a ni a. A sam a buang a, a mitmu a paw ram a, hmeichhe hmelchhe lem lo tak mai a ni.

Zanriah kan ei zawhah mu turin khum lam kan pana. Atuk chawlh a nih tho avangin thawnthu chhiar sak an ngen a, an muthilh thleng ka chhiar saka. An pahnihin ka sirah ve ve ka mut tira.

*** ***

Zing a ni hma kher mai. Rang takin khum atang naupang ho an zuang tho a, bathroom lam an pana. Kei pawhin ka zui ve nghala. Kan intifai zung zung a, chhuak turin kan insiam nghala. Caleb-a pawh a hmain min lo nghak vang tawha.

Jeans tight tha tak a ha a, a malpui lian ltak mai chu a lang chiang hle a. A t-shirt plain hak lah chuan banpuam lian tha tak mai chu mar takin a hreng a. Ani hi zawng eng thawmhnaw pawh ha se a inhmeh pui vek dawn a nih hi.

Chhun lamah naupang ho nen animation movie kan en a, ice-cream te kan ei bawka. Tlai lamah park-ah kan kal a, Caleb-a hoin kan inbiruksiak a, mittuam a inum te kan ti a. Naupang dang pawh an rawn tel ve a, nuam an ti hlawm khawp mai. Zanriah kan kil zawhin kan haw a. Haw lamah chuan car chhungah an unauin an muhil tawh a. Caleb a'n inah min pawm luh pui a, an pheikhawkte phelh sakin kan mut that tira. Ryker-a hi chuan kekawr phelh kher a mut a duh avangin Caleb-a chu a kekawr phelh sak turin ka ti a.

Kan pahnih chuan kawngka bulah dingin lungmuang taka an muhil lai chu kan thlir a. Zawitein kawngkhar ka khar a, inpui lamah ka phei a, ka hnungah Caleb a'n min rawn zui bawka. Caleb-a lam ka hawi a, a hma ni tlai a a hmel put ang tho kha a la pu renga.

"Aw le Caleb, i rilru a thil awm chu ti hian min hrilh tawp mai rawh" ka ti ta ringawt a. A ngawi vang vang a, chutah ka mitah tak min rawn en a.

"Ka duh che a ni Sapphire Kingsley"

END OF CHAPTER -2

Chapter -3

(Nathan)

Min thawng.

Chu chu ka hmelah chiang takin a hmuh theih ang. Caleb a'n min duh a maw? Ngaihzawng induh ang hian. Zep loh chuan kei pawhin ka duh lo hauh lo. Mahse ka hriatna ka neih let leh hma chuan chutiangin eng thil mah ka ti ngam si lo. Tu nge ka nih chiah tih ka hriatchhuah leh phawt loh chuan.

"Caleb...ka" thawk ka la vang vang a. A rilru ka ti na dawn tih ka hria. Mahse relationship kan neih hma leh thil a thlen tur a thlen tak tak hma a lo tih nat chu ka inthiamlo em em hran bik chuang lo.

"Caleb, kei pawhin ka duh che alawm. Chu chu chiang takin ka hria. Mahse ka hmuh hmasak ber che khan tunge ka nih ka inhre lova, chu chu zawn chhuah hmasak phawt ka duh a ni" ti a chhangin a mitah tak ka en a. "Ka chawr chhuahna dik tak ka hriat chhuah hmasak phawt loh chuan eng thil mah hi ka ti ngam lo a ni. I hriatthiam hram hram ka beisei" tiin hnuai lam ka melh a. A mitmenga hrehawm a ti lai hmel chu ka hmu ngam lo.

Ka biangah rawn vuanin a lamah min kuai dak a, a mitmeng chu a la nelawm reng tho a. "Ka hrethiam alawm, nghah a ngai a nih pawhin ka nghak mai ang. Kum 6 chhung ka nghak tawh a, reilote nghah leh hlek chu a harsa ka ti tawh lovang" ti a nui chungin a dar a chhin ak a. Kei pawh chu ka lo nui ve a. Nghet takin min rawn kuah a, kei pawh chuan ka lo kuah let ve a.

"Min hriatthiam avangin ka lawm e" a awm ngheng chuan ka ti sapa.

"Engtik lai pawhin" a ti a, ka lu chungah a khabe a rawn nghata.

"Va mu tawh rawh. I chau tawh lutuk ang" tiin min kuahna chu a la thla a, kei pawh chu ka ham zui nghala.

"Kei chu naupang ho mutna piah pindan saw ka chang mai ang. I pindanah va mu tawh rawh. Mangtha le Saph" ti a nui sang chungin a mutna tur lam a pan a. "Mangtha le Caleb" ka ti sapa.

Ka inher a, ka chau tawh khawp mai. Ka inbual a, sweatpants leh tanktop ka ha a, ka khumah lawnkaiin puan ka sin a, light ka off a.

*** *** ***

"Morning Sapphire" dawr ka luh rualin Judy chuan min lo ti vata.

"Morning Judy" tiin choka lamah ka lut tlang a. Kan Chef chuan min hmuh veleh "Vawinah eng chhang nge kan siam dawn?" nuisang hian a lo ti a. Chu chu tuk tin a a tih dan ve reng a ni. A mitmeng lah hi a hmuhnawm sang reng mai a. Kum 50 bawr vel chu a ni ve tawh. A lu a tuak pheuh pheuh a, a kum aiin a lang naupang daih a. A chang phei chuan hmeltha ka ti lek lek zel.

"Naupang hoin brownies an duh thu an sawi a" tiin ka lu ka thing a. Fa te'm an ngen tlat i chuan kan siam sak leh nge nge thin a nih hi. Chet-a chu a lo nui hak haka. Ka fate tan brownies chu ka siam tan nghal a. Hetiang chungchangah hi chuan Judy chungah ka lawm thin khawp mai. Kei hi chuan dawr han kalpui vak ngaihna hi ka hre lutuk lova. Chhang ka ur a, chu chu mipuiin an lo duh phian a. Anni ho lo chiauau leh dawr enkawl erawh Judy leh Caleb a'n an chang deuh rawt a.

Rang takin chocolate brownies tui tak tur kan siam sawk sawk a, ur turin ka dah nghala. Ka apron chu hlimin ka thaw haka.

"Ka siam zo ta e" tiin Chet-a chu ka va nuih a. Choka atanga chhuah ka tum lai tak chuan mangan hmel deuh hian Judy a rawn luta. Chutianga mangan hmel deuh a rawn luh chu a tih dan lo pawh a ni lo va, chubakah ka hrethiam lutuk tho. Hmeichhiate hi chu hnahthel tla mai maiah pawh ka mangang thin alawm. Min rawn koh takah chuan ka lo ding a.

"Eng nge ni?" ka han ti a. "Sawlaiah sawn mipa naupang a thu a. Darkar hnih chuan a thu tawh. Bawnghnute no khat chiah ala in" a rawn ti a.

Chu chu manganna awm pawh a ni viau mai. "Amah chauhin maw? Darkar hnih chuang maw?" makti angreng deuh hian ka ti a. Judy chuan a lu a bu nghata.

Ka sam ka tawn tha a, choka atang chuan ka chhuaka. Dawr chhung chu ka melh kual a, dawhkan tinah mai chuan thu an awm far a, coffee te inin hun khawhral nan an rawn hmang mek hlawma. An vai mai chuan chu naupang tereuhte chu ngaihven awm pawhin an lang lova. Korean hmel a pu mah a, dawhkanah chuan lehkhabu dahin a chiar a, dawhkanah a kiu a nghat a, a khabe-ah a kutin a dawm bawka. A bulah chuan bawnghnute no ruak a awm a, amah chauhin a ni a awm ni. A lamah va pheiin a dawhkan bulah chuan ka va ding a, ka kutin dawhkan chu ka khawng ri karh karh a. Fa pahnih lai nei mahin ila naupang bulah hi chuan ka zam deuh tlat zel. A chhan chu an nemin an rilru a na hma em em a, thil hoteah an haw mai ang che.

Ka ke a rawn en a, ka lam a rawn hawi lo reng reng. Hawi let lehin a lehkhabu chhiar lai chu a chhiar chhunzawm leh maia.

"Helai chair-ah hian thu an awm em?" ka han ti a. Chutia ka tawng takah chuan min rawn en a, a hma a chair ruak ka kawh chu a en leha. Chu naupang chuan min rawn en leh a. A dar a chhin ak a, a lehkhabu bawk chu min bih san leh daiha. A hma zawn thutna ruakah chuan thuin dawhkanah ka ban ka nghata. Pawn lam khawthlirna nuam tak lam chu ka hawi pheia.

"Tunge i hming?" a nelawm thei ang ber hian ka han ti a. Chu mipa naupang chuan ka kut a rawn en ringawt a, engtin mahin min chhang lo. A ri lovin ka nui saka. A lehkhabu chhiar chu kan thlek deuh a, ka rin loh daihin 'The tales of Venus' a lo chhiar a.

Chumi thawnthuah chuan hmeichhe hmeltha tak Venus-i chuan pasal Christopher-a anei a, mahse pathian te'n a thlarau an lakzak a. Chu thawnthu chu vinus i'n a pasal thlarau nei let leh tur a a beih dan a ni a. Christopher-a chu mihringah rawn chang lehin nausenah a rawn piang nawn leh a. Venus-i chuan a enkawl seilian a, a rawn puitlin hnuah a hmeiche hmangaih ber rawn neiin fanu an nei a. Mahse Venus-i chu a vanglai pawh chen mumal hman lovin a tar thi a, lungchhiat thlak viau mahse a hmangaih ber erawh a nei let leh ta thunga. Thawnthu ngaihnawm tak a ni nangin a tawpnaah a hmanagaih ber pawh nei let ve lova Venus-i a thi chu ka lawm lo viau mai. Chutiangin thil lungchhiatthlak chu tuman an phu lo.

Ka tawng chhuah awm pawh ka hre lo. Mahse chu naupangte chuan "Thawnthu zawng zawng hi hlimawm takin a tawp vek bik hleinem" tiin min rawn en a. Ka lo meng kawk a, tawng a pei ka rin rin nen American aw phawi dik tak a rawn hmanga. Ka chhanna nghakin min en reng zawka.

Ka nuih saka. "Ni e,a tawpna ai chuan a zin kawng a lai kha a pawimawh ber zawk alawm" ka tih chuan a kun lehnghala. A awm danah chuan a ril a tam a ni tih ka hre thei a. Dingin choka-ah ka lut a, brownish pathum chu plate-ah ka dah a, chu naupangte awmna lam chu ka pan phei leh a. Plate chu a hma zawnah nui sangin ka va chhawp sak a, a ngaihna hrelo tak hian min rawn en a.

Ka thutna ngaiah thu lehin ka thil pek chu ei turin ka va mitmei a. "Ei rawh. Keima siam a nih kha. A tui leh tui loh min han hrilh teh?" ka ti a. A inngaihtuah vang vang hnuin fork chu a la a, a ei tan ta a,

"A tui em..?" ka lo ti a. Vawikhat a ei leh a, rawn hawi chhuakin a nui vur vur a. "A tui lutuk ka tih sak mai ang che" a rawn ti ta reuh a. ka lo nui haka. A ei zawh vek hnu chuan a kawr banin a hmui a hru faia. Han en mai pawhin a biang a puar elh a, korean mipa naupang duhawm tak hmel ang hi a ni.

A nu leh pa ten an kalsan em ni? Eng emaw zawh ka tum lai takin Judy i'n min rawn ko a. Ka va hawi a, ka va hau thelh a ni. Mahse call ka dawn thu leh a pawimawh thu min lo hrilh a. Thawhak chungin ka tho chhuak a. "Ka kal a ngai tlat mai, Kan inhmu chu ka lawm hle mai" tiin a hming ka zawt a, mahse a lehkhabu bawk chu a lo bih leh daih tawh a. Min chhang dawn lo tih ka hriat tho avangin ka kalsan tumin ka inher a.

"Nathan" zawi sap hian a rawn ti a. Ka inher a, mahse a lehkhabu chuan a hmai a lo khuh veka. Ka nuih saka, ka kalsan ta a. Judy chuan ka iphone, Caleb a'n a min lei sak chu min lo pe vata.

"Miss Kingsley?" tu emaw hian phone atang chuan min rawn ti a.

"Aw keimah ka nia" ti a chhang chungin dawhkanah chuan ka thu a.

"Falls High a principal ni lai Samuel Hopkins ka ni a" a rawn ti a, chu thu chuan min ti tho zawt a. Chu school chu Ryker leh Raine te school luhna a ni.

"Aw eng nge ni ta Pu Hopkins?" ka lo ti vata.

"Khawngaihin a rang lamin rawn kal la, ka office-ah min rawn hmu ta che" a rawn ti a. Rang takin "Ka rawn thleng thuai ang" ka ti nghal vata. Ka kawrchung ka la a, choka atang chuan ka chhuak nghal vata. Mipa naupang thutna lam kha ka va melh leh zauh a, mahse hmuh tur a awm tawh lo.

"Khawiahnge naupang kha?" tiin ka zawt vata.

"A pa in a rawn hruai ta a nih kha" tiin pitar pakhat hian min lo chhanga.

Apa chuan a ngaihsak tha vak lo a ni lo maw tih zawhna chu ka rilruah a rawn lut thuai a, ka haw ru deuh riau mai.

"School-ah ka va kal dawn a nia" tiin Judy chu ka hrilh a, dawr atang chuan chhuakin taxi ka phar a. Car hi chu ka mamawh ve takzet tawh a ni.

END OF CHAPTER -3

Chapter -4

"Lut rawh le" uangthuang deuha tih pahin Caleb-a chuan Car chhungah R

aine a pawm lut a, belt a hren tira. chutiang chiah chuan ke pawhin Ryker-a ka lo hren tir ve mek a. Kan chuan fel zawh hnu chuan nidang aia a speed sang mahin Caleb-a chuan a khalh a. Nidangah chuan naupang nen kan nih hi chuan 40 aiin a tlan sak ngai lova, vawiinah erawh 60 lai a chakin a tlana.

"Caleb, tlan muang deuh rawh" tiin ka va vuan a, min lo en vata. Kei pawh chuan ka en tho chungin kawngpui lamah pawh a rilru ka pe reng tho a. Accident lian tham dang tawh leh ka duh tawh lo a ni. Ka fate nen ngat phei chuan.

Caleb-a pawh chu chutia ka han tih takah chuan tlemin a tlan muang leh ta deuh a. Vawiin hi school a an ni hnihna a ni a, Principal in a complain nachhan kha Caleb-a pawh chuan a la hre reng ang. Naupang pakhat Ryker a'n a lo insual pui a, chutia a unaupate insual ta nanana chu Raine a lo tap chiam mai bawka. Seat hnung lamah chuan an pahnihin an la thu tau bur a.

In kan thlen chuan Raine chu a muthlu siar siar tawh a, Caleb a'n pawmin a khumah a mut a. Ryker-a erawh thutthlengah kan thut tir a. A nungchang tha lo tak avang chuan Caleb-a pawh a lawm tehchiam lo a ni.

"Thil awmzia dik tak min hrilh ve dawn em?" tiin nem takin ka tawng lui a.

"Prince vang kha alawm" ti a phun sap chungin a inhnit feih a.

"Prince a?!" ka lo ti vata, ka nuihte lam lam a za lek lek a ni. "Principal tih zawk tur alawm bawihte" tiin a hnar bal chu ka tuai fai saka.

"Chuan in nangma hnen atang engkim hriat ka duh a ni"

"Sean a'n Raine a lo be char char a, chuan pangparte a lo pe vela" ti a a sawi lai chuan a thinrim avangin a beng a sen hlar thei a. "Chuvang a sual rikngawt chu a va tha awm lo ve tiraw?" ka lo ti a.

Ryker-a chuan min rawn en kalh a. "A chhan chu khapa kha mipa tha lo tak a ni a, chubakah tu mipa pawh nise khatianga Raine an rawn hnaih kha ka duh lo a ni"

"A nih, i va kal a chu pa chu i va hnek ta em ni?" ti a ka zawh chuan min chhang duh tawh lo. "Ryker bawiha, i farnu i chhan chu thil tha lutuk a ni alawm. Mahse i thu ang diak diakin i awmtir vek thei bik lo ania. Thian siamte pawh a duh ve anga, mipa naupang pawh nise a kawm thei a, pangpar lo dawn pawh chu a sualna a awm hleinem. Mipain a rilru an lo tih nat hun a awm a nih pawhin a tuar ve tur ania lawm. A nat hunah chuan ala vuan dawn che a, i han lian deuh anga, tuna ka sawi awmzia hi i la hrethiam thuai mai ang" tiin a lu-ah ka fawpa. "Tunah rih chuan tlangvalte, i farnu hi hlim takin nuih tir la, chutiangin a thian tharte lo va sual ngawt tawh loh tur aw. A tha em?". A lu tereuhte chu a bu ve nghat a, ka lo nuih ver ver a.

"I pindanah han chho la, han inti fai tawh rawh le. Chaw ei ka lo siam ang" ka ti a, inchunga a tlan chhoh lai chu ka thlir renga.

"Tih tur dik tak a ti a ni" Caleb-a aw-ah chuan ka zuang lo chauh. Ka awm dawmin ka thaw kawka. "I kal daih tawh emaw tih naklaiin"

"La kal ngawt thei bik nang" tih pahin Caleb-a chu a rawn luta.

"Tih tur dik ti si, tinge a bulah khan thinrim awm hmel deuh a i awm?" choka lama luh pah chuan ka ti a.

"Chumi avang chuan ka thin a rim reng reng hleinem. A laka ka thinrim chhan zawk chu him pial a a kalsan kha a ni. Chu zawng chu" tiin Caleb-a chuan a ban a phar hlut a.

"I ti tak tak em ni Caleb? Ui karei leh. Ka lawm hlemai nangmah ka biak tir lo che a. A nih loh chuan a leh pekah ka fapa kut tuar a naupang dang damdawiin a awm ka kan a ngai dawn si a"

"Chutiang a dem an ngai hleinem. Ti hian ngai kan awah reng tho alawm" a ti liam puat a.

"Zanriah ka siam dawn. Lo va inti thawveng rawh" ka tih san a. A nui hak hak a, a kal sawn a.

*** *** ***

"Caleb, naupang ho kha lo ko teh" ka ti a, dawhkanah chuan lasagna la sa vat vat ka chhawp a. Caleb-a chuan min rawn chhang miah lo. An pindanah ka han chho a, chutah chuan Caleb-a pawh kawr eng dar bul leh sweatpans grey ha in a lo awm a. A chhelo khawp mai.

Ka va phei chuan thawm dim turin a hmui bulah a kut a rawn lek vata. Hrethiam lo zetin a hawina lam chu ka hawi ve vata. Ryker-a chuan tui taka Raine mu lai chu a samah a lo chul mek a. "Ka tihpalh aw Raine, tuman an tihnat che ka duh loh vang a ni. Kan chhungkua a mipa awmchhun ka ni si a. Chu chu ka lawhpurna a ni ve tlat sia" a tih lai chuan zawitein Caleb-a chu a lo nui a. Lawhpurna ni lovin mawhphurhna tih zawk tur a ni. Mahse chu thumal tawite chu atan chuan a lian mah mah deuh a ni. Chubakah kan chhungkua a mipa awmchhun a nihna anga a chanvo a hrethiam ve chu ka lawm takzet. Kum 6 lek ala ni a,chutiang nag hrethiam turah pawh ka la ruat lova.

Ka inher a, chaw eina pindan lamah ka chhukthla a. Ka hnungah Caleb a'n min rawn zui a. Chumi zan chuan a in lamah Caleb-a pawh a haw a, Zirtawp a an meeting neih tur atan in puahchah a duh a ni awm e. Ryker-a a khumah ka mut tir a, Raine in tur tui ka chhawp sak bawka. Chumi zan chuan kei pawh naupang ho bulah ka mu ve a. An hmel ka hmuh chuan thil eng emaw minngaihtuah tir a. Ka fate hian pa an la mamawh ve thuai dawnin ka hria.

*** *** ***

Inrinni pawh kar lovah a rawn herchhuak leh thuai a. Khami ni atang khan Raine hian Ryker-a a hlat deuh riau mai a, park a lenpui pahin titi pui ka duh a ni.

"Vawiin chu park-ah leng ang u aw" ka tih rual rualin "Khawiah nge pate Caleb-a?" an ti nghal vata. Hemite pahnih hian a chang hi chuan min ti hlau lek lek zel chu a ni e.

"Pate Caleb-a chuan a phone ala thei lova, a tel lo pawhin kan kal thei tho alawm" ka ti a, taxi kan changa. Park kan va thlen chuan naupang an lo ri teng tung tawh a, a then an lo tlan lual zuai zuai a.

"Nu, ka va tawlh ve dawn" tih pahi Ryker-a chu tawlpahrit awmna lamah a tlan phei a, Raine erawhin min kai a, a kut lehlamah a nautelem a pawm bawka.

Raine chu thutna ruak awmna lam ka panpui a, chutah chuan ka thuttir a. "I unaupa i hlat tlat nachhin hi min hrilh la ka duh a ni bawihi" tiin kazawta. "Hlat.., hlat maw?" tiin min rawn en hu a.

"Aw hlat. Hlat tih awmzia chu i biak duh loh chhan tihna" tiin ka hrilhfiah a. Ka malchungah rawn lawnin a rawn thu a.

"Anu bulah chuan eng pawh i sawi thei a nia" tiin ka lo fuih pah bawka.

"Thian ka neih a duh lo alawm" a ti a. Ka lamah pawm betin a lu-ah ka fawp a. "Engtin nge a tih a?" ka lo ti a.

"Mipa naupang pakhatin pangpar nalh deuh mai min pe a, chuan chu pa chu a rawn hnek ringawt alawm" tih pahin a inhnit feih a.

"Chutiangin unaupate an be duh lo ngai hleinem. A hmangaih em vang zawk che ania, thian i neih a duh loh vang ni lovin" tiin ka hrilhfiah a, Raine pawh chu a nui ve maia. Ka malchung atang chuan a chhuk a, a unaupa awmna lamah a tlan phei a, eng emaw hi a va hrilh a. Ryker-a chu a nui ver ver a, an inkuah lai pawh chu chiang takin ka hmu thei a.

Nileng thakin kan infiam a, chawhnu lamah phei chuan thlanin min bual huh dup tawhah. Tum loh deuhin park-ah chuan Caleb-a hotel a an maid ho enkawltunu Jane-i nen kan inhmu hlawl a, ani chuan a cabin lamah min hruai a, chutah chuan kan va intifai a.

"Kha hei hi ha rawh" tiin Jane-i chuan nipui kawr eng nalh zet mai hi minpe a. Ka intihfai zawh chuan ka inthlak a. pawnah ka chhuak a. Kan piah deuhah chuan Caleb-a pindan bik 'CALEB MCKENZIE' tih loh inziah kulhna hi a awm a. Va surprise ve hrim hrim ka chak riau mai.

Kawngka ka hawng a, nui sang chungin ka luta.

Caleb-a chuan file a lo khawih mawlh mawlh a, rawn hawi chhuakin a rawn nui sanga. "Sapphire, tlemin ka la buai rih deuh a" inthiam loh hmel deuh hian a rawn ti a, a hma zawn chair-ah chuan suit ha mi pahnih an thu bawka.

"Ka tihpalh, pawnah ka lo nghak ang che" ka tih rual rual chuan mipa pahnihte chu rang zetin ka lam hawiin an rawn inher thuai a. Pakhat zawk chu pa uupa lam tawh, mitmu uk a ni a, a mit hnuaiah dark circle a nei a, han en mai pawhin pa thiltihtheih hmel tak a ni. Pakhat zawk erawh chuan mitmu dumpawl nalh tak mai a nei a, ka hmuh thin niawm tak a hriatna ka nei nangin chutianga sawi tur erawh ka hre chuang lo. Makti deuhin ka ding a, ka nui hmel erawh a bo zo tawh.

Engmah ka tih hmain pa upa tawh zawk chu a rawn ding chhuak vata, mittui tling deuh pum chungin ka lamah a rawn phei a. Ka biang tawn tawnah a rawn dawm a, a biangah mittui a rawn luang ta maia. A chhan ka hre lo vam chutiang a awm chu ka duh lo bawk.

"Alison". Lawm hmel takin a thaw haka, rilru hahna zawng zawng kiang ta vek hmel hi a pu a. Min rawn kuah a.

Alison maw? Tunge chu nu chu?

END OF CHAPTER -4

Chapter -5

(Alison or Sapphire?)

* Ian's P.O.V *

Ka hma a darthlalang hlai zet mai hmaah chuan dingin ka kawr chung chu ka pawt rem tha a, ka sam pawh chu ka kutin ka tuai thuak thuaka. Keimah leh keimah pawh hi ka inhre chiang meuh tawh lo chu a nih hi. A mitte chu nunna nei hmel pawh a pu lova, kum 6 chhung zet a der a ka nuih thinna lamah ka khabe ruhte pawh a na zo ta. Phur lo zetin ka dar ka chhin a, ka thawmhnaw khaina bawm chu ka khar a. Tun thlengin tie ka awrh ta ngai lo. Marie pawhin tunah chuan ngaiah a nei ve ta a, min tur lui tawh ngai lo. Mahse engtik niah emaw chuan ka la awrh lei ngei a rin thu erawh a sawi thin a, ni e, Alison-i khan ka nghawngah min awrh tir leh dawn a nih phawt chuan ka awrh leh em em ang.

Kawngka atanga ka chhuak chiah chu Nathan-a chuan ka keah min rawh pawm chawt a. Chhuatah thingthiin a lu ka tuai saka. "Good morning mipa naupangte"

"Good morning apa" tiin ka biangah min rawn fawp a. Chutih lai chuan Marie pawh bawnghnute no keng chungin a rawn lang chawpchilh ve nghala. Min hna hmu chu a ding a, a thawhak a. "Helaiah hian a ni maw i lo awm renga naupang harh pa" a rawn ti a. Chuveleh Nathan-a chuan tlan a rual a, a hnungah Marie chuan a umzui hlawp hlawp a. Hmuhnawm ti taka thlir chungin ka nui haka, chutih lai tak chuan Ashley pawh a rawn lang a, chuveleh ka nui hmel chu chawp leh chilhin a bo nghala.

Party na atangin a rawn haw thleng ve chauh a ni a, Nathan a'n a hmu hman lo chu a lawmawm ngawt mai. A pindan thar lama a pen lut chhak chhak lai chu ka thlir reng a.

Ka phone a rawn ri a, ka ipte atanga phawrhin ka han en a, Mr Brown-a number alo chuang kuau a. Kum 6 chhung khan a makpa ang ni lovin a bussiness partner ang bakin min en ngai lo a, chu chu duh lo hle mah ila a hrehawmna ti belhchhahtu mai nih erawh ka duh si lo.

"Tlai dar 5 ah McKenzie-ah ka rawn hmu ang che" a aw-ah chuan ngaihnobeina emaw, thinurna emaw pawh engmah a awm lo. "Aw le Sir" ka ti a, phone pawh chu a dah lehnghal vata. McKenzie a ken tur ka file chu laiin in chu ka chhuah sana. Caleb McKenzie tih hmingpuin a share pakhat a lei sak dawn a, chu chu a sumdawnna kawng zauhna tur pawimawh tak a ni.

Ka Car a din veleh ka chhuak a, ka hnungah chiah Mr. Brown-a car pawh a rawn ding a, rawn chhuak vein kan inhmuh veleh kan lu kan bu tawn nghauh a. Inchhung lamah kan lut a, nu upa tawh lam hian nuisangin min lo chhawn a. Chutih lai chuan pawn lamah ruah a rawn baw hawk hawk a.

"Heti lamah hian aw Sir" tiin a kawhna lamah chuan kan zui a, kawngkhar pakhat, rangkachak rawnga 'Caleb McKenzie' tih lo inziahna chu kan thleng a. A bangah rawng sen a hnawih a, chutah chuan lemziah, a duma ziah a intar thliah thliah a. Han luh pawhin a nuam bik khawp mai. Hetiang kher kher hi chu CEO office dangah hmuh tur a awm ngai lem lo.

A pindan chhungah chuan kan lut a, Armani suit a ha a, min hmuh veleh a thutna atangin a lo ding chhuak vata. "Lo leng rawh u Mr Cullen leh Mr Brown. Caleb McKenzie ka ni e" tiin nuisangin min lo lawm a, kan inchibai a.

A ep chiah chair-ah chuan kan thu dun a, "Presentation pawh kan nei thuai dawn nia" Mr Brown-a chuan a han ti a. Caleb-a chu a nui saka, a hmelah chuan a zam takzet a ni tih ka hre thei nghal mai. A presentation a tan meuh chuan ani pawh chu zawi zawiin a confi chho telh telh a.

A that viau rualin offer tha tak ni a ka hriat lem loh avangin hnawl mai ka tuma. Caleb-a chuan a lehkha chapdarh ho chu a han siam rem zung zung a, chutih lai chuan pawn lam atang kawngka an rawn kik karh karh a. Caleb-a chu a dak chhuak a, a hmel chu a nelawm nghal vek thei tih ka hmu. Mahse tunge rawn lut tih lo thlek ve chiam chu kan tih tur a ni ve lem lo.

"Sapphire, ka la buai hrilh emai" inthiamlo aw tak hian hian a ti a. Thil engkim chu a tha vek a, mahse aw ri ka hriat leh chiah chuan ka khawvel zawng zawng a inlet danglam vek ta.

"Ka tihpalh lutuk. Pawnah ka lo nghak mai ang che". Chu aw chu kum 6 liam ta khan ka hre tawh thin. Aw ri, engtikah mah a ka hriat nawn leh ka rin tawh ngai loh chu. Aw ri, ka lungphu zawng zawng ti danglam vek thei tu.

Aw lo chhuahna lamah Mr. Brown-a nen chuan kan hawi rual thawt a.

Amah ngei a ni. A hma aiin a hmeltha zawk a, a hrisel hmel daih zawk bawk. Tlemin a thau deuh tawha, chu chuan a ti lang duhawm mah zawk.

Ka mit ka la sawn thei thlawt lo. A mitmu uk kharh mai chuan min rawn en ve chiah bawka. Engkim mai chu an ding vek a ka hriat laiin a thutna atangin Mr. Brown-a a rawn ding chhuaka.

"Alison!" tiin lawm avangin a tap chhuak a, lawm avanga lo nuih ver ver ka tum a. Nghet taka a kuah laia a mit menga mak tihna ka hmuh meuh chuan ka lawmna a famkim ta lo. Min hre tawh lo a ang riau. A hmel chu mak tihnain a khat a, Caleb-a khan Sapphire tiin a ko tlat. Alison tih ni lovin.

"Min lo hrethiam la. Tunge Alison-i chu?" tiin ka hlauhthawnna nemnghettu tur zawhna a rawn zawt ta.

Mr. Brown-a chuan a kuahna kut a la thla a, chiang takin a en a. A tawng hmain ka lo tawng khalh a. "A fanu a nia, kum eng emaw zat kal ta khan a thi tawh a. Amah nen chuan in in ang lutuk a" ka lo ti a. Min rawn en vang vang a, Mr. Brown-a lam hawiin a nui seih a.

"A pawi ka tihpui khawp mai che. Mahse kei chu Alison-i ka ni lova" tiin a nui a. Mr. Brown-a pawh chu a nui a, a biangah a vawn saka. Chutia vawn sak ve chu ka chak takzet a nio, mahse tunah chuan ni lovin. Tunge a nih chiah tih hriatchhuah phawt ka duh. Alison-i nge Sapphire?

Mahse chhungril tak atang erawh chuan ka Alison-i ngei kha niin ka hria. A kal tak hnu chuan Caleb-a lam ka hawi a. Kan inremsiamna tur chu ka pawm ngei a ngai. Ka beisei ai a tha dawn tlat ta mai.

* Caleb's P.O.V *

A ngaihna hre lo tak chungin engkim mai chu ka lo thlir ve reng ringawt a. Chutiangin Mr Cullen leh Mr Brown-a te chanchin hi ka lo chik ngai lem lo va, a fanu a chan tawh tih thu chuan min thawng ve khawp mai. Ka lo hriat ve dan kha chuan fanu pakhat a nei a, chu chu Mr Cullen-a nupui hi a ni tih kha a ni si a.

Sapphire-i chu ka nuih sak a, a mizia nu hnap leh mahni hmasial lo tak hi a ni min hiptu em em thin chu. A eng pawh hian min hneh a ni tawp mai. A nuih dante, Raine leh Ryker-a a mangan pui dan te, hmangaih leh duat taka a thlir lai ka hmuhte hian chhan awm lovin ka lo nui leh ver ver thin.

Engtik lai mai pawh hian a apartment-ah ka va tlawh thin a, a chhan chu hlim taka min lo chhawn thin avang leh a thil siam thar tui tak takte min lo tem tir thin avangte a ni a, khawvela naupang duhawm ber pahnih a fate nen min infiampui bang lova, ka tan chuan an ni chu ka chhungte an ni.

"Nakinah kan inhmu mai dawn nia" a rawn tih chuan ka lo bu nghauh a, pindan atang chuan a chhuaka. Mr Brown-a pawh a rawmawl a a mittui hru chungin a thutna ngaiah a rawn thu leh a.

"A pawi ka ti khawp mai" tiin thupha ka lo chawi vata.

Mr Cullen-a chuan a lu a lo bu nghat a. "A ho lutuk. Tu maw a nih a?" tiin min han zawt satliah a.

"Sapphire-i, ka thiannu a nih kha" tiin ka chhang a. Thiannu tih chu ama duh dan a ni a, a duh dan a nih phawt chuan ka lungawi. A lu a bu nghat a. "Engtik atang a inhria nge in nih a?" tiin min zawt leha.

"Kum 6 kal ta khan" tiin ka chhang leh a, ani pawh chuan engmah min zawt chhunzawm tawh bik lo.

An pahnihin an thutna atang an ding chhuaka. "Ka lawmpui a che Mr. McKenzie, kan inremsiamna tur chu kan pawm e. Tha takin kan thawk ho dawn nia" Mr. Cullen-a chuan a ti a, min rawn chibai a. Sumdawnna lam thil ni lo a tawng a ang deuh riau a hriatna ka nei a.

"Ka lawm e" ka ti a, pindan atanga an chhuak lai chu ka thlir reng a.

END OF CHAPTER -5

  

Chapter -6

(Dine with The Cullens)

*Sapphire's POV*

Ka apartment a ka luh rualin Raine leh Ryker-a ka zawng nghal a, mahse an lo mu fel diam tawh hi a lo nia. "Min lo awm sak avangin ka lawm lutuk e aw Pi Smith" tiin kan thenawm nu, amah a awm, kum 50 bawr vel chu ka nuih saka.

"A ho lutuk. Mamawh i neih phawt chuan rawn sawi zel ang che" tiin ani pawh chuan min chhuah san a. Nu fel tak mai a ni a, mahse ni tlak tawh hnuah erawh nu fimkhur tak a ni thung. Zan rei tawha a in i kik a nih chuan baseball bat nen a rawn chhuak mai ang. Zan khat pawh a bat in Caleb-a lu-ah a hem lo chauh tawh. Khami tum nuihzathlak tak ka han ngaihtuah chhuak chu ka nui hak a.

"Mangtha aw bawihte" tiin Raine chalah ka fawp a, a puan sin lai chu ka sin that tir a, chutiang chiah chuan Ryker-a bulah pawh ka ti ve a. Ka chhuah hmain ka hawi let leh a, an pahnih chuan ka en vang vang a, chu mi zawhah light off in ka chhuah san a. Ka lu chu a na ut ut a, ka thluak thleng chuan a vit ngawng ngawng mai hian ka hria. Chutiang chiah chuan kar kal ta Caleb-a office atanga ka chhuah pawh khan ka awm tawh. Khami ni atang khan a chhan pawh hriat si loh hian ka lu chu a na fo mai a. Ka bek a nuai mawlh mawlh chungin choka lam ka pan a, nachhawkna ka ei a.

Chutih lai chuan kawngka inhawng ri ka hria a, Caleb-a a rawn lang hlawl mai. Zanin hi Inrinni zan a ni tih ka lo theihnghilh hman dawn alawm mawle. Inrinni zanah hi chuan Caleb-a a rawn riak ziah a, Chawlhni nilengin hun kan hmang ho thin.

"Hey..." zawi raihin ka lo ti a. A chahbi ken chu kawngkhar bula darthlalang bowl bulah chuan a daha, ka lam panin a rawn phei a. Ka bulah dingin ka chalah a raw fawp zeuh a, min rawn en in "I lu a na leh tawh a mi?" min ti a, ka bekah min rawn nuai saka. Aw tih nan ka lo bu nghat a.

"Thawhtan chawhnu dar 2 a in entir turin Dr. Reed-a hnenah lehkha ka thehlut tawh a nia" tih pahin living room a thutthleng awm lamah chuan min pawt phei a. A kawrchung phelhin a tie a pawt thawl a. "A ho lutuk Caleb. Doctor hmuh kher pawh a ngai chuang hleinem" ka lo tih saka.

Dr. Reed-a chu kum 6 kal ta, tawhsual ka tawh laia min enkawltu kha a ni. "Kum 5 zet luna i neih tawh loh hnuah tunah a rawn chhuak leh a, eng dang vang vak nge ni ang?" tih pahin Caleb-a chuan ka lu min hmeh saka. Ka dam sawng sawng theiin ka hria. Ka beng bulah rawn kun hniamin "Chu chu engvang nge tih ka hre chak a ni" a rawn ti sap a, a hmui chuan ka ber a rawn tawk thuak a.

"Mut a hun tawhin ka hria" rei vak lo hnuah chuan ka ti a, ka tho chhuak a. "A nih mangtha le" tiin ka biangah min rawn fawp a, a riahna thin mikhual pindan lam a pana.

Ka pindanah ka lut a, ka inbual fai zawh hnuin sweatpants ka ha a, khumah ka lawn a. Ka muhil rang khawp mai.

*** *** *** ***

Ka lu na tur ut ut chuan min kaitho a, thawhhlim atang a fuh lo tan dawn khawp mai. Mahse chutia han thawh takah chuan a na pawh tlem tlemin a zia chho ve telh telh a. Khum atang thoin ka intifai a, chawlhni a ni nangin khawiah mah vak chhuah ka tum hran lo. Ka fate nen apartment chhungah awmin kan inkawm anga, Disney movie te kan en mai mai anga, a duh a nih chuan Caleb-a pawh a lo tel ve thei ang.

Choka ka va luh chuan Vawksa ti kan rim leh artui kan rim a lo nam chem chem a, Caleb a'n eirawng a lo bawl mek a. Chutia eirawng an bawl surh surh chu hmuh a nuamin a inhmeh lohna lai tak chu a inhmehna lai tak a ni lawi si. Ka lam a rawn hawi a "Hei, tukthuan tur ka lo siam a" a rawn ti a.

"Nia ka hmu alawm" tiin ka lo chhanga. "Min en vung vung danah ka eisiam hi i ei chak chiang mai. Min ngaihsan hmel riau" min ti a, ka lo nui haka. Coffee no la chhuakin ka coffee in tur ka inthlit a.

"Naupang ho ka va kaitho ang e" ka ti a. "La mut tir rih rawh. Chawlhni a nih hi" tih pahin tray ah kan thil in tur chu a dah a, balcony lamah a chawi phei a. Chutah chuan dawhkan te leh chair pahnih a inchhawp sa a. Ka thutna tur chair min pawhchhuah saka, "Ka lawm e" ka lo ti a.

Caleb-a chuan thil eng emaw min zawh duh a nei a ni tih ka hre nghal mai. Mahse a sawi hmain a phone a rawn ri a. Ka maimitchhing a, thlasik intan tur thli vawt raih rawn thawh heuh heuh chu nuam ti takin ka lo dawng a. Hetiang a zing thlifim dawn hi nuam ka tiin min ti harh sawng sawng zel. Ka mit ka han men leh chuan bang ngheng a kut kuangkuah chungin nui vur vurin Caleb-a chuan min lo thlir reng a. A nui chhuak hak ri pawh chu ka hre thei. Ke lawngin marble chhuat chu a ran rap phei a, ka hmaah rawn dingin ka khabeah a rawn dawm a, min kuai daka. "Naupang pahnih tih lohah chuan nang hi khawvela ka thil hmuh tawh zinga duhawm ber i ni" ti a a sawi lai chuan chung ramhuai pahnihte chu rak teng tung chungin an rawn tlan phei a, Caleb-a chu an rawn bawh nghal luai luai a. A sawi duh ang pawh a sawi hman meuh lo.

Caleb-a chuan an pahnihin a infiam pui a, an hlim nui ri chu ka beng a rimawi ber a ni. "Aw le, in ha va nawt tawh rawh u" ti a hnawh darh pahin kan thil eina thleng ho chu thleng silna lamah ka seng phei a. "Tunge nachin khan rawn call che a?" tiin Caleb-a chu ka zawta.

"Mr. Cullen-a mawle. A chhungte nen a chawhlui kilpui atan min rawn sawma". Ka mit ka lo sana. "Enga ti maw?"

"Kan inzawmna thar tur hi lawm an duh a ni awm e".

"An chhungkua nen kher maw in ei dawn a?"

"Aw ni e, Nang pawh a sawm tel ve che a. Mr. Brown-a khan hmuh leh che a duh a ni awm e" Caleb a'n a tih chuan ka lo nui haka. Pa hmangaihna hi ka dawng ve reng em tih ka inhre lo va, engtin nge a awm tih pawh ka ngaihtuah thiam lo. Mahse Mr. Brown a'n a fanu ang a ngai a min rawn pan kha chuan pa hmangaihna awmzia tur chu ka tem thiam ruai ruaiin ka inhria. "Chutia min ngente chuan ka lo kal ve ang e. A nih leh engtin nge naupang ho hi ni ang?"

"Shophia-i kan ko ange" tih leh chhuah a rual.

Nilengin Disney movie kan en a, Chinese food te kan chah bawka. Ka hma darthlalangah chuan ka in en a. Kawr fual pawl duk, khup thleng ka ha a, pheikhawk sang dum bunin makeup pawh tlem a zawng ka hmang ve bawka. Ka sam chu ka tukhumah fel takin ka tawn a, ka bekah tlem ka ti tla bawka. Bengbeh dum ka beh a, chutih lai chuan kan nau min lo awm saktu tur Sopphia-i pawh a lo thleng ve chiah a.

Naupang nen a kan inthlah hnuin ka purse ka la a, in atang ka chhuak a. Caleb-a pawh pawnah a Car bulah a lo ding vang tawh a. Kan han inhmu dun chu kan nui chhuak haka. Ani pawh chuan kamis var leh tie dum a awrh bakah ka kawr rawng ang chiah kawrchung leh kekawr a lo ha ve chiah a. "Intiam rualte pawh kan va ang ve" ka ti a.

Caleb-a chuan ka thutna tur lam kawngka min hawn saka, thu lutin kawngtluan chuan eng em em kan sawi lo. Radio kan ngaithla dun ngar ngar mai. "Ka thleng e" Caleb a'n a tih chuan ka hawi chhuaka.

Kan hmaah chuan in nalh zet mai hi a lo ding luaha. A lianin a nalh khawp mai. Huat hring mawi zetin a hual a, a sirah chuan pool nuam hmel leh thianghlim zet hi a awm bawka. Chung hunahte chuan pangpar chi hrang hrang an chinga, thingkung te pawh chu awmze nei tak a chei vek an ni a. Chutiang in chu a lawm chenna atana ka awh em em thin ni. Hnim hring eng pawh mai chu tha taka tui a chawm vek an ni tih a hriat nghal mai.

"Nuam i ti em?" tih ri ka hriat chuan ka zuang lo chauh. Kan hmaah chuan suit dum ha in Ian Cullen-a chu a lo ding reng tawh a. Pa hmeltha tak a ni. A mitmu pawl raih mai chuan min rawn en a, chu mitmeng ka hmuh chuan engtin emaw tak hian awm a inhriatna ka nei deuh nangin eng nge a nih chiah tih erawh ka hrechhuak zo chuang lo. Eng emaw hi ka mitthlaah a rawn lang zuai a, na em em hian ka lu a rawn na zui nghala. Caleb-a chuan min lo chelh vata. "Sapphire, i tha em?" min lo ti vat a. "Aw tha e. Luna satliah mai mai a ni e" tiin ka nui lui a.

Ian-a chuan kan invuan lai chu mak tih hmel tak hian min lo thlir reng ringawta. "I nawm loh chuan duh leh program pawh kan cancel thei tho a nia" a rawn ti a. "A ngai hleinem. Ka tha lutuk alawm" tiin ka lo chhang a.

Inchhung lamah kan inzui lut a. "In in nei nuam hlemai" ka ti a. "Kan nu duh ang taka kan sak a nia" tih pahin min lo en a. "In nu chu thil mawi hre tak a nih dawn chu le" ka lo ti a, ka kawchhung atang hian min mawlh tu eng emaw tak awm hian ka hre leh thin.

"Ni e. Chu chu a nihna chiah a ni" tiin min rawn melh leh a. Eng a ti nge maw aawmze eng emaw riau nei ang tlat a thusawi a ka hriat zel mai ni.

"Sapphire" Mr. Brown a'n min rawn koh chuan nuisangin a lam ka hawi a, min rawn kuah a. "Ka hmu leh che chu ka lawm e. I chhelo hlemai" a ti a, ka lo sen deuh ap ap a.

Inchhung chu a zau nuam hle a, a bang chu theite rawng a ni a, satin la var a siam parda nalh deuh deuh an zar bawka. A lai takah chuan Chandelier lian zet mai a inkhai ruah a, bulb za chuang a awm ang. Chu chuan inchhung chu a chhun eng pup thei a. Furniture var nalh tak takte chuan inchhug chu a ti lang thianghlim sar a.

"Engkim hi a mawi em em vek a nih hi. I nupui chu hmuh ka chak hlemai" tih pahin Ian-a lam chu ka hawia. Eng emaw sawi tumin a ang zuau a, mahse hnung lam atang chuan hmeichhe aw hian a rawn tawng khalh a.

"Keimah hi a nupui chu ka nia

END OF CHAPTER -6

EXTRA -1

Kawngah a kal mek a, thli a thawt nasat avangin a jacket hak lai chu a pawt chip sawt a. A ke pen zawng a concrete chhuat ri thlerh thlerh chu chulai hmun a thawm hriat tur awm chhun a ni. A hma a hmeichhe ding a han hmu chiah chu a mit ngei pawh chu a ringhlel rum rum mai.

Chu hmeichhia coat ha chu kawmkar thim lamah a lut a, chulai kawm kar chu mi pakhat leng tawk vel chauh a zau a ni a, a thuiin a thim em em mai lehnghala. Chu hmeichhia chuan a mit a chhi kar reng a, fimkhur takin a kal a. A thim em avang chuan a awm a nuam lo kher mai. Chulai hmun chu thlarau sualte tawm buk ang maia nelawm loh a ni a, amah ngei pawh chu a tirilah a tim er er reng a.

Chu nu chuan a sana a en a, zing dar 1 kha an inhmuh hun tur a an tiam kha a ni a. Rei vak lo a nghah hnuah chuan a mi nghah pawh chu a rawn thleng ve thei ta hram a. "Enga tinge i va han rei em em ve?" tiin a lo vin nghal khur khur a.

"Veng tawp atanga rawn kal ka nih hi hre ta che. Mahni Car a chuanga duh lam lama tlan turin nang anga hausa ka ni ve hleinem" tiin a lo chhanga.

"Chutiang sawi a ngai lo" chu nu chuan a ti hmuk a. "Dar 1 a thlen tur ka tih chuan dar 1 a ni mai". A aw chu a nelawm loh viau nangin pakhat erawh a lo nui suk duh chauh a. Eng hmel pawh in put khum se a thim avangin an inhmu thei chuang lova.

"Engvanga min ko nge i nih reng reng a?" ani pawh chu a aw a nelawm vak tawh bik lo.

"Alison-i hi a la dam ni a hriatna ka nei a ni" chu nu chuan ten hmel tak hian a han ti a. "A chungchang eng pawh lo zawng chhuak turin ka duh che a ni" chu nu chuan thutak zet hian a ti a.

Pakhat zawk chu a nui chhuak haka. "Ani chu i hlau tihna em ni?"

Chu nu chuan a melh kawk a. "A chanchin eng pawh lo chhui ang che, Khang kum 6 chhung khan eng nge a tih a, engvanga Sapphire Kingsley tih hming rawn pu ta daih nge a nih tih leh a hriatna hi a hloh tak tak reng em tih hriat ka duh a ni. Chu thil chu kimchang taka hriat ka duh a ni"

"Mahse Nick-a leh Ian-a ten detective dang ruaiin case kha thar thawh leh an tum a ni awm e" pakhat zawk chuan a lo ti ve a.

"Chu chu alawm ka hlauhthawn ni. A tul a nih chuan a hma a kan tih ang bawk khan ani pawh chu kan dahtha ve leh hmak mai tur a ni" chu nu chuan a han ti a, a tawng danah tualthah hrehna reng a nei lo.

"A nih a eng chu nge i hlauhthawn ber ni a?" tiin pakhat chuan a zawt a.

"A chhan chu ani khan engkim a hriat vek vang a ni. Chuvang chu a nia a hriatna a hloh ngei em tih ka hriat duh" chu nu chuan a ti a. "A car kan tih chhiat lai khan chiang takin min hmu a ni. Alison-i hian amah thattu hi chiang takin a hria a ni"

Chapter -7

Ka inher a, hmeichhe hmeltha zet mai, ria zaih mai hi ka va hmu a, a mitmeng chu ngaihnobei tak hian a hriam kak a. A cher chi ah chuan hmeltha tak a ni. Nuisang hmelpu chunga ka en lai chuan ani erawh chuan ka keler atanga ka chhip thlengin min en tawn a, a hmelah chuan mak tihna leh tenna hmel ka hmu thei a. Eng nge a chungah thil tih ka nei tawh em ni le tiin ka ngaihtuah hial a.

"Hei hi thudik ngei chu a ni si. I lo let leh a ni tih hi" ti chungin a hmel ngai reng pu chung chuan min en reng a.

Kei lah chu ka lo meng a ruai a. "Ka..., chutiangin khawiah mah ka kal hleinem" ka aw ah chuan zawhna nei zawk hmel ka pu a ni. Ka lo lrt leh tak thu a sawi chu ka hrethiam hlawl lo. Tunge an nih ka hriat ngai loh mai bakah tun hi ka vawikhat hmuhna a ni. Ian-a leh Mr Brown-a te chuan min lo en haw ringawt a, a hnu deuhah an mahni zawk chu a nuichhuak hmasaah an rawn tanga. Ni e, a hming takngial pawh ka la hre hleinem.

"I hming pawh ka la hre lo" ka han ti zet a, ka tawng dan chu a zahawm loh lutuk angem aw tiin ka ngaihtuah leh nghal vata. Mi lian nupui a ni a, Pi ti tala sawi tur kan nih laiin a mi lo dawnsawn dan tehhrep chuan min ti tui lo lek lek tlat.

"Ashley...Cullen ka nia" a ti bah deuh nak nak a.

"Ashley" ka han tih chuan amah zawk chuan min lo pawtchat vata. "I tan chuan Pi Cullen ti a koh zawk tur ka ni ang" mi elhsen lek lek hian a han ti a. Ian-a chuan a hachang a lo thial deuh rap a, mahse a tawng chhuak lo. Midang lo awm ve ho pawh chuan an mitsir deuh thap a, a landanah a tu amah chuan an ngaina tehchiamin a lang lo.

"Ashley ti a ka kohna chhan che chu kei hian zah taka ka kohna chhan tur che ka hre tlat lo" nui sang chungin ka ti let ve ngat a. Inherin inchhung lamah ka pen lut a. Hnung lamah chuan a lungawi zan lo tih hre reng mah ila ka beng ka chhu ngawng lui ve tlat a. Nuisang chungin Caleb-a chu ka bulah a rawn kal a, lei pawh chuan ka lo nuih let ve a. Chutih lai chuan eng emaw hi ka su dawt a, ka han hawi chhuak chu Cafe a ka hmuh naupang Nathan-a kha a lo ni renga.

"Nathan" ti a nuisang chungin chhuatah chuan ka thu hniam a.

"Saph" ti chungin ani pawh chuan min rawn nuih let ve a. Fin hmel deuh hian a nui ver ver a, a hahmai pahnih bal chuan a ti lang duhawm lehzual a. A la tawng fiah chiah lo bawk nen.

Ka bul a lo ding ve Caleb-a lam chu a hawi a. "Hei hi Caleb-a a nih hi. Ka thian a nia" tiin ka lo inhmelhriat tir vata. Caleb-a pawh chu nuisang chungin a rawn kun hniam ve a.

"Thian chauh maw in nih?" a sawi zawng ringawt pawh chuan ka thin zu han phu dup dup thei a maw le. Mak ti hmel ka pu tih a hmuh chuan a nui chhuak hak hak a. "Thian tha a ka ngaih vang mai mai che a nia" a rawn ti ta reuh a.

"Ni e, thian tha tak kan nia lawm" tiin ka lo bu nghat a. Chutia kan inbiak mawlh mawlh chuan Nathan-a chuan ka hnung lamah eng emaw melh a nei tih ka hria a, a hmel chu hlauhthawnnain a khat nghala . Ka hawi let vata, Ashley i'n Nathana a lo en reng lai chu ka va hmu a.

"Ka mut a hun tawh a. Mangtha le" tih leh tlan a rual a. Han koh leh ka tum nangin a ke tereuhte hmang chuan a rang a rangin a lo pilbo chu niin. Ashley-i lam chu ka hawi phei a, ani pawh chuan min lo en ve reng a. Ian-a leh Mr, Brown-a te chuan eng emaw hi an hrilh mawlh mawlh a, chu pawh chu ngaithla awmin a awm lo.

Minute reilote kal ta, anni ka hmuh hma kha chuan mi huat hi ka neih ngai pawh ka hre lo. Thill engkim hian hmasak berna an nei theuh a, kei pawh Ashley hi ka mi huat hmasak ber a nih mai ka ring. Chutiang thil ka han hmuh takah chuan Cafe a Nathana ka hmuh hmasak ber tuma a a banrek vual rut mai kha ka hrechhuak zawk a. Ka rilru te te chuan Ashley-i hian a sawisa thin a nihte ka han ring deuh rum rum a. Chutiang chuan lo ti na selang cuan keimah hian a kut ka tan sak duh hial lo ang tih pawh ka sawi thei lo.

"Khatiang a i en chhung kha chuan ani pawh sawn a en ve char char reng mai ang che" ti a ka beng zawna Caleb-a a rawn phun sup rual chuan ka phu nasa lutuk chu ka zuang lo chauh a ni. "Kei pawh chu chu ka rin dan a ni" ka tih lai chuan Ian-a leh Mr. Brown-a te pawh an rawng lang ve leh chiah a. "In mi hriatthiamna ka rawn dil e" tiin Mr. Brown-a chuan thupha a rawn chawi saka.

"Chutiang a ngai lo ve" ka tih zawng chuan ka pum a rawn ri ruih ruih a. Ian-a leh Mr Brown-a te chu an nui chiam lehnghal. Ka zak lutuk chu ka lum pup pup a, ka hmai a rawn sen tawn tawn a. "Tu emaw chu a ril a tam tawh viau a ni ang maw" Ian-a chuan a rawn la ti kher lehnghal a.

"Khatiangin hmeichhia an fiam ngai lo" uang lek lek chung si hian Mr Brown-a chuan a lo ti a, mahse a mitmeng ukkharh kara uanthuanna awm chu ka hmuh hmaih chuang lo. "Marie, zanriah chu han siam la" tiin Ian-a chu a au lauh a.

Hmeichhe upa tawh lam, kum 50 rual vel hi a rawn kal a, kawr dum fual a ha a, apron var a hreng bawka. A mit chuan khawilai pawh mai chu uluk takin a vil emaw tih mai tur a ni. Dawhkan chu a siam fel zung zung a. A sam var siau mi chu fel fai takin samtawnna dumin a tawn a, a mitko chuar deuh tawh chuan a ti lang upa hret nangin nu hmeltha tak a ni a, a nulat lai phei chuan a to pawl tak a ni ang tih ka ring. Ka chaw thleng ka en a, kan hma a inchhawp ho pawh chu ka en a, ka ngainat em em te vek an ni. Engtin nge maw ka ngainat zawng hlir siamna chang an hriat chu le?

"Thil dik lo a awm em ni Sapphire?" tiin Ian-a chuan min rawn zawt a, mahse engtin mah ka chhang thei o. Midang zawng zawng pawh chuan chu zawhna tho chu an kawn a nih ka ring min en danah.

"Aih, engkim a tha vek alawm" ka ti a. Chhiahhlawh pitar chuan ka lam a rawn hawi a, a mitah mittui a tling a ni tih ka hmu thei a. Ka hrethiam lo takzet tawh. "Min lo hrethiam lawk rawh u" tih leh inchhung lama tlan luh a ruala.

Enga tinge engkim mai hi a mak a, ka rin ang loh vek a thil a thlen le?

Ian-a chu a lu ber thutnaah a thu a, a ding lamah kei, ka bul chiahah Caleb-a a thu ve bawka. Kan eitur ho chu nui ver ver chungin ka thlek kual a, tu emawin ka tan bik liau liau a a siam ang mai a tuihnai leh ei chakawm a ni.

Chutih rual erawh chuan ka rilruah zawhna a awm reng a. Eng vanga ka ei duh zawng hlir siam nge an nih? Enga tinge Ian-a khan an in chu a nupui duh dan ang taka sak a nih thu a sawi? Ashley-i kha chutiang anga duh thlang a thil han design vel chi ang hmel a pu bawk si lo. Chu ai zawng zawng chuan enga tinge tupawh mai chuan mak ti leh awih lo hmel tak veka min en le? Min hre tawh ang maiin alawm an mitmeng a awm hlawm ni. Kei erawh chuan vawikhatmah ka la hmu ngai lo tih hi 100% in ka chiang.

"A pawi ka ti khawp mai. Ka nupui a rawn tel ve thei dawn lova. A nuam sam vak lo va" Mr Brown-a chuan a rawn ti a, a thutna tur chair-ah chuan a rawn thu ve a. Rei vak lo hnuah AShley-i pawh a rawn chhuk ve a, Ian-a vei lamah a rawn thu a.

Zanriah pawh chu kan kil chho nghal mawp mawp a, kan fian leh fork inkhak ri tih loh chu kan vai mai chuan kan ngawi thap hlawma. Ashley-i chuan min rawn en zauh zauh reng a ni tih ka hre reng a, achang phei chuan kan mit a intawn fuh chang pawh a awm. Nuih letin ka thil ei lai chu ka chunzawm leh mai zela.

Desserts te kan ei zawh hnuah sitting room lamah kan thu lut a, an eisiam tui ka tih thute Ian-a bulah chuan ka sawi luam a. Lawm takin ani pawhin min lo dawngsawng a. "Naktukah hian ka chhungte leh thian thenkhatte nen kan thianpa nupui fa hmasa ber neih lawmna party kan nei dawn a, nangni pawh rawn tel ve ta che u" tiin Ian-a chuan min sawma. Ka lo phu deuh zawk a, chutiang angte chu chhungkaw thil a ni a, keini lo tel ve ngawtna chi pawh ni ta lo chuan. Ka fa neih lawmna kha ka hre chhuak zawka. Caleb-a leh a chhungte bak tumah midang an awm lo.

Caleb-a ka va en a, ani pawh keimah ang thoin a lo meng a ve hu a. "A tha alawm" tiin ka chhanga. Chutiang ang insawmna lawmawm leh hlute chu hnar ngawt chi ni pawhin ka hre lova, chubakah mi kan tam chuan naute than len nan zel a malsawm te kan ring deuh ngawt a.

Ian-a chuan lawmthu min hrilh zawkin a kalsawn a. Mr Brown-a chu kan hnung lamah a ding a, min rawn en zeuh zeuh thin tih ka hria. A mitmengah chuan helaia ka awm ve hi awihawm loh tihna riau nei tlatin ka hria a, enga tinge ni ang?

Kan in mangtha zawhin Caleb-a car lam kan pan a, ka chuang lut a. Kan tlan liam dawn thleng chuan side glass atang Ian a'n min thlir reng a ni tih ka va hmu thei a, a hmelah makt tihna leh hriatthiam harsa ti hmel a pu reng a, Cullens ho bula awm chu rilru bual atna mai mai a ni ti ten ka ngaihtuah phah hiala. Kut lum ther ther hian ka malah min rawn chul a, ka hawi phei a Caleb-a chuan ngaihthat loh hmel zet hian min lo en reng a. "Ka tha alawm" ka ti a.

Naktuk hi ka doctor hmuh hun tur a ni a, ka lu rawn na fo thin check tir turin. Engmah thil serious a awm loh hram ka beisei.

END OF CHAPTER -7

  

Chapter -8

(Visit to the Doctor)

"Bye naupangte u" tiin ka ban ka vai lawp lawp a, phur fahranin an school gate lam panin an tlan hlawp hlawp a. An rawn hawi let a, min rawn bye zuau a, an school lam panin an tlan chhunzawm lehnghala. Him taka school an thlen fel hnuah Caleb-a chuan cafe lamah min thlah leh a. "I buai thei si am hetia i tih ziah pawh hi a ngai lo an ia. Mahni puala car neih ve maite pawh ka rilruk ta deuh" tukverh a dak chungin ka ti a. A remti lo hmel chu hmuh kher ka chak hran lo a ni.

"I nunna derthawngah ka dah ang a maw? Chu zawng la thleng rih suh se" tiin ka ngenna chu- min uhnial usak uleh ta. Inherina lam ka hawi a. "Caleb, kum 6 lai a liam tawh hi. Tunah chuan engkimah ngai ka awh leh vek tawh a, mahni a car khalh tur pawhin ka tlak em em tawh ang. Hetiang ang te hi chuan nang pawh i hman reng tawh bik nang" tih pahin tukverhah ka dak leh daih a.

"Hman dawn. Ka hman reng bawk ang" a ti ram deuh hmurh a. Chu bak chu kan tawng chhunzawm tawh lo. Ngawi rengin Cafe kan thleng a, Car atang chuan ngawi rengin ka chhuak a, Cafe lam ka pan a.

Kumkhua a motor kkhalh ve inphal sak loh ngawt pawh chu thil dik ber niin ka hre lo. Accident leh hlauhnain ka khat reng bik lova, chubakah hriat pawh ka hre mumal tawh lo. Counter a bag dah pahin ka thaw hak a, vawiin zet chu hnathawh pawh ka phur lo. Coffee no dawm chungin dawr chhung chu ka thlir reng ringawt a.

"Saph!" naupang pakhat hian ka hmingin min rawn ko a. Aw rawn chhuahna lam chu ka hawi vat a, Nathan-a rawn lut chu nuisangin ka lo chhawn a. A ke tereuhte hmang chuan a rawn tlan ter ter a. "Heyy" tih pahin ka bul a rawn thleng veleh ka lo pawm kang lawp a. Ka bianga urawn fawp pahin good morning a rawn ti a, kei pawhin a tih ang chuan ka lo ti let ve a.

"Nangmahin em ni i lo kal a?" ka tih chuan "Ni lo ve. Ka rawn kal pui" tiin hnung lam atang mipakhatin min rawn chhang a. Ka hawi phei vata, Ian-a a lo ding reng a. A mit dumpawl nalh tak mai chu ka hmuh tawh hnu ni tlat a hriatna ka nei leh thin. Mahse khawiah nge ka hmuh tawh tih erawh ka hrechhuak zo tawh lo.

"Ian, Good morning" tiin nui hmel ka lo hmuh a. "Engti tia helaiahte rawn lang ve mial nge i nih a?"

"Nathan-a hi school a kal ve tan tawh dawn a, an school turah admission ka va tih pui e ka tia. Chuan in dawr ami chocolate brownies hi a ei chak deuh tlat a" tiin Nathana lam a melh a, ani chuan chocolate brownies ngawt a lo melh tawh a.

"Min lo nghak rawh u" tiin choka lam ka pan sana, Nathana ta tur chocolate brownies chu ka lak saka.

Let phei lehin ka chocolate brownies ken chu a plate in Nathan-a chu ka pe a, a lawm lutuk chu a kut a lo beng a, a ei nghal mawlh mawlh a. Nuisang chungin ka en reng a. Ian-a lam hawi lehin Ryker-a leh Raine te pawh school-ah chuan an luh ve thu hrilh ka tum a, mahse suit ha chung a a lo thu leh a khabe dawm chunga a mitmu pawl nalh tak mai a min lo en reng ka hmuh chuan ka lei chu tih khang ang maiin a awm a, eng thu mah ka sawi thei lo. Ka biang a rawn sa ap ap a, ka tum ngial pawhin khaw dang ka hawi sawn thei lo. Ka awm dan chu ka duh lo takzet.

Judy a rawn kal a, a rawn khuh kharh takah chuan ka hawi sawn vata. Ian-a pawh chu a hawi san vat a, keiin Judy lam ka hawi a. "Eng nge ni ta?" ka ti a.

"Lo kal lawk teh a" tiin choka lamah chuan min mitmei a. Bu nghat chungin ka tho chhuak a, a hma a birthday puala cake rawn order tu te tho kha an lo ni a. Tui an ti khawp am an thiante tan cake dang order leh an lo tum mek hi a lo nia. "Aw le Sir. Cake chu kan lo peih thuai dawn nia" ka tih hnu chuan lungawi takin a man tur min pe advance a, a kal chhuak lehnghal mai a. "Hna kan thawh vat vat a ngai" tiin choka lamah chuan ka lut tlang nghala.

Ka apron ka hreng a, cake chhawng thum a sang siam tur chuan ka inpuahchah nghal a. A buaipui a hautakin ka uluk bawk a, ka zawh meuh chuan khua pawh a tlaai ta kuar mai. Dawr lamah ka va chhuak leh a, Nathan-a te pafa chu an thutna hmun ngai rengah an lo la awm reng chu niin. Nathan-a chuan a lehkhabu a lo chhiar leh a, Ian-a erawh a laptop bihin a lo tul khawp a.

"Ehe...! In lo la awm reng a ni maw?" ka tih chuan Ian-a chu a rawn hawichuak a, a lu a bu nghata. "Ka Car midangin an hmang lawka, ka driver in a rawn let pui leh veleh kan kal thei ang. Pawi i tih loh ka beisei"

"Ti lo ve le" ti a nuisang chungin an thutna bulah chuan thuthmun ka rem ve a. "A nih leh Sapphire, i chanchin tlem a zawng min han hrilh teh" tiin Ian-a chuan a laptop a khup am a kut kuangkuahin a mitmeng fin hmel tak chuan hriat chak takin min en reng a.

"A zawng zawng chuan ka sawi thei lo va, a chhan chu a chanve hmawk chu theihngilh a ni tawh a" tiin zam ru takin ka kut chu ka han chul kual te te a. Ian-a chuan ka kut chu a rawn en a, ka hriat ve loh eng emaw hriat nei ni awm tak hian a nui suk a. "I hriatna i hloh tawh em ni?" ti a min zawh chuan ka lo bu nghata.

"Ka tan chuan ka hringnun chu kum 6 kal ta a damdawiin a Caleb-a ka hmuh atang chiah khan a intan ve chiah a. A sawi dan chuan Car-ah na takin ka accident a, Car a puah hmain min rawn pawtchhuak a ni awm e" ti a ka sawi lai chuan kha ni a ka chanchin min hrilh lai, ni rapthlak tak kha ka mitthlaah a rawn lang uai uai a.

Ian-a mitmeng chu a vawt ta raih a, thinrimnain a khat a ni tih ka hre thei a. A khabe kual chu a che ralh ralh a, a kut pawh a hum ruh kher mai. 'Eng vangin nge maw a thinrim tak ngawt mai le?' ti a ka inzawh lai chuan Judy i'n min rawn ko leh a, ka thil ngaihtuah mek pawh chu chawplehchilhin a tawp nghala.

Ka leh hawi vata, ka piah a patling, dawhthei taka a order lo nghak reng tu chu hmel hlim sang pu chungin ka nuih a. "Min lo hrethiam lawk dawn nia" Nathan-a leh Ian-a hnena ka tih zawh chuan ka ding a, chu pa lam chu ka pan phei a. "Chibai ka pu. I order kha kan peih fel tawh e aw. I tem chhin duh em?" ka tih chuan min rawn en vang vang a. "A tha ngawt ang chu" tiin min chhanga.

Ka nuih saka, a tem chhin tur a ka dah hran chu ka laksak a, a ei lai leh tui ti taka a chhing duar duar lai chu rilru hlim veng veng chungin ka lo thlir reng a. Lungawi takin a cake tur a box a kan dah chu ka pe a, a man pekna lamah phei puiin hlim hmel tak pu chungin a man pawh chu an inpe fela. "Ni nuam tak hmang ang che ka pu" tiin kan invai liam a, kei pawh ka hna ngai lamah ka let leh a.

"Tu pawh mai hi zah tak hian i lo treat thei vek zel mai a" aw rawn chhuahna lamah chuan ka hawi vata, counter ah chuan a kut nghatin a khabe a lo dawm a, Caleb-a chu a lo ding reng a. Ka nui haka. "Tirawh, doctor hmuh kan ngaih kha. I kal vat teh ang" a rawn tih takah chuan ka apron ka phelh a, ka purse lain Judy chu ka mangtha pah nghala.

Ian-a leh Nathan-a pawh an lo awm tawh lo. Caleb-a car awmna lam kan pan dun a, tunah chuan Doctor in eng thu nge a sawi dawn tih chiah nghah a ngai ta.

Rei vak lovah Dr Reed-a office pawh chu kan va thleng thuai a, damlo thutnaah chuan min koh hun nghakin kan thu ve rana.

"Pi Kingsley" ti a min rawn koh chuan ka magazine chhiar lai chu dahin ka hawi chhuaka. "Dr Reed-a chu in hmu thei tawh e" min rawn tih chuan kan ding chhuak vat a, Caleb-a nen chuan kan inzui lut nghala. Dr Reed-a hmaah chuan thuin kan in check-up na report chu kan hmuh a. "Eng nge a an?" tiin Caleb-a chuan a zawt vata.

"Engah mah hlauhthawnna tur a awm lo ve. Lu na satliah ve mai a nih kha. A rawn nat leh hun apiangin hemi damdawi hi i lo ei thin dawn nia" tiin lehkha min pe a. Kan chuah dawn chuan Dr chuan Caleb-a chu la awm rih turin a ti a, kei erawh min chhuah tir a. Caleb-a a rawn chhuah leh chuan hlauhthawn hmel zet hian ka lo en a. "Caleb...?" ka lo ti vata.

"I kal ang" a ti ringawt a, ka banah min vuanin a car awmna lam min pan pui a.

"Caleb, eng thil dik lo nge awm a?" ka tih pawh chuan ka zawhna chu hria ang pawhin a awm lo. Zawt eng ang mah ila min chhan a tum lo. Ngawi rengin ka apartment awmna thleng min thlah a. A thusawi chu a ngaihna ka hre lo hlemai.

"Nau lawmna party-ah chuan kan kal thei lovang"

END OF CHAPTER -8

  

Chapter -9

(The Baby Shower)

"Naktuk rawn thleng se la, ka Car tur chu ka lei ve dawn khawp mai" taxi in a min tlan pelh sup sup lai chuan ka rilru te tein ka ti mawlh mawlh a. Darkar khat zet Taxi nghakin kawngsirah ka ding tawh. A ruaka rawn tlan pakhatmah an awm lo va, an rawn full zel mai bawk si. Thli a thawt reng avangin la tirilah ka khur der der a, keimah leh keimah ka inbawm tlata. Kawrlum hak chu sawi loh, kawr ban bul leh pawnfen chhing ka la feng zui bawk si.

Caleb-a khan nau lawmna a kal ve a phal lo nangin kal lui turin ka insiam ta tho a. Kawr purple, pangpar dum lem chuang ka ha a, ka inchei dan chu a naupang chhia angreng khawp nangin Ryker a'n ti hian ka nalh ber min tih sak miau si a, engvangin nge maw ka hak loh tehlul ang ni. Chutih lai chuan chak mangkhengin car a rawn tlan a, ka hmaah tak a rawn ding chawt a.

"Caleb? Ka lungphu i ti tawp dawn alawm mawle" ti a ka awm dawm chungin ka thaw halh halh a. "Rawn lut rawh" chu zawng chu a rawn sawi a.

Engmah sawi nawi lovin ka thu lut ve mai a. Ka luh vat loh chuan vawt tiin ka tlu mai ang tih pawh a hlauhawm tawh alawm le. Ka lut chiah chu a lo lum vung vung a, nuam tak hi a ni ringawt. Ka bulah chuan pakhatin motor a khalh mawlh mawlh a, eng thil mah a sawi lo.

"Rawn kal i tum ve lo emaw ka tia" tih pahin tukverhah ka dah san daih a. "Ka hrechiang che alawm Sapphire. Kal suh ti eng ang mah ila i kal lui dawn tho tih hi" a rawn tih chuan ngei hmel deuh hian ka va melh a.

"Chu, i thusawi pawh eng a tan maha ngai lo angah min chhuah i tum a ni maw?"

"Ni chiah e" tiin min rawn en a, kawng lam en lehin ka hriat ve tham loh hian a phun sep a. Ang huau chunga en pahin a banah ka va chum tawk a. "I rilru a te lutuk" ka ti a, thinrim tak chungin ka inkuangkuah hmak a. Caleb-a erawh a rawn nui chhuak hak hak a. "Eng nge ka rilru a tet na? Nang hi chu i luhlul ve hrim hrim a, eng ang driver nge maw ka lo nih reng reng ni, mahni boss te khawlai khawvawt hnuaia taxi chang te a ka lo dah rng reng ni?" a rawn ti zuah zuah a. Ka insum zo lo, ka nui chhuak hawk hawk a.

Kawng tluan chuan eng em em sawi lovin kan ngawi deuh reng a, Caleb-a chu engvanga kal remti lo nge a nih tih zawh ka duh viau nangin a chhanna erawh ka hre chak em em hran chuang lo. Ka thinlungin eng nge a sawi tih ka ngaithla a, chu chu ka zui zel zawk rih chu a nih hi.

An apartment kawtah chuan Caleb-a chu a ding a, mikhuate tana motor dahna tur bika an siam a a dah reng zawh chuan Car atang chuan ka chhuaka. Ka hma a apartment lian tak mai chu enin ka dak vauh vauh a. A bangah chuan rawng var vek an hnawih a, tukverh tin mai chuan balcony nalh tak a nei veka. Caleb-a a rawn phei ve takah chuan a hnungah zuiin inchhung lamah kan inzui lut a. A chhng lam chu pawn lam aiin a nalh leh zual zawka. Linght engin bangte chu an lo kap eng chiai a, rawngkachak rawng a hnawih elevator ah chuan kan inzui lut a, chu pawh chu a bang darthlalang vek a ni a.

A chhung chu ,i 40 leng vel zet hi a ni ang. Inchung ber (penthouse) lam kan pan chho a, kan ep lamah chuan elevator tho pahnih ka va hmu a, a danglam bik na chu an ni chuanna chu silver rawng a ni thung a. "Private elevator a ni maw kan chuanna hi?" tiin a chhanna tur hre sa tho mah ila Caleb-a chu ka va zawt leh deuh kher a. "Aw" tih ringawtin min chhanga. A phone a khawia, a tul khawp mai. Building chu a sang tha bawk a, a chhawng chung ber thleng tur pawhin hun a duh ve viau mai.

"Khawiah nge Ryker-a leh Raine te?" tiin Caleb-a chuan min zawt a. "Anni chu naktuk school kal an ngai sia, kan thenawmnu Pi Smith-i bulah ka riah tir mai" tiin ka chhanga.

Penthouse chu kan thleng ta. Zam rukna riau hi ka nei a, ka hmul thi ding ur ur chu Caleb-a pawh chuan a hre thei hial ang. Inchhung mawi taka an chei lamah chuan kan lut phei a, an chei nalhin engkim mai chu rawng pawl leh vat theme vek a chei a ni a.

Ka beisei ai erawh chuan mi kan tlem. "Sapphire" ka hmeichhe aw hriat than takin a min rawn koh chuan ka hnung lam ka hawi vata. Hmeichhe sambuang a ni a, a nalh khawp mai. A sam chu awmze nei takin a zial a, nui var var chungin min rawn kuah chawt a. "Um...,Hi" ka lo ti ve ringawt a. Kuah pangai piah mai lamah min kuah bet deuh ngawr ngawr a. Rei tawk fang min kuah hunah a kut chu la thlain "Emily ka nia" a rawn ti a, a nui hmek chu a chuai deuh rawih a. Chutia a mood a inthlak deuh tehthut chu mak ka ti hlemai. A huat zawngin ka awm emawni ka inti hman hial.

"Chibai le, Sapphire-i ka nia. Ka hming chu i lo hre sa tawhin ka hria" ka han ti a. "Hei hi Caleb-a a nih hi" tiin ka hnung a dik, uluk deuh a thil lo en mek chu ka han kawk a. "In lo kal chu ka lawm hlemai" tiin Caleb-a pawh chu a va chibai ve a.

"Mr Brown-a khan rawn kal ve turin min sawm a, kan rawn kal ve a nih hi" ka ti leh a. Mr Brown-a leh Ashley-i te pawh an rawn thleng chawpchilh ve a, rei lote kan inbiak zawk hnuah Emily chuan dawhkan pakhat, an thilpek hrang hrang an dahkawmna lamah chuan min phei pui a. "I dam tha em?" tiin min zawt a.

A ngaihna hre lo angreng tak chungin ka nui lui a. "Aw tha e. Tinge chutiangte min zawh tehdaih a?"

"A chhan chu kum tam tak hnuah ka hmu leh chauh che a, ka-" thil eng emaw hriatchhuah thut nei ni awm tak hian a thusawi lai chu a tawp chawt a. "Kum tam tak hnuah a?" ka lo ti vata. Ka nui hmel a bo a, a ngaihna hriat lohnain ka khat nghala.

"Chibai le. Drake ka nia, Emily pasal" tiin a pasal a rawn lang a, min rawn chibaia. Caleb-a nen chuan inhmelhriat tirna kan lo nei ve nghal vata. "In lo kal hi kan lawm khawp a nia" tiin tha takin min lo lawm a. Ka rilruah erawh Emily thusawi kha a cham tlat thung a. Kum tam tak hnuah a tih awmzia khan zawk chian ka chak takzet a ni. Kei chuan ka la hmuh awm ka hre lo nangin ani khan accident ka tawh hmain min lo hre tawh a ni mai lawng maw?

Tawng chhuak rih lo turin ka ka ka chip lui tlat a, a chhan pawh mipa pahnih an awm ve avangin. "Ka ril a tam emai. Eng emaw eitur min han lak teh" Emily i'n a tih chuan "Nichin lawkah pawh thil i ei tawh kha" tiin Drake-a chuan a lo chhanga. "Ei ka thei i tihna em ni? Ngeni a ka thau min tih na?" lungawi lo angreng tak hian Emily chuan a han ti kha kha a. Caleb-a nen chuan kan inen a, nuihza si, nui hreh deuh siin kan nui tat tat a.

Thu ho te te kan sawina lamah ka fate chungchang pawh ka sawi tel ve a. Chuveleh an nupa chuan an hmel a danglam nghal vek a. "Fa, fa in nei tawh a maw?" tiin Emily chuan min zawt nghal vat a.

"Aw, Ryker-a leh Raine te an nia"

"In pahnih a in fa hi em ni?" Drake-a chuan a nupui chu a darah a kuah a, hnem tum ni awm tak hian a chul pah a. "Aw ni e" ka hnug lam atang chuan Caleb a'n a rawn chhang a. Mak ti zetin hnung lam ka hawi vat a, ani erawh chuan confi takin nui hmel a lo pu sang thung a.

"Enga tinge chumi chungchangah chuan thil dik lo a awm em ni?" tiin an pahnih chuan ka zawt a. "A..awm hran lo ve" tiin Drake-a zawk chuan min lo chhang vata. "Eitur te kha lo ei bawrh bawrh ru aw. Chawhlui kil pawh kan ti har tawh lovang" tiin a nupui nen chuan an kal sawn daih a.

A ngaihna ka hre lo thin khawp mai. Serthlum tui no khat la in tlem ka lem a, chutih lai tak chuan thleng thar an awm tih hriat takin elevator chu a rawn ri ral a. Mipa sambuang pahnih an rawn chhuak a, pakhat chu a hlim hmelin Emily nen khan an inang hle a, phir an nih hial ka ring. Pakhat zawk pawh chu a phurin a hlim hmel sar sar khawp mai. Han en mai pawhin mi hausa tak a ni tih a hmel atang ringawt pawhin a hriat theih a, mahse ngeiawm hmelna riau hi a pu thung a.

Hmun dang hawi sawnin lawmpuina thilpek an pek khawm an dahna lam chu ka hawi phei a, present pawh a awm nual tawh. Chutih lai chuan ka darah tu emaw hian min rawn khawih zeuh a, chuveleh hnung lam ka hawi vat a, ka hnungah chuan Ian-a a lo ding reng a, a bulah chuan nachin a ngeiawm hmel deuh ka tih tlangval kha a lo ding bawka. "Sapphire, hei hi Aiden a nih hi. Aiden, hei hi Sapphire" tiin nuisang chungin Ian-a chuan min han inhmelhriat tir a. Chu pa chuan min rawn en a,chuveleh a thawklehkhatah a hmel awm dan zawng zawng chu a rawn danglam nghal veka.

END OF CHAPTER -9

 

Chapter -10

(The Phone Call)

*Ian's POV*

A hmel a mawiin a nalh takzet. Kawr purple ha chunga a vai thauh thauh ka hmuh phei chuan ka mit ka la sawn thei hlawl lo. Tleirawl ang maiin alawm le a la nalh le. Mr Brown-a chuan kan client thenkhatte a lo be mek a, chumi thilah chuan kei pawh ka hawisawn ve zawk a, ka va hawi let leh chuan a kawngah mipakhat hian a lo vuan a. Chuveleh thiknain ka khat a, ka kut ka hum ruh nghala. Mahse a kuahtu kut a paihthlak sak lai ka han hmuh leh takah chuan ka kut pawh chu thlah dul lehngha; vatin nui hmel ka pu leh thei hrama.

"Engkim a tha vek em?" Mr Brown a'n a rawn tih takah chuan Alison-i ka enna mit chu la thlain a lam ka hawi vata. "Aw.." a zawhna ber pawh hrechiang chuang lo chhuan kan ti ve ringawt a. "Min lo hrethiam lawk mai" tiin midang ho zing atang chuan ka kal sawn a, kan piah deuh hlek a mini-bar, tu vakmah awm lohna lam chu ka pan a. Chuta tang chuan chiang taka ka thlir theih dawn vang a ni.

Stool-ah chuan thuin ka in tur Whiskey ka inthlit a, tlem ka lem zauh a, ka thil thlir lai bawk chu ka thlir chhunzawm leh a. Ka Alison-i kha. Hming dang pu tawh mahse amah a ni tih ka hai lo. Ka Alison-i ngei kha a ni.

Ka hmuh lohna kha kum 6 zet a lo ni ta. A thlalak mawi taka siamin ka dawhkan bulah ka dah reng thin a, chu chu ka hmuh theihna awmchhun a ni.

Ka naupan lai kha ka hrechhuak uai uai mai. Ka toys ngainat em em mai ka ti bo a, mahse naupang dangte anga tap a nuar chiam chi erawh ka ni lo. A chhan chu ka tah chuan ka nu in nuam lo a ti thin a, chu chu a thlen fo ka duh lo a ni. Zanah ka mutnaah ka nu chu a rawn kal a, 'A pawi hleinem, toys dang ka khalh mai dawn alawm' tiin ka lo chhang a. Khami tuma ka nu thusawi kha ka thinlungah a la cham reng thin. "Ka thil duhtak te chauh hi alawm kan chan thin" tiin. A awmzia ka hriatthiam loh avangin ka zawta.

Ka nu chuan ka sam min chul saka. "I birthday a in school ami i thianpain a pek che teddybear pawh i tih bo daih tawh kha. Hriat pawh i hre hleinem. A chhan chu i khalh ngai mang tlat lo alawm" tiin ka nu chuan a hnung atang ka toys tih bo chu a rawn phawrh chhuak a, lawm takin ka la a, ka pawm vawng vawnga. A sawi awmzia pawh kha ka hrechiang ta viau mai.

Khami ni a ka kal tir kha ka nuna ka thiltih sual lian ber a ni tih ka hria. Chuvangin engtikah mah a thleng nawn leh tawh lovang. Alison-i ka kokir leh thei tawh lo tih inhre mah ila.

"Ka hria alawm" ka hnung lam atanga mipakhatin a rawn tih chuan ka harhchuak zawka. Rang takin ka mittui chu ka hru hul vata. "Engtin nge i hriat a?" ka ti a, ka no chu ka dawm lehnghal a.

"Sapphire-i tun hma hun hii hria tih ka hria a ni" ti a a rawn sawi chuan ka khawng lo chauh. Mak ti takin a lam ka hawi a, ka awm dan avang chuan a nui haka. "Engtin nge chu chu ka hriat tih i ngaihtuah a ni tiraw? A chhanna chu Sapphire-i doctor kha a ni. Kum 6 chhung zet khatiang anga lu na kha a nei ngai lova, doctor hnenah ka hruai a. Ani chuan a lu nat chhan chu thil eng emaw, a hun kal tawh a mi a tawn leh vang a ni tiin min hrilh a. Nangmah i rawn lan atang chiah hian a ni tiang hian a awm ni. Mr Brown-a awm dan mak tak avangte leh i vawikhat hmuhna atanga a duh zawng leh duh loh zawng i hre nghal thei kha mak ka lo ti reng a ni"

Engmah sawi zawm lovin ka hawi sawn a, ka no dawm lai chu ka in leha. "Amah vang hi a ni tiraw ka share pawh kha min lei sak nachhan?" tiin min rawn zawt leh a. Engkim a hre vek tawh. Dawt a han phat mawina lehchuan tur pawh ka nei lo.

"Aw, amah vang saw a ni" ti a chhang chungin mahni inringtawk tak hmelpu in ka en let a. "Helai hmuna ka awmna chhan hi amah vang saw a ni a, engtikniah emaw chuan ka la nei let leh em em ang" ti a ka sawi zo chu a hmel awm dan a rawn inthlak danglam dawrh a.

"Ka lak atang hian engtikah mah min chhuhsak ngai lovang" sehchilh zet hian a rawn ti a.

"I theih phawt chuan min dan i tum dawn nia" tiin ka lo chhang let vata.

*Sapphire's POV*

"Hi" tiin ka hma a ding vun buang, sam buang bawk chu ka en a. Ani erawh mithi tho leh hmu ang maiin a meng phawk a. "Imm..." min chhan mai tak si lovah chuan a ngaihna hrelo angreng takin Ian-a ka va melh a.

"Alison" ka hma a ding Aiden-a, a hma lawka Ian an a min inhmelhriattir chuan min rawn ti a. A thusawi ngei chu amah pawh chuan a ring lo tih ka hria.

Ka dar ka lo chhin a. "Min lo hrethiam la ka hming chu Sapphire a nia, Alison ni lovin. A thu hrimin tunge Alison-i chu ni a?" tiin ka lu na rawn intham tan mek chu ka dawm a. "Heyy.., muangchangin le" Caleb a'n a rawn tiri chu ka hria a, ka darah min rawn kuaha. "Muangchangin thaw rawh le" tih pahin thutthleng dupah min thut tira. "I haw ang aw" a tih chuan ka lu ka lo thing a. "Ka tha alawm. A tawp thlengin kan awm ve ang chu le" tiin ka chhang tlata.

"In tur ka va lak ang che aw" a tih lai chuan "Hei hi in rawh" tiin Ian-a chuan serthlum tui no in min rawn pe a. La in ka in a, ka nuam sawng sawngin ka hria. Midang ho pawh chuan ngaihven takin min rawn en thup hlawm a.

Caleb-a chuan ka awmdan chu hrethiam takin ka tukhumah a rawn nuaia. "Tunah chuan a zia tawh e" a tih takah chuan midang ho chu a kalsawn leh mai a, Ian-a erawh a dinna ngaiah chuan ala ding reng a.Chutia in chul mawlh mawlh chu a zialo deuh a ka hriat avangin Caleb-a kut pawh chu ka lakthlak saka.

"Haw mai in duh a nih pawhin kan hrethiam lutuk che u ania" tiin ka mitah tak min rawn en a. "A ngai lo ve Mr Cullen. Ka tha lutuk tawh alawm" ti a ka chhan chuan a lu a lo bu nghata min kal san a. Caleb-a hmel erawh a hmuhnawm tehchiam lo. A hma kha chuan lehkhabu inhawng sa ang mai hi a nia, a engkim hi ka hre vek zel. Mahse Mr Culen-a a rawn lan atang erawh hi chuan a danglam tlat. A bik takin ka chungah.

"Ka tihpalh" ka ti sapa. "Ka tih mangan che avangin". Caleb-a chu a nui haka, ka khabeah rawn dawmin min kuai daka. "Saph. Engmah inthlahrunna tur a awm lo. I bulah ka awm alawm" tih pahin min rawn kuah a, kei pawh chuan ka lo kuah let ve vata.

Aw thian kharh ri kan hriat chuan rang takin kan inthlah nghala. "Ka lo tihbuai che u avangin a pawi ka ti lutuk mahse tu emaw hmuh duh ka nei a" Mr Brown-a chuan a rawn ti a, a hnungah chuan hmeichhe pahnih an dinga. Pakhat chu Ashley-i kha a ni a, pakhat zawk erawh a hmel ang deuh hlek niin Ashley ai chuan a upa daih zawk ang. Min han hmu chu a meng phar awn a, mahse ka nuih sak takah chuan hmel pangai a rawn pu leh a.

"Sapphire-i maw! I chanchin kan lo hre nual " tiin min rawn kuah a. A kut cher tak chuan ka biang tawn tawnah a rawn vuana. "I hmeltha lutuk" min rawn ti a. Ka lo nui suk ringawt a. Kan titi luam hnuin anni pawh chuan min kalsan veleh a.

Caleb-a pawh sumdawnna chungchangah midang nena an inbiak avangin juice inchungin kei mah chauhin ka lo thu a.

"Hey?" aw rawn chhuahna lam chu ka hawi a, inthlahrun hmel angreng deuh hian Aiden-a a lo ding reng a. "Ka lo thu ve thei angem?" tih pahin ka bulah a rawn thu a. Min rawn en leh thin a. "Nachin a ka awmdan avang khan min lo hrethiam hram a ni ang chu"

"A ho lutuk. Keimah zawk kha alawm. A thuhrimah tunge Alison-i chu ni reng reng a?" tiin ka nui haka. "Midang pawh hian chutiang chuan min ko leh nawlh zel. Kan in ang viau aniang" ka han ti a. "Ian-a khan a sawi thuak a, ani chu Mr Brown-a fanu hi a nia, kan inang ve viau a ni ang"

Min chhan hmain min han nuih ver ver phawt a. "Aw ni e Mr Brown-a fanu hi a nia. Tu pawh mai hian kan ngaina a, a chhan chu mi zawng zawng ngaihnat theih tur nungchang a pu tlat bika" tiin min chhanga.

Nui sak chungin midang nena inbe mek Ian-a chu ka va en a. "Anih leh Ian-a leh chu nu chuan eng inzawmna nge an neih a?" tiin ka zawt leh a. In zawh awm a nih leh nih loh erawh ka chiang chiah bik lo. Aiden-a chu a ngawi vang vanga. "Chu zawng, a chhangtu tur dik tak ka ni lovang tih ka hlauh zawng tak a ni. Mahse ka tan chuan ka unaunu ang chiah a ni" tiin a ding hluai a. "Kan inhmu leh dawn nia" tiin min kalsan a.

An awmdan leh an thil sawi dan zawng zawngte chuan danglam na riau nei hian a hria a, eng nge a nih tak erawh ka zuk hre pha chiah chuang lo. Juice in a ka thut veng veng lai chuan ka phone a rawn ri a.

Ka phone chu ka en a, kan thenawmnu Pi Smith-i a ni tlat mai. Rang takin ka la vata.

"Eng nge ni ta Pi Smith?". A thu rawn sawi erawh ka beisei loh lam daih a ni. Mangang leh hlauthawng takin Caleb-a lamah ka tlan phei a.

"Eng nge ni ta?" tiin hlauhthawn hmel takin min rawn en a. "Raine, tunah damdawiin an pan pui mek" ka sawi zawng chuan ka mittui a rawn tling nghal pum a.

END OF CHAPTER -10